1. Ninga munawogela Mateus 24:9, mwahaya bwaddi elabo yaniddaga kannatikina?

YEHOVA anipadduse wihina nadhivelege athu amodha ni aliwa enidhivelege. Bumwahaya, muthu aniddaga nnotakaleliwa teto nnowova. Motajhiha, murogola dhala anithaniwa Jeyorjina anakala elabo yo Ewuropa anowoga egi: “Nganna yaka 14, mmani oogidda mwaha wokala Namona a Yehova. Goona ninga kaginna thima, miyo obajha wanganyedha wi kagaali muthu apama.” * Ddibila dhala anithaniwa Danylo ohuleba egi: “Atoropa nugivada, nugiruwana ni nugithusa mwaha wokala Namona a Yehova, gahoova ni goona wi kaginna thima.” Makalelo ala owiddiwa enopiha mbani, mbwenye kannatikina. Mwaha Yesu ahiwoga wihina nerege widdiwa. — Omwileri Mateus 24:9.

2-3. Anamahara a Yesu eniddeliwa ddi?

² Elabo enowawidda anamahara a Yesu. Mwaha wa ddi? Mwaha ‘kannakosa epaddi ya elabo’ ninga Yesu. (João 15:17-19) Naarive naarihaga anamathonga, kannakokorela bandera ni dhithu dhimodha. Nnamukokorela Yehova baahi. Iyo nnamwakihedha Mulugu wi dinna ofuru wowalamulela athu — ofuru Saddana vamodha ni ale eli epaddi yaye enavanyihiwa. (Gén. 3:1-5, 15) Nnolaleya wihina Omwene wa Mulugu baahi bunamarihe makathamiho amatene aathu ni onere watolosa anamathonga atene amwilaboni. (Dan. 2:44; Apo. 19:19-21) Muthenga ola onowahagalasa athu owiyeviha, mbwenye onowatakalela athu abure. — Sal. 37:10, 11.

 ³ Ethu emodha enaniddeliwa, sowihina nnowawiwelela malamulo a Mulugu. Naliganiha malamulo a Mulugu ni malamulo a elabo ela, nnowona wi enohiyana pamadhene. Motajhiha, kale Mulugu ahigujhula luwani ya Sodoma ni Gomora mwaha dhowera dhewa dhabure ni mararuwo. Peeno elabo enna mweddelo mmodhave! (Judas 7) Mwaha wa ohara malamulo a mBibliyani enawoga wodhela dhithu dhonyakavala athu owinjhiva enoniteya ni enawoga wi nihikanna nsakulo! — 1 Ped. 4:3, 4.

4. Dhikalelo baani dhinanikavihera ovilela niiddiwaga?

⁴ Enaanikavihere ovilelana widdiwa ni oruwaniwa ddi? Enohoweleya okanna nroromelo wi Yehova anere onikavihera. Nroromelo nnaligana ni mujhila wa munyakoddo onanikavihera ‘othimiha mathere amatene amwiddani.’ (Efé. 6:16) Mbwenye nroromelove kannakwana. Nnohowela okanna odhivela. Mwaha wa ddi? Mwaha muthu anna odhivela kanaguvela onyanyuwa. Anovilelana dhithu dhatedhene, ni anojheha dhithu dhatedhene, naarive athu emukuulaga. (1 Cor. 13:4-7, 13) Vano nnafuna noone makalelo oomudhivela Yehova, wadhivela addibila ni wadhivela amwiddani winanikaviheriwa ovilela niiddiwaga.

5. Makalelo Yesu amudhiveliye Babe wamulibihe avi?

⁵ Ohalaga mudhidhi vang’ono wihina apiwe ni amwiddani aye, Yesu ahiwoga ni anamahara aye oororomeleya egi: ‘Miyo ginowadhivela Ababa, bumwahaya, ngerana dhithu ninga egirumiliwa.’ (João 14:31) Makalelo Yesu amudhiveliye Yehova wahinvaha kopolo wihina awanena makathamiho yadha. Omudhivela wehu Yehova podi onikavihera ni makalelo mamodhave.

