1. Yesu, aavahile nlamulo baani anamahara aye?

EMAHIYU yele Yesu ahinathi okwa, ahiwoga nlamulo ni anamahara aye. Oliye awogile egi: “Ninga guudhivelimini, mudhivelege.’ Vasogolova oliye wera: Mwadhivelanaga mmodha ni mukwaye, athu atene enere onona wi muri anamahara aaga.”​—João 13:34, 35.

2. Ekalele ddi yathima odhivelana mmodha ni mukwaye?

² Yesu awogile wihina nnere ononiwa wi niri anamahara aye, nakalana odhivela wimodhave oonihedhe oliye. Nlamulo nna, kanaali baahi nanamaharave a Yesu a mudhidhi yole, mbwenye nnonipatha nihiyowa peeno. Bubwahaya egahoweleyaga okanna odhivela mmodha ni mukwaye naari dhiruse dhihiruse.

3. Ethu baani nnafunihu osuza muwari mwa yohudhera ela?

³ Odhivelana mmodha ni mukwaye, kahiyo ethu yokweya. Malabo mamodha ohilogomana winonipupurusa. Naari dhigarive nndo, enohoweleya wilibihera wihina nimutajhihe Yesu kiristu. Muwari mwa yohudhera ela nnere, woona makalelo odhivela winanikaviheriwa ofiyedha ofwanya murenddele vamodha ni wawakela aleddo. Naasuzaga muselu ola, wikohege: Ethu baani ginaahudherimi naaddibila obe naarogola enaagikavihere woniha odhivela mmodha ni mukwaye naari dhiruse dhihiruse?

4. Ninga anawoga Mateus 5:23, 24, mwahaya bwaddi egahoweleyaga oteyihana akala ddibila obe murogola ohunithegela?

⁴ Yesu ohunihudhiha wi ddibila anithegela, nimusayele wihina nteyihane. (Omwileri Mateus 5:23, 24.) Yesu owogile wi nakanna wandana wapana nathu amodha, nnere omuhagalasa  Mulugu. Yehova onohagalala vanlubale, oonaga wilibihera wehu wi nikanne murenddele naaddibilihu. Ohiya eyeneve, nakoya ntxiga naaddibila obe naakodda oteyinana, Yehova kanarumedha webedha wehu.​—1 João 4:20.

5. Mwahaya bwaddi ddibila ole, adhe akoddege okurumuwela?

⁵ Athu abili yathegelana, kahiyo yokweya olevelenana ofiyedha oteyihana. Mwahaya bwaddi egereya ndo? Kasugwa ethu empadduwele Mark. * Ddibila ammulogoni, ahimukuula mwaha oliye aamuwogile obure, awaddelaga addibila amodha amulogoni. Ethu baani erilena Mark? Oliye ohusoriha egi: “Miyo onyanyuwa ofiyedha owana nuuliye.” Nuuvira mudhidhi, Marki otwaruwa wodhela ethu yela erihedhiye. Oliye oveda makalelo oomuloba nikurumuwelo ddilala ole aawanniyena wi eteyihane. Mbwenye ddibila ole okodda, newene kaafuna omulevelela Mark. Omambelelo, Mark wera: Mwahaya bwaddi egahoweleyaga omuwadda? Oliya dihinafuna wi nteyihane! Mbwenye namaholela oweeddedda, omukongomedha wi kahiyo oselela omuloba nikurumwelo. Ki ethu baani erilena Mark?

6. a) Mark ilibihere addi oveda murenddele? b) Mark odidele addi oparihedha mabasa yolebela ya Colossenses 3:13, 14?

