1-2. Makathamiho baani enagumanana addibila owinjhiva?

MURUMIWI Pawulo omukongomedha Timotiyu: ‘Wapare mabasa olaleya.’ (2 Tim. 4:5) Iyo atene kannavudhuwana yolaga ya Pawulo. Mbwenye ehikalavo makathamiho. Addibilihu owinjhiva wapara mabasa oolaleya ethu enahoweleya oliba murima. (2 Tim. 4:2) Wawubuwele addibila ale enakala elabo mabasa ehu oolaleya enakoddihiwiwa. Aliwa enolaleya naarive enonaga wi enookoddihiwa.

² Addibilihu enowagumanana makathamiho enathukulela okwerebeya. Motajhiha, owinjhiva enolaba nduwa nantero wihina esapele murala wewa. Amodhaya enofuna wawenjhedhedha mabasa ala oolaleya, mbwenye omagomihero wa sumana waafiyaga kopolo kinakanna, amodhaya ehikanna oredda wahinayila obe ehuluvala. Malabo mamodha newene kinawedha ovenya vaade, bumwahaya kinawedha wawenjhedhedha mabasiwa oolaleya. Teto ehikalawo addibila ale mubuwelo wewa onanyemela, aliwa enubuwela wi vamentoni va Yehova aliwa kinna thima. Mariya, * murogola anakala Oriente Médio ohusoriha egi: “Owanana mubuwelo wonyemela ethu enagikwerebeyiha vanlubale. Vowindo ginowambela wivaha nibili, teto eyo enoogiyela mudhidhi gaparegimi mabasa oolaleya ni enogaaka kopolo.”

3. Nnaasuze ddi muwari mwa yohudhera ela?

³ Kannapwatha makathamiho baani enanifwanya, Yehova ohunipaganya wihina anere onivaha kopolo. Oliye kanonikavihera baahi wawanana makathamiho ninnihuna, mbwenye ononikavihera waparagave mabasihu anivahiliye. Yohudhera ela nnere woona makalelo Yehova aneriyena. Nihinathi, nnarajhiha ohudhera makalelo amukaviheriye murumiwi Pawulo ni Timotiyu wawanana makathamiho ewa, ni wapara mabasiwa oolaleya ni kopolo dhewa dhatedhene.

4. Makathamiho baani agumanena murumiwi Pawulo?

⁴ Pawulo ahagumanana makathamiho ohiyana-hiyana. Oliye ohowela kopolo thabwathabwa akala malabo owinjhivene oharahariwa, ovonyiwa ni mabwe ni ovokeriwa mukambura. (2 Cor. 11:23-25) Pawulo orumedha wi nuliyeya owanana mubuwelo wonyemela. (Rom. 7:18, 19, 24) Ohiya eyo ahikanna ‘mwana mwinga’ awaniyena mmwiilini mwaaye. Nlabo nimodha ahinpigireyelaga Mulugu wihina amwangule mwinga anniyena. — 2 Cor. 12:7, 8.

5. Naarive afwanyiwaga makathamiho mabasa baani aparile murumiwi Pawulo?

⁵ Naarive murumiwi Pawulo agafwanyiwe makathamiho owinjhiva, oliye ahikaviheriwa ni Yehova. Nimakalelo yala owapara mabasaye oolaleya ni kopolo dhatedhene. Kasugwa Pawulo eriliyena. Mudhidhi dhaala Pawulo aali oRoma kambura ya vaade kawedha ovenyavo. Naarive dhigari ndo oliye walaleya anamathonga. Podi wera muthenga aalaleyiye agwarda ala mukambura ni athu ale yadhela ompaada, buyola mmodhave aalaleyiye anamaholela aJudewu. (Atos 28:30, 31; Fil. 1:13) Bumudhidhi yola Pawulo alebiliye makarta mamodha, makarta mamodhave enaparihedhiwa mabasa ni makiristawu eebaribari. Vadhuluva Pawulo aali yotajhiha yapama ya makiristawu oRoma. Bumwahaya Bibliya agasoriha wi addibila wengo ‘yahikanna oliba murima owoga nuuhova madhu a Mulugu.’ (Fil. 1:14) Kananganyedha wi mwebaribarene Pawulo malabo mamodha osegedheya ethu baani afuniye werana, mbwenye oliye owilibihera mwadhatedhene. Marelihoya? Ninga Pawulo asorihiliye: ‘Omagiwa waaga, oheriha wihina muthenga dhapama dhunnuwe.’ — Fil. 1:12.

