1. Muthu aafunaga omaga nyumba enohoweleya ere ddi?

OMUBUWELE muthu anafuna omaga nyumbaye. Oliye ohunona makalelo a nyumba onafuniye omaga. Enahoweleya wi oliye akume athamagaga wihina agule ethu sithu wi ambele omaga nyumbaye? Naari. Ahinaambele omaga, enohoweleya ethu emodha yathima​—wekela konta korowadha dhinahoweliye wihina amagena nyumbaye. Mwahaya bwaddi? Mwaha wi sofuneya onona akala ohukanna korowa enahoweleya wihina amarihe omaga nyumbaye. Oliye apendda dhithu dhinafuneya ahinambele olabihedha, mwebaribarene onere oroma mabasa aye ni onere wamariha mabasa amatene.

2. Ninga munawogela Lucas 14:27-30, wafunaga obaddiziwa enohoweleya were ddi?

² Omudhivela ni omutamalela Yehova wuhuthukulela ofiyedha wubuwela wi obaddiziwe? Akala siyeyo, enakala ninga mulobwana ole onafuna omaga nyumba. Mwahaya bwaddi nigawogaga ndo? Kasugwa madhu a Yesu eli va Lucas 14:27-30. (Omwileri.) Vala, Yesu asoriha ethu enatapulela okala namahara aye. Akala nnafuna nikale namahara a Yesu, nrumedhe oliva “kontadha”​—ninga makathamiho ni osukuma dhithu dhinanidhivela. (Lucas 9:23-26; 12:51-53) Mowindo, ohunathi obaddiziwa, wabihe opendde pamadhene wodhela dhatedhene dhinahoweleya. Werana ndo onere okanna kopolo wihina omulabegeve Mulugu ninga enerana mukiristawu oobaddiziwa.

3. Yohudhera ela enafuna ethapanyedhe muselu baani?

³ Wilibihera wawo wi okale namahara apama oobaddiziwa a kiristu enodhana mareeliho? Hee! Obaddiziwa winofugula musiwo dhinadhana mareeliho owinjhiva​—ovanene ni osogolo.  Vano ndoweni nthapanyedhe makoho athima wodhela obaddiziwa. Dhowakula dhawo dhinere wukavihera waakula nikoho nna, “Gihiwegeredha wi gibaddiziwe?

4. a) Wipeleka enatapulela ddi? b) Ninga enawoga Mateus 16:24 “wikodda wekawo”, enatapulela ddi?

⁴ Wipeleka enatapulela ddi? Wafunaga obaddiziwa, enohoweleya wipeleka. Wipeleka enatapulela nlobelo oneriwena omwaddelaga Yehova wi onere olabihedha egumi yawo omulabelege oliye malabo amatene. Wipeleka wi omulabele Mulugu, we “onowikodda” wekawo. (Omwileri Mateus 16:24.) Vano oli a Yehova. Werana eyo, ethu yathima. (Rom. 14:8) Wipelekaga onamwaddela Mulugu wi wambela ovanene odhowa osogolo onamulabelege oliye ohiya widhivela wamwinyo. Wipeleka wawo olibela​—mutholo munlubale vamentoni va Mulugu. Yehova kananiwaddihedha werana mpaganyo ola. Mbwenye napaganya, oliye onajheha wi nakwanelihe dhatedhene niwogilihu nuuliye.​—Sal. 116:12, 14.

5. Obaddiziwa ni wipeleka wihiyanne addi?

⁵ Obaddiziwa ni wipeleka wihiyanne addi? Wipeleka fwawo weka, we ni Yehova baahi. * Obaddiziwa onereya vathaddo, vamentoni vaathu atene, enabaddiziwa vamusonkanoni wa murudda obe wa malabo mararu. Wabaddiziwaga, onowawoniha amodha wi ohumala wipeleka wa Yehova. Mowindo, obaddiziwa wawo winere wawoniha athu amodha wi onomudhivela Yehova Mulugu awo ni murimawo waatene, emuthu yawo, mubuwelo ni kopolo dhawo ni ohuthoma omulabela mwigumini mwawo ni mukalakala.​—Marcos 12:30.

6-7. Ninga anawoga 1 Pedro 3:18-22, dhithu bili dhineriha wi obaddiziwa wikale wofuneya sivi?

