1. Yapadduwe ddi nuuxixa olaleya dila yobajha?

ONOWUBUWELA labo wafwanyiwe ebaribari? Wahudheriwe yahukweyela — obe yakala ninga onajha nipala nasukari! Podi wera wubuwela wi athu atene enere ohudhera ebaribari ela. Ni wahikanna ebaribari wi madhu amBibliyani podi wakavihera athu okala ohagalala ni okanna ejhehedho yapama yosogolo. (Sal. 119:105) Vano mwaha wodhiveliwa, wothoma wawaddela amudhawo dhithu warumedhiwe. Mbwenye yapadduwile ddi? Yowuukuliha amudhawo vamodha nakwawo kiyarumedha nde wawaddeliwe.

2-3. Athu amalabo a Yesu yubuwela ddi wodhela oliye?

² Iyo nalaleyaga mbwenye athu amodha yahirumedhaga kanitikine. Naarive Yesu aweragana matikiniho owinjhiva yatonyihedha wihina oliye arumiwe ni Mulugu, athu owinjhiva kiyarumedha muthenga walaleyiye. Motajhiha, Yesu ahinvenyiha Lazaru muukwani — ala yaali matikiniho amwiddani a Yesu yawoniliwa ni mento ewa. Mbwenye anamasogolela gereja kayafuna orumedha wi Yesu di Mesiya. Yowukulihaya aliwa ofunaga wihina empe Yesu vamodha ni Lazaru! — João 11:47, 48, 53; 12:9-11.

³ Yesu ahinona wi athu owinjhiva kiyamurumedhe ninga Mesiya. (João 5:39-44) Oliye ahiwoga nnikuru naanamahara a Juwawu Batista egi: ‘Oohagalala duule ahigifwannyena ethu yokwakwathusa.’ (Mat. 11:2, 3, 6) Ki mwahaya bwaddi athu owinjhiva edhe emukoddege Yesu?

4. Yohudhera ela nnaasuze ddi?

⁴ Yohudhera ela ni yohudhera enaharela, nnere woona dhithu baani dhathukulele athu amalabo a Yesu ohukanna nroromelo nuliye. Teto nnere woona mwahaya bwaddi athu owinjhiva peeno egakwakwathuwa, obe, egakodda muthenga  nnalaleyihu. Yathimaya, nnere woona mwahaya bwaddi egahoweleya okanna nroromelo nooliba ni Yesu wihina nihikwakwathuwe.

5. Ethu baani yathukulele athu owinjhiva wanganyedha wihina Yesu kaali Mesiya?

⁵ Owinjhiva yahikwakwathuwa mwaha wa nihimo wibaliwe Yesu. Aliwa yahinona wi Yesu namahudhiha munlubale ni owawerana matikiniho. Mbwenye athu yala yamoona Yesu ninga mwaanakalapimtero. Oliye do Nazare, athu owinjhiva yoona ninga luwani ehinna thima. Natanayeli, aali namahara a Yesu, ahifiyedha owoga: ‘Nerege oNazare podi okumawo ethu yapamene?’ (João 1:46) Natanayeli podi wera kaavaha thima luwani yo Nazare wakala Yesu. Obe podi wera ubuwela wi yovuhulela eli va Miqueias 5:2, yawoga wihina Mesiya aabaliwe o Bele, ohiya o Nazare.

6. Ethu baani yakavihere athu amalabo a Yesu onona wi oliye aali Mesiya?

⁶ Dholebela dhinasoriha ddi? Namavuhulela Izayiya ahivuhulela wi amwiddani a Yesu kiyathuwathuwe ‘newene kiyasanyihe muladduya wamuthukulele Mesiya opiwa.’ (Isa. 53:8) Dhithu dhowinjhiva dhafuna opadduwa dhahivuhuleliwa. Athu yahagule mudhidhi wihina ependde dhithu dhawogiwe, yere onona wihina Yesu aabaliwe oBele teto wihina aali anihimo na Mwene Davidi. (Luc. 2:4-7) Mburo wibaliwe Yesu wowiwanana ni yovuhulela ya Miqueias 5:2. Ki muladduya waali ovi? Athu yarumedha dhithu yahinabihe opendda. Aliwa kiyanonile dhithu dhatedhene wodhela Mesiya. Mwaha wa yeyo aliwa okwakwathuwa.

