Yopadduwa Ya Mwigumini
“Gafunimi yaali omulabela Yehova”
IYO NEERA opaganya nikuru ning’ono naaddibila nadhowilihu waredhela murudda wo Garanbori yakala vaari vakokola yo Suriname. Vano iyo obajha olenddo weehu mwihinjhe wo Tapanahoni ni mwanddeya. Vano, niviraga dhipaddi dhowopiha dha mwihijhe yoole, motooriya ovada nibwe. Mudhidhi yoole epaddi modha ya mwanddeya yosogolo otorowa. Vano mwanddeyaya obajha obwina vamodha ni hiyoya. Miyo obajha woova ni miyo osegedheya vanlubale, naarive yakadhene geeddaga olenddo ninga nameeddela mulogo, mbwenye kagaanonne oraba!
Gahinathi owoga yapadduwile, ginafuna guwaddeleni makalelo gibanjhiimi mabasa aaga amudhidhi wamutene.
Miyo gibaliwe yaka ya 1942 elabo yoKurasawu eli elabo yowoma. Ababa ebaliwe oSurinami, mbwenye aliwa yatamenle oKurasawu wihina yalabege. Yaka mundduli gahinabaaliwe, aliwa yaali mmodha wa anamoona oobajha elabo yo Kurasawu. a Aliwa yomuhuhera Bibiliya naaniwa atanu sumaana dhatedhene, bumwahaya malabo mamodha dhithudha kadhaakweyela. Miyo nuwaakwaniha yaka 14, iyo otamela oSurinami mwaha ababa yofuna wasamalela amamiiwa mwaha yahuluvala.
GAHANDANA NAATHU APAMA
OSurinami, gahandana na azombwe yanna thotho mmulogoni, aliwa yahunnuwelavo ogikwaranya miyo ni yalaba ninga apiyonero regular. Yaagaddelaga dhopadduwa dhewa yaniwana mmabasani ewa olaleya, Gowanda woona wihina bohagalala. Mutugumano dhamala miyo vamodha na akwaga nohogolowela othapanyedha wodhela muselu dha mBibiliyani — malabo mamodha, nathapanyesa mahiyu. Baaliwene yagikavihere othoma ethu gahowelimi werana mwigumini mwaga; Gafunimi yaali omulabela Yehova. Vano ngaakwanihe yaka 16 miyo obaddiziwa. Nuwindo ngaakwanihe yaka 18 miyo obajha olaba ninga piyonero regular.
DHITHU DHATHIMA GIHUDHERIIMI
Gilabaga ninga Piyonero oParamaribo
Nuukala piyonero Miyo ohudhera dhithu dhathima, ni yaali yeyo yagikavihere mwigumini mwaga nukala piyonero amudhidhi waamutene. Motajhiha, ethu gihudherimi si thima enna waxagiha athu amodha. Gibanjhimi olaba ninga piyonero, nameddela murudda ithaniwa Willem van Seijl ni makalelo mamodha owoga agisamaalela ninga mwanaye. b Oliye ahigihudhiha vanlubale wodhela osamaalela mutholo dhamulogoni. Kale, miyo kaganona wihina gohowela dhoxagihande. Yaka yaharela miyo othomiwa wihina nkale piyonero avayeka, vano miyo obajha wakavihera makuru mang’ono yakalela wolapela vaari va Surinami ni mulogo dhimodha. Miyo ginotamalela dhoxagiha dhatedhene addibila yagivahiwa! Vano, ginowilibihedha ohara dhotajhiha dhewa, wodhela waxagiha athu amodha.
Ethu yanabiili gihudherimi, yaali wodhela mareeliho endhela mwaha okanna egumi yokweya ni okala owiwegeredha. Omabajho wa kadda mweri, miyo vamoda ni ddibila dhaala nalaba ninga apiyonero avayeka, noolebela dhithu nahowelihu wihina nigule sumana enaharelege. Vano mmodha wa iyo owedda olenddo wolapa wihina adhowe musidadi wi agule nahowelihu. Iyo nopang’ana pamadhene wihina mukono nakelihu ogoneele ofiyedha mweri wantero. Iyo naali vaari va kokola, bumwahaya yahahoweleyege ethu-sithu kaavo anikavihere, miyo ginoorumedha wihina wodhela iyo okanna egumi yokweya ni ohudhera okala muthu owiwegeredha obajha ehimeene, ehigikavihera wapara mabasa a Yehova egumaga yaatene.
Ethu yanatharu gihudhererimi si thima enna wahudhiha athu ni ewogelo yewa. Miyo gunnuwale giwogaga ewolandeji, engeleji, epapiyamentu, ni esaranantongo (enoniwe ninga Saranan), eli ewogelo enathabwa owogiwa oSurinami. Mbwenye galaleyaga athu a kokola yeele, aliwa yorumedha muthenga dhapama galaleyimi thabwathabwa gawogaga ni ewogelo yewa. Mbwenye miyo gubuwela wihina soorusa owoga dhiwogelo dhimodha, ninga ewogelo yesaramakano, enna dhikalelo biili dhowoga, enalabihedhiwa madhu ookuwa ni madhu ohikuwa. Mbwenye, wilibihera wule wahigikavihera. Yaka dhaharela, miyo gahanda wahudhiha athu owinjhiva ebaribari, mwaha galabihedha ewogelo yewa.