6. Mowiwanana ni 2 Coríntios 12:9, 10 Pawulo awedhile addi wapara mabasaye olaleyela?

⁶ Pawulo ahinona wihina dhahere dhihikala kopolo ya Yehova, kawedhe werana dhatedhe aapariliye. Oliye ahikanna ebaribari wihina kopolo dha Mulugu ‘samukavihera mukwerebeyani mwaaye’. (Omwileri 2 Coríntios 12:9, 10.) Yehova olabihedha muzimu waye wotxena wihina aavahe kopolo murumiwi Pawulo. Vowindala murumiwi ola oororomeleya ahiwedha wapara mabasaye oolaleya ni kopolo dhaye dhatedhene naarive aharahariwaga, avokeriwaga mukambura, obe afwanyiwaga makathamiho owinjhiva.

7. Makathamiho baani Timotiyu ahoweliye wagonjhiha wihina aapare mabasaye oolaleya?

 ⁷ Naarive agali muzombwe ohiyana ni Pawulo, Timotiyu ohoweleya ororomela kopolo dha Mulugu wihina aapare mabasaye oolaleya. Timotiyu ahimuhara Pawulo mmabasani mwaaye oolaleya olenddo dholapela. Ohiya eyo Pawulo ahimuruma Timotiyu wihina adhowe aalibihe addibila ammulogoni. (1 Cor. 4:17) Podi wera Timotiyu ahubuwela egi kagifwanelele wihina gaapare mabasa ala. Podi wera bumwahaya Pawulo adhe amulagege egi: ‘Kuwenye wihina muthu upwaze mwaha wokala muzombwe.’ (1 Tim. 4:12) Ohiya eyo mudhidhi yola Timotiyu owanana mwingaye wa mmwiilini: ‘ookala muredda malabo owinjhiva.’ (1 Tim. 5:23) Mbwenye Timotiyu ohowela ororomela muzimu wotxena wa Yehova. Ni kopolo dha muzimu wotxena oliye ere okanna kopolo wihina alaleye ni akavihere addibila. — 2 Tim. 1:7.

8. Peeno Yehova ananivaha addi kopolo?

⁸ Peeno Yehova anowavaha adharaaye ‘kopolo dhohikala dha masika.’ Mwaha wa kopolo dhendha nnowedha omulabela oororomeleyene. (2 Cor. 4:7) Nnere wawona makalelo mannayi Yehova analabihedhiye wihina anivahe kopolo: olobela, Bibliya, addibila ni mabasa oolaleya.

9. Olobela winanikavihere addi?

⁹ Okanna kopolo mwaha wolobela. Va Efésios 6:18, Pawulo anonikongomedha olobela wa Yehova ‘mudhidhi watene.’ Mulugu anere onaakula anivahaga kopolo nnahowelihu. Jonnie anakala oBoliviya, ohona kopolo dha Yehova mudhidhi afwanyiwiye makathamiho owinjhiva. Mwariye, ababe, ni amaye ofwanyiwa oredda mudhidhi mmodhave. Epaddi ya Jonnie wakavihera atene yahimurusa vanlubale. Amaye okwa, wahivira mudhidhi wowinjhivene wihina ababe ni mwariye evulumuwe oredda yanniwana. Obuwelaga mudhidhi yola Jonnie onosoriha egi: “Mudhidhi ginathabwimi othuwathuwa, enagikavihera fumwaddela Yehova ginafunimi wihina agikavihere.” Yehova ohunvaha kopolo Jonnie wihina akale oovilela. Ronald namaholela mulogo oBoliviya, oliye wiwa wihina amaye ehikanna kanser. Yowukulihaya nuumala mweri mmodha aliwa okwa. Yamukavihere ddiniyani mudhidhi yole? Oliye wera: “Galobelaga wa Yehova ginonfugulela murima waaga gimwaddelaga dhatedhene makalelo murimaga oriwa. Kaginanganyedha wi Yehova anoogivuruwana opitha muthu di muthu. Mwebaribarene, oliye ohuginona opitha miyo gamwiinya.” Podi wera malabo mamodha makathamiho enonisegedha iyo kuhuwedhaga osoriha nalobelaga. Mbwenye Yehova ononiloba wihina nimwaddelege naarive nahiwedhaga omwaddela dhatedhene nnafunihu. — Rom. 8:26, 27.