7. Mwahaya bwaddi athu owinjhiva egakodda nlogo na Yehova peeno?

⁷ Peeno nnofwanyiwa makathamiho mamodhave? Hee. Adhaari owinjhiva a Yehova enadhela nihimo nohawa. Mwaha wa yeyo aliwa enooniwa ninga athu ‘ehithabwile ohudhera.’ (Atos 4:13) Athu owinjhiva enubuwela wi nlogo na Yehova kiyahudhihege athu amodha Bibliya mwaha wi kinna dipoloma anoniha wihina aliwa athu ethanbwe ohudhera. Amodha enihina Anamona a Yehova “nikuru nnadhela wamerika,” mbwenye ebaribariya sowi athu atanu nabili eli Anamona a Yehova, mmodha waathu yala anakala Wistadu Unidu. Amodhaya yiwale yeraga Anamona a Yehova kinamurumedha Yesu. Yaka dhowinjhivadhene adhaari a Yehova enowooniwa ninga “anameddelela enadhela wamerika.” Ale enarumedha madhu ala yahinonne ebaribari wodhela iyo enokwakwathuwa, obe, enokodda nlogo na Yehova.

8. Ninga munawogela Atos 17:11, athu yere ddi wihina yanone Anamona a Yehova?

⁸ Wihina nihikwakwathuwe nere ddi? Athu enohowela opendda pama dhithudha. Siyeyo namaleba Livuru na Lucas eriliyena. Oliye ahithoma osayela pama ‘dhithu dhatedhene, moopwasedha, obajhana vambeliwa.’ Oliye afuna wi ale enilerigi ‘ekanne ebaribari wa dhithu dhatedhene’ yiwaliwa wodhela Yesu. (Luc. 1:1-4) Majudewu akale a luwani yo Bereya yaali ninga Lucas. Nuwiwa muthenga dhapama wodhela Yesu, aliwa osayela dholebela dhebarayiku wihina yoone akala yiwiwa yaali ebaribari. (Omwileri Atos 17:11.) Nimakalelo mamodhave, peeno athu enohowela opendda pama dhithudha. Eliganihege dhohudhiha dha nlogo na Mulugu ni ndhe dhinawoga dholebela. Nihiyoya nnohowela ohudhera thalako ya nlogo na Yehova mudhidhi wa peeno. Neera “noone dhithu dhinerana nlogo” na Mulugu, nsakulo ni ndhe athu enawogiwa kadhinanipupuruse.

9. Yapadduwe ddi Yesu nukodda wooniha yintelelo yodhulu?

⁹ Dhohudhiha dha Yesu dhothukula murima. Mbwenye athu amodha amalabo aye, othukuliwa murima ni dhohudhiha baahi kiyakwana. Aliwa yofunave. Aliwa yafuna wihina Yesu onihe wi aali Mesiya wodhela woniha ‘yintelelo yodhulu.’ (Mat. 16:1) Podi wera aliwa yamuwadda werana eyo mwaha kiyonelamo pama madhu eri va Daniel 7:13, 14. Mbwenye ole kuwari mudhidhiya Yehova wakwaneliha yovuhulela ela. Ole waali mudhidhi athu yafuniwa orumedha dhohudhiha nde dha Yesu dhawonelihemo wihina oliye aari Mesiya. Yesu nukodda wawoniha yintelelo athu ala yafuniwa woona, aliwa okwakwathuwa. — Mat. 16:4.

10. Yesu akwanelihe aavi yovuhulela alebile Izayiya?

¹⁰ Dholebela dhinasoriha ddi? Namavuhulela Izayiya ahileba wodhela Mesiya egi: ‘Kanaakuwe newene kanavenyihe ndhu, newene ndhu naaye kanniwiwe murampani.’ (Isa. 42:1, 2) Yesu ahapara mabasaye ahithithimihe yeka. Oliye kamagile nyumba dhowebedhamo dhinlubale, oliye kawara guwo dhatonyihedha wi onokosa epaddi ya nikuru thinikuru newene kawaddihedhe athu wihina emwithanegena ndina nomuthithimihana. Naarive athongiwaga ni mwene Herodes Yesu ahikoodda werana yintelelo wihina athithimihiwege. (Luc. 23:8-11) Ebaribari wi Yesu aherana matikiniho, mbwenye ethu yathima mwigumini mwaaye wari olaleya muthenga dhapama. Oliye ahawaddela anamaharaye egi: ‘Bi mabasa gaadhelimi.’ — Mar. 1:38.

