1. Mwahaya bwaddi Yesu adhe amulobege Yehova wihina aasugwerege anamahara aye?

EMAHIYU yaye yogomihera agaali elabo yavati, Yesu owubuwela makathamiho yafwanye anamahara aye. Mwaha wa makalelo adhiveliye akwaye Yesu omuloba Babe egi: ‘Mwasugwerege mwaha wa Mbure.’ (João 17:14, 15) Yesu ahinona wi mohilegela ere ohogolowela odhulu, teto wi Saddana Ddiyabo ere odidela waharahara ale yafuna omulabela Yehova. Bumwahaya, nlogo na Yehova nere ohowela obareliwa.

2. Enanivaha ebaribari wi Yehova anere wawakula malobelo ehu ddi?

² Mwaha odhivela anniyena ni mwanaye, Yehova werana ele Yesu amulonbiye. Nerana dhatedhene wihina nimwiwelele Yehova, oliye anerege onidhivela. Teto nalobela nilobaga nikavihero ni obareliwa, oliye anere onaakula. Yehova ali ninga babi anathuwa-thuwela murala waye. Oliye kadha ahiya wasamalela anaaye nuudhivela. Mwaha wihina ndina naaye ni emuthu yaye dhili vang’ovini!

3. Mwahaya bwaddi nigahowela obareliwa ni Yehova?

³ Peeno nnothabwa ohowela nikavihero na Yehova. Mwaha wi Saddana ohiigariwa odhulu, odha elabo yavati ‘oonyanyuweene.’ (Apo. 12:12) Oliye anowaweriha athu amodha wubuwelaga wi oniharahara makalelo ‘omparela mabasa ootaleleya Mulugu.’ (João 16:2) Amodha ehinarumedha wi Mulugu ohukalawo enoniharahara mwaha nnohiyana ni athu a mwilaboni. Naarive nihinonaga ethu enathukulela athu amodha oniharahara, kinahoweleya woova. Mwaha waddi? Mwaha Madhu a Mulugu enihina: ‘Nabwiya dororomeleya, oliye anere wulibiha ni anere wubarela mwaha wa Mbure.’ (2 Tes. 3:3) Vano nnafuna nawone makalelo menli Yehova analabihedhiye.

4. Ninga munawogela Efésios 6:13-17, Yehova anivahile ddi wihina nibarele?

⁴ Yehova ohunivaha mujhila dhatedhene dhinanibarela murako dha Saddana. (Omwileri Efésios 6:13-17.) Mbwenye dhinanikavihere nalabihedha kadda epano ya mujhila — ni nahirula. Kadda epano ya mujhila enatapulela ddi? Kabeni none.

5. Sintu na ebaribari ddiniya, ki mwahaya bwaddi nigahowela owara?

⁵ Sintu na ebaribari enatapulela ebaribari enafwanyeya mMadhuni a Mulugu ali Bibliya. Mwahaya bwaddi nigahowela owara? Mwaha wihina Saddana ‘babi owoota.’ (João 8:44) Oliye anna waleketha athu muwari mwa yaka dhowinjhivadhene ‘wapela elabo yatene.’ (Apo. 12:9) Mbwenye ebaribari enafwanyeya mBibliyani enonikavihera ohulekethiwa ni Saddana. Sintu nna na ebaribari nnaalabihedhe addi? Nahudheraga wodhela oliye, namukokorelaga Yehova ni muzimu vamodha ni ebaribari ni nakala oororomeleya mwa dhatedhene. — João 4:24; Efé. 4:25; Heb. 13:18.

6. Yowara ya mujhila ya mutoropa ddiniya, ki mwahaya bwaddi nigahowela owara?

⁶ Yowara ya mujhila ya mutoropa enatapulela malamulo a Yehova. Mwahaya bwaddi nigahowela owara? Kale, yowara ya mujhila yombarela mutoropa wihina ahikakathiwe newene ahilatiwe ni nthere. Bumwahaya, yowara ya mujhila ya mutoropa enobarela murima wehu obe emuthu yehu. Yowara ela enoonibarela wihina nihitaganyihedhe ni mweddelo wa elabo ela. (Pro. 4:23) Yehova anafuna wihina nimudhivelege teto nimulabelege ni murima watene. (Mat. 22:36, 37) Bumwahaya, Saddana agasayela makalelo ogawa murima wehu, wihina nidhivelege dhithu dha mwilaboni — dhithu aniidda Yehova. (Tia. 4:4; 1 João 2:15, 16) Oliye oona wi makalelo ala kipanre mabasa, anosayela makalelo oonithusa wihina nihiye wawiwelela malamulo a Yehova.

7. Nnawara avi yowara yamujhila ya mutoropa?

⁷ Iyo nnowoniha wihina nihiwara yowara yamujhila ya mutoropa narumedhaga malamulo a Yehova ni navirihagamo enawoga malamuloya. (Sal. 97:10) Amodha enona wi muthu aharaga malamulo a Yehova kanakanna ofuru. Mbwenye mudhaari a Yehova onahiya ohara malamulo a Yehova, analigana ni mutoropa anarula dhowara dhaye mwaha wi dhinomunyemela. Werana eyo otaduwa! Muthu anamudhivela Yehova, kanawona malamulo aye ninga oonyemela, mbwenye onoona ninga ethu enavuluse egumi yaye. — 1 João 5:3.

