Ethu ele yagipadduwelege nlabo nne, yahisaddula egumaga, ofiyera ogithukulela wambela omusayela Mpaddusi. Vano ginafuna guwaaddele vaagomele emahiyu ele. Mbwenye gihinathi ginafuna guuthakelemo makalelo yeddile ezombwe yaaga. Dhigipadduwele mudhidhi yole, dhahigithukulela osaddula mubuwelo waaga ni dhahegeredha murima waaga wihina gimusayele Mulugu.

Miyo gibaliwe yaka ya 1937 oGuesnain, luwani yoFransa omadhelo nduwa watibiwesa mabwe. Ababa mabasiwa yaali waatiba mabwe, baaliwene egihudhihe okala muthu ooviheya ni mabasa. Ohiya eyo gihudhera naababa okala muthu owogowa, mwaha aliwa dhowapa mbani yawonaga akwiwa yonihiwaga goyi mwaha wolabihiwa bure-bure. Mwaha wa yeyo yahifiyedha ovolowa nikuru dhaala naapara mabasa mamodhave wihina ekanganele makalelo owaweddiha aliba yatiba mabwe. Ohiya eyo yotakaleliwa vanlubale yawonaga anamaholela gereja agwalamgwambi yakala valuwani. Amodhaya yaali athu oorela, naari dhigarive ndo, yowaloba dhoojha ni korowa aliba ohawa yahanna mudhidhi wowithuwa mwaha waja makalelo osapela murala dhewa. Mwaha wowatakalela dherana anamaholela gereja, ababa kiyawedha ogihudhiha dhithu dhereya mugereja mwewa.  Nakirati newene kanathapanyedha muselu dha Mulugu.

Gunnuwagave, miyo wambela widda ohogowa wereya. Motajhiha, miyo gowawona anyawedda yadhela elabo yo Fransa, yaheddihiwaga pama mwaha widdiwa. Miyo gahikanna elemelelo yonvoka bola naahima aanyawedda ni waredha vamodha. Teto amama, kiyabaliwe oFransa, aliwa yaali apoloneza. Gakirati ethu gathabwesimi wunlela fuwoona murenddele elabo yatene ni wiwanana wa mahimo amatene.

Givolowe mutoropa yaka ya 1957. Ninga gisorihilimi mundduli, yagithukulele wipita ohela wamwango wo Argeliya nlabo nne mahiyu, yaali mabasa yala ootoropa. Vano miyo nuukuwa gegi: “Nabwiya Mulugu! Gikavihere”, miyo ogumana nimutoropa dhaala kove ni kove, mbwenye kaali mwiddani aali mwanenyama dhaala amukokolani anithaniwa Jumento. Murima okurumuwa! Naari dhigaali ndo, guubuwela ele enagipadduwelaga labo nne mahiyu, teto guubuwela koddo ele, othabwaga ogubuweliha wihina ginohowela omusayela Mulugu wihina ginone: Elabo ela epadduseliwe ddi? Mulugu ononipwatha? Nnodha nifiye nlabo nikanne murenddele?

Nuuvira mudhidhi, ngali vaade vaababa gijhagavo feriya dhaaga, miyo onfwanya namona a Yehova dhaala ogivaha mwana livuru naalebiwe La Sainte Bible, Bibliya a ewogelo ya Efranses, Aakatolika. Nuuhogolowela oharAgeliya miyo obajha omwileri. Yolebela yathabwile ogithukula murima di Apocalipse 21:3, 4. Yolebela ela enihina: ‘Nyumba ya Mulugu eli naathu . . . Oliye onere wavuda mitoridhiwa dhatedhene mwintonimwiwa, kawindha wikala okwa, kutho, wibulela, naari widdela.’ * Yakalaga ninga gera oroha. Miyo wambela wubuwela giikohaga: ‘Elaya ebaribari?’ Mudhidhi yole miyo kagaanonne ethu wodhela Mulugu newene dhawoga Bibliya.

Yaka ya 1959, mabasa ootoropa egamanle, miyo omunona Namona a Yehova mmodhaya, ithaniwa François, oliye ogihudhiha ebaribari ya mBibliyani. Motajhiha, oliye ogitonyihedha mBibliyani wihina Mulugu ohukanna ndina, ndina naaye di Yehova. Yehova anere odhana wogowa elabo ela yavati ni anere osaddula elabo yatene wihina ekale parayizu, vano madhu ala elebiwe va Apocalipse 21:3, 4 yakwanele.

Madhu ala gowawonelamo ni yahigitomola murima. Mbwenye gasugwa yerana anamaholela gereja, kagoona oriya. Miyo gagana ninga gaabumbule atene mwaha wowaleketha athu ni wahudhiha dhithu Bibliya ahinasorihiye. Vano miyo obajha okanna mubuwelo mmodhave yanna ababa, wonyanyuwa burebure. Mudhidhi yole gafuna gerena ethu-sithu.