⁶ Mark nupendda makalelo aye owubuwela, wonelamo wi yohoweleya wi akala owiyeviha, teto wiwona mwinya wihina ohukanna mubuwelo wofunesa marazawu. Oliye wonelamo wi enohoweleya osaddula mowaguva mubuwelo waye. (Col. 3:8, 9, 12) Vano Mark wiyeviha, odhowa oloba dila bili nikurumuwelo wa ddibila ole. Oliye omulebela karta wera: “gihisinyuwa, vano ginafuna we ni miyo, nirome wanddana wixa. Mark ofiyedha, ogula dhego dhoniye wi ddibila ole onere odhiveliwa, odhowana wi anvahe. Yabureya sowi, ddibila ole ahididela okoya ntxiga nuuliye. Naari dhigarive ndo, Mark ohudidela  wiwelela nlamulo nnakongomedha wi naalevelelege addibila obe nikanne odhivela naaliwa. (Omwileri Colossenses 3:13, 14.) Ninga dhimwereyele Mark, podi okalavo ddibila ohunafuna orumedha oteyihana ni we. Mbwenye odhivela wehu wekiristawu, onere onikavihera omulevelela ddibila ni olobela wihina muladdu wehu nuuliye omale ni murenddele.​—Mat. 18:21, 22; Gál. 6:9.

7. a) Yesu onafuna naapwathege athu ni makalelo baani? b) Ethu baani yorusa emwereyele murogola Lara?

⁷ Yesu annafuna wi naapwathege athu ninga nnafunihu opwathiwa. Vasogolova oliye ohusoriha wi kahiyo wadhivelaga bahi athu enna odhivela ni iyo. (Luc. 6:31-33) Naari nihifunaga, mmulogoni podi okalamo ddibila obe murogola ohunafuna onaddamela obe onilojhela. Dhereya ndo, neere ddi? Lara yahimwereyela ethu ninga yeyo. Oliye ohusoriha egi: “Murogola mmodha kaafuna ogisugwa, teto miyo kaganona muladduya. Eyo yogipiha mbani vanlubale. Malabwene gaadhowaga omutugumanoni, gadhowesa oowukuwene.” Omambelelowene Lara wera: Miyo kaginna muladdu, murogola ola ohunoniwa mmulogoni wi dabure.’

8. Ethu baani erilena Lara wihina akanne omurenddele ni murogola, ki ethu empadduwile oliye enanihudhiha ddi?

⁸ Lara daaromile wilibihera wi oliye ni murogola ole, okalevo murenddele. Oliye nuumala olobela, omusayela murogola ole wihina ethapanye vamodha. Aliwa othapanyedha museluya, okubarelana vano obajha oteyihana. Iyo nuwerana ndo, yakala ninga muladduya ohumala. Teto nuvira mudhidhene ninga munawogela Lara, “murogola ole ohogolowela omurabela ninga eeresiye. Lara okwerebeya vanlubale!” Omambelelowene, Lara oonamo wi onere ohagalala murogola ole asaddula mubuwelo waye. Vano oliye wonelamo, wi enafuneya sowi adidele mudhivela oliye ni “amulevelelege mohiwaddihedhiwa.” (Efé. 4:32-5:2; 1 Cor. 13:5, 7) Nuwindo, Lara okanna murenddele mmubuweloni. Nuvira mudhidhene, murogola ole obajha omuriha Lara. Wadidela odhivela onniwena naaddibila obe naarogola, mwebaribarene ‘Mulugu oodhivela ni amurenddele, onere okala ni we.”​—2 Cor. 13:11.

9. Ninga munawogela Atos 10:34, 35, mwahaya bwaddi egahoweleya okala athu ehinna nsakulo?

⁹ Yehova kanna nsakulo. (Omwileri Atos 10:34, 35.) Iyo nahikanna nsakulo, nnowoniha wi nili ahima a Yehova. Bumwahaya, nigiwelela nlamulo nnakongomedha okanna odhivela ni mwanddamani. Teto nnowilibihera wi mmologoni mwikale murenddele ni wiwanana.​—Rom. 12:9, 10; Tia. 2:8, 9.

10-11. Murogola Ruth ethu baani eriliyena, wihina agonjhihe mubuwelo wabure anniyena?

¹⁰ Athu amodha, ohukanna nsakulo, winowarusa. Kabe noone yampadduwele murogola anithaniwa Ruth. Oliye agali namwali, muthu aali mwanodha eelabweyo ahimwerihedha ethu yabure. Eyo yanongile addi mubuwelo waye? Ruth kanakuwa: “Miyo gowidda dhego dhatedhene dhadhela elabo yele.” Miyo gubuwela wi athu atene eelabo yele yamaligana, naaddibilaya yogitakalela.” Ethu baani erilena Ruth wihina agonjhihe mubuwelo ola wabure?

