1-2. Namaleba mmodha owonge ddi, ki dhithu baani nnafunihu woona muwari mwa yohudhera ela?

ATHU owinjhiva peeno enihina enomurumedha Yesu mbwenye dhinahudhihiye aliwa kinahara. (2 Tim. 4:3, 4) Enowiwanana niile awogile namaleba mmodha egi: “Yahakale ninga ahikumelela ‘Yesu’ mmodha vano oliye osoriha dhithu dhimodhave awonge Yesu obajha . . . , nere omukodda ninga nerilihu yaka 2000 mundduli? . . . Yowakulaya podi wera yakale hee nere omukodda.”

² Athu owinjhiva nsaka noobajha yowiwa dhahudhiha Yesu ni yahoona matikiniho aweriliyena, naarive dhigaali ndo yahikoodda omuroromela. Yohudhera evirile nihoona dhithu nayi dhaathukulele athu okwakwathuwa mwaha dhasorihile Yesu ni dheriliyena. Yohudhera ela nnere woona dhithu dhimodha nayi dhinaweriha athu apeeno wakodda anamahara a Yesu ni dhithu dhinanikavihere ohukwakwathuwa.

3. Dhithu baani erilena Yesu dhathukulele anamaholela gereja okwakwathuwa? [Meaning: What did Jesus do that caused some people to reject him]

³ Yesu agaali velaboni yavati ahandana ni athu aatene. Oliye oojha ni aliba orela vamodha naale yanna owedha, ohiya eyo oojha mudhidhi waye ni aliba ohawa vamodha naale yahipwathiwa. Vadhuluva owaweddela thagaraga ale yoniwa ninga aliba “othega.” Athu amodha yiwoona ninga owogowa yahifiyedha okwakwathuwa mwaha mweddelo wa Yesu. Ofiyedha wakoha anamaharaye yegi: ‘Mwahaya bwaddi mugajha ni mugang’wa ni anamakukusa musoko ni aliba othega?’  Wawaakulawa Yesu wera: ‘Ale eli agumi kinamuhoowela mediku, mbwenye aredda binamuhoowela. Miyo kagidhele wawithana athu owogowa wihina ethwaruwe, mbwenye gadheele aliba othega.’ — Luc. 5:29-32.

4. Ninga asorihe namavuhulela Ezayiya aJudewu yajhehera ddi wodhela Mesiya?

⁴ Dholebela dhinasoriha ddi? Mesiya ahinadhe elabo yavati namavuhulela Ezayiya ahisoriha wihina oliye adha ere okoddiwa. Yovuhulela ela yahisoriha yegi: ‘Athu yahimulamusa ni yahimukodda.’ . . . (Isa. 53:3) Ninga enasoriha yovuhulela ela Mesiya ere ‘olamusiwa ni athu,’ mwaha wa yeyo aJudewu ansaka noobajha egahubuwela wihina Yesu ere okoddiwa.

5. Athu owinjhiva a peeno enawona avi anamahara a Yesu?

⁵ Peeno nnofwanyiwa makathamiho mamodhave? Hee. Anamaholela gereja owinjhiva enorumedha wavolosiha mugereja mwewa athu orela ni athima, athu enooniwa ni elabo ninga athu athotho. Aliwa enowerana yeyo naarive athu ala enavolowa mugereja mwewa eganna mweddelo wahiniwanana ni malamulo a Mulugu. Teto anamaholela gereja ala enowalamusa adhaari a Yehova naarive egaali athu ooviheya, ni enilibihedha oparihedha mabasa malamulo a Mulugu. Elabo kinawoona makiristawu eebaribari ninga athu athima, ninga asorihile murumiwi Pawulo, Mulugu asakule dhithu dhinakala ninga ‘kadhinna mabasa.’ (1 Cor. 1:26-29) Mbwenye vamentoni va Yehova adharaaye atene ororomeleya bathima.

6. Nnande addi omutajhiha Yesu okanna mubuwelo mmodhave onasorihiwa va Mateus 11:25, 26?

⁶ Wihina nihikwakwathuwe nere ddi? (Omwileri Mateus 11:25, 26.) Kurumedhege dhithu dhatedhene dhinawoga athu wodhela adhaari a Mulugu. Orumedhe wihina mwebaribarene Yehova analabihedha athu owiyeviha ni enamulabela ni murima watene, wihina akwanelihe efunelo yaye (Sal. 138:6) Wubuwele dhithu gansi Yehova dheriliyena aalabihedhaga adharaaye, enooniwa mwilaboni ninga athu ehinna thotho ni ehisuzale.