10. Mowiwanana ni Hebreus 4:12, ekalele ddi yapama omwileri Bibliya ni wubuwela makalelo oparihedha mabasa?

¹⁰ Otodoleya mwaha wa Bibliya. Pawulo ahikanna kopolo mwaha wolobela, eyo podi wereya nihiyoya. (Rom. 15:4) Sathima omwileri Bibliya ni wubuwelela pama. Neragana ndo, Yehova anoparihedha mabasa muzimu waye wotxena wihina antonyihedhe wi Bibliya podi onikavihera naafwanyiwaga makathamiho. (Omwileri Hebreus 4:12.) Ronald asorihiwe mundduli ohuwoga egi: Yahigikavihera vanlubale kadda emahiyu wileri epaddi modha ya mBibliyani. “Ginoopwasedha wubuwelela pama dhikalelo dha Yehova ni odhivela waye anniyena ni adharaaye. Eyo enogikavihera ong’wela ng’weleyana kopolo dhaaga.”

11. Bibliya anvahile addi kopolo murogola ola aali ookwerebeyene?

 ¹¹ Wubuwelela nawilerigi madhu a Mulugu winonikavihera okanna mubuwelo wapama naafwanyiwaga makathamiho. Kasugwa yereye ni murogola dhaala. Okwa wamamune wahimuukula vanlubale, vano namaholela mulogo omwaddela yolaga egi wileri livuru na Jo. Vohilegela murogola oparihedha mabasa yolaga ele. Ambelagawene wileri, ethu yobajha yaari ohonelamo makalelo owubuwela a Jo. Oliye ookala nusoriha egi: “Jo! Kuwubuwelege ndala!” Siyeyo yamukavihere murogola ola wonelamo ethu modha. Oliye ahikanna mubuwelo mmodhave ninga wa Jo. Wileri livuru nne na Jo nahimukavihera murogola ola osaddula mubuwelo waye naarive agamuyelele mamune.

12. Yehova anaparihedha addi addibila ammulogoni wihina enivahe kopolo?

¹² Okanna kopolo mwaha wa addibilihu oomuzimuni. Makalelo mamodha Yehova ananivahiye kopolo fuukala naaddibilihu ammulogoni. Pawulo ahalebela addibile amunroromeloni egi: ‘Ginofuna vanlubale wuwoonani, wi nilibihane.’ (Rom. 1:11, 12) Mariya asorihiwe mundduli wera okala ni addibila ethu yathima vanlubale. Oliye anosoriha egi: “Yehova ohalabihedha addibila ni arogola yahanonne makathamiho ginafwanyiwimi. Aliwa yahisoriha ethu yagilibihe, nugilebela njhangala gahowelimi mudhidhi yole gifwanyiwaga makathamiho. Ethu enagikavihera fuwawaddela addibila efwanyiwe makathamiho mamodhave ninga aaga, mwaha makalelo yagonjhihiwa podi ogikavihera ni miyoya. Teto anamaholela mulogo enowilibihera ogaddela madhu olibiha yegi gili athima mmulogoni.”

13. Nnalibihena addi mmodha ni mukwaye omutugumanoni?

¹³ Mudhidhi nnathabwihu olibihana mmodha ni mukwaye onereya natugumana. Nakala mmutugumanoni, ononamo avi walibiha athu amodha? Kamwaddele ddibila were: “Miyo ginowudhivela” “ginowutamalela dhatedhene oneriwena.” Motajhiha, mutugumano dhihinambele namaholela mulogo anithaniwa Peter omwaddela murogola aali nimukwaye ahaali namona a Yehova: “We kunonne makalelo ginalibihiwemi mwaha wokala ni iyo. We onowadhana anawo atanu nammodha mmulogoni teto aliwa enakala owiwegeredhene wihina evahe dhowakula dhewa.” Mmentoni mwa murogola ole odhalamo mitori. Nuutamalela oliye omwakula: “We kunubuwela makalelo egilibihe madhu ala wasorihiwe peeno.”

