1. Yesu awogile ddi wodhela dhorela dhodhulu?

KAHIYO dhoorela dhatedhene dhinoneya. Mwebaribarene, dhoorela dhathima kadhinoneya. Mwaha wa vathaddo awogile Yesu vamwangoni, oliye ohuwoga wi dhoorela dha odhulu sathima opitha dhokanna. Oliye ohenjhedha egi: ‘Venvo vinaakale dhorela dhawo, murima wawo onere okala venvo.’(Mat. 6:19-21) Iyo nathimbiza ethu ofiyedha woona ninga yathima, murima wehu onere onithukulela osayela ethu yeyo. Ki vano, muthu anasayela ni makalelo baani ‘dhoreela dhodhulu’? Iyo podi wugela dhorela odhulu nakosa ndina napama, obe nakanna ekalelo yapama vamentoni va Mulugu. Yesu ohuwoga wi dhorela dhodhulu kadhinagujhuliwa newene kadhiniyiwa.

2. a) Yokongomedha anivahile Pawulo va 2 Coríntios 4:17, 18 sivi? b) Muwari mwa yohudhera ela nnaasuze ddi?

² Murumiwi Pawulo ononikongomedha wi ‘mentwihu ekaleve yelee ni dhithu dhohoneya.’ (Omwileri 2 Coríntios 4:17, 18.) Dhorela dhohoneya dhinatapulela dhithu dhatedhene dhapama dhinaanivahe Mulugu mwilaboni exa. Mbwenye mudhidhi yola nnakalihu dhihikalawo dhorela dhohoneya.Yohudhera ela, nnere osoriha dhorela naayi dhohoneya: Wandana ni Mulugu, nlobelo, muzimu wotxena ni okavihera wa Yehova wodhela Yesu, angero nakala mmalaleyelo. Neera ndo, nnere osuza makalelo ootamalela mwaha wa dhorela ndha dhohoneya.

3. Yoreela yohoneya yathima sivi, ki vano, mwahaya bwaddi edhe yaandeyege?

³ Yoreela yohoneya yathima fuwandana ni Yehova Mulugu. (Sal. 25:14) Ki vano, dhinandeya addi Mulugu wandana naathu oothega ofiyedha oliye okalagave ootxena? Eyo enandeya  mwaha mukutho erilena Yesu. Mukutho wa Yesu ‘onovenyihavo dhoothega dha mwilaboni.’ (João 1:29) Yehova ahinona wi efunelo yaye yomuruma muthu wihina aavuluse athu amwilaboni, yere wandeya. Bumwahaya adhe andanege naathu yariwo mudhidhi Yesu ahinathi okwa. — Rom. 3:25.

4. Kawoge athu yandanne ni Mulugu mudhidhi Yesu ahinathi odha elabo yavati.

⁴ Wawubuwele athu amodha amudhidhi yole Kiristu ahinathi odha elabo yavati yaandile okanna wandana ni Mulugu. Abaraawu aari muthu aanna nroromelo nooliba. Nuuvira yaka 1 000 Abaraawu nuumala okwa, Yehova ahiwoga wi Abaraawu di ‘mukwaga.’ (Isa. 41:8) Eyo enowoniha wi okwa kunawedha ommwalaniha Yehova naakwaye. Mmubuweloni mwa Mulugu, Abarawu ohukalawove. (Luc. 20:37, 38) Yotajhiha emodha sa Jo. Labo nimodha angero egatugumane odhulu, Yehova ahiwoga mohanganyedha wodhela Jo. Yehova ahifiyedha owoga wi ‘oliye di muthu oororomeleya ni owogowa, anamova Mulugu ni anasukuma dhithu dhatedhene dhabure.’ (Jó 1:6-8) Ehikalawo yotajhiha emodha ya Daniyeli. Dhahivira yaka 80 oliye akalaga mwilaboni naathu yahamwebedha Yehova. Naari dhigarive ndo, oliye aari muthu oororomeleya vamentoni va Mulugu. Bumwahaya angero edhe ewogege dila tharu wodhela mwanakalaba Daniyeli wi oliye di muthu ‘athima vanlubale’ vamentoni va Mulugu. (Dan. 9:23; 10:11, 19) Mohanganyedha, Yehova onoojheha ni Murima watene wihina ofiye mudhidhi aavenyihe muukwani akwaye aatene. — Jó 14:15.

