1-2. Ethu baani nnafunihu osuza muwari mwa yohudhera ela?

IYO NIRI omagomihedho wa mudhidhi wokuthula wa elabo yela nnakalihu. Vano nihikanna ebaribari wi niri omakuthulo opitha malabo amundduli. Movanene Yehova vamodha ni mwaye Yesu enere wagujhula anamathonga atene ehinakavihera Omwene wa Mulugu. Mbwenye yeyo ehinathi wereya, mwene oonorti ni mwene oosul enere odidela owana wula eharaharaga nlogo na Mulugu.

² Muwari mwa yohudhera ela, nnere osuza yovuhulela eri va Daniel 11:40–12:1. Nnere omunona mwene oonorti a peeno, teto, nnere woona makalelo ooliba murima naari njhehega makathamiho enadha osogolo.

3-4. Peeno mwene oonorti baani? Kawogamo.

³ Yaka ya 1991, União Soviética nuumala opwaramwasuwa, adhari a Mulugu yakala elabo yele enlubale, yahakela “vang’ono nikavihero”, obe, yahivahiwa ofuru mudhidhene. (Dan. 11:34) Mabasa oolaleya kiyawadelihiwa, mwaha wa yeyo nuuvira mwana mudhidhi, anamalaleya amurudda yole yahakwana matxikwi ni matxikwi. Mbwenye elabo yo Rússia ni dhilabo dhiniwananiyena, dhowunnuwa vang’ono-vang’ono ofiyedha okala mwene oonorti. Ninga nonilihu muwari mwa yohudhera ya mundduli, wihina mwene akale namathonga oonorti obe oosul enohoweleya erena dhego tharu: (1) Aharahare nlogo na Mulugu, (2) eerihedhe ethu enoniha wi oliye mwiddani a Yehova vamodha ni nlogo naye, (3) erena mapoka ni mwene ahinavahana nuuliye.

⁴ Peeno mwene oonorti si elabo yo Rusiya ni dhilabo dhiniwananiyena. Kasugwa mwahaya bwaddi nigasoriha ndo. (1) Aliwa enowaharahara adhari a Mulugu, mwaha wowawadeliha  mabasa oolaleya, teto, enowaharahara nubure matxikwi ni matxikwi aadhari a Yehova enakala murudda dhinathongiwa naaliwa. (2) Oharahara wewa winowoniha wi enoomwidda Yehova vamodha ni nlogo naye. (3) Aliwa enompokiha mwene oosul a Potência Mundial Anglo-Americana. Vano kabeni noone dhego anerana Rusiya vamodha ni dhilabo dhiniwananiyena ni makaleloya enoniha wi aliwa amwene oonorti.

5. Yovuhulela ya Daniel 11:40-43, enatonya mudhidhi baani, ki mudhidhi oyo enaapadduwege ddi?

⁵ Omwileri Daniel 11:40-43. Epaddi ela ya yovuhulela, enowoniha mudhidhi watene wokuthula. Madhu ala, enowoniha widdana orivo wodhela mwene oonorti ni mwene oosul. Ninga munawogela namavuhulela Daniyeli, mudhidhi wokuthula, mwene oosul anere werana mapoka ni mwene oonorti ‘wodhela othikana’ obe “owana.” — Dan. 11:40; nota.