6. Ninga munawogela Romanos 5:3-5, mwaha widdiwa ni elabo, adhaari a Yehova enakala avi?

⁶ Omudhivela Mulugu onna wakavihera adhaari a Yehova ovilela yaharahariwaga. Motajhiha, onamathonga winlubale wa aJudewu wahakoddiha arumiwi olaleya. Mbwenye arumiwi yahikanna odhivela winlubale ni Yehova. Bumwahaya, edhe ethomege ‘omwiwelela Mulugu ninga namathonga ohiya athu.’ (Atos 5:29; 1 João 5:3) Ethu emodhave enopadduwa ni addibila a peeno. Owinjhiva enoharahariwa ni anamathonga abure, mbwenye omudhivela Yehova onowavaha kopolo dhovilela. Bumwahaya elabo yaniddaga kannakwerebeya, mbwenye nnona ninga gari yomulabela Mulugu ehu. — Atos 5:41; omwileri Romanos 5:3-5.

7. Naharahariwaga ni amudhihu nerege ddi?

⁷ Podi wera nniddiwa ni amudhihu. Nabajha omuhudhera Bibliya, athu amodha avamuralani podi wubuwelaga wi nnolekethiwa. Amodha podi wubuwelaga wi naataduwa. (Omusugwe Marcos 3:21.) Aliwa podi oniharahara nuuwali. Ekalelo ela kinantikiniha. Mwaha Yesu ohuwoga egi: ‘Amwiddani a muthu enakale athu avaade vaye.’ (Mat. 10:36) Naarive amudhihu ehinirihaga iyo kannawona ninga amwiddani. Ohiya eyo odhivela wehu ni Yehova wunnuwaga, odhivela wehu naathu amodha wunnuwege. (Mat. 22:37-39) Mbwenye kanihiye wawiwelela malamulo ni malagano a mBibliyani wi nimuhagalase muthu.

8-9. Emukavihere murogola ola okala oolibene naari aharahariwaga ddi?

⁸ Jeyorjina, awogiwe mundduli, ahanda okalave oolibene naarive amaye emuharaharaga. Jeyorjina ohusoriha egi: “Miyo gaabanjhe omuhudhera Bibliya mudhidhi mmodhave ni mmani. Mbwenye nuuvira mweri mitanu nammodha, gifunaga oya omutugumanoni mubuwelo wamama osadduwa. Miyo woona  wihina yoothapanya ni mapostata, teto yolabihedha mubuwelo wewa yawogaga ni miyo. Yogiruwana, yogiweta mathithi, yogimaga mukothi ni yowarahila malivuru aaga. Gibaddiziwe nganna yaka 15. Wihina egihihe omulabela Yehova, ogithukulela mburo winakala azombwe ehinna mweddelo wapama. Gakala vaari va azombwe yajha murombwe dhinanonga ogoogo ni yaali atimbwini. Kahi yokweya owanana oharahariwa onadhela wa muthu nnonnihu wihina onofwanelela onidhivela ni onisamalela.”

⁹ Jeyorjina owannena avi oharahariwa wula? Oliye ohuwoga egi: “Labo amama yabanjhiwa ogiharahara naali labo nimodhave gamamlimi omwileri Bibliya aamutene. Kaganganyedha wihina gahifwanya ebaribari, gowoona wihina wandana waaga ni Yehova wahithabwa oliba. Galobelaga, oliye ogivuruwanesa. Mudhidhi gikalaga mburo winakala azombwe ehinna mweddelo wapama murogola dhala ogithanela vaade vaye wihina nimuhudhere Bibliya vamodha. Addibila ni arogola yahigikavihera mudhidhi yole. Aliwa yagoona ninga mmudhiwa. Gihanda woona wihina Yehova ohukanna kopolo wapitha amwiddani atene.”

10. Ebaribari baani ninnihuna wodhela Yehova Mulugu ehu?

¹⁰ Murumiwi Pawulo ohuleba wihina kawo ethu enawedhe ‘onimwalaniha ni odhivela wa Mulugu, oli mwimodhani ni Nabwiya ehu Yesu Kiristu.’ (Rom. 8:38, 39) Naarive nifwanyiwaga makathamiho mudhidhi wowinjhivene, nikanne ebaribari wihina Yehova ali epaddi yehu ni anere onlibiha. Teto ninga nonilihu yotajhiha ya Jeyorjina, Yehova anere onikavihera alabihedhaga emudhi yehu yomuzimuni.