5. Enahoweleya ddi werana wihina nikanne wandana wapama ni Yehova?

⁵ Peeno athu angasi oohilogomana enna wandana wapama ni Yehova? Matxikwi ni matxikwi. Eyo nnonne mwaha wapela elabo yatene, alobwana, ahiyana ni ahima enowoniha ni dhowera dhewa wihina enofuna wandana ni Mulugu. Yehova ‘ohukanna wandana wapama ni athu oororomeleya.’ (Pro. 3:32) Wandana wula winowandeya mwaha wa nroromelo enniwana wodhela mukutho erilena Yesu. Mwaha wa nroromelo nna, Yehova ni makalelo apama, onowenya wi niipeleke wa oliye ofiyedha obaddiziwa. Nerana thalo ela yathima, nnerere witaganyihedha ni makiristawu matxikwi ni matxikwi yipelekile ni ebaddiziwa, enahagalala mwaha okanna ‘wandana wapama’ ni muthu athima a elabo yatene!

6. Nnoonihe ni makalelo baani wi nnotamalela wandana ninnihuna ni Mulugu?

⁶ Nnonihe ni makalelo baani wi nnotamalela wandana ninnihuna ni Mulugu? Ninga Abaraawu ni Jo, yaamuroromele Mulugu okwaranya yaka 100, enohoweleya iyo nikale oororomeleya — naarive nimulabelaga Yehova mudhidhi wowinjhivene elabo ela yabure. Enohoweleya omutajhiha Daniyeli. Wandana ni Yehova yaari ethu yathima mwigumini mwaye. (Dan. 6:7, 10, 16, 22) Nnikavihero na Yehova, iyo podi ovilela nafwanyiwa dhoweha ni okannave wandana ni nuuliye. — Fil. 4:13.

7. a) Ninga munawogela Provérbios 15:8, Yehova onona avi wodhela malobelo ehu? b) Yehova anaakula ni makalelo baani malobelo ehu?

⁷ Yoreela emodha yohoneya thi nlobelo. Athu enna wandana wapama enodhiveliwa othapanya wodhela mubuwelo wewa ni efunelo yewa. Ki eyo enopadduwa ni iyo ninna wandana ni Mulugu? Hee enopadduwa! Amulabihedhaga Bibliya, Yehova onowoniha mubuwelo ni efunelo yaye. Naalobelaga, iyo podi owoga nuuliye wodhela mubuwelo ni efunelo yehu yavati vamurima. Yehova onohagalala vanlubale iwaga malobelo ehu. (Omwileri Provérbios 15:8.) Oliye kanowavuruwana baahi malobelo ehu, mbwenye onowawakula.  Malabo mamodha, oliye onowawakula mowaguva. Malabo mamodha enohoweleya nilobelegeve wodhela ethu nnalobihu. Naarive dhigari ndo, iyo podi okanna ebaribari wi, nlobelo nehu nnere wakuliwa ni makalelo apama. Ebaribarene sowi, yowakula ya Mulugu podi ohiyana ni ele nnajheherihu. Motajhiha, ohiya ovenyihavo yoweha enanifwanya, oliye podi onivaha thotho ‘wihina nakwanihe.’ — 1 Cor. 10:13.

8. Nnonihe ni makalelo baani wi nnotamalela nvaho wa nlobelo?

⁸ Nlobelo nvaho ohunaliviwa korowa. Ki nnonihe ni makalelo baani wi nnotamalela nvaho ola? Ekalelo emodha fulabihedha yolaga ananivaha Yehova enawoga wi: ‘Mudidele olobela.’ (1 Tes. 5:17) Yehova kananiwaddihedha olobela. Oliye onoriha yosakula yehu ni ononikongomedha egi: ‘Muvilelege ni nlobelo.’ (Rom. 12:12) Mowindala, iyo podi woniha otamalela naalobelaga dila dhowinjhivadhene. Kannaalobele baahi nilobaga dhego, mbwenye sofuneya omutamalela ni omuthithimiha Yehova mwaha wa dhowera dhaye dhatedhene.— Sal. 145:2, 3.

9. Ddibila mmodha anonamo aavi wodhela malobelo, Ki we ononamo avi?

⁹ Wavira mudhidhi nimulabelaga Yehova, nnere owedha onona makalelo Yehova anawakuliye malobelo ehu. Eyo enere onithukulela otamalela ni murima wehu watene nvaho ola wa nlobelo. Osugwe yotajhiha ya Chris, ddibila anna yaka 47 mmabasani amudhidhi wamutene. Oliye ohusoriha egi: “Ethu ginadhiveliwimi fusayela mudhidhi mambesi, wihina gilobele wa Yehova githapanyaga nuuliye sowaguva. Eyo enogithukulela ofuna omutamalela oliye mwaha wa dhatedhene anagivahiye, gihiddiwale nvaho wa nlobelo. Vano gaalobela mahiyu, ginakala apamene ni ginogona ni mubuwelo wapama.”