6. Ethu baani enoniha wi mwene oonorti ni mwene oosul enoothikanave?

⁶ Mwene oonorti ni mwene oosul enoopokihanave, wihina yande osugwera elabo. Motajhiha, nuuvira koddo yanabili ya elabo yatene, União Soviética vamodha ni dhilabo dhiniwananiyena, binathonga murudda dhowinjhiva dho Europa. Mwaha wa yeyo, mwene oosul ohandana ni dhilabo dhimodha ni ohatugumanya atoropa wihina awane ni mwene oonorti oneriwa OTAN (Organização do Tratado do Atlântico Norte). Mwene oonorti ni mwene oosul, enolabihedha dhoreela dhewa wihina yerena mapoka mmodha ni mikwaye wodhela osasanya futi dhinddimuwa dhowanihana koddo. Malabo mamodha, mwene oonorti onowakavihera amwiddani enawana ni mwene oosul, teto, mwene oosul onowerana emodhave ni mwene oonorti ninga dhereye mwafrika, Aziya ni Ameika Latina. Yaka dhivirile ovanene, Rusiya vamodha ni dhilabo dhiniwananiyena, ehimala ovolowana obure wewa dhilabo dhimodha. Aliwa ehifiyedha otatamula koddo enawanihiwa ni enteneti eneriwa cibernética ni mwene oosul. Amwene ala, enowinkedhana wi onna olabihedha porogarama dhamukomputadorini wihina enoonge dhoreela ni pulitika dha elabo yaga. Ninga awogele namavuhulela Daniyeli, mwene oonorti annave oharahara nlogo na Mulugu. — Dan. 11:41.

7. ‘Elabo Yothithimihiwa’ enatapulela ddi?

⁷ Daniel 11:41 anawoga wi mwene oonorti onovolowa ‘mwilaboni.’ Elabo eyo enatapulela ddi? Kale, madhu ala yatapulela elabo yo Ezarayeli. Ezarayeli ‘yaali elabo yoriya ohiyana ni dhilabo dhatedhene.’ (Eze. 20:6) Elabo ele yaali yoriya vanlubale, mwaha wi waali mburo wowebedha weebaribari. Mbwenye obajha o pentekoste 33 M.W., ‘elabo’ ela kahiyo mburo mmodha baahi. Mwaha wi nlogo na Yehova nnoofwanyeya mburo dhoohiyana-iyana. Ki peeno, ‘Elabo yothithimihiwa’ enatapulela ddi? Peeno madhu ala, enatapulela nikuru na Yehova. Nikuru nna, nnakala ninga elabo winakala adhari a Mulugu owiwanana wula eparaga mabasa aatene enaharana ni webedha weebaribari.

8. Mwene oonorti avolowile elabo ‘yothithimihiwa’ ni makalelo baani?

⁸ Mudhidhi wokuthula, dila dhowinjhivadhene mwene oonorti ohuvolowa elabo ‘yothithimihiwa.’ Motajhiha, Alemanha nazista agaari mwene oonorti, thabwathabwa mudhidhi ewaniwaga koddo yanabili ya elabo  yatene, oliye ahivolowa elabo ‘yothithimihiwa’ mwaha wowaharahara ni waapa athu owinjhiva a nlogo na Mulugu. União Soviética, nuukala mwene oonorti, oliye ahivolowa elabo ‘yothithimihiwa’ mwaha oharahara nlogo na Mulugu ni owavolosiha addibila mukambura.

9. Yaka dhivirile ovanene, Rússia ni dhilabo dhiniwananiyena, evolowile elabo ‘yothithimihiwa’ ni makalelo baani?

⁹ Yaka dhivirile ovanene, Rússia ni dhilabo dhiniwanana nuuliye, dhihivolowa elabo ‘yothithimihiwa.’ Ki ni makalelo baani? Yaka ya 2017, Rússia ni dhilabo dhiniwananiyena ohuwadeliha mabasa enapariwa ni nlogo na Yehova ni ohovokera mukambura addibila ni arogola owinjhiva. Teto, ohuwadeliha malivuru ehu vamodha ni Bibliya Tradução do Novo Mundo. Ohiya eyo, ohunaakiha Beteli yo Rússia, nyumba dhowinjhiva dhomwene ni dha musonkano. Dhendho nuumala opadduwa, yaka ya 2018 Nikuru Nolamulela nihifiyedha woona wi elabo yo Rússia ni dhilabo dhiniwananiyena di mwene oonorti. Naarive eharahariwaga nuubure, adhari a Yehova kinawidda anamathonga newene kinasayela makalelo oosaddula mubuwelo wewa. Ohiya eyo, adhari a Mulugu enohara yolaga ya mBibliyani enasoriha wi mwalobelelege ‘atene yale enna mutholo dhathima’, thabwathabwa yasakula ethu enavolowela ofuru wehu wowebedha. — 1 Tim. 2:1, 2.