¹¹ Ruth nuupendda pama, wonelamo wi yohoweleya osaddula mubuwelo waye ni owanana ofiyedha ogonjhiha mubuwelo wabure anniyena. Oliye obajha wileri thalako dhili mu Anuário dha elabo yele. Ruth ohusoriha egi: “Gahilibihera wi gapwathege ni makalelo apama athu atene yadhela eelabo yele. Vano miyo obajha woona wi addibila eelabo yele yali ooviheya ni mabasa oomwene. Mwaha wa yeyo, gahonelamo pamadhene wi aliwa enokosa epaddi yaddibila elabo yatene.” Nuuvira mudhidhene, Ruth woona wi yohoweleya werana ethu emodha. Oliye ohusoriha egi: “Malabwene gagumana ni ddibila obe ni murogola eelabo yele, gowilibihera wi githapanyege naaliwa ni makalelo apama. Othapanya vamodha naaliwa, wahigikavihera wanona pamadhene.” Wilibihera waye wahidhana mareliho? Ruth ohakula egi: “Nuvira mudhidhene, mubuwelo waga wabure omala orimela.”

12. Muladdu baani aanna murogola Sarah?

¹² Athu amodha podi okanna nsakulo wula ehinonaga. Motajhiha Sarah, ubuwela wi kanna nsakulo mwaha oliye kaafuna watoriha athu wodhela kore, oreela obe mabasa ammulogoni. Mbwenye oliye kanakuwa: “ Miyo obajha woona meeka wi gihikanna nsakulo mmurimana.” Nsakulo ni makalelo baani? Sarah amudhaye atene boosuza, mwaha wa yeyo oliye afunesa wandana bahi naathu oosuza ninga oliye. Nlabo nimodha Sarah owoga ni mukwaye wera: “Miyo gineedda bahi naathu oosuza. Ale ehisuzile miyo kaginaafuna.” Madhu ala enowoniha wi yohoweleya Sarah osaddula mubuwelo waye. Oliye aandile addi osaddula mubuwelo waye?

13. Nnahudheravo ddi makalelo Sarah asadduliye mubuwelo waye?

¹³ Namaholela oweeddedda, ahimukavihera Sarah wihina ipendde yeka wodhela muselu yola. Sarah ohusoriha egi: “Namaholela ooweddedda, ogithethela vanlubale mwaha makalelo aaga oowakula makoho mmutugumanoni ni enonelo yaga yaBibliya. Vasogolova, wera enonelo yinjhivaga enohoweleya okala amanddile, okala oolevelela ni owiyeviha.” Sarah wakoya mmurimani madhu ala aawogile namaholela oweddedda. Sarah ohusoriha: “Namaholela oweddedda, nuuwoga ndo, miyo wonelamo wi okala muthu oodhivela obe apama ethu yathima.” Vasogolova Sarah obajha wawona addibila ni makalelo apama. Sarah ohusoriha egi: “Miyo wilibihera ofiyedha wonelamo wi dhikalelo dhinomuthukulela muthu okala athima vamentoni va Yehova.” Ki iyovano? Kahiyo wenya wihina enonelo yehu enubuwelihe wi nili athu athima wapitha  athu amodha. Nakanna “odhivela wahinamala” naaddibila, nsakulo kanidha nikanna mburo.mwigumini mwehu.​—1 Ped. 2:17.

14. Ninga munawogela Hebreus 13:16, nawakelaga aleddo Yehova onakala avi?

¹⁴ Yehova onovaha thima wawakela aleddo. (Omwileri Hebreus 13:16.) Nakanna elemelelo yo wawakela aleddo obe yowakavihera aliba ohawa, Yehova onovaha thima webedha wehu. (Tia. 1:27; 2:14-17) Bumwahaya Bibliya agasoriha egi: “Malabwene mwawakelege aleddo.” (Rom. 12:13) Wawakela addibila ninga aleddo, makalelo oowoniha wi nihikanna odhivela naaliwa, obe makalelo oowoniha wi nnofuna wandana naaddibila. (1 Ped. 4:8-10) Mbwenye naafunaga wawakela aleddo dhihikalawo dhego dhinakathamiha.