10. Mwahaya bwaddi muzimu wotxena odhe okalege yoreela?

¹⁰ Yoreela emodha yohoneya bumuzimu wotxena wa Mulugu.Yesu ononikongomedha olobela  malabo matene nilobaga muzimu ola. (Luc. 11:9, 13) Yehova anolabihedha muzimu waaye wihina anivahe kopolo — podi okala ‘Kopolo dhohikala dha masika.’ (2 Cor. 4:7; Atos 1:8) Nnikavihero na muzimu wa Mulugu, nnere okala oolibene, naarive nifwanyiwaga dhoweha dhohiyana-iyana.

11. Muzimu wotxena onanikavihera avi?

¹¹ Muzimu wotxena podi onikavihera naafunaga wakwaniha yothomeliwa mmabasani a Mulugu. Podi wakwaneliha ndhe nnandihu werana. Mowindala, iyo naanda werana dhithu mmabasani a Mulugu, sofuneya wubuwela wi kahiyo kopolo dhehu, mbwenye muzimu wotxena bunikavihere.

12. Ninga munawogela Salmo 139:23, 24, mwahaya bwaddi nigalobaga nikavihero na muzimu wotxena?

¹² Ehikalawo makalelo mamodha owoniha wi nnovaha thima muzimu wotxena. Iyo podi olobela wa Mulugu nimulobaga wi anikavihere woona mubuwelo obe efunelo yabure mmurimani mwehu. (Omwileri Salmo 139:23, 24.) Vano namala olobela, noona wi nihikanna mubuwelo obe efunelo yabure, enohoweleya olobela dila bili nilobaga muzimu wotxena wa Mulugu wi onivahe kopolo wihina nikale ooliba. Ni makalelo yala, nnere woniha wi nnofuna werana dhatedhene wihina naakele nikavihero na muzimu wotxena. — Efé. 4:30.

13. Ethu baani enaanikavihere otamalela vanlubale muzimu wotxena?

¹³ Iyo nubuwela dhatedhene dhinerana muzimu wotxena peeno, nnere otamalela vanlubale. Yesu ahinathi odhowa odhulu, oliye ahiwoga ni anamahara aye, wera: ‘Muzimu wotxena wumorelani, munere wakela kopolo ni munere okala anamona aaga o Jeruzale, o Judeya watene ni o Samariya, ofiyedha wengo wigomele elabo.’ (Atos 1:8) Siyeyo enapadduwa peeno. Nnikavihero na muzimu wotxena, peeno mwilaboni mwihikala athu owakwana 8,5 milhões enamwebedha Yehova. Ohiya eyo, muzimu wotxena ononivaha ‘dhowima’ dhaye — dhikalelo dhapama: Ohagalala, murenddele, opama, owoma murima, nroromelo, opwaaseya ni ohaguva onyanyuwa. (Gál. 5:22,  23) Mwaha wa yeyo, nnowanda okala owiwanana naamwebedhaga Yehova. Mohanganyedha, muzimu wotxena nvaho wathima!

14. Nikavihero baani nohoneya ninnihuna wodhela mabasa oolaleya?

¹⁴ ‘Olaba’ ni Yehova, Yesu vamodha ni angero siyoreela yohoneya. (2 Cor. 6:1) Ki nnalaba ni makalelo baani? Naakaviheraga mabasa oowakosa anamahara. Murumiwi Pawulo owoga wodhela oliyeene ni athu amodha enalaleya muthenga dhapama, wera: ‘Iyo nnalaba vamodha ni Mulugu.’ (1 Cor. 3:9) Ohiya eyo, olaleya winotonyihedha wi iyo nnalaba vamodha ni Yesu. Oliye ohusoriha wi: ‘Dhowani mwaahudhihe athu a malogo amatene’, voharela Yesu wenjhedhedha wera: ‘Miyo giri ni nyu.’ (Mat. 28:19, 20) Ki vano, nnalaba ni angero ni makalelo baani? Nathukula ‘muthenga dhapama wi naalaleye ale enakala velaboni ya vati’, angero enonikavihera. Eyo sapama, kunoonelamo? — Apo. 14:6.

15. Owoge yotajhiha modha ya mBibliyani enoniha wi Yehova ohukanna paddi yaye yathima wodhela mabasa oolaleya!

¹⁵ Nnikavihero nnavahiwihu ni Yehova, Yesu vamodha ni angero, nnowapara mabasa ehu wodhela muthenga Dhomwene. Thanga dhinadhalihu dhimodha dhinamorela mmurimani mweebaribari dhinowunnuwa. (Mat. 13:18, 23) Baani aneriha wi thanga dhebaribari dhunnuwe ni dhivahege dhowima? Yesu ohuwoga wi kaavo anakala namahara wula ‘ababa ehimwiitanne.’ (João 6:44) Bibliya anovaha yotajhiha ya muselu yoyo. Labo nimodha, Pawulo ahilaleya nikuru nahiyana ode wa luwani yo Filipos. Osugwe dhinasoriha Bibliya wodhela muhiyana mmodha anithaniwa Lidiya aari vari vanikuru nne alaleya Pawulo: ‘Yehova onfugula murima waaye wihina avuruwane dhatedhene awoga Pawulo.’ (At. 16:13-15) Ninga empadduwele Lidiya, matxikwi ni matxikwi aathu eehudhera ebaribari mwaha Yehova dawithane.

