1-2. Ninga anawoga Atos 8:27-31, 35-38, yamuthukulele mukudda Etiyope ole obaddiziwa yaali ddi?

ONOFUNA obaddiziwa wi okale namahara a Yesu? Odhivela ni otamalela winnathukulela athu amodha obaddiziwa. Woone yopadduwa ya mudhari amulaba musano oWetiyopiya.

² Mukudda Etiyopiya ole, ooparihedha mabasa Dholebela dhahudheriye. (Omwileri Atos 8:27-31, 35-38.) Yamweriha yaali ddi? Mwebaribarene oliye oovaha thima Madhu a Mulugu. Akarati mukarosani enawetiwa ni ng’ombe, owileri epaddi ya livuru na Izayiya. Filipi agawogile nuuliye, mulobwana ole wenjhedhedha otamalela waye mwaha ele amwerele Yesu. Mwahaya bwaddi mulobwana ole adhe adhowege oJeruzale? Mwaha oomudhivela vanlubale Yehova. Nnonne addi? Oliye ahogolowela oJeruzale amwebedhiyewo Yehova. Enakala ninga mulobwana ola, ahihiya webedha weelabwaye vano witaganyihedha ni nlogo niipelekile wi emulabelege Mulugu eebaribari. Wula waali odhivela anniyena ni Yehova wamuthukulele ohara dila yela, ofiyedha obaddiziwa ni okala namahara a Kiristu.​—Mat. 28:19.

3. Enamuthukulela muthu ohubaddiziwa ddi? (Osugwe kwaduru “ Murima wawo onaligana ni thaya baani?”)

³ Omudhivela Yehova onowuthukulela obaddiziwa. Teto odhivela wimodhave podi wuthukulela ohubaddiziwa. Ni mukalelo baani? Woone dhotajhiha ndha. We podi wadhivela amudhawo ni akwawo, ofiyedha wambela woova obaddiziwa wubuwelaga wi, aliwa enere ogiidda. (Mat. 10:37)  Obe ohukanna dhilemelelo dhabure ononniwe wi Mulugu kanadhiveliwa, mbwenye kunanda osukuma. (Sal. 97:10) Obe onowubuwela mudhidhi wajhesiwe mathanga owebedha wowoota, wubuwela mathanga ala podi wurusaga wasukuma mathanga enamutakalela Mulugu. (1 Cor. 10:20, 21) Bumwahaya enohoweleya wikoha: “Miyo ginathabwesa omudhivela aani ni ginathabwa odhiveliwa ddi?”

4. Enuthukulele obaddiziwa ddi?

⁴ Dhihikalawo dhithu dhowinjhiva dhapama dhinudhivela ni dhinuweriha we otamalela. Ninga Bibliya. Podi wera ohunathi omuhudhera Bibliya ni Anamona a Yehova we weresa omuriha. Ohiya eyo we wahihudhera omudhivela Yesu. Vano wanoniliwe Anamona a Yehova podi wera onodhiveliwa okala naaliwa. Odhiveliwa dhithu dhendha sapama, mbwenye kahiyo eyeneve bahi enuthukulele we wipeleka wa Yehova ni obaddiziwa. Mwebaribarene enuthukulele obaddiziwa fudhivela onniwena ni Yehova Mulugu. We wamudhivela Yehova opitha dhithu dhatedhene, kavo ethu enuhihe opeleka egumawo mmadani mwaye. Obaddiziwa ni omudhivela Yehova,winere wuvaha kopolo yokala dila yaye yebaribari.

5. Nikoho baani nnakuliwe?

⁵ Yesu ohuwoga wi enohoweleya omudhivela Yehova, ni murimihu watene, ni emuthu yehu yatene, ni mubuwelo wehu watene, ni kopolo dhehu dhatene. (Mar. 12:30) We onere ddi wi okanne odhivela ni nriho na vati vamurima ni Yehova? Wubuwela makalelo Yehova onihiliye odhivela waye niwe, winere wuthukulela omuwelihedha odhivela waye. (1 João 4:19) Wakanna odhivela ni Yehova dhofuna ni dhowera dhawo dhinereyege yekiwa. Nimakalelo baani? * Siyeyo nnafunihu woona.

6. Ninga anawoga Romanos 1:20, makalelo mamodha oohudhera wodhela Yehova baavi?

⁶ Ohudhere wodhela Yehova ni dhopaddusa dhaye. (Omwileri Romanos 1:20; Apo. 4:11) Wabihe wubuwela thotho Yehova alabihedhiye wi apadduse muthanko ni anenyama. Ohudhere makalelo mwiili wehu onalabiwa. (Sal. 139:14) Wubuwele kopolo Yehova ovahiliye nduwa. Nduwa thendderi enna kopolo dhohiyana ni thendderi dhimodha. * (Isa. 40:26) Makalelo ayo oopendda enere wukavihera wenjhedhedha nriho ni Yehova. Mbwenye onona baahi wi Yehova dathotho ni dakopolo kinaakwana. Onona ndho omambelelo wowandana wenyu. Akala onofuna wenjhedhedha odhivela onniwena ni Yehova, enohoweleya ohudhera wodhela oliye.