15-16. a) Mwahaya bwaddi athu amodha egakanna manyazo wawakela aleddo? b) Ethu baani emukavihere Edit ofiyedha peeno agadhiveliwa wawakela aleddo?

¹⁵ Iyo podi okanna manyazo wawakela aleddo mwaha wohawa. Wubuwele tajhiha yamamukwele onithaniwa Edit. Ahinathi ohudhera ebaribari, oliye kaafuna okala mudhidhene naathu. Oliye ubuwela wi ale enawakela aleddo, athu ookanna.

¹⁶ Edit nuumala ohudhera ebaribari makalelo aye owubuwela ehisadduwa. Vano oliye onowawakela aleddo. Oliye ohuwoga egi: “Mudhidhi emagiwaga Nyumba yehu Yomwene, namaholela amulogo owoga ni miyo wera: ‘Murogola Edit, ohukalawo ddibila ni mwariye onadha okavihera mabasa oomaga Nyumba Yomwene, enere owomela wawakela vaade venyu sumana bili? Vano miyo wubuwela makalelo Yehova aamureelihiye mamukwele akala elabo yo Sarefá.” (1 Reis 17: 12-16) Edit ahirumedha omwakela ddibila ni mwariye vaade vaye. Edit ohakela mareeliho? Oliye ohuwoga egi: Ohiya ohaya vaade sumana bili, ddibila ole ni mwariye, yohoweleya ekale vaade mweri minli. Mudhidhi yola wahinikavira wandana vanlubale.” Mareeliho mamodha awakele Edit, fukanna akwaye apama ammulogoni. Oliye peeno piyonera, onodhiveliwa wawithana akwaye onadhowesiyena  mmalaleyelo wihina yajhe vamodha vaade vaye. Edit ohusoriha egi: “Wakavihera athu amodha, winogivaha murenddele mwigumini mwaga! Teto ginowakela mareeliho owinjhiva.”​—Heb. 13:1, 2.

17. Luke vamodha ni mwariye, ethu baani yoneliwamo wodhela wawakela aleddo?

¹⁷ Akala nnodhiveliwa wawakela athu vaade, podi wera enohoweleya osaddula makalelo ehu oowawakela aleddo. Motajhiha, Luke vamodha ni mwariye enodhiveliwa wawakela aleddo. Aliwa yadhiveliwa bahi wawakela amudhi ewa, akwiwa avati vamurima ni anamaholela oweeddedda vamodha ni amwariwa. Mbwenye Luke ohusoriha egi: “Iyo nahonelamo yekihu wi nnadhiveliwa bahi wawakela vaade akwihu avati vamurima.” Ethu baani erilena Luke ni mwariye wihina ekale anamakela aleddo apama?

18. Ethu baani erilena Luke ni mwariye wi ekaleve athu enawakela aleddo?

¹⁸ Luke ni mwariye, yandile osaddula mubuwelo wewa nuumala openda madhu a Yesu enihina: “Nyu, mwakanna odhivela bahi naathu enna odhivela ni nyu, mareeliho baani munawakelinyu?” (Mat. 5:45-47) Aliwa yahonelamo wi yohoweleya omutajhiha Yehova onadhiveliwa wavaha athu atene. Nuwindo, aliwa wawithanela vaade vewa addibila ni arogola ehinawithanelegiwa vaade. Luke ohusoriha egi: “Mudhidhi wowakela vaadevihu addibila ehinawithanelegihu vaade, iyo atene nahidhiveliwa vanlubale. Athu atene nawithanelihu vaade, wafiya mudhidhi womwadheya, atene nakumavo oolibihiwene ni oohagalalene.”

19. Nnatonyihedhe addi wi niri anamahara a Yesu, ki we okuma peeno odhowa osogolo onafuna werege ddi?

¹⁹ Muwari mwa yohudhera ela, nihoona wi odhivela wehu, winonikavihera oteyihana yakuma magudhulano naakwihu, winonikavira ohukanna nsakulo ni winonikavihera wawakela aleddo. Enohoweleya ogonjhiha mubuwelo watene wabure, nilibihere wi nikanne odhivela naaddibila ni murima watene. Nerana ndo, ohiya ohagalalave bahi nnere otonyihedha wi niri anamahara a Yesu.​—João 13:17, 35.