14. Mabasa oolaleya podi onithukulela wera ddi?

¹⁴ Okanna kopolo mwaha woolaleya. Nalaleyaga obe nathapanyaga ni muthu mmodha wodhela Bibliya, iyo nnokanna kopolo naarive akala aliwa enorumedha obe naari. (Pro. 11:25) Murogola dhaala anithaniwa Stacy ohonelamo wi olaleya onovaha kopolo. Muthu mmodha vemudhini vewa nuutxosiwa oliye ahukuuwa vanlubale. Oliye owikohesa egi: “Ehikalawo ethu-sithu yahoweleya wihina gerena wi gimukavihere?” Kavo ethu emodha ubuweliye. Yamukavihere Stacy ogonjhiha mudhidhi ola wamakathamiho yaali ddi? Olaleya! Mudhidhi athabwiye wilibihedha mmalaleyelo, mubuwelo waye wakala naathu aalaleyiye. Oliye onosoriha egi: “Mudhidhi yole, Yehova ogivaha namahudhera unnuwelevo mowaguva. Eyo yahigihagalasa vanlubale. Ethu enagivaha kopolo egumaga fulaleya.”

15. Ohudhere ddi ni madhu a Mary?

¹⁵ Addibila amodha enubuwela wi mwaha wamakathamiho enaafwanya kinawedha werana ethu-sithu mmalaleyelo. Kiwe onubuwela ndo? Akala siyeyo kuddiwale wihina Yehova onohagalala ethu-sithu oneriwena mmalaleyelo. Kasugwa yereye ni Mary asorihiwe mundduli:  Nuutamela mulogo wawogiwa ewogelo ahanonniye oliye ahisegedheya. Mary wera: “Mudhidhi wowinjhivene ethu gawedhimi werana fuwakula mwana madhu vang’no baahi, wileri mwana yolebela ni ovaha mwana folyetu mmalaleyelo.” Mary era wiliganiha naale enonne owoga pama ewogelo ele teto eyo omuthukulelaga wukuuwa. Mbwenye oliye ahisaddula mubuwelo waye. Oliye wambela wonelamo wihina Yehova omparihedha mabasa naarive ahinonne ewogelo ele. Mary wera: “Ebaribari ya mBibliyani sapama, sokweya, ni podi wathukulela athu osaddula egumi yewa.”

16. Akala kunawedha ovenya vaade, enukavihere ddi okanna kopolo?

¹⁶ Podi wera we onofuna wapara mabasa oolaleya mbwenye, kunawedha ovenya vaade. Okanne ebaribari wi Yehova onowawona makathamiho yayo enuufwanya. Oliye podi wuvaha ofuru wowalaleya ale enukavihera ninga enferimero, obe amediku enasamalela egumi yawo. Ohiya eyo, kuwaliganihege mabasa onapariwe peeno naale waparesiwe mundduli, eyo podi wuthukulela okwerebeya. Kubuwela makalelo Yehova anukaviheriye peeno. Wera ndo, onere okanna kopolo dhowanana makathamiho wahiyelele ohagalala.

17. Mowiwanana ni Eclesiastes 11:6, mwahaya bwaddi kinafwanelela wasukuma mabasa oolaleya?

¹⁷ Iyo nnowilibihera waala thanga dhebaribari, mbwenye kannone thanga baani enaamele ni enakanne musisi. (Omwileri Eclesiastes 11:6.) Kubuwela yereye ni Barbara. Oliye ohukanna yaka dhokwaranya 80 mbwenye kanaselela olaleya ni telefoni ni makarta. Njhangala nimodha alembiye, muwarimwa oliye ompwehamo Sentinela a 1º de março a 2014, anna musolo: “O que Deus tem feito por você.” Barbara kaanonne wihina karta naaye nahaakeliwa naanamatelana yahile okala Anamona a Yehova. Aliwa yahileri revista nne dila dhowinjhivadhene. Mamune wera akala ninga Yehova dinawoga ni oliye kove ni kove. Anamatelana ale wambela woona mutugumano, dila yoharela dhigavinre yaka 27 ohogolowela okala Anamona a Yehova. Kubuwela ohagalala anna Barbara ni kopolo anniyena mwaha wamareeliho wakarta nne anlembiye.

18. Wihina nakale kopolo dha Mulugu nerege ddi?

¹⁸ Yehova ononifugulela ofuru dhowinjhiva wihina nakale kopolo dhaye. Ninga nonilihu oliye ohunivaha ofuru wolobela, Bibliya, addibilihu oomuzimuni ni mabasa oolaleya. Oparihedhe mabasa pama ofuru ola onavahiwiwe. Neragana ndala nnere wonelamo wihina Yehova, kanna kopolove baahi mbwenye anofuna onikavihera. Omuroromele baabo oodhulu, okanne ebaribari wi ‘mento a Yehova enosugwa elabo yatene, wihina emukavihere ole onna murima wapama’. — 2 Cró. 16:9.