10. Mwene oonorti anere ommariha mwene oosul? Kawogamo.

¹⁰ Yovuhulela enafwanyeya va Daniel 11:40-45, enothabwa owoga wodhela dhowera dha mwene oonorti. Ki vano, mwene oonorti anere ommariha mwene oosul? Naari. Mwene oosul anere ‘okalawove’ ofiyedha koddo ya Armajedo wafiya mudhidhi Yehova ni Yesu, anamariheye onamathonga watene waathu. (Apo. 19:20) Mwahaya bwaddi nihanganyedhaga yeyo? Osugwe dhinasoriha dhovuhulela dha Daniel ni Apocalipse.

11. Daniel 2:43-45 anoniha ddi? (Osugwe fotu ya vakapani.)

¹¹ Omwileri Daniel 2:43-45. Namavuhulela Daniyeli onosoriha ekwamuthu yunlubale enna epaddi ya mwiili yohiyana, yubiwe ni mujhila dhohiyana-iyana. Kadda epaddi ya ekwamuthu, enatapulela onamathonga wohiyana wa mwilaboni, ohunavahana ni nlogo na Mulugu, onathonga mudhidhi wohiyana-iyana. Manyalo a ekwamuthu yubiwe ni mujhila vamodha nuulogo, enatapulela onamathonga wogomihera waathu onithaniwa Potência Mundial Anglo-Americana. Yovuhulela ya Daniyeli enasoriha wi onamathonga wula, winere okalawove ofiyedha mudhidhi Omwene wa Mulugu onamarihewa onamathonga waatene waathu.

12. Musolo wanetanu nabili wa mwanenyama owopiha baani, ki vano, mwahaya bwaddi edhe ekalege yathima onona muselu ola?

¹² Murumiwi Juwawu, ohusoriha wodhela onamathonga ori mwilaboni wihinavahana ni nlogo na Yehova. Yovuhulela ya Juwawu, onamathonga wula winoliganihiwa ni mwanenyama owopiha anna musolo mitanu nabili. Musolo wanetanu nabili wa mwanenyama owopiha, onithaniwa Potência Mundial Anglo-Americana. Onona muselu ola sathima, mwaha musolo ola wagwaddiwa, kudha okumelela musolo mmodha. Musolo wanetanu nabili wa mwanenyama ola owopiha, onerege mathongave ofiyedha mudhidhi anadha Kiristu ni atoropa aye oodhulu wihina emwiipe mwanenyama ola owopiha ni musolodhayedha. *— Apo. 13:1, 2; 17:13, 14.

13-14. ‘Googwe a elabo ya Magogwe’, baani ki enamuthukulele ddi orijha nlogo na Mulugu?

¹³ Yovuhulela ya Ezequiel enonivaha monelo wodhela enampadduwele mwene oonorti ni mwene oosul ehinathi otolosiwa. Enakala ninga dholebela ya Ezequiel 38:10-23; Daniel 2:43-45; 11:44–12:1 ni Apocalipse 16:13-16, 21 dhinasoriha dhego dhimodhave. Monelo ola akala fwebaribari, kasugwa dhego nnoonihu wi dhinere wereya.

¹⁴ Ohoseya winlubale wabajha, wavira mudhidhi vang’ono, ‘amwene a elabo yavati’ enere otugumanya nikuru na malogo. (Apo. 16:13, 14; 19:19) Otugumanyiwa wula wa malogo, Bibliya anithana ‘Googwe a elabo ya Magogwe.’ (Eze. 38:2) Googwe anere orijha nlogo na Mulugu wihina atolose natene. Enamuthukulele ddi ofiyedha orijha? Juwawu ohonihiwa ni Mulugu wodhela mudhidhi yoyo wa thalako yaathu. Juwawu ahawona mabwe manlubale oonyemela amararala, yamothelaga amwiddani a Mulugu. Mabwe ala a maralala podi wera muthenga wotoriha onalaleyiwe ni nlogo na Yehova. Podi wera yeyo sinamuthukulele Googwe a elabo ya Magogwe orijha nlogo na Mulugu wihina atolose. — Apo. 16:21.