7. Mwahaya bwaddi Yesu adhe awithanege aFarizewu agwalagwabi, ki aliwa yerile ddi?

⁷ Yesu ahaabumbula anamaholela gereja yaali agwalagwabi. Mudhidhi yole ni oliba murima Yesu owakona aFarizewu yathabwa othuwathuwa mwaha makalelo oonawa mada ohiya makalelo owasamalela ababi. (Mat. 15:1-11) Podi wera anamahara a Yesu yowatikina madhu aye. Bumwahaya edhe emukohege yegi: ‘Mwahinona wi afarizewu ehikwakwathuwa mwaha madhu mwasorihinyu?’ Oliye wawakula egi: ‘Muthanko watene wahidhaliwe ni Ababa oodhulu onere odduliwa.’ (Mat. 15:12-14) Yesu keenyile mubuwelo wovirigana waanamaholela gereja omuselelihe owoga ebaribari.

8. Yesu atonyihedhe addi wihina Mulugu kanarumedha makalelo atene owebedha?

⁸ Yesu oobumbula dhohudhiha dhowoota dhanyagereja. Oliye karumedha wihina Mulugu onorumedha makalelo atene owebedha. Ohiya eyo, Yesu ahiwoga wi athu owinjhiva yeddege dila yorambalala enaathukulele otolosiwa, mbwenye athu vango’no beddege dila yopurana enaathukulele ovulusiwa. (Mat. 7:13, 14) Yesu ahisoriha wi athu amodhaya Yerege withukula ninga enomulabela Mulugu mbwenye mwebaribarene ehimulabelaga. Oliye wawaddela egi: ‘Wodhela dhowera dhewa, munere wanona.’ — Mat. 7:15-20.

9. Dhohudhiha baani dhowoota Yesu abumbuliye?

 ⁹ Dholebela dhinasoriha ddi? Bibliya ahisoriha wihina oviheya ni Nyumba ya Yehova were omuthukula murima Mesiya. (Sal. 69:9; João 2:14-17) Fuuviheya wewula wamuthukulele Yesu obumbula dhohudhiha dhewa dhowoota ni dhowera dhewa dhabure. Motajhiha, maFarizewu yubuwela wi muneba kunakwa, mbwenye Yesu ohudhiha wihina anokwa enogona. (João 11:11) Asadusewu kiyarumedha wihina athu enere ovenyihiwa muukwani, mbwenye Yesu onvenyiha mukwaye Lazaru muukwani. (João 11:43, 44; Atos 23:8) Afarizewu wera dhithu dhatedhene dhabure dhinereya di Mulugu anerana, mbwenye Yesu ohudhiha wihina athu podi osakula omulabela Mulugu obe naari. — Mat. 11:28.

10. Mwahaya bwaddi dhohudhiha dhehu dhigahiyaga athu onyanyuwene?

¹⁰ Peeno nnofwanyiwa makathamiho mamodhave? Hee. Owinjhiva enokwakwathuwa naatonyihedha mBibliyani wihina dhohudhiha dhimodha dha mugereja sowota. Motajhiha, wihina yasugwerege athu anamasogolela gereja enohudhiha wihina Mulugu onowatabusa athu othukuthani wa mootho. Mbwenye ale enamulabela Yehova Mulugu oodhivela, enowatonyihedha athu wihina eyo kahiyo ebaribari. Anamasogolela gereja enohudhiha wihina muneba kunakwa, mbwenye iyo nnowatonyihedha athu wihina mubuwelo oyo kunadhela mBibliyani. Yahere muneba ohukwaga ovenyihiwa muukwani kuwakanne thima. Anyagereja owinjhiva yawogaga wihina egumihu eneddihiwa wodhela destino iyo nnahudhiha wihina muthu ohukanna ofuru wosakula akala onofuna omulabela Mulugu obe naari. Anamasogolela gereja enoonamo avi wodhela dhohudhiha nda dhinadhela mBibliyani? Owinjhiva enonyanyuwa vamlubale.

11. Mowiwanana ni madhu a Yesu eli va João 8:45-47, Yehova anajheha ddi wadhaari aye?

¹¹ Wihina nihikwakwathuwe nere ddi? Mwebaribarene akala nnodhiveliwa ebaribari,  nrumedhe nde dhinawoga Mulugu. (Omwileri João 8:45-47.) Iyo kanili ninga Saddana Ddiyabo ahilegele mwibaribarini. Iyo kaanaguliha ebaribabari yehu. (João 8:44) Mulugu anafuna wihina adharaaye “Yiidde obure”, ‘mbwenye mudhivele opama’, ninga Yesu eriliyena. — Rom. 12:9; Heb. 1:9.