⁶ Mweebaribarene enohoweleya obaddiziwa? Kasugwa ele Bibliya anawogeye va 1 Pedro 3:18-22. (Omwileri.) Mwanddeya ole, wooniha wi Nowe ahikanna nroromelo. Obaddiziwa wawo winowawoniha athu atene wi ohumala wipeleka wa Yehova. Mweebaribarene, enohoweleya obaddiziwa? Hee, enohoweleya. Peduru ohuwoga mwahaya bwaddi egahoweleya obaddiziwa. Vobajha obaddiziwa winere “wuvulusa”. Negi obaddiziwa winivuluse enohoweleya okanna nroromelo ni Yesu. Nikanne nroromelo wi oliye anikwenle iyo ni ohuvenyihiwa muukwani wihina adhowe odhulu, vano oliye “ali mono wojha wa Mulugu”.

⁷ Yanabili, obaddiziwa winonivaha “mubuwelo wapama”. Napeleka egumi wa Mulugu, vano nnobaddiziwa , nnere wandana nuuliye. Mwaha wootwaruwa ni nroromelo ninnihuna wodhela mukutho wa Yesu, ebaribarene Mulugu onere onilevelela dhotega dhehu. Teto, Mulugu onere onivaha “mubuwelo wapama”.

8. Enuuthukulele obaddiziwa ddi?

⁸ Enuuthukulele othoma wi obaddiziwe ddi? Wodhela ohudhera wawo wa Bibliya, we ohudhera dhithu dhowinjhiva wodhela Yehova​—ninga ekalelo yaye ni dila dhaye. Dhatedhene ohudheriwe wodhela oliye dhihuddiginya murima ni dhihuthukulela okanna odhivela nuuliye. Odhivela onniwena ni Yehova sithu enuthukulele wi obaddiziwe.

9. Ninga anawoga Mateus 28:19, 20, obaddiziwa ‘ni ndina na baba na mwaana ni muzimu wotxena’, enatapulela ddi?

⁹ Ethu emodha enuthukulela obaddiziwa, muselu dhebaribari dha mBibliyani orumedhiwe ni wubuwela awogiliye Yesu arumaga wi mudhowe mwahudhihe athu wi ekale anamahara. (Omwileri Mateus 28:19, 20.) Ninga awogile Yesu, anamahudhera ayo  ebaddiziwege ni ‘ndina na babi, na mwaana ni muzimu wotxena.’ Ela enatapulela ddi? Enatapulela orumedha ni murima wawo watene ebaribari ya mBibliyani wodhela Yehova, mwanaye Yesu, ni muzimu wotxena. Ebaribari ela ehikanna kopolo, podi oddiginya murima wawo. (Heb. 4:12) Nnere ohudhera dhithu ndha.

10-11. Ebaribari ya Mulugu ohudheriwe ni orumedhiwe sivi?

¹⁰ Onowubuwela mudhidhi wambeliwe ohudhera ebaribari wodhela Mulugu? Motajhiha, “ndina naye di Yehova,” “Namadhulu-dhulu a elabo yatene,” oliye baahi dili “Mulugu ebaribari.” (Sal. 83:18; Isa. 37:16) Oliye Mpaddusi ehu ni “anavulusa di Yehova.” (Sal. 3:8; 36:9) Oliye ohusayela makalelo wi anivuluse muuthegani, muukwani ni ohunivaha ejhehedhelo yokalawo ni mukalakala. (João 17:3) Wipeleka wawo ni obaddiziwa, winowutonya ninga Namona a Yehova. (Isa. 43:10-12) Mulugu oheriha wihina okale epaddi ya emudhi ya anamwebedha enahagalala mwaha wowiithaniwa ni ndina na Mulugu ni wawaaddela athu amodha ebaribari yaye.​—Sal. 86:12.

¹¹ Gari enlubale ononelamo ele Bibliya anahudhihiye wodhela Mulugu! Warumedha ebaribari ela yathima, murima wawo onere wuthukulela wipeleka ni obaddiziwa.

12-13. Ebaribari ohudheriwe ni onarumedhiwe wodhela Yesu sivi?