7. Wihina okanne odhivela winlubale ni Yehova, enahoweleya onone ebaribari baani?

⁷ Okalena ebaribari wi Yehova kanaapwatha athu ninga nikuru baahi, mbwenye onompwatha kadda muthu. Enowurusa orumedha wi Mpaddusi oodhulu ni Elabo yavati ohunona wi we ohukalawo ni onowupwatha? Akala onubuwela ndo, wubuwele wi Yehova “kali wolapela wa kadda muthu wa iyo.” (Atos 17:26-28) Oliye “onoosugwa murima dhatedhene” ni onopaganya wi, wamusayela, oliye onere wuhiya wi onfiyedhe. (1 Cró. 28:9) Mwebaribarene, we onamuhudhera Bibliya mwaha Yehova duwithanile. (Jer. 31:3) Wonelamo dhatedhene Yehova anuwereliye, odhivela onniwena ni Yehova onerege wenjhedhedheya.

8. Onoonihe addi wi onootamalela odhivela wa Yehova?

 ⁸ Makalelo mamodha ootamalela odhivela wa Yehova futhapanya nuliye. Walobelaga, omwaddelege Mulugu dhithu dhinuthuwathuwiha ni omutamalele dhithu dhapama anuwereliye ni opwasedhe makalelo anaakuliye malobelo awo. (Sal. 116:1) Werana ndo onere wenjhedhedha odhivela wawo nuliye ni onere olibiha wandana wenyu. Onere okanna ebaribari wi onowuvuruwana. Mbwenye wihina wandane pamadhene ni Mulugu, enohoweleya onona makalelo anubuweliye ni ele anajhehiye wi werena. Wihina onone dhithu ndha: ohudhere Madhu aye, eri mBibliyani.

9. Onoonihe addi wi ononvaha thima Bibliya?

⁹ Ohudhere ovaha thima Madhu a Mulugu. Bibliya dinawoga ebaribari ya Yehova ndhithu onafuniye werana osogolo. Bumwahaya egafuneya omwileri Bibliya malabo amatene. Wadhowaga omuhudhera Bibliya, wiwegeredhege pama. Ovirihegemo dhatedhene onahudheriwe. Weragana ndo, onere woniha wi ononvaha thima Bibliya. (Sal. 119:97, 99; João 17:17) Ohukanna porogarama oomwileri Bibliya? Malabo amatene onowanda omuhara porogarama yoyo?

10. Dhithu baani Bibliya onawogiye malivuru mamodha ehinawogiwa?

¹⁰ Bibliya baahi dinasoriha dhego dherilena athu emoonile Yesu. Bibliya baahi dinawoga ele Yesu uwereliye. Ohudhera dhego erilena Yesu ni awogiliye dhinere wuthukulela okanna odhivela nuuliye.

11. Enuukavihere ddi wenjhedhedha odhivela wawo ni Yehova?

¹¹ Ohudhere omudhivela Yesu, odhivela wawo ni Yehova onere wunnuwa. Mwaha waddi? Mwaha Yesu onotajhiha pamadhene dhikalelo dha babe. (João 14:9) Bumwahaya, wahudheragave wodhela Yesu, onere omunona pamadhene Yehova ni onerege onvaha thima oliye. Wubuwele makalelo Yesu aweddeliye thagaraga athu yahapwathiwa​—athu oohawa, aredda naale yahanna kopolo dhowiwakihedha. Wubuwele madhu ookavihera onawoga Yesu, ni makalelo egumawo enafuniwa okala wavirihamo madhu yala.​—Mat. 5:1-11; 7:24-27.

12. Wahudhera dhithu dhimodha wodhela Yesu, enuthukulela wera ddi?

 ¹² Ohiya eyo, wubuwele mukutho erilena Yesu ni murimaye watene: oliye uukwele wene, wihina dhothega dhawo dhileveleliwe. (Mat. 20:28) Wubuwela eyo mwebaribarene enere wenjhedhedha odhivela wawo onniwena ni Yesu. Ohiya eyo, enere wuthukulela othwaruwa dhothega dhawo ni omuloba Yehova nikurumuwelo. (Atos 3:19, 20; 1 João 1:9) Wamudhivela Yesu ni Yehova, onerege ofuna okala naale enna odhivela wimodhave.