8. Owara sapatho wihina nilaleye muthenga dhapama dha murenddele enatapulela ddi?

⁸ Pawulo ohunikongomedha owara sapatho wihina nilaleye muthenga dhapama dha murenddele. Ni madhu mamodha, nikalege owiwegeredhene wihina nilaleye muthenga dhapama dha Omwene. Nathapanyaga ni athu amodha muthenga dha mBibliyani, nroromelo nehu nnothabwa oliba. Sohagalasa onona wihina wapela elabo yatene nlogo na Yehova ninna olaleya muthenga dhapama — omabasani, oskola, omusika, yaalaleyaga nyumba ni nyumba, yadhowaga ogula ethu-sithu, yathapanyaga ni amudhiwa ni akwiwa, malabo mamodha enolaleya egaali vaade. Nahiya olaleya mwaha woova, nnaliganege ni mutoropa anarula sapatho dhaye vaari va koddo. Mutoropa ahere arula sapatho dhaye, ere olatiwa. Ndo, aakale vang’ovini teto kiyakweye wiwelela dhoholela dha namasogolela aye.

9. Mwahaya bwaddi nigahowela owara yowithithana yunlubale?

⁹ Yowithithana yunlubale ya nroromelo enatapulela nroromelo ninnihuna ni Yehova.  Nnororomela wi Yehova anere werana dhatedhene opaganyiliye. Nroromelo nnonikavihera ‘wathimiha mathere amatene amwiddani.’ Mwahaya bwaddi nigahowela owara yowithithana yunlubale? Mwaha enoonibarela wihina nihilekethiwe ni dhohudhiha dhaale esukume ebaribari, ni ohugurumela mwaha wa ale enawoga obure ndhe nnarumedhihu. Nahikanna nroromelo kannande wibarela amodha yanehaga wihina nihiye waroromela malamulo a Yehova. Mbwenye naakoddaga werana ele Yehova oniddiye nakala oskola obe omabasani nnoniha wi nnolabihedha yowithithana yunlubale. (1 Ped. 3:15) Naakoddaga ganyo enaliva korowa dhowadda mwaha wa ononona wi enere ononga epaddi yehu ya omuzimuni, ninna olabihedha yowithithana yunlubale. (Heb. 13:5, 6) Teto naadidelaga omulabela Yehova naari niharahariwaga yowithithana yunlubale ya nroromelo enoonibarela. — 1 Tes. 2:2.

10. Kapaseti oovulusa anatapulela ddi, ki nnamuwarele ddi?

¹⁰ Kapaseti oovulusa ejhehedhelo Yehova ananivahiye enatonyihedha wihina oliye anere onobola muukwani ni anere wavaha mareeliho ale enerana efunelo yaye. (1 Tes. 5:8; 1 Tim. 4:10; Tito 1:1, 2) Moligana ni kapaseti  amunyakoddo anabareliye musolo waye, kapaseti oovulusa onobarela mubuwelo wehu. Nimakalelo baani? Ejhehedhelo ananivaha Yehova enoniroromeliha mpaganyo dhaye ni enonikavihera okanna monelo wapama naafwanyiwaga makathamiho. Nnamuware aavi kapaseti ola? Enowoneya wihina nihimuwara nubuwelaga ninga Yehova. Motajhiha, iyo kannaroromela dhoreela dhinavira, mbwenye nnamuroromela Mulugu. — Sal. 26:2; 104:34; 1 Tim. 6:17.

11. Supadda noomuzimuni ddiniyani, ki mwahaya bwaddi egahoweleya olabihedha?

¹¹ Supadda noomuzimuni bi Madhu a Mulugu, Bibliya. Supadda nna nihikanna kopolo dhovanyiha dhohudhiha dhowoota, nnowawobola athu mwa dhohudhiha dhowoota ni dhilemelelo dhonyakavala. (2 Cor. 10:4, 5; 2 Tim. 3:16, 17; Heb. 4:12) Nnohudhera olabihedha pama supadda nna nakanna ohudhera wavayeka ni nakelaga dhoxagiha dhinanivaha nikuru na Yehova. (2 Tim. 2:15) Ohiya onibarelave epaddi ya omuzimuni ethu emodha ya kopolo Yehova ananibareliyena siivi?

12. Ethu emodha nnahowelihu siivi, ki mwahaya bwaddi?

¹² Munyakoddo alemele owana koddo, ohunona wi akala yeka kanawedhe wagonjhiha amwiddani aye. Oliye anohowela nikavihero naanyakoddo amodha. Nimakalelo mamodhave, yekihu kannaawedhe omugonjhiha Saddana vamodha ni ale enamukavihera, nnohowela nikavihero naaddibila vamodha ni naarogola. Bumwahaya Yehova adhe anivahege ‘addibila a elabo yatene.’ Addibila ala enakala owiwegeredhene wihina enikavihere nahowelaga ethu-sithu. — 1 Ped. 2:17.