¹² Wonelemo avi ohudheriwe ebaribari wodhela Mwanaye? Yesu di muthu anabili athima odhulu ni elabo yavati. Duliyene Anoobole. Oliye ohuleva egumaye wi anobole. Akala nnowoniha wodhela dhowera dhehu wi nihikanna nroromelo nuuliye, nnere oleveleliwa dhothega dhehu, nnere wenjhedhedha wandana wehu ni Mulugu ni wakela egumi yohimala. (João 3:16) Yesu Namakutha ehu Munddimuwa. Oliye anafuna anikavihere opurelamo mukutho eriliyena ni okanna wandana wapama ni Mulugu. (Heb. 4:15; 7:24, 25) Ninga Mwene a Omwene wa Mulugu, Yehova onere omulabihedha wi atxenihe ndina naye, amarihe obure, ni adhena mareliho ohumala Mparayisu. (Mat. 6:9, 10; Apo. 11:15) Yesu yotajhiha yapama. (1 Ped. 2:21) Oliye ohunivaha yotajhiha wodhela wipeleka ni werena efunelo ya Mulugu.​—João 4:34.

¹³ Warumedha ele Bibliya anahudhihiye, onohudhera makalelo oomudhivela Yesu oli mwana Yehova anamudhiveliye. Odhivela wula winowuthukulela werana efunelo ya Mulugu ninga Yesu. Yeyo enere wuthukulela wipeleka wa Yehova ni obaddiziwa.

14-15. Ebaribari wodhela muzimu wotxena ohudheriwe ni onarumedhiwe sivi?

¹⁴ Ogahudhere ebaribari wodhela muzimu wotxena wonelemo ddi? Muzimu wotxena ola, kahiyo muthu mbwenye kopolo dha Mulugu. Yehova ohulabihedha muzimu wotxena wihina aakaviherena aliba omuleba Bibliya. Peeno muzimu ola ononikavihera wonelamo ni oharihedha ndhe nnahudherihu mBibliyani. (João 14:26; 2 Ped. 1:21) Wodhela muzimu wotxena, Yehova ononivaha “Kopolo dhohikala dha masika”. (2 Cor. 4:7) Muzimu wotxena ononivaha kopolo wi nande olaleya muthenga dhapama ogonjhiha dhoweha, okwerebeya ni wagonjhiha makathamiho. Muzimu ola, ononikavihera woniha dhikalelo dhapama dhinerela epaddi ya “yowima ya muzimu wotxena”. (Gál. 5:22) Ale enamuroromela Mulugu ni enaloba muzimu waye wotxena enovahiwa mohipimelela.​—Luc. 11:13.

¹⁵ Sapama onona wi ale enamwebedha Yehova podi ororomela wi muzimu wotxena onowakavihera omulabela oliye! Warumedha ele bibliya anahudhihiye wodhela muzimu wotxena, enowuthukulela wipeleka wa Mulugu ni obaddiziwa.

16. Ofiyedha vala ohudhera wula nipunrevo ddi?

 ¹⁶ Othoma wipeleka wa Mulugu ni obaddiziwa ethu ya thima. Ninga nonilihu, werana eyo, enohoweleya orumedha dhatedhene dhinupadduwele​—enatapulela, orumedha dhoweha ni werena kukuthu. Mbwenye mareeliho onawakeliwe ehiyana ni kukuthu oneriwe. Obaddiziwa podi wuvulusa ni wuvaha mubuwelo wapama vamentoni va Mulugu. Ethu ya thima enuthukulele wipeleka ni obaddiziwa ekale odhivela onniwena ni Yehova Mulugu. Ororomele ni murima wawo watene ebaribari ohudheriwe odhela babi, Mwana ni muzimu wotxena. Nihudherihu ofiyedha vala, onakule avi nikoho nna: “Gihiwegeredha wi gibaddiziwe?