13. Yehova anuuvahe ddi?

¹³ Ohudhere odhivela emudhi ya Yehova. Podi wera amudhawo ehinonile ebaribari ni akwawo akale, kinonelamo ethu enuthukulela obaddiziwa. Podi wera aliwa enere uwidda. Mbwenye Yehova kanuhiye wekawo: oliye anowuvaha emudhi yomuzimuni. Wakalaga malabo matene naaddibila naarogola a mmulogoni, onere ofwanya odhivela nnikavihero onafuniwe. (Mar. 10:29, 30; Heb. 10:24, 25) Wavira mudhidhi, podi wera amudhawo enere othoma okala vamodha ni we emwebedhaga Yehova ni enere okanna dhikalelo Bibliya anawogiye.​—1 Ped. 2:12

14. Ninga anawoga 1 João 5:3, ohudhere ddi wodhela dila dha Yehova?

¹⁴ Ohudhere otamalela ni ovirihamo ndhe Yehova dhinafuniye. Ohunathi omunona Yehova, podi wera wahikanna mubuwelo wawene wodhela ele eli yapama ni yabure. Mbwenye, vano ohunona pamadhene wi dila dhatedhene dha Yehova sapama. (Sal. 1:1-3; omwileri 1 João 5:3.) Wawubuwele madhu a Bibliya enawogiwa wodhela anamatela, ahiyana, ababi ni anamwani. (Efé. 5:22–6:4) Onoonamo wi dholaga ndha dhinokavihera muralawo okala wohagalala? Wubuwela dhoxagiha Yehova onavahiye wodhela makalelo wowasakula akwawo. We wiwelela dhoxagiha ndha dhinowukavihera okanna dhikalelo dhapama? Ki vano, onoonamo wi oli muthu oohagalala? (Pro. 13:20; 1 Cor. 15:33) Podi wera we ohakula wi “hee”.

15. Enuukavihere ddi onona makalelo oohara malagano a mBibliyani?

¹⁵ Podi wera malabo mamodha, we kunanda wahara pamadhene malagano a mBibliyani onahudheriwe. Bumwahaya Yehova agalabihedha nikuru naye. Nikuru nno, nnokumiha muselu dha mBibliyani dhinukavihera onona ele eli yapama ni yabure. (Heb. 5:13, 14) Wileri ni ohudhere muselu ndha. Werana ndo, onere woona makalelo enukaviheriwa ni wonelamo kadda ethu enafuneya. Ohiya eyo, dhinere wukavihera okala epaddi ya nikuru na Yehova.

16. Yehova anegeredha avi nlogo naye?

¹⁶ Ohudhere odhivela ni okavihera nikuru na Yehova. Yehova onowegeredha nikuru naye mulogo mulogo. Oliye ohumuthoma mwanaye Yesu, wihina akale Musoro dha mulogo dhatedhene. (Efé. 1:22; 5:23) Peeno, ehikalawo mabasa enahoweleya wi epariwege ni mulogo ndha. Wihina epariwe pamadhene mabasa ala, Yesu ohuthoma nikuru ning’ono anithaniye “mudhari oororomeleya ni athotho”. Nikuru nno, alobwana oothikitheliwa ehinavudhuwana mutholo wewa wowujhiha ni wobarela epaddi yawo yomuzimuni. (Mat. 24:45-47) Makalelo mamodha a mudhari oororomeleya anusamaleliye, fuwathoma anamaholela mulogo oofwanelela eli mmulogoni mwawo wihina yuweddihege ni yubarelege. (Isa. 32:1, 2; Heb. 13:17; 1 Ped. 5:2, 3) Anamaholela mulogo enofuna wi yukavihere, enofuna wulibiha ni wukavihera okanna wanda woliba ni Yehova. Makalelo mamodha oofuneya aanamaholela mulogo, fuwuxagiha wihina wandege  wahudhiha athu amodha wodhela Yehova.​—Efé. 4:11-13.

17. Ninga anawoga Romanos 10:10, 13, 14, mwahaya bwaddi nigawogaga naathu amodha wodhela Yehova?

¹⁷ Wakavihere amodha ohudhera omudhivela Yehova. Yesu oharuma anamahara aye wi yahudhihe athu amodha wodhela Yehova. (Mat. 28:19, 20) Ebaribari wi malabo mamodha iyo podi wiwelela nlamulo nno mwaha wowaddihedhiwa. Mbwenye odhivela wawo ni Yehova wunnuwaga, onere okala ninga murumiwi Pedro ni João. Aliwa ehiwoga yegi: “Iyo kannaselele owoga dhithu nonilihu ni ndhe niwalihu.” (Atos 4:20) Ethu enathabwa odhana ohagalala fumukavihera muthu okanna odhivela ni Yehova. Wubuwele makalelo Filipi ahagalaliye mwaha womukavihera mukudda etiyopiya ole onona ebaribari ya Yolebela ni omukavihera obaddiziwa. Wamutajhihaga Filipi wiwelelaga nlamulo na olaleya, we onowoniha wi onofuna okala Namona a Yehova. (Omwileri Romanos 10:10, 13, 14.) Ebaribari yuuddiginya murima, podi wera onere okoha ninga mukudda etiyopiya ole aakohile egi: “Enagihalela ddi wihina gibaddiziwe?”​—Atos 8:36.

18. Ohudhera onaharela nnasunze ddi?

¹⁸ Yothoma yawo yathima ya mwigumi mwawo, fubaddiziwa. Woona wi obaddiziwa kahiyo ethu yamasika, enohoweleya wubuwela pamadhene dhithu dhatedhene dhinahoweleya. Ethu baani enahoweleya wi onone wodhela obaddiziwa? Ethu baani enahoweleya werana, ohunathi ni wamala obaddiziwa? Ohudhera onaharela onere wawakula makoho yala.