16. Baani anafwanelela othithimihiwa wodhela mareeliho nnawakelihu mmalaleyelo?

¹⁶ Baani anerana wi nikanne mareeliho mmalaleyelo? Pawulo ohakula nikoho nna nuuleba wodhela mulogo wakudda Korinto: ‘Miyo waala, Apolo weeka manjhe, mbwenye Mulugu dunnuwiha, mwaha muthu anaala newene aneeka manjhe kahiyo ethu, mbwenye Mulugu, dinunnuwiha.’ (1 Cor. 3:6, 7) Ninga Pawulo, naafwanya mareeliho mmalaleyelo, enohoweleya omuthithimiha Yehova.

17. Nnere ddi wihina nonihe wi nnotamalela ‘olaba’ ni Mulugu, Kiristu vamodha ni angero?

¹⁷ Nnonihe addi wi nnotamalela ‘olaba’ ni Mulugu, Kiristu vamodha ni angero? Nnere woniha wi nnotamalela, nilibiheraga mmalaleyelo malabo matene ni osayela mudhidhi wothapanya naathu wodhela muthenga dhapama. Ehikalawo makalelo owinjhiva owerana ndo: Olaleya ‘vaari vaathu, ni olaleya nyumba ni nyumba.’ (At. 20:20) Addibila owinjhiva enodhiveliwa olaleya wogumanyedha. Yanfwanya muthu mmalaleyelo, enomulojhela ni makalelo apama ni enosayela makalelo oothapanya nuliye. Muthuya aakula pama, aliwa enosayela makalelo oothapanya nuliye muthenga dhapama.

18-19. a) Enahoweleya nere ddi wihina neeke manjhe thanga dhebaribari? b) Kawogamo yopadduwa yamwigumini ya namahudhera a Bibliya makalelo Yehova amukaviheriye!

¹⁸ ‘Iyo nnalaba vamodha ni Mulugu’, nihikanna epaddi ya thima. Ohiya waalave baahi thanga dhebaribari, enohoweleya weka manjhe. Muthu ooniha wi ohudhiveliwa ele nithapanyedhihu nuliye, enohoweleya niilibihere wi nimwaredhele dila bili. Akala kannanda omwaredhela dila bili, enohoweleya nimulobe ddibila  obe murogola wihina amwaredhele. Efunelo yehu ekale omuhudhera Bibliya nuliye. Naasuzaga nuuliye, nnere ohagalala namona Yehova afugulaga murima waaye wihina osogolo akale namahara.

¹⁹ Osugwe yotajhiha ya Raphalalani, namuugu anakala elabo yo África do Sul. Oliye nuwambela omuhudhera Bibliya, ahibajha odhiveliwa dhatedhene ahudhereye. Vano oliye oohudhera ele enawoga madhu a Mulugu wodhela othapanya naanokwa. (Deut. 18:10-12) Omambelelo, yomurusa orumedha ebaribari ela. Mbwenye, vang’ono vang’ono, Raphalalani weenya wi Mulugu asaddule mubuwelo waaye. Nuumala, oliye ohiya mabasa ale oonamugu, naarive egari mabasa yanvaha mwinnyu vaade. Peeno, Raphalalani anna yaka 60, oliye ohusoriha egi: “Miyo ginowatamalela vanlubale Anamona a Yehova. Aliwa ehigikavihera ni makalelo oohiyana-iyana. Ehigikavihera ofwanya mabasa apama. Mbwenye ethu yathima, fumutamalela Yehova mwaha ohugikavihera osaddula egumi yaga. Vano, ginowapara mabasa oolaleya ninga Namona a Yehova.”

20. Onafuna osakule werana ethu baani?

²⁰ Muwari mwa yohudhera ela, nihisuza wodhela dhoreela naayi dhohoneya. Yoreela yathima fukanna wandana wapama ni Yehova. Wandana wula, winonikavihera wakela dhoreela dhimodha dhohoneya — olobela wa Yehova nithapanyaga nuuliye, wakela muzimu wotxena ni okaviheriwa winlubale nakala mmalaleyelo. Vano, osakule wunnuwiha otamalela wawo mwaha wa dhoreela dhehu dhohoneya. Omutamalelege Yehova mwaha wokala muthu anandana pama naathu.