1. Makathamiho baani enaafwanya adhaari a Yehova?

ONOOFWANYIWA makathamiho? Podi wera ddibila mmulogoni ohuwukuula. (Tia. 3:2) Obe mukwawo oskola obe omabasani onowuteya mwaha okala Namona a Yehova. (1 Ped. 4:3, 4) Teto podi wera amudhawo enowukoddiha oya omutugumanoni obe odhowa mmalaleyelo. (Mat. 10:35, 36) Wafwanyiwa makathamiho oorusa, podi wuwaka kopolo dhomulabelana Yehova. Mbwenye okanne ebaribari wihina naarive ofwanyiwaga makathamiho ohiyana-iyana, Yehova anere wuvaha thotho ni kopolo wihina wande wavilelana.

2. Ninga munawogela Romanos 15:4, omwileri Bibliya onanikavihere addi?

² Yehova ohenya wi mBibliyani, mulebiwe makalelo adhaari aye akale yawanniwana makathamiho. Mwaha waddi? Wihina nihudhere ethu-sithu niile yapadduwele. Bumwahaya Yehova adhe anvethelege murumiwi Pawulo madhu enafwanyeya va Romanos 15:4. (Omwileri.) Wileri dhopadduwa ndha dha mBibliyani podi onlibiha ni onivaha ejhehedhelo. Mbwenye wihina dhinikavihere, kahi omwilerive Bibliya baahi. Enohoweleya orumedha wi dholebela ndha dhisaddule mubuwelo wehu ni dhiddahinye murima wehu. Nahowela dhoholela wihina niwanena makathamiho bi makathamiho, nere ddi? Ohare thalo dhinaharela: (1) Olobele, (2) Wubuwele, (3) Opendde, ni (4) Oparihedhe mabasa. Ohudhera wula, nnere woona yotapulela ya kadda thalo. * Teto nnere olabihedha ele empadduwele mwene Davidi ni murumiwi Pawulo.

3. Enahoweleya were ddi wihina Yehova ukavihere?

³ (1) Olobele. Omwaddele Yehova makalelo oriwe mwaha makathamiho enuufwanya. Motajhiha, wasayelaga dholaga  wodhela makathamiho enuufwanya, omulobe Yehova yoholela wihina ofwanye mBibliyani yolebela enuukavihere onona ethu onahoweliwe werana. — Fil. 4:6, 7; Tia. 1:5.

4. Wihina dhopadduwa ndha dha mBibliyani dhutukule murima enuukavihere ddi?

⁴ (2) Wubuwele. Yehova ohunivaha makalelo owubuwela ootikiniha. Wihina dhopadduwa ndha dha mBibliyani dhutukule murima, orajhihege wimela wi wubuwele dhupadduwelaga mwigumini mwawo. Okalege ninga dhithu ndhe woniliwe dhinna wupadduwela.

5. Opendda ddiniyani, ki we onapendde addi?

⁵ (3) Opendde. Opendda, makalelo owubuwela moopwasedha ele onileriwe ni wubuwela kadda thalo onaparihedhiwe mwigumini mwawo. Opendda winowukavihera woona makalelo dhithu onileriwe dhiniwananiwa ni moonelo wowakwanela wodhela muselu yole. Motajhiha, omwileri Bibliya winaligana ni opiya. Wahigumaniha tempero dhatedhene kinakuma yojha yodhiva. Vano opendda winaligana nuugumaniha tempero dhatedhene wihina ekume yojha enadhiveliwiwe. Wihina nande opendda, nnohowela wawerana makoho enaharela: ‘Muliba opadduweliwa makathamiho ola erile ddi wihina agonjhihe makathamiho yaanfwanye? Yehova amukavihere addi? Ela gihudherimi enaagikavihere avi ovilela?’