12. Mwahaya bwaddi makalelo aakwile Yesu wahakwakwathusa aJudewu owinjhiva?

¹² Ethu baani emodha yaakwakwathuse maJudewu amalabo a Yesu? Pawulo onosoriha egi: ‘Iyo nnamulaleya Kiristu akwile vantxikwani na goyi, eli ethu yokwakwathusa vamentoni vamaJudewu.’ (1 Cor. 1:23) Mwahaya bwaddi maJudewu amodha edhe enyanyuwege mwaha makalelo akwile Yesu? Aliwa yonelamo wi mwaha Yesu okwa vanjhikwani nagoyi, ali mpanga ni muliba otheega ohiya Mesiya. — Deut. 21:22, 23.

13. Dhithu baani maJudewu ale yakwakwathuwile yaharajhihiliwa wubuwela?

¹³ Majudewu yakwakwathuwile kiyaapemddile pama thomodha, dhawoga wi Yesu kanna muladdu, oliye ere winkedhiwa, teto kaatorihiwe mowogowa. Anamatoriha ale yamuthongile Yesu kiyaavahile thima malamulo. Yahitugumana mowaguva ni kayarihile malamulo yawoga wodhela otoriha. (Luc. 22:54; João 18:24) Anamatoriha ale yahere ehikala aansakulo yere opendda pama wodhela nde nkedhiwa Yesu akala dhahereya obe naari. Ohiya werana eyo, aliwa bathabwa otuja wihina ‘evahe onamona wowoota wodhela Yesu, wihina apiwe.’ Nuwona wi kiyapurilena ethu namakutha munlubale omutuja Yesu wihina awoge madhu yamuthukulele opiwa. Eyo kiyiwanana ni malamulo a mudhidhi yole. (Mat. 26:59; Mar. 14:55-64) Teto Yesu nuvenyihiwa muukwani anamatoriha ale odhowaganave makalelo ewa obure. Aliwa okumiha ‘korowa dhagwinjhigwinjhi dhowinjhivadhene dha parata’ wavaha atoropa yasugwera mahame mwakoyiwe muruthu wa Yesu. Nuwindo wawaddela wihina yote wodhela ovenyihiwa wa Yesu. — Mat. 28:11-15.

14. Dhovuhulela dhawoga ddi wodhela okwa wa Mesiya?

 ¹⁴ Dholebela dhinasoriha ddi? Ebaribari wi athu owinjhiva a malabo a Yesu kayajhehera wi Yesu ere okwa, mbwenye kasugwa dhovuhulela dhasorihiwa dhegihina: ‘Ooniwa ninga muthu othega; Ohuthukula dhothega dhaathu owinjhiva ni ohukwela dhothega dhaanamwinjhi.’ (Isa. 53:12) Bumwahaya maJudewu kiyafwanelele okwakwathuwa Yesu nuukwa vantxikwani na goyi.

15. Ethu baani yinkedhiwe Anamona a Yehova enakwakwathusa athu owinjhiva?

¹⁵ Peeno nnofwanyiwa makathamiho mamodhave? Mohanganyedha Yesu ahiinkedhiwa nuwindo omagiwa, ethu emodhave enopadduwa peeno ni Anamona a Yehova. Kasugwa epadduwe yaka ya 1930 ofiyedha 1940, nlogo na Mulugu mudhidhi wowinjhivene yodhowesa mmatiribunale wihina yakihedhe ofuru wewa womulabela Mulugu. Anamatoriha amodha yowoniha wihina yahikanna nsakulo ni makalelo ehu owebedha. Elabo yo Quebec oCanadá, egereja ni Guverno yahilaba vamodha wihina yamarihe mabasa ehu. Anamalaleya owinjhiva yahivokeriwa mukambura mwaha walaleya amwanddamaniwa Omwene wa Mulugu. Elabo yo Alemanya, azombwe ororomeleya yahifiyedha opiwa ni regime nazista. Ovaneneve addibila owinjhiva ORússia ehivokeriwa mukambura, ehiwaxuliwa mwaha owoga wodhela Bibliya, aliwa enawona mabasa ala ninga “Mabasa owopiha.” Teto otapuleliwa wa Tradução do Novo Mundo da Bíblia Sagrada ni ewogelo yorusiya ehiwadelihiwa, mwaha enamoona ninga ‘ethu yowoopiha’ ni mwaha wokalamo ndina na Yehova.