François vamodha ni akwaga abili yaali Anamona a Yehova ogikavihera okala muthu okurumuwa murima. Aliwa ogitapulelamo wihina mabasihu ninga makiristawu kahiyo watoriha athu mbwenye walaleya wihina ekanne ejhehero wi Omwene wa Mulugu onere onobola. Mabasa a Yesu yaali yala teto bimabasa yala aahiyedhiye anamahara aye wihina yahala yaparege. (Mat. 24:14; Luc. 4:43) Madhu ala ogikavihera waja makalelo apama othapanya ni athu sewawukula naarive yahili anihimo naaga. Ninga anasoriha Bibliya: ‘Mudhaari a Nabwiya kanahowela okangana, mbwenye akanne makalelo apama owoga ni athu atene’  — 2 Tim. 2:24.

 Miyo osaddula egumaga, vano yaka ya 1959 vamusonkanoni wa murudda, miyo obaddiziwa ninga Namona a Yehova. Vamusonkanoni vale, miyo omunona murogola dhaala ithaniwa Angèle, namwali ola ogidhivela pamadhene. Vohilegela miyo obajha waredhela mulogo waye. Nuuvira yaka modha iyo otelana. Mwebaribarene namwali ola mwihiyana apama ni mareeliho agithikele Yehova. — Pro. 19:14.

Muwari mwa yaka ndha, gihudhera dhithu dhowinjhiva ni dhohudduwaleya ni addibila ala athotho yakovelele mabasa. Ethu ethabwile ogidhivela siila: Negi dhehu dhineddele pama navahiwa mutholo worusa, enofwanelela nikale athu owiyeviha, ni niparihedhe mabasa yolaga ya Provérbios 15:22 enihina: ‘Mbwenye atxokotxeliwa onowedda pama.’

Yaka ya 1964, fambelimi wonelamo wihina yolaga ela sathima. Yaka yele miyo othomiwa ninga nameeddela mulogo. Mabasaaga yaali waredhela mulogo wihina galibihe ni gaakavihere addibila. Woona wi ganna yaka 27 baahi, dhithu dhowinjhiva kagannone weddihawa. Dhithu dhimodha gooviriganiha. Mbwenye dhoviriganiha dhaaga ogihudhiha. Vadhuluva, mwaha wokanna elemelelo ‘yotxokotxela’ ni addibila ale athotho yanonne dhithu dhowinjhiva miyo ohudhera dhithu dhathima.

Kaginadduwala ethu enagipadduwelaga, gambelagawene mabasa oweeddela mulogo. Nuumala waredhela mulogo dhaala woParis, ddibila dhaala owithwa omuzimuni ogikoha akala yere owedheya othapanya ni miyo nigaalivo abili baahi. Miyo wera: “Kahi muladdu.”

Ddibila ole ogikoha egi: “Louis, Mediku adhowaga vaade vamuthu, anaya ere ddi?”

Miyo omwakula “anaya awoone aredda.”

Oliye wera: “Ohakula pama. Mbwenye enakala ninga we, onoovira mudhidhi wowinjhivene ni addibila owithwa omuzimuni, ninga anamaholela mulogo. Wahinona wihina mmulogoni mwehu addibila ni arogola owinjhiva enedda owukuwene mwaha wokala axa teto amodhaya bamanyazo? Yere odhiveliwa vanlubale wahere osayela mwana mudhidhi wowaredha naaliwa, teto akala enowedheya podi odhowa vaade vewa wihina mwaajhe vamodha.”

Yolaga yaddibila ole, yahigidhivela pamadhene. Odhivela anniyena ni mambila a Yehova wahigidahinya murima. Vohilegela miyo okuna withukula waaga, vano miyo werana ele agaddeliye. Ginomutamalela vanlubale Yehova mwaha omunona ddibila ninga yole.

 Yaka ya 1969 ni 1973, miyo othomiwa wihina geeddihe departamento yakabelela dhoojha dha musonkano minli dhinlubale dha elabo yo Colombes, Paris. Musonkano wa yaka ya 1973, yahoweleya malabo matanu, naajhihe athu owakwana 60 mil! Gubuwela wi kagakwanihe. Ethu yagikavihere dhaaga ogeddela pama, siyolebela emodhave ya Provérbios 15:22 — wahinathi werana ethu orajhihe otxokotxela. Vano miyo okarati ni addibila ale owithwa omuzimuni enaweragana mabasa yala okabelela dhoojha, yaali anamalima, yanonne opiya ni makalelo dhinaguliwa dhoojha. Omambelelowene mutholo ola wakala ninga boorusa mbwenye mwaha wooriganela gahakwaniha.

Yaka ya 1973, miyo nimwaraga iyo withaniwa wihina nalabege Beteli yo França. Kaginakuwa, mutholo wobajha gathomeliwimi wogirusa. Mabasaaga yaali wafihedha malivuru addibila oKamaroes ni Wafrika. Yowukulihaya sowi obajha yaka ya 1970 ofiyera 1993 elabo ela mabasihu oolaleya yokoddihiwawo. Miyo wambela wubuwela wi kaginawakwanihe wapara mabasa yala. Podi wera ddibila ole aakabelela mabasa yala olaleya elabo ele yo França nuvuruwana yereya, oliye ogilibiha egi: “Addibilihu oKamaroes enorabulela yojha yomuzimuni. Kabe naajhihe!” Nuuliba murima iyo werana ndo.