17. Dhithu dhinahoweleya wi muthu erena ahinabaddiziwe sivi?

¹⁷ Akala onowoona wi ohiwegeredha wi obaddiziwe, podi wera oherana ethu sithu wi wandane ni Yehova. * Mwaha ohudhera wawo wa Bibliya, ohufiyedha onona dhithu dhowinjhiva wodhela Yehova ni Yesu. Vano ohukanna nroromelo. (Heb. 11:6) Vano onororomela mpaganyo Yehova apaganyiye dhili mBibliyani ni ohukanna ebaribari wi ororomela mukuthu erilena Yesu podi wuvulusa mwa dhothega ni okwa. Ohutharuwa dhothega dhawo, onokubanya vanlubale mwaha dhoviriganiha dhawo weriliwena wale ni ohumuloba Yehova wi ulevelele. We ohurugunuwa, obe, ohureya dduli mweddelo wanniwena, vano othukunle mweddelo onamuhagalasa Mulugu. (Atos 3:19) Mwaha wohagalala, kuwoona mudhidhi wowawaddela athu amodha wodhela nroromelo nawo. Bumwahaya odhe wilibiherege wi okale namalaleya ohubaddiziwa ni wambele olaleya vamodha ni mulogo. (Mat. 24:14) Yehova onoohagalala vanlubale mwaha dhithu dhatedhene ndha weriliwena. We ohumuhagalasa vanlubale Yehova.​—Pro. 27:11.

18. Dhithu dhimodha dhinahoweleya werana ohunabaddiziwe sivi?

¹⁸ Ohunabaddiziwe enohoweleya werana dhithu dhimodha. Ninga nihudherihu we onohowela wipeleka wa Mulugu. Ogaali weka, olobele wa Yehova omwaddelaga wi onafuna olabihedhe egumi yawo weragana efunelo yaye. (1 Ped. 4:2) Wamala, omwaddele namaholela a nikuru nanamaholela mulogo wi onafuna obaddiziwe. Oliye anere waloba anamaholela mulogo amodha wi ethapanye ni we. Mbwenye kuwoove. Anamaholela mulogo ayo ehunona ni ehikanna odhivela ni we. Aliwa enere ovirisedha vamodha ni we dhohudhiha dhili mBibliyani ohudheriwe. Aliwa enafuna enone akala onowonelamo dhohudhiha dha mBibliyani ni akala ohunona ofuneya wo wipeleka ni obaddiziwa. Aliwa yoona wi we ohiwegeredha enere wuwaddela wi onere obaddiziwa vamusonkanoni obe musonkano wa malabo mararu.

19-20. Enahoweleya ddi wamala obaddiziwa, ki onande addi?

¹⁹ Wamala obaddiziwa enohoweleya were ddi? * Wubuwele wi wipeleka olibela, Yehova anajheha wi wakwanelihe ele opaganyiwe. Bumwahaya wamala obaddiziwa, mweddelo wawo wiwananege ni wipeleka wawo. Onande addi?

²⁰ Vobajha, odideleve otugumana ni mulogo wawo. Wabaddiziwa, onere okala epaddi ya nikuru ninlubale naaddibila. (1 Ped. 2:17) Addibila ni arogola a mmulogoni enaakale amudhi awo oomuzimuni. Wahijhombaga mmutugumanoni, onerege olibiha wandana onniwena naaliwa. Ethu yanabili, omwilerigi Bibliya malabo amatene ni wubuwelege ele onileriwe. (Sal. 1:1, 2) Wileri epaddi ya Bibliya, wabihege wimela wi wubuwelele pamadhene eli wileriwe. Wera ndo, madhu a Bibliya enere wuddiginya murima. Ethu yanatharu, “owaralihe olobela”. (Mat. 26:41) Walobelaga ni murima wamutene, onothabwa wandana ni Yehova. Ethu yanennayi, “odidele waja Omwene”. (Mat. 6:33) We podi werana eyo wahelaga mburo wobajha mabasa olaleya mwigumini mwawo. Wakanna elemelelo yodhowa mmalaleyelo, nroromelo nawo nnakala nolibanene. We ohukanna gari yowakavihera athu amodha ofwanya dila ya egumi yohimala.​—1 Tim. 4:16.

21. Obaddiziwa wawo onafugula musiwo baani?

²¹ Wipeleka wa Yehova ni obaddiziwa yothoma ya thima oneriwena mwegumini mwawo. Mweebaribarene dhihikalawo dhithu “dhinavolowelavo”. Mbwenye nerege wi sapama? Mohanganyedha! Makathamiho bimakathamiho enufwanye mwilaboni muna yabure, ‘bovira ni bojajaleene’(2 Cor. 4:17) Ohiya eyo, wabaddiziwa onoofugula musiwo dhowinjhiva dha egumi yohagalala peeno ni egumi yeebaribari osogoro. (1 Tim. 6:19) Mowindo, wubuwele pama ni olobele mwaha yowakula yawo ya nikoho nna: Gihiwegeredha wi gibaddiziwe?