11. Odhivela winawogiwa va João 15:12, 13 wakavihere avi anamahara a Yesu? Kawogamo.

¹¹ Emahiyu ele Yesu ahinakwe, ahiwoga ni anamahara aye wihina edhivelanege mmodha ni mukwaye. (Omwileri João 15:12, 13.) Yesu ahinona wihina makalelo ala oodhivelana yere wakavihera okala owiwanana ni ovilelana widdiwa ni elabo. Sugwa epadduwe mulogo wo Tesalonika. Okuma labo witiwe mulogo wo Tesalonika addibila awewule yoharahariwa vanlubale. Naari dhigarive ndo, ehihiya mweddelo wokala oovilela ni odhivela. (1 Tes. 1:3, 6, 7) Pawulo ahakongomedha addibila oTesalonika odhivelanaga ni ‘othabwaga’  woniha odhivela wula (1 Tes. 4:9, 10) Odhivela wowathukulela walibiha ale yaridhale. (1 Tes. 5:14) Addibila oTesalonika yahihara dhoholela ndhe dha Pawulo. Bumwahaya karta alebenliye egavinre yaka modha, oliye ohuwoga egi: ‘Makalelo munadhivelaninyu winna othabwa wunnuwa.’ (2 Tes. 1:3-5) Odhivela wa addibila oTesalonika wihakavihera ovilelana makathamiho ni oharahariwa.

12. Mudhidhi wa koddo, addibila a elabo emodha yonihe avi odhivela mmodha ni mukwaye?

¹² Woone yopadduwa ya Danylo awogiwe mundduli, vamodha ni mwariye. Murudda wakaliwa yahifwanyiwa koddo. Naari dhigarive ndo Danylo odidelave woona mutugumano, olaleya ni wavahamo yoojha addibila amodha yahowela. Labo nimodha, anyakoddo egathukule futhidhiwa onfwanya Danylo. Oliye anowoga egi: “Anyakoddo ale yafuna gihiye ebaribari. Nukodda, aliwa ogivada vano wera nnowuwobela, mbwenye yobela odhulu. Ehinadhowe, aliwa wera nnohogolowa wihina nimugonihe mwariyo. Mbwenye mohilegela addibila onigweliha mukumboyini wihina ndhowe luwani emodhaya. Kaginadduwala odhivela wa addibila ale. Nufiya luwani ele, addibila onivaha dhoojha ni onikavihera ofwanya ganyo ni mburo wokalawo. Marelihoya, nihanda wakavihera addibila amodha yadha murudda waali koddo.” Dhopadduwa ninga dhendha dhinowoniha wihina odhivela waaddibila podi onikavihera ovilelana widdiwa.

13. Muzimu wotxena onanikavihera avi ovilelana mabasa nnamparelihu Yehova naarive athu eniddaga?

¹³ Yesu ehiwoga wihina anamahara aye yohowela wadhivela amwiddani ewa. (Mat. 5:44, 45) Eyo ethu yokweya? Newene! Mbwenye enowandeya nnikavihero na muzimu wotxena wa Mulugu. Ohiya odhivelave baahi, yowima ya muzimu wotxena wa Mulugu enakosa epaddi ya ovilela, opama, omaleya ni wihiha. (Gál. 5:22, 23) Dhikalelo ndha dhatedhene dhinonikavihera ovilela widdiwa. Athu amodha yaali anamaharahara ehisaddula moonelo wewa numoona mwariwa, mamuniwa, aniwa obe amwanddamani yonihaga dhikalelo ndha. Amodha ehisaddula ofiyedha okala addibila. Bumwahaya, akala enowurusa wadhivela ale enuwidda mwaha womulabela Yehova, olobele olobaga muzimu wotxena. (Luc. 11:13) Okanne ebaribari wihina makalelo Mulugu aneriyena dhithu bapama. — Pro. 3:5-7.

14-15. Romanos 12:17-21, amukavihere avi Yasmeen omudhivela mamune naarive amuharaharaga?

 ¹⁴ Sugwa yopadduwa ya Yasmeen, anakala o Oriyenti Mediyu. Nuukala Namona a Yehova, mamune ubuwela wi onolekethiwa vano omuhiha omulabela Yehova. Oliye omuruwana ni waloba amudhaaye, pastori ni namuugu wihina emuthuse ni ewoge wihina ohunyanyala emudhi. Labo nimodha, mamune Yasmeen odhowa Onyumbani Yomwene wihina aaruwane addibila! Yasmeen owunla dila dhowinjhivadhene mwaha wa makalelo ala abure.