11. Mubuwelo baani wabure athu enniwana peeno?

¹¹ Peeno nnofwanyiwa makathamiho mamodhave? Hee. Peeno enadhaala mmentoni mwanyagereja owinjhiva, si dhithu ninga omaga gereja dhinlubale ni okalamo dhithu dhokwima, anamasogolela gereja enna mandina enathithimihiwiwana, ni muthupo athu owinjhiva ehinoniliwa makalelo dhambeliwa. Ki dhithu ndha dhinakavihera nimakalelo  baani, ohudhera wodhela Mulugu, ni efunelo yaye ni elabo yavati? Mbwenye ale enatugumana ni iyo enohudhera ethu Yehova anafuniye wi iyo neregena. Nyumba dhehu Dhomwene mburo dhowegeredheya ni dhosamaleleya pama. Ale enaasogolela athu amodha kinawara guwo dhowithithimihana newene kinithaniwana mandina owathithimihana. Dhohudhiha dhehu dhinadhela mBibliyani eli madhu a Mulugu. Naari dhigarive ndo athu owinjhiva peeno enokwakwathuwa ni enubuwela wi makalelo ehu omulabela Mulugu bookweya vanlubale. Mwaha ndhe nnahudhihihu kahiyo dhendho aliwa enafuniwa wiwa.

12. Ninga munawogela Hebreus 11:1, 6, nroromelo nehu nidhelege waani?

¹² Wihina nihikwakwathuwe nere ddi? Murumiwi Pawulo ahiwoga ni makiristawu oRoma egi: ‘Muthu anakanna nroromelo mwaha wa ele aniwiye. Teto ele aniwiye enadha mwaha wa madhu a Kiristu.’ (Rom. 10:17) Muthupo dhineriwana mmagereja dhihiniwanana ni Bibliya naarive dherege othukula murima obe dhikale dhapama kadhinalibiha nroromelo nehu. Ethu enanikavihera wunnuwiha nroromelo nehu, fuhudhera madhu a Mulugu. ‘Wahikanna nroromelo kinenyeya omuhagalasa Mulugu.’ Bumwahaya enohoweleya okanna nroromelo nooliba nnadhela mBibliyani. (Omwileri Hebreus 11:1, 6.) Wi nihanganyedhege wihina nihifwanya ebaribari kannahowela yintelelo yootikiniha enadhela odhulu. Ohudhera ni opendda pamadhene ndhe dhiri mBibliyani winere olibiha nroromelo nehu ni siithu yathimaya enaanikavihere ohanganyedha.

13. Mwahaya bwaddi athu owinjhiva edhe emukoddege Yesu?

¹³ Malabo a Yesu, anamahara a Juwawu Batista yowatikina anamahara a Yesu mwaha kiyanna elemelelo yothuga. Yesu ahawaddela wihina aliwa kiyahowela othuga egaali vamodha nuliye. (Mat. 9:14-17) Naari dhigarive  ndo Yesu ahikooddiwa ni aFarizewu vamodha ni amwiddani amodha a Yesu mwaha ohuhara dhilemelelo dhewa. Athu ala yahimunyanyuwela Yesu nuwavulumusa aredda amodha labo na Sabado. (Mar. 3:1-6; João 9:16) Aliwa yowoga nuuwithukula wi nnomukoya Sabado, mbwenye kiyona muladdu oguliha mutempulu labo na Sabado. Yesu nuwasumulula aliwa otakaleliwa vanlubale. (Mat. 21:12, 13, 15) Athu yamwiwale Yesu alaleyaga mu Sinagoga yo Nazare yahitikina vanlubale, mwaha olabihedha thalako yamwaana Ezarayeli wihina aatonyihedhe wi ekalelo yewa yohukanna nroromelo yera oligana ni aliwa. (Luc. 4:16, 25-30) Ekalelo ya Yesu yahakwakwathusa athu owinjhiva. — Mat. 11:16-19.

14. Mwahaya bwaddi Yesu adhe asumululege dhilemelelo dhaathu dhahiwanana ni dholebela?

¹⁴ Dholebela dhinasoriha ddi? Amulabihedhaga namavuhulela Izayiya Yehova wera: ‘Nlogo nna nnagaddamela ni mulomo, ni enagithithimiha ni mulomo baahi wula murimiwa ogaali wolapelawene ni miyo; Teto makalelo enagebedhiwa kiniwanana ni malamulo aaga mbwenye eniwanana ni malamulo aathu enaahudhihiwa.’ (Isa. 29:13) Yesu kaviriganihe mwaha osumulula dhithu yeresana athu yanna mubuwelo wahiniwanana ni Madhu a Mulugu. Athu yathabwesa ovaha thima malamulo ni dhilemelelo dhaathu opitha dholebela, mwebaribarene yamukoodda Yehova Nuule amurumiliye ninga Mesiya.

15. Mwahaya bwaddi athu owinjhiva peeno kinaafuna Anamona a Yehova?

¹⁵ Peeno nnofwanyiwa makathamiho mamodhave? Hee. Athu owinjhiva enowanyanyuwela Anamona a Yehova mwaha wihina kinajha festa ni kinerana dhilemelelo dhimodha dhihiniwanana ni Bibliya, ninga omujha Nataliya. Amodha enothabwa onyanyuwa Anamona a Yehova yahivolosihaga mmuthuponi dha pulitika obe yahijhaga muthupo dhaanokwa dhihiniwanana ni Bibliya. Athu yala enubuwela wihina enna omulabela Mulugu mwamakalelo oliye anarumeedhiye. Mbwenye ole anafuna ohara dhilemelelo dhelabo ohiya ohara dhithu dhinahudhihiwa mBibliyani, kaamuhagalasa Yehova. — Mar. 7:7-9.