6. Mwahaya bwaddi egahoweleya oparihedha mabasa dhithu nnahudherihu?

⁶ (4) Oparihedhe mabasa. Yesu wera ole ahinaparihedha mabasa ele anahudheriye, analigana ni muthu anamaga nyumba yaye vamutxesani. Mabasaye atene aapariliye aparenle yoovi. Mwaha waddi? Mwaha wi wadha nipevo ni muzogwe, nyumba ele enobwanyuwavo. (Mat. 7:24-27) Ni makalelo mamodhave, nahiparihedha mabasa ndhe nnahudherihu, wilibihera wehu, malobelo wehu, wubuwela ni opendda wehu nnerana ebewene. Nlabo nroromelo nehu nnadhiwa nehiwa ni makathamiho obe oharahariwa, nnere okwerebeya. Mbwenye naparihedhaga mabasa ndhe nnahudherihu, nnere wanda othoma dhego dhapama ni nnere okanna murenddele teto nroromelo nehu nnooliba. (Isa. 48:17, 18) Vano nnafuna noone makalelo ooparihedha mabasa thalo nayi nihudherihu ni ndhe dhimpadduwele mwene Davidi.

7. Yopadduwa baani ya mBibliyani nnafunihu woona ovanene?

⁷ Mukwawo obe mmudhaawo, anoopwazaga nroromelo nawo? Akala eyo ehupadduwela, ethu enukavihere fuwubuwela ethu erilena mwene Davidi, mwanaye Abisalawu afunaga omuhaba omwene waye. — 2 Sam. 15:5-14, 31; 18:6-14.

8. Onamulobe ddi Yehova?

⁸ (1) Olobele. Wahinathi wileri ele empadduwele mwene Davidi, wabihe omwaddela Yehova makathamiho enawuukula. (Sal. 6:6-9) Wamala, olobe dhoholela dha Yehova wihina ofwanye dholaga dha mBibliyani dhinukavihere.

9. Davidi ni Abisalawu yapadduwele ddi?

⁹ (2) Wubuwele. Wubuwele dhatedhene dhimpadduwele mwene Davidi, ni makalelo baani dhampiliwa mbani. Yobajha, Abisalawu, mwaana Davidi, onoomala yakadhene abebedhaga odhivela wa nlogo. (2 Sam. 15:7) Vano agoonile wi mudhidhi ohufiya, oliye waruma anameddelela elabo yatene yo Izarayeli wihina yegeredhe nlogo emusakule Abisalawu ninga mwene. Ohiya eyo oliye omuleketha Ayitofeli, wihina akale epaddi yaye. Abisalawu wihabiha omwene, nuwindo oliye waaja makalelo wihina aape ababe, mudhidhi egaali aredda. (Sal. 41:1-9) Davidi  nuwona wi mwanaye Abisalawu afuna ampe oliye othawela oJeruzale. Vano, anyakoddo Abisalawu osayela makalelo wihina ewane ni anyakoddo a Davidi. Abisalawu ogonjhihiwa ofiyedha opiwa.

10. Ethu baani erena mwene Davidi?

¹⁰ Wamala, wubuwele dhatene dhimpadduwele Davidi. Oliye omudhivela Abisalawu ni oomuroromela Ayitofeli. Mbwenye aliwa yahifiyedha omuguliha naarive agaali mukwiwa. Ohiya omuukulave, waaja makalelo ompa. Davidi agahihiya waroromela akwaye, aanganyedhaga wihina naaliwaya ehitaganyihedha ni Abisalawu. Ahakale muthu mmodha erege wikubanyedha ni erege osayela makalelo othawa. Mbwenye Davidi kerilena ndo. Oliye ahanda wawanana makathamiho ale ofiyedha wagonjhiha. Davidi andile addi?

11. Dhithu baani erilena Davidi nuufwanyiwa mudhidhi woorusa?

¹¹ (3) Opendde. Onahudhera ddi ni ndhe dhimpadduwele Davidi mwigumini mwaaye? Waakule nikoho nna: “Wihina Davidi agonjhihe makathamiho ale erilena ddi?” Ohiya okanna marulu, Davidi ahilabihedha thotho. Oliye kasegedheyile mwaha wowoova obe ohuthoma ethu. Ohiya eyo, ahilobela alobaga nikavihero na Yehova. Vasogolova, oliye oloba nikavihero naakwaye. Nuwindo oliye oparihedha mabasa ndhe aathomiliye. Podive agaali owuukuwene, Davidi kahiyile waroromela athu amodha, newene kaakoyile ntxiga. Oliye odhowagave amuroromelaga Yehova vamodha naakwaye.