¹⁵ Omutugumanoni, Yasmeen olibihiwa ni addibila amunroromeloni. Anamaholela mulogo omukongomedha oparihedha mabasa yolaga eli va Romanos 12:17-21. (Omwileri.) Yasmeen anowoga egi: “Kiyaali yokweya, mbwenye gomuloba Yehova wihina agikavihere, ni gowilibihera oparihedha mabasa dholaga dha mBibliyani. Mamunaga ootakaliha omapiyelo wihina agipujhe, mbwenye miyo gowomihedhawo. Aagiruwanaga, gomwakula nupwaseya. Akala muredda, gomusamalela.”

16-17. Ohudhere ddi ni yopadduwa ya Yasmeen?

¹⁶ Yasmeen ahakela mareeliho mwaha womudhivela mamune. Anowoga egi: “Mamunaga obajha ogiroromela mwaha ahinona wi gawogesa ebaribari. Obajha ogivuruwana ni nriho nathapanyaga wodhela gereja, oliye orumedha wihina murala wehu weddege nimurenddele. Vano onogikongomedha odhowa omutugumanoni. Murala wehu boohagalala, vaade vihikala murenddele. Ginojhehera wihina mamunaga ahudhere ebaribari ni akanne efunelo wi nimulabelege Yehova vamodha.”

¹⁷ Yopadduwa ya Yasmeen enowoniha wi muthu anna odhivela ‘anovilelana dhithu dhatedhene, anojheha dhithu dhatedhene.’ (1 Cor. 13:4, 7) Ebaribari wihina widdiwa kahi ethu enahagalasa ni podi onuukula, mbwenye odhivela ohukanna kopolo. Onodahinya murima. Teto, onomuhagalasa vanlubale Yehova. Mbwenye naarive amwiddani ehu eniddagave iyo podi okala ohagalala. Ni makalelo baani?

18. Naarive niiddiwaga enanihagalasa ddi?

¹⁸ Yesu ohuwoga egi: ‘Athu yuwiddagani munerege ohagalala.’ (Luc. 6:22) Iyo kanere osakula wihina niddiwege. Kannahagalala noonaga goyi mwaha wa nroromelo nehu. Ki vano mwahaya bwaddi nigahagalala niiddiwaga? Dhithu tharu dhinanihagalasa. Yobajha, navilelaga nnomuhagalasa Mulugu. (1 Ped. 4:13,  14) Yanabili, nroromelo nehu nnowomihedheya ni nnakala nooliba. (1 Ped. 1:7) Yanatharu, nnokanna gari yowawakela mareeliho ohagalasa eli egumi yohimala. — Rom. 2:6, 7.

19. Mwahaya bwaddi arumiwi edhe ehagalalege naarive egawaxuliwe?

¹⁹ Ogavinre mudhidhi vang’ono Yesu agavenyihiwe muukwani, arumiwi a Yesu yahifwanyiwa ohagalala awogile Yesu. Nuumala owaxuliwa ni okoddihiwa olaleya, aliwa yahihagalala vanlubale. Mwaha wa ddi? ‘Mwaha wi Mulugu ahafwaneleliha onyemuliwa mwaha wa ndina na Yesu.’ (Atos 5:40-42) Odhivela arumiwi yanniwana ni Yesu wahithabwa wunnuwa opitha wawova amwiddani ewa. Aliwa yahoniha odhivela wula mwaha wa ‘odidela’ olaleya muthenga dhapama. Peeno addibilihu enoomulabelave Yehova nuroromeleya naarive efwanyiwaga makathamiho. Ehinona wi Yehova kadha adduwala mabasa yapanriwa ni odhivela yonihiwa ndina naaye. — Heb. 6:10.

20. Nnahudhere ddi sumaneyo?

²⁰ Ofiyedha omakuthulo wa dhithu ndha elabo enerege onidda. (João 15:19) Mbwenye kannahowela woova. Ninga nnahudherihu ohudhera winadhawo, Yehova ‘anowalibiha ni anowabarela adhaari aye oororomeleya.’ (2 Tes. 3:3) Bumwahaya, odidele omudhivela Yehova, wadhivela addibila vamodha ni amwiddani. Naharaga yolaga ela nnakala owiwanana, epaddi yehu yomuzimuni enakala yolibene, nnovuwiha ndina na Yehova teto nnowoniha wihina odhivela ohukanna kopolo opitha widdiwa.