16. Mowiwanana ni Salmos 119:97, 113, 163-165, ethu baani nnahowelihu werana ni ethu baani nnahowelihu okoodda?

¹⁶ Wihina nihikwakwathuwe nere ddi? Enohoweleya okanna odhivela winlubale ni malamulo vamodha ni malagano a Yehova. (Omwileri Salmos 119:97, 113, 163-165.) Akala nnomudhivela Yehova nnere okoodda muthupo bu muthupo ohunamuhagalasa oliye. Teto kannenye wihina ethu-sithu ekale yathima opitha odhivela ninnihuna ni Yehova.

17. Athu owinjhiva a malabo a Yesu yajheha Mesiya ere ddi?

¹⁷ Athu amodha a mudhidhi wa Yesu yajhehera wi elabwiwa essadduliwe mowaguva. Mwaha yotabusiwa ni onamathonga woRoma ni yafuna Mesiya awobole mwaha goyi yela. Mbwenye nuuxixa omutikithera Yesu Omwene, oliye okoodda. (João 6:14, 15) Athu amodha ni anamakutha, yowakelesa onamathonga vang’onove ni akudda Roma. Bumwahaya, aliwa yamoova Yesu anadha asaddule onamathonga woRoma. Mwaha wa yeyo maJudewu owinjhiva okwakwathuwa.

18. Yovuhulela baani wodhela Mesiya athu owinjhiva yahivahiwa thima?

¹⁸ Dholebela dhinasoriha ddi? Dhovuhulela dhowinjhiva dhawoga wodhela Mesiya dhosoriha wi oliye akale munyakoddo aagonjhihe, mbwenye dhovuhulela dhimodha dhootonyihedha  wi oliye abajhe okwa wodhela dhothega dhehu. (Isa. 53:9, 12) Mwahaya bwaddi maJudewu edhe ekannege mubuwelo wovirigana wodhela Mesiya? Mwaha athu owinjhiva yafuna wi Mesiya akavihere mowaguva mwa makathamiho ewa. Bumwahaya aliwa kiyavaha thima yovuhulela si yovuhulela yawoga muselu yahifuniwa ovuruwana. — João 6:26, 27.

19. Mubuwelo baani wabure onaakwakwathusa athu peeno?

¹⁹ Peeno nnofwanyiwa makathamiho mamodhave? Hee. Athu owinjhiva peeno enokwakwathuwa mwaha kannivolosiha mpulitikani. Aliwa enubuwela wi yere okala yapama omusakula muthu anathongege. Mbwenye iyo nihinona wi namusakula muthu oomwilini wihina anithongege, nnamukoodda Yehova. (1 Sam. 8:4-7) Athu owinjhiva enubuwela wi yere okala yapama nahamagege dhiskola, dhispitale obe wapara mabasa bi mabasa ookavihera. Aliwa enokwakwathuwa yonaga wihina nnolaba nikopolo dhatedhene mmabasani oolaleya, ohiya waaparaga mabasa yamarihe makathamiho mowaguva eli mwilaboni.

20. Ninga awogile Yesu va Mateus 7:21-23, ethu yathima mwigumini mwehu siivi?

²⁰ Wihina nihikwakwathuwe nere ddi? (Omwileri Mateus 7:21-23.) Ethu yathima mwigumini mwehu fuwapara mabasa Yesu anivahiliye. (Mat. 28:19, 20) Kanihiye muselu dha pulitika dha elabo ela dhinipupuruse. Iyo nnowadhivela vanlubale athu ni nnothuwathuwa yaafwanyiwaga makathamiho, teto nihinona makalelo baani apama omukavihera mwanddamanihu: omuhudhiha wodhela Omwene wa Mulugu ni omukavihera wandana ni Yehova.

21. Nikome wihina nere ddi?

²¹ Yohudhera ela, nihoona dhithu nayi dhaathukulele athu owinjhiva omukodda Yesu ni okwakwathuwa teto dhinodhowave dhakwakwathusaga athu ni dhathukulelaga wakodda anamahara a Yesu peeno. Nerege enahoweleya okala pasope ni dhithu dhendha baahi? Naari. Yohudhera enaharela, nnere woona dhithu dhimodha nayi dhinaathukulela athu okwakwathuwa. Wikome wihina ohukwakwathuwe ni okanne nroromelo nooliba!