12. Yehova erilena ddi wihina amukavihere Davidi?

¹² Yehova amukavihere addi Davidi? Napendda vang’no, nnowona wi Yehova ahinvaha kopolo wihina ande ovilela. (Sal. 3:1-8; cabeçalho) Yehova oreeliha dhoothoma dha Davidi. Vasogolova, Yehova wakavihera akwaye oororomeleya ewanaga wihina embarele.

13. Muthu awuukula onaamutajhihe addi Davidi? (Mateus 18:15-17)

¹³ (4) Oparihedhe mabasa. Wikohe: ‘Ginande addi omutajhiha Davidi?’ Wakanna muladdu, otxokotxele mowaguva. Muladdu bu muladdu onuufwanya oparihedhe mabasa yolaga ya Yesu enafwanyeya va Mateus kapitulu 18. (Omwileri Mateus 18:15-17.) Kuthomege bure-bure ni maruluya obe mwaha wotujiwa. Omulobe nikavihero Yehova wihina murima wawo okurumuwe ni uvahe thotho dhowanana makathamiho awo. Kuhiye waroromela akwawo, mbwenye orumedhe nikavihero neewa. (Pro. 17:17) Yinlubaleya wa dhego dhatedhene, oharege dholaga dha Yehova dhinafwanyeya mBibliyani. — Pro. 3:5, 6.

14. Dholebela ndha dha 2 Tim. 1:12-16; 4:6-11, 17-22, dhinulibihe addi wafwanyiwaga makathamiho?

¹⁴ Mudhidhi yola, amudhawo enna wuharahara? Elabo onakaliwe enookoddihiwa olaleya? Akala enupadduwela siyela, yolebela ya 2 Timóteo 1:12-16; 4:6-11, 17-22 podi wulibiha. * Pawulo alebile yolebela ela agaali mukambura.

15. Ethu baani onaamulobiwe Yehova?

¹⁵ (1) Olobele. Wahinileri yopadduwa ela, omwaaddele Yehova makathamiho enuufwanya ni makalelo oriwe. Windo, omulobe Yehova wihina ofwanye yolebela eniwanana niile yampadduwele Pawulo.

16. Empadduwele Pawulo ddiniyani?

 ¹⁶ (2) Wubuwele. Wipwehe vamburoni va Pawulo, agaali oRoma mbwenye agamagiwe ni kurenti. Oliye onorajhihaga omagiwa, mbwenye olenddo ola fopiwa. Akwaye amodha anniyena ehimala omuthawa, mwaha wa yeyo oli ookwerebeyene. — 2 Tim. 1:15.

17. Ethu baani erena Pawulo mudhidhi yole?

¹⁷ Podi wera Pawulo agahikirati sutukumwee ubuwelaga ele empadduwele mundduli: “Gahere gerana ethu emodha kagamagiwe.” Podi wera agahanyanyuwela athu eelabo yo Aziya mwaha omuthawa, ni agahihiya waroromela akwaye amodha. Mbwenye Pawulo kerilena ndo. Yamukavihere Pawulo waroromela akwaye ni Yehova yaali ddi?

18. Pawulo erilena ddi wihina awanena makathamiho aye?

¹⁸ (3) Opendde. Waakule nikoho: ‘Pawulo erilena ddi wihina agonjhihe makathamiho aye?’ Naarive athuusiwaga nuukwa, Pawulo kadduwale ethu yathima — omuthithimiha Yehova. Oliye kaaselele waaja makalelo owalibiha akwaye. Oliye wooniha wi oomuroromela Yehova mwaha wolobela malabo amatene. (2 Tim. 1:3) Pawulo kagiratile sutukumwee ikubanyedhaga mwaha addibila yaamuthawile. Ohiya eyo, waja makalelo owatamalela akwaye yamukavihere. Teto, Pawulo kaaselele wahudhera Madhu a Mulugu. (2 Tim. 3:16, 17; 4:13) Yathimaya, ahikanna ebaribari wi Yehova ni Yesu enomudhivela. Mwaha wa mabasaye oororomeleya apariye, aliwa kiyamusukume Pawulo mbwenye yere omureeliha.