Ebaribari wihina malabo mamodha gowitotela manyazo. Motajhiha, nlabo nimodha gafuna gimukohe namahudhera dhaala a Bibiliya awoga eSaramakano makalelo oliye aliye mwigumini mwaye, mwaha mbani monvereya. Mbwenye gamukonhe ethu emodhene, miyo omukoha akala anna wari! Enowoneleyamo wihina oliye kadhiveliwe newene gamukonhimi. Naarive malabo owinjhivene giviriganihaga, miyo kagaaselele wilibihera wihina gihudhere owoga ewogelo ya elabo yeele.
GIRUMEEDHAGA MUTHOLO DHIXA
Yaka ya 1970, miyo othomiwa wihina nkale nameddela mulogo. Yaka yele miyo omoniha porogarama “waredhela sede mundiyale ya anamoona a Yehova” wihina yakavihere makuru eli okokolani. Wihina nifiye murudda dhendo, miyo vamodha na addibila nowedda olenddo mwiiko ni mwandeya. Mmwandeyani nomwihisa jiradore, gasolina, malanpada a kirozeni ni dhithu dhimodha dhaanikavihere. Nafiya nohowela otheba dhithu dhaatedhene ndha wihina nidhowena muwari mwa kokola nadhowihu wawoniha addibila porogarama oyo. Mbwenye ethu gahinadduwalimi, fudhela makalelo athu yakala kokola yele yamudhiveliwiwa porogarama ole. Miyo godhiveliwa vanlubale wahudhiha athu wodhela Yehova ni nikuru naye na velabo ela yavati. Wawona athu emunonaga Yehova ni emwaddamelaga, yahigithukulela woona wihina kopolo dhatedhene gerilimina dhihikavihera.
NIPAGANO NAATHU ARARU
Ethel ni miyo ntelanne mweri wa Setembro, yaka ya 1971
Miyo gahinona wihina okala muddiye yaali ethu yahoweleya mmabasani mwaga, mbwenye naarive dhigaali ndo goofuna vanlubale omunona muthu aagidhivele. Vano miyo obajha olobela wa Yehova gimulobaga wihina agivahe mwihiyana agikavihere naarive gifwanyiwaga makathamiho. Nuuvira yaka modha miyo obajha omwenddi ni Ethel piyonera dhaala oviheya aavaha thima mabasa aye. Obajha ehimene Ethel omutikina murumiwi Pawulo, ni ofuna wapara mabasa olaleya ninga oliye. Vano iyo otelana mweri wa Setembro yaka ya 1971, iyo obajha olaba vamodha ninga anameddela mulogo.
Ethel unnuwile vaade ahisamaleliwiye ni dhithu dhowinjhiva dhomwilini, vano woona wihina mutholo wehu wali wokala okokolani oliye kaana makathamiho. Motajhiha, neegeredhaga wihina naaredhele mulogo dhinafwanyeya okokolani, nathukula dhithu vag’onove. Iyo nathukula guwo dhihu ni nahaba mwiiku, teto nahihudhera oojha ethu-sithu navahiwihu, ninga anegongo, obaa obe ethu-sithu yaafwanyiwe mukokolani obe mwiiko. Nahikanna parato iyo najhela vantabani na muhobo, nahikanna koyeri najha ni maddihu. Miyo ni Ethel nahonelamo wihina werana dhithundha mudhidhi nimulabelaga Yehova yahinikavihera waalibiha matelwihu enthukulelaga okala olibene ninga kabala tharu. Dhahandeyege ohogolowela mudduni, neere werana emodhave!
Wali mudhidhi nidhaga okokolani yapadduwiliwa ele giwogilimi omabajhowene. Niviraga epaddi modha yowopiha ya mwihijhe mwanddeyaya obwina, nandile omoona agaali wadamela vatheyani, yapamaya sowihina nahawabala makoleti yanibarenle wihina nahibwine. Teto muwari mwa mwanddeyaya mwahidhala manjhe, vano nohowela walabihedha matijela wihina nakupena manjhe yaali mmwaddeyani, mbwenye wihina eyo yadeye nohowela orahilamo dhoojhadha. Woona wihina nahirahilamo dhoojha dhatedhene, iyo opangana wi nimezege wula nedaga oleddo, mbwenye kanandile ohidda newene oba modha. Vano iyo olobela wa Yehova nilobaga wihina anivahe yoojha yanikavihere nlabonene, nigamanle olobela ddibila dhaala ovoka emezo yaye mmajheni, nnona akumihaga ooba enddimuwa yanakwanne iyo aatene ofiyedha ohala.