15-16. a) Daniel 11:44, 45, anasoriha yopadduwa baani? b) Ethu baani enaapadduwe ni mwene oonorti vamodha naale enakosa epaddi ya nikuru na Googwe a elabo ya Magogwe?

¹⁵ Muthenga ola wonyemela ni orijha wogomihera enerena amwiddani a Mulugu, enakala ninga dhinoligana ni dhopadduwa dhili va Daniel 11:44, 45. (Omwileri.) Vala, Daniel onosoriha wi ‘muthenga dhinakumelele o leste ni o norti’ dhanfwanya mwene oonorti, anere othuwathuwa. Vasogolova, oliye ‘anere ovenya oonyanyuweene’ wihina ‘awipe owinjhiva.’ Podi wera madhu ala owi ‘owinjhiva’ enawagana adhari a Mulugu. * Podi wera Daniel anagana orijhiwa wogomihera wa nlogo naatene na Mulugu.

¹⁶ Orijha anerena mwene oonorti nnikavihero naanamathoga amodha amwilaboni, winere omutatamula Mulugu a kopolo dhatedhene wihina awanihe koddo ya Armajedo. (Apo. 16:14, 16) Mudhidhi yoyo, mwene oonorti,  vamodha ni malogo matene enakosa epaddi ya nikuru na Googwe a elabo ya Magogwe, enere ofiya omakuthulo ni ‘kavo anadha amukavihera’ mwene oonorti. — Dan. 11:45.

17. ‘Namasogolela munlubale’ Migeli, anawogiwa va Daniel 12:1 baani, Ki oliye anerana ddi?

¹⁷ Versu enaharela enasoriha yovuhulela ya Daniel, enowoga pamadhene makalelo mwene oonorti ni ale eniwanana nuuliye enaafiyiwa omakuthulo. Ohiya eyeneve, enosoriha makalelo iyo nnaavuluwihu. (Omwileri Daniel 12:1.) Versu ela enatapulela ddi? Migeli thi ndina nimodha na mwene ehu, Yesu Kiristu. Oliye ari ‘owimeleene epaddi’ ya nlogo na Mulugu obajha yaka ya 1914 yaka ebanjheye olamula Omwene waaye odhulu. Movanene yatatamuliwa koddo ya Armajedo, Migeli ‘anere ovenya’, obe, anere watolosa amwiddani aye atene. Koddo ela enaakale yopadduwa yogomihera. Mudhidhi yoyo, Daniel anithana ‘mudhidhi munlubale wosegedheya’ wa thalako yaathu. Yovuhulela ya Juwawu eri va Apocalipse, mudhidhi onaathukulele otatamuliwa koddo ela, anithana ‘mahoso manlubale.’ — Apo. 6:2; 7:14.

18. Mwahaya bwaddi iyo nihovaga osogolo?

¹⁸ Kannahowela woova osogolo. Mwaha Daniyeli ni Juwawu, onororomeliha wi ohoseya winlubale wafiya, ale enamwebedha Yehova vamodha ni Yesu enere ovulusiwa. Daniyeli onosoriha wi aatene yale enaavulusiwe, mandina ewa enere ‘olebiwa mulivuruni.’ (Dan. 12:1) Ki vano, neere ddi wihina mandina ehu elebiwe livuru nenno? Enohoweleya woniha wi ebaribarene nnomuroromela Yesu — nimbila na Mulugu. (João 1:29) Enohoweleya wipeleka wa Mulugu ni obaddiziwa. (1 Ped. 3:21) Sofuneya woniha wi nnokavihera Omwene wa Mulugu wodhela wasuziha amodha muthenga dha Yehova.

19. Enahoweleya ddi werana ovanene, ki mwahaya bwaddi?

¹⁹ Ola mudhidhi womuroromela Yehova vamodha nnikuru naye naadhari oororomeleya. Mudhidhi buyola wokavihera Omwene wa Mulugu, nerana ndo, wafiya mudhidhi waaye wommariha mwene oonorti ni mwene oosul nnere ovuluwa.