Miyo gihedda olenddo dhowinjhiva gidhowaga dhilabo dhinakosa manddile ni oKamaroes, olenddo ndha dhogikavihera otugumana ni anamaholela mulogo a elabo dhendhe. Addibila ala, yaali addibila oliba murima ni ooxaga, baliweene yagikavihere wegeredha dhoojha dhomuzimuni wihina dhafiye elabo yo oKamaroes. Yehova onreeliha mwaha wowilibihera wehu. Podi wera dhahimala yaka 20 addibila a elabo yele yahimuyelele newene Namasugwera mmodha ni livuru nimodha nakumesa kadda mweri niithaniwa Nosso Serviço do Reino.

Naarive neraga wambelawene omwenddi, Angèle owoneya wihina namwali owithwa omuzimuni. Iyo  nuumala otelana dhikalelo dhaye dhomuzimuni weraga othwabwa. Nlabo nimodhave, iyo nuumala otelana oliye ogiloba wihina gilobele, nimulobaga Yehova wihina oone efunelo nannihuna yomulabela ninga anamatelana. Yehova wakula nlobelo nehu.

Ohiya eyo, Angèle kahiyile ogikavihera omuroromela Yehova. Motajhiha: Yaka ya 1973 nuwithaniwa wihina nlabege oBeteli, gahipambiha vang’no, mwaha mabasa ala oweeddela mulogo gahimala walemela. Mbwenye Angèle ogubusedha: “Egumihu nihipeleka mmadani mwa Yehova. Kiyakale yapama orumedha nikuru nehu nnanilobiwa wihina nerena?” (Heb. 13:17) Kanubuwele dila bili iyo odhowa oBeteli. Muwari mwa yaka ndha nilihu vamodha ginohagalala vanlubale gamusugwa mwaraga, ginowoona wi mwihiyana oxaga, okweya ni owithwa omuzimuni. Eyo enolibiha matelo ehu ni enonikavihera opwasedha dhothoma dhehu.

Peeno nihimala wuluvala, naarive dhigaali ndo Angèle kanahiya okala mwihiyana apama ni okavihera. Motajhiha, Eskola dha nikuru nehu dhineriwana ni Engeleji. Wihina nasuze Eskola ela, miyo ni Angèle nahilibihera vanlubale wihina nikovelele pama Engelejihu. Mwaha wofuna okovelela pama, iyo otamela mulogo wa Engeleji, naarive mudhidhi yola niganna yaka dhokwaranya 70. Woona wi gihikanna mutholo woolaba ni Komisawu ya Ofiliyale yo França, ohudhera ewogelo emodha kiyaali ethu yokweya. Mbwenye miyo ni Angèle nnokaviherana vanlubale. Peeno nihakwaniha yaka okwaranya 80, wegeredha mutugumano ni Engeleji vamodha ni eFranseji kannawedha oselela. Ohiya eyo nnowilibihera wihina nivahe dhowakula dhehu mmutugumanoni ni odhowa mmalaleyelo vamodha ni mulogo wehu. Yehova anna oreeliha wilibihera wehu wohudhera Engeleji.

Mareeliho manlubale nawakelihu baala yereye yaka ya 2017. Miyo nimwaraga Angèle, iyo withaniwa wihina nasuze Eskola ya nikuru noofiliyale ni amwariwa, enereya oPatterson, Nova York.

Mwebaribarene, Yehova namahudhiha munlubale. (Isa. 30:20) Bumwahaya nigarumedha wihina kaawo ohudhiha onapitha makalelo Yehova anahudhihiye adhaari aye. (Deut. 4:5-8) Owoga ebaribari, gihoona ni mento aaga wihina azombwe enanvuruwana Yehova, addibila ni arogola athotho, enooliba epaddi yomuzimuni ni enoojhavo egumiwa. Provérbios 9:9 ononikongomedha wihina: ‘Omuxagihe muthu athotho oliye anerege othabwa okala athotho. Omuhudhihe muthu owogowa, oliye anere wenjhedhedha enonelo yaye.’

Malabo mamodha ginokala nuwubuwela enagipadduwelaga yaka 60 mundduli, labo nne gipitilimi ohela wa mwango woArgeliya emahiyu ele yowopiha. Newene kagaanonne wihina osogolo waaga dhere wereya dhithu dhapama. Miyo gihudhera dhithu dhowinjhiva naathu amodha! Yehova ohugivaha miyo ni Angèle, egumi yapama ni yohagalasa. Bumwahaya ofiyedha peeno, iyo nihiikoma wihina nahiselele ohudhihiwa ni Babihu oodhulu, ni addibilihu athotho enonne dhithu dhowinjhiva ni anamudhivela Yehova.