MAMUNI, BAABI NI NAMEDDELA MOLOGO
Nuuvira yaka tanu neddelaga mulogo, miyo ni Ethel wawakela mareeliho nahajhehedhihu, neere okala abaabi. Miyo gahihagalala vanlubale nuwiwa, mbwenye kaganonne nimakalelo baani eyo yavuloweliwa mabasa ehu. Miyo ni Ethel neere odhiveliwa vanlubale odhowagave naaparaga mabasa a vayekiwa yahandeyege. Yaka ya 1976 Ethniel obaliwa, mwanihu anabiliya Giovanni abaliwe nuvira yaka biili.
Gaasugwaga athu ebaddiziwaga mwinjhe Tapanahoni waddamela Godo Holo oSurinami yaka ya — 1983
Mudhidhi yole Osurinami yohoweleyawo vanlubale anamalaleya. Vano filiyale orumedha wihina gikale nameddela mulogo wula gaalelaga ahima. Anihu nubajha wunuwa gathomeliwa muruda waali mulogo vag’ono. Eyo yogikavihera olaba ninga nameddela mulogo sumana vag’ono ni mweri dhahala galaba ninga piyonero mulogo gaathomeliwimiwo. Mulogodha dhaaddamela vade Ethel ni anihu yogivelela, mbwenye Malabo mamodha gedda mekaga mulogoya wakala woolapela obe gathomeliwa werana musonkano woolapela.
Gilabaga ninga nameddela mulogo, dila dhowinjhivadhene geddesa olendo ni mwanddeya wihina garedhele mulogo
Wihina gaande wakwanihedha mutholo dhatene, gohowela wiwegeredha pama. Miyo gowaja wihina nikanne ohudhera weemudhi sumana dhatedhene. Mbwenye gadhowa okokolani waredhela mologo dhimodha Ethel deeddiha ohudherawa ni ahima vade. Vano dhandeya neerana dhatedhene ninga emudhi. Ethel ni miyo nowaredha vanlubale naanihu, ninga ojogar obe opaseyari. Malabo owinjhiva gagonesa mutanene mwaha gohowela wegeredha wihina gakwanihedhe mutholo dhaga. Teto Ethel aali mwihiyana a va Provérbios 31:15 avenya nduwa nihinakume wi egeredhe dhithudha wihina nikanne ohudhera ya yolebela ya kadda labo ni omug’wa xa ni ahima yahinathi odhowa oskola. Miyo ginomutamalela vanlubale Yehova wodhela ogivaha mwihiyena oviheya anagikavihera wakwanihedha mutholo dhaaga dhomuzimuni.
Ninga abaabi iyo nnowilibihedha vanlubale wihina naakavihere anihu okanna odhivela ni Yehova ni wadhivela mabasa olaleya. Iyo nafuna wihina anihu ekale apiyonero a mudhidhi waatene ni wihina eyo ekale yosakula ya mwegumini mwewa, Yahili wihina enihagalase. Iyo nowogesa wihina yasakula okala apiyonero a mudhidhi waamutene yeere okanna murendele. Mbwenye naarive nifwanyiwaga makathamiho Yehova oonikavihera ni oreeliha emudhe yehu. Iyo nowakongomedha anihu wandana ni addibila yahela mburu woobajha omwene wa Mulugu.
Yehova oonivaha dhatedhene nahowelihu epaddi yomwilini, ebaribari wihina gowerana epaddi yaga. Mudhidhi gilabaga okokolani ninga Piyonero avayeka ngali muddiye, gahihudhera okoya korowa wihina yapadduwa ethu-sithu gikaviherena. Mbwenye naarive giilibihedhaga malabo mamodha kanakanna nahowelihu wihina nande wakwanihedha nde nafunihu. Eyo yapadduwa ginowoga ni orarameleya wi Yehova onivaha nahowelihu. Motajhiha vaari va yaka ya 1980 ni 1990 dhithudha dhahithabwa orusa Osurinami, yoorusesa vanlubale okanna ethu yokweya ya kadda labo, mbwenye Yehova onikavihera. — Mat. 6:32.
GUBUWELAGA DHOPADDUWA DHAMWIGUMINI MWAAGA
Nlada nemara odhowa nlada noojha, vamodha ni mwaraga Ethel
Mwanihu apogoya Ethniel ni mwariye Natalie
Mwanihu Giovanni ni mwariye Christal
Egumihu yateene Yehova onikavihera ni onivaha mureenddele. Anihu mareeliho manlubale ni walela wihina emulabele Yehova mutholo nakelihu. Nnohagalala vanlubale mwaha wi aliwa esakunle wapara mabasa apiyoneru a mudhidhi wamutene ninga yothoma ya mwigumini mwewa. Ethniel ni Giovanni ehikursar eskola ya anamahudhera a Bibiliya, vano enalaba ofiliyale yoSurinami vamodha ni amwariwa.
Vano Ethel ni miyo nihuluvala, mbwenye naarive dhigaali ndo nili opinyamiyeyene nimparelaga Yehova mabasa ninga apiyonero avayeka. Teto gihithabwa opinyaminyeya ofiyedha ohukanna mudhidhi wohudhera oraba. Mbwenye, kaginasinyuwa. Gubuwelaga wodhela egumi yaga, mwebaribarene ginowona wihina othoma okala piyonero amudhidhi wamutene ngali muzombwe, yaali yothoma ya thima gahowelimi weerana.