19. Yehova aamukavihere avi Pawulo?

¹⁹ Yehova ahimwaddela Pawulo wi mwaha wokala mukiristawu ere oharahariwa. (Atos 21:11-13) Yehova aamukavihere addi Pawulo? Oliye wawakula malobelo a Pawulo, ni onvaha kopolo. (2 Tim. 4:17) Pawulo ororomelihiwa wihina ere wawakela mareeliho mwaha wa mabasa aapariye. Yehova walabihedha akwaye wihina emukavihere mwa makalelo ahoweliye.

20. Mowiwanana ni Romanos 8:38, 39, nnaatajhihe avi nroromelo na Pawulo?

²⁰ (4) Oparihedhe mabasa. Wikohe: ‘Ginamutajhihe avi Pawulo?’ Ninga murumiwi Pawulo, nnojhehera oharahariwa mwaha wa nroromelo nehu. (Mar. 10:29, 30) Wihina nikaleve oororomeleya wa Yehova naarive nifwanyiwaga makathamiho, enohoweleya nilobelege malabwene ni nihudherege Madhu aye malabo amatene. Kanidduwale wi ethu yathima mwigumini mwehu fumuthithimiha Yehova. Nikanne ebaribari wi Yehova kadha aninyanyala, ni kawo ethu enerana athu enafiyedhe omariha odhivela anna Yehova ni iyo. — Omwileri Romanos 8:38, 39; Heb. 13:5, 6.

21. Emukavihere Aya ni Hector ogonjhiha makathamiho yanniwana ddi?

²¹ Naarive nifwanyiwaga makathamiho bi makathamiho, dhopadduwa dha mBibliyani podi onlibiha. Motajhiha, Aya, piyonera anakala oJapawu, onosoriha egi: Thalako ya Jonasi ehigikavihera ogonjhiha woova ni wapara mabasa oolaleya. Hector, muzombwe anakala o Indoneziya ababe ehili makiristawu, onosoriha egi: Empadduwele Ruti enomuthukulela ohudhera wodhela Yehova ni omulabela oliye.

22. Wihina vidiyu ndha dhinakumihiwa mBibliyani ni epaddi enawoga “Imite a Sua Fé” dhuukavihere were ddi?

²² Onaafwanye waani dhopadduwa dha mBibliyani dhinalibihe nroromelo nawo? Wileriwa wa Bibliya ninga darama, vidiyu ni epaddi ya “Imite a Sua Fé” dhinoddahinya murima. *  Malivuru ala enotonyihedha wi yahipwasedhiwa otoliwa muselu dhebaribari. Vowindo wahinabajhe olabihedha va ohudhera wawo wavayeka, omulobe Yehova wihina ukavihere ofwanya thalo dhinukavihere. Wipwehege va mburo wa muthu ole anawoga. Openddege dhithu yerilena adhaari a Yehova ni makalelo Yehova aakaviheriye wagonjhiha makathamiho. Wamala, weregena ndhe onahudheriwe. Omutamalele Yehova mwaha wa nikavihero anuvahiiye. Wihina wonihe wi onotamalela nikavihero nno osayele makalelo owalibiha ni owakavihera athu amodha.

23. Ninga munawogela Isaías 41:10, 13, Yehova onipaganye ddi?

²³ Okala elabo ela enasugweriwa ni saddana kahi ethu yokweya. Malabo mamodha kaninkanna yowera. (2 Tim. 3:1) Mbwenye kannahowela othuwathuwa newene woova. Yehova ohunona dhithu dhinanipadduwela. Podive nikwakwatuwe, oliye ohupaganya wihina anere oniparela ni moono waye woojha. (Omwileri Isaías 41:10, 13.) Nihikanna ebaribari wihina Yehova anere onikavihera, teto Bibliya anonivaha kopolo nnahowelihu wihina naawanena makathamiho bi makathamiho enanifwanya mwigumini mwehu.