16. Ninga anawoga 1 João 4:1, mwahaya bwaddi Anamona a Yehova yahirumedhaga dhithu dhininkedhiwiwa?

¹⁶ Wihina nihikwakwathuwe nere ddi? Wonelemo thomodha. Mwaha wa vamwangoni wa Yesu, ahisoriha wihina athu: ‘Enere wawinkedha dhithu dhatedhene dhabure’ anamaharaye. (Mat. 5:11) Dhowoota ndha dhinadhela muwano mwa Saddana. Oliye onowatujela ale enanidda wihina evuwihege dhowoota ndha. (Apo. 12:9, 10) Iyo kanivuruwanege dhowoota nda dhinawogiwa ni ale enanidda. Kanenye wihina dhowoota ndha dhinoopopihe ni dhikwerebeyihe nroromelo nehu. — Omwileri 1 João 4:1.

17. Dhithu dhipadduwile mwigumini mwa Yesu ahinathi okwa dhathukulele ni makalelo baani athu okwakwathuwa?

¹⁷ Ahalaga vango’no wi akwe Yesu ahigulihiwa nnamaharaye, teto namahara mmodha omukodda Yesu dila tharu, nuwindo emahiyu yele Yesu afuniye opiwa anamaharaye atene omuthawa. (Mat. 26:14-16, 47, 56, 75) Podi dhigalive ndo oliye katikinile mwaha wi oliyeene mwinya ahiwoga wihina yere opadduwa. (João 6:64; 13:21, 26, 38; 16:32) Podi wera yopadduwa ela yahakwakwathusa anamwinjhi yubuwelaga yegi: ‘Akala anamahara aye ehimuthawa miyo kaginafuna okala namahara aye.’

18. Dhovuhulela baani dhakwanele mwigumini mwa Yesu ehalaga vango’no wihina akwe?

¹⁸ Dholebela dhinasoriha ddi? Yaka dhowinjhivadhene mundduli, Yehova ahiwoga mBibliyani wihina Mesiya ere ogulihiwa, ni korowa 30 dhagwinjhingwinjhi. (Zac. 11:12, 13) Muthu aamugulihe akale mukwaye nyingala ginyingalevo. (Sal. 41:9) Teto namavuhulela Zakariya ahileba egi: ‘Omporose namakukula, wihina mambilaye ebalaleye.’ (Zac. 13:7) Ale yakanne murima wapama kayakwakwathuwe mwaha dhopadduwa ndha, mbwenye woona dhopadduwa nda dhakwanelaga  mwigumini mwa Yesu nroromelo newa nere okala nooliba.

19. Ale enna murima wapama ethu baani enonniwa?

¹⁹ Peeno nnofwanyiwa makathamiho mamodhave? Hee. Athu amodha yanoniwe ninga Anamona a Yehova ehisukuma ebaribari, vano onisadduwela ni watujelaga athu amodha wihina evunganyedhe ebaribari. Athu ala enowalabihedha malivuru obe interneti wihina evuwihe muthenga dhowoota wodhela Anamona a Yehova. Mbwenye ale enna murima wapama kinahiya omuhara Yehova mwaha wa dhowoota ndha. Ohiya eyo aliwa ehinona wi Bibliya ahisoriha wi athu amodha yere onidda. — Mat. 24:24; 2 Ped. 2:18-22.

20. Enaanikavihere ddi ohuselela omulabela Yehova mwaha waale enyanyale ebaribari? (2 Timóteo 4:4, 5)

²⁰ Wihina nihikwakwathuwe nere ddi? Iyo nnohowela okanna nroromelo nooliba, wihina nande enohoweleya omusuza Bibliya, olobela kadda labo ni wapara mabasa anivahile Yehova. (Omwileri 2 Timóteo 4:4, 5.) Nakanna nroromelo nooliba kannadha nlekethiwa mwaha makalelo eninkedhiwa Anamona a Yehova. (Isa. 28:16) Odhivela ninnihuna ni Yehova ni Bibliya vamodha ni addibilihu, onere onikavihera ohuselela omulabela Yehova mwaha waale enyanyale ebaribari.

21. Naari athu owinjhiva ehirumedhaga muthenga ninnihuna, Madhu a Mulugu enanroromeliha ethu baani?

²¹ Nsaka noobajha athu amodha yahikwakwathuwa ni yahihiya omuhara Yesu. Teto mudhidhi mmodhave athu owinjhiva kiyahile omuhara Yesu. Waathu yala ahikalavo muJudewu aali namasogolela oSinediriyu ni ‘anamakutha owinjhiva.’ (Atos 6:7; Mat. 27:57-60; Mar. 15:43) Eyo enopadduwa peeno, mbwabwadda waathu kineenya wi ethu-sithu yahihe omuhara Yehova ni Yesu, mwahaya bwaddi? Mwaha aliwa enodhiveliwa ni ehinona ebaribari eli mBibliyani. Ninga enawoga Madhu a Mulugu: ‘Ale enadhivela malamulo enyu ehikanna murenddele, kayiwo ethu yowakwakwathusa.’ — Sal. 119:165.