13. Mowiwanana ni Hebreus 10:24, 25, wihina mutugumano dhinikavihere nere ddi?

¹³ Makalelo owakela nikavihero nna nnahowelihu fudhowa omutugumanoni. (Omwileri Hebreus 10:24, 25.) Malabo mamodha iyo podi ofiyedha okwerebeya. Mbwenye yereya ndo, mwaha wowoona mutugumano dhatedhene iyo podi ofiyedha okanna kopolo niyelelihu. Mwaha dha vathaddo dhinakuma mBibliyani ni dhipaddi dha anamahudhera dhinonivaha kopolo dhomulabelana Yehova. Othapanya ni addibila nahinavolowe ni naweruwa winonihagalasa vanlubale. (1 Tes. 5:14) Teto, omutugumanoni okaviherana mmodha ni mukwaye winonihagalasa okunamo. (Atos 20:35; Rom. 1:11, 12) Ohiya eyeneve, mutugumano dhinonikavihera ni makalelo mamodha. Dhinowomihedha makalelo ehu olaleya ni ohudhiha. Motajhiha, fumutugumanoni nnaxagihiwihu ni makalelo owalabihedha malivuru ehu owahudhihana. Vowi ndala, wiwegeredhege pama waadhowaga omutugumanoni. Mutugumano dheddaga okalege txethe wihina opurelemo ethu-sithu. Wafiya vaade waajege makalelo oparihedha mabasa ndhe ohudheriwe omutugumanoni. Weragana ndo, onere okala ‘munyakoddo apama a Yesu Kiristu.’ — 2 Tim. 2:3.

14. Nikavihero nimodha ninnihuna thivi?

¹⁴ Iyo nihikanna nikavihero na matxikwi ni matxikwi angero akopolo. Kuddiwale mungero mmodha podi werana dhithu dhotikiniha! (Isa. 37:36) Vano wubuwele dhithu dhinerana muthithi ni muthithi wa angero. Kavo muthu obe demoniyu analigana ni muthithi wa angero akopolo a Yehova. Amodha ehiwoga wi kinapwatha amwiddani enniwana, muthu akala epaddi ya Yehova onowagonjhiha amwiddani. (Juí. 6:16) Eyo ebaribari! Bumwahaya wakwerebeya mwaha wa ethu yabure uwerele mmudhaawo obe mukwawo ahili mukiristawu, omubuwele ali epaddi yawo. Wubuwele wihina koddo ela kunawana weka. Yehova ali osogolo wawo uholelaga.

15. Ninga munawogela Isaías 54:15, 17, mwahaya bwaddi kavo onande omaaliha nlogo na Mulugu?

¹⁵ Elabo ela enasugweriwa ni Saddana ehikanna dhithu dhowinjhiva dhinathukulela onidda. Iyo kannivolosiha mpulitikani newene kannadhowa mukoddoni. Mbwenye nnavuwiha ndina na Mulugu, teto nnolaleya wi Omwene waye bunaadhena murenddele mwilaboni yatene yavati ni nnowiwelela malamulo aye. Nnowakavihera athu amodha onona wihina mwene a elabo ela muthu owoota ni mpanga. (João 8:44) Teto nnolaleya wi mohilegela, elabo ya Saddana enere ogujhuliwa. Saddana ni anamahara aye kidha enimaaliha. Ohiya eyo nnere odidelave onvuwiha Yehova ni makalelo matene. Naarive aganna kopolo, Saddana kanande ohiha wi muthenga wa Omwene wafwanye athu wapela elabo yatene. Dhithu ndha dhinenyeya mwaha Yehova onoonibarela. — Omwileri Isaías 54:15, 17.

16. Yehova onaavuluse avi nlogo naaye mudhidhi wa ohoseya winlubale?

¹⁶ Mohilegela enaapadduwe ddi? Mudhidhi wa ohoseya winlubale, Yehova anere onivulusa mwa makalelo menli ootikiniha. Vobajha, oliye anere wavulusa adhaari aye oororomeleya aathukulela mamwene a elabo ela omugujhula Babiloniya Munddimuwa, dhili dhigereja dhatedhene dhowoota. (Apo. 17:16-18; 18:2, 4) Vano, anere ovulusa nlogo naaye dila yanabili, aagujhula mu armajedo athu atene a Saddana enaahale. — Apo. 7:9, 10; 16:14, 16.

17. Mwahaya bwaddi nigahowela okanna wandana wapama ni Yehova?

¹⁷ Nakanna wandana wapama ni Yehova, Saddana kadha anerela ethu-sithu nahinandihu ogonjhiha. Mwebaribarene, oliye dinagujhuliwe nimukalakala. (Rom. 16:20) Bumwahaya, oware — ni kudhe orula — yowara ya mujhila ya mutoropa yowakwanela! Kuwane weka. Wakavihere addibila ni arogola. Teto ohare dhoholela dha Yehova. Werana yeyo, okanne ebaribari wihina Yehova babi awo oodhulu anere wulibiha ni anere wubarela. — Isa. 41:10.