1. Nnonne addi wihina Yehova anofuna wihina ninfiyedhe?

 YEHOVA ononithana wihina ninfiyedhe. (Tia. 4:8) Oliye onoofuna okala Mulugwihu, Baabihu ni mukwihu. Oliye onowaavuruwana malobelo ehu ni ononikavihera mudhidhi worusa. Oliye onolabihedha nikuru naaye wihina anihudhihe ni anibarele. Mbwenye ki iyo nnere ddi wihina ninfiyedhe Yehova?

2. Nnande addi onfiyedha Yehova?

² Iyo podi onfiyedha Yehova wodhela olobela, omwileri Bibiliya ni opendda. Eyo enere onthukulela omudhivela ni omutamalela. Mareelihoya bowihina nnere okanna efunelo yonvaha Yehova ele enanfwanelela, wili omwiwelela ni omwebedha. (Apo. 4:11) Mudhidhi nnamunonegihu Yehova nnerege othabwa omuroromela oliye nnikuru naaye analabihedhiye wihina anikavihere.

3. Saddana anera ddi wihina animwalanihe ni Yehova, ki enaanikavihere ddi ohimusukuma Yehova nnikuru naaye? (Salmos 31:13, 14)

³ Saddana, onoveda onimwalaniha ni Yehova, thabwa-thabwa naafwanyiwaga makathamiho. Anerana ndo ni makalelo baani? Oliye anoneeha vang’ono vang’ono wihina aridhihe ororomeleya wehu wa Yehova vamodha nnikuru naaye. Mbwenye kannahowela omothela mmurakoni mwaaye. Nroromelo nehu wa Yehova naaliba kinadha ekalawo ethu-sithu enanimwalanihe ni Yehova vamodha nnikuru naaye. — Omwileri Salmos 31:13, 14.

4. Ohudhera wula nnasunze ddi?

⁴ Ohudhera wula nnere woona dhoweha tharu dhihinadhela munikuruni mwa Yehova ni nahikala pasope podi onthukulela  oridhiha ororomeleya wehu wa Yehova vamodha nnikuru naaye. Nimakalelo baani dhoweha ndha podi onthukulela onimwalaniha ni Yehova? Ki nnande addi wibarela wodhela dhoweha dha Saddana?

5. Nimakalelo baani makathamiho yaanthukuleliwa oridhiha ororomeleya wehu ni Yehova vamodha nnikuru naaye?

⁵ Iyo aatene malabo mamodha nnofwanyiwa makathamiho, ninga oharahariwa ni amudhihu obe wayelela mabasa. Makathamiho ala, podi onthukulela oridhiha nroromelo nehu ofiyedha onimwalaniha ni Yehova vamodha ni nikuru naaye. Ni makalelo baani? Makathamiho yaagonelaga omala, iyo podi wiwoonaga ninga nliyekihu ofiyedha okala owukuwene. Teto Saddana onowaaja mudhidhi yoyo wihina ananganyedhihe odhivela onna Mulugu nihiyo ni antotele makoho. Ninga motajhiha, iyo podi wikohaga akala mwebaribarene Yehova ononidhivela, obe Yehova vamodha ni nikuru naaye ehikanna nibili ni makathamiho ehu. Ethu emodhave yaapadduwela aamwaana Ezarayeli. Vobajhavene aliwa yorumedha wihina Yehova dimusakunle Moyizeji ni Arawu wihina awobole muudharini. (Êxo. 4:29-31) Mbwenye vasogolova Farawo nuwatotela makathamiho mwigumini mwewa, amwaana Ezarayeli obajha omwinkedha Moyizeji ni Arawu. Aliwa ofiyedha owoga yegi: ‘Nyu munoneriha iyo ohikanna thima vamentoni va Farawo ni vadharaaye, ofiyedha omuhiyedha supadda mmadani mwaaye wihina enipe.’ (Êxo. 5:19-21) Aliwa wawinkedha adhaari a Yehova, yali ethu yohifwanelela. Akala ohuvira mudhidhene ofwanyiwaga makathamiho, onere ddi wihina odhowegeve omuroromelaga Yehova vamodha ni nikuru naaye?

6. Nnahudhera ddi ni namavuhulela Abakuki wodhela makalelo owawanana makathamiho? (Habacuque 3:17-19)

⁶ Olobelege wa Yehova ni murimawo wamutene, ni omulobe nikavihero. Namavuhulela Abakuki ohufwanyiwa makathamiho owinjhiva, eyo enowoniha mwaha malabo mamodha oliye owikoha akala Yehova ompwatha. Bumwahaya oliye onfugulela Yehova murima waye ni omwaddela dhatedhene dhampadduwela, Abakuki owoga egi: ‘Ofiyedha alini Yehova, ginupigireyelimini gilobaga nikavihero, mbwenye nyu kamunagivuruwana? . . . Munagihiyela ddi miyo woona dhithu dha bure?’ (Hab. 1:2, 3) Yehova ahaakula nlobelo na Abakuki. (Hab. 2:2, 3) Abakuki ahibajha opendda dhithu Yehova ereliye nlogo naaye, eyo omukavihera ohogolowela ohagalala. Eyo yali ethu yonihile wihina Yehova omuthuwathuwela Abakuki ni eere omukavihera ogonjhiha ethu-sithu yadhelege osogolo. (Omwilleri Habacuque 3:17-19.) Nnahudhera ddi? Wafwanyiwaga makathamiho olobele wa Yehova omwaddelaga dhatedhene dhinupadduwela ni olobaga wihina ukavihere. Werana ndo, onere okanna ebaribari wi Yehova anere wuvaha kopolo onahoweliwe wihina odhowegeve ovilelaga. Woonelamo wi Yehova ali epaddi yawo, nroromelo nawo nnere oliba.

7. Ethu baani mmudhi mmodha a Shirley asayeliye werana, ki oliye eerile ddi?

⁷ Okanne ekalelo yapama yoomuzimuni. Shirley murogola dhaala anakala elabo yo Papuwa Nova Gine, ahifwanyiwa dhoweha dhowinjhiva. b emudhaye yaali yohawa, malabo owinjhivene kiyaali yokweya ofwanya yojha ya kadda labo. Mmudhaye dhaala oveda makalelo omukwerebeyiha epaddi yomuzimuni. Oliye owoga egi: “We wenre muzimu  wotxena onowukavihera, ki nikaviherona thivi? Emudhi yaawo nivanove sohawa. We onayelela mudhidhi wawo ebewene ni olaleya.” Shirley onorumedha wihina ohufiyedha wikoha: “Mwebaribarene Mulugu onogithuwathuwela miyo vamodha ni emudhi yaaga?” Vano miyo olobela wa Yehova gimwaddelaga dhatedhene dhagipadduwela. Miyo odidelave omwileri Bibiliya ni malivuru ehu, naarive gilaleyaga ni goonaga mutugumano. Shirley obajha wonelamo wihina Yehova eere osamalela emudhi yaye, mwaha aliwa kinamalege nlabo nantero yahijhile ni yakala oohagalalene. Shirley onowoga egi: “Miyo woona wihina Yehova eere wawakula malobelo aaga.” (1 Tim. 6:6-8) We wadidela okanna ekalelo yapama yomuzimuni, makathamiho ni makoho kinadha yumwalaniha ni Yehova.

8. Addibila enaholela nikuru na Yehova podi wapadduwela ethu baani?

⁸ Wodhela midiya ni redi sosiyale, amwiddani ehu enovuwiha dhowoota ni muselu dhimodha wodhela addibila munikuruni na Yehova. (Sal. 31:13) Addibila amodha ehivolosihiwa mukambura yinkedhiwaga wihina apanga. Mbwenye eyo kinantikiniha mwaha kale makiristawu yahifwanyiwa makathamiho mamodhave. Murumiwi Pawulo ahiinkedhiwa ahinna muladdu ofiyedha ovolosihiwa mukambura ahinna muladdu. Aliwa yerile ddi?

9. Makiristawu mamodha yenre ddi murumiwi Pawulo nuumagiwa?

⁹ Murumiwi Pawulo nuumagiwa oRoma, makiristawu mamodha yahihiya omukavihera. (2 Tim. 1:8, 15) Mwahaya bwaddi? Nerege aliwa yakanna manyazo naathu mwaha yamoona Pawulo ninga mpanga? (2 Tim. 2:8, 9) Obe aliwa yera woova wihina enaharahariwe? Kannapwatha ethu baani yaathukulele aliwa wera ndo, mbwenye kubuwela makalelo aali Pawulo. Oliye ahifwanyiwa makathamiho owinjhiva ofiyedha weka egumi yaye vang’ovini wodhela addibila ale. (At. 20:18-21; 2 Cor. 1:8) Mwebaribarene kannafuna okala ninga addibila ale yamusukumme Pawulo mudhidhi oliye ahoweliye nikavihero! Ethu baani  nnafunihu wihina nubuwelege addibilihu enaholela nikuru yaharahariwaga?

10. Nubuwelege ddi addibila enaholela yaharahariwaga, ki mwahaya bwaddi?

¹⁰ Wubuwelege mwahaya bwaddi nigaharahariwaga ki anatetedha baani. Bibiliya onowoga va 2 Timóteo 3:12 egi: ‘Aatene yale enaafunege omuhagalasa Mulugu, emuharaga Yesu, enerege oharahariwa.’ Bumwahaya kahiyo yootikina wihina Saddana dinathabwa waharahara ale enna mutholo mmulogoni. Anafuniye sowihina addibila ala ehiye okala oororomeleya wa Yehova. Ohiya eyo oliye onoofuna wihina nikale ookwerebeyene ni owovene. — 1 Ped. 5:8.

11. Nnahudhera ddi ni yotajhiha ya Onesiforu? (2 Timóteo 1:16-18)

¹¹ Okalave oororomeleya ni wakaviherege addibila. (Omwileri 2 Timóteo 1:16-18.) Kale mukiristawu dhaala iithaniwa Onesiforu kaali ninga makiristawu mamodha yahile omukavihera murumiwi Pawulo. “Oliye kanna manyazo mwaha Pawulo okala mukambura.” Onesiforu ahinveda Pawulo vano nunfwanya omukavihera niithu ahoweliye. Wihina erena eyo Onesiforu ahihela egumaye vang’ovini. Ethu baani nnahudherihu? Kanihiye woova onigonjhiha ofiyedha ohiya wakavihera addibila enaharahariwa. Ohiya eyo nnohowela wabarela ni wakavihera ni ndhe enahoweliwa. (Pro. 17:17) Aliwa enohowela vanlubale odhivela wehu nnikavihero nehu.

12. Nnahudhera ddi naaddibila ni arogola oRusiya?

¹² Kasugwa yotajhiha yaaddibilihu enakala oRusiya. Aliwa kinaselela wakavihera addibila narogola eri mukambura. Addibilihu amodha yathukuliwa nasupayi wihina yatorihiwe, addibilihu narogolihu enowerana dhatedhene wihina edhowe otiribunale wihina yakavihere. Anamaholela mulogo yaaruwaniwaga, yaamagiwaga ni yaaharahariwaga, kuwoove, walobelelege ni wakaviherege amudhiwa ni wubuwele makalelo mamodha onandiwe wakavihera. — Atos 12:5; 2 Cor. 1:10, 11.

13. Obeddiwa podi ovolowela ororomeleya wehu ni Yehova vamodha nnikuru naaye, nimakalelo baani?

¹³ Amudhihu, akwihu ooskola obe oomabasani podi onibeddaga mwaha nnolaleya ni nnokalawo mowiwanana ni malamulo a Yehova. (1 Ped. 4:4) Aliwa podi owoga yegi: “Miyo ginowudhivela, mbwenye kaginadhiveliwa gerejawo, gerejawo enoowadeliha dhithu dhowinjhiva.” Athu owinjhiva enakohiwa bumuselu wodhela otxosiwa, aliwa enowoga yegi: “Nyu munolaleya wodhela odhivela mbwenye kasugwani makalelo munaweddihinyu ale etxosiwe?” Makalelo ala owoga podi onanganyedhihaga. Iyo podi wikohaga ayi: ‘Yehova kanothabwiha dhithudha? Ki nikuru kannafwanelela ojajaliha vang’ono dhithudha?’ Akala onofwanyiwa makathamiho ninga ayo, onande aavi onfiyedha Yehova vamodha nnikuru naaye?

14. Nere ddi akwihu yanibeddaga mwaha wawiwelela malagano a Yehova? (Salmos 119:50-52)

¹⁴ Othome werana ndhe Yehova anawogiye wihina sapama. Jo kaselele wahara malagano a Yehova naarive abeddiwaga wodhela ororomeleya waye. Mukwaye dhala ohiroromeleya waja makalelo omuleketha, oliye owoga egi Mulugu kanapwatha akala we onowerana dhithu dhapama obe naari. (Jó 4:17, 18; 22:3) Mbwenye Jo kaarumedhe yowoota eyo. Oliye ahinona wihina malagano a Yehova bowogowa, teto oliye ahithoma okalawo mowiwanana ni malagano aye. Oliye kahile wihina newene ethu obe muthu di muthu asaddule mubuwelo waye. (Jó 27:5, 6) Nnahudhera ddi ni yopadduwa  ela? Kuhiye wihina obeddiwa naathu amodha wuwanganyedhihege wawiwelela malagano a Yehova. Wubuwele dhatedhene dhupadduwele mwigumini mwawo, podi wera ohonelamo wihina malagano a Yehova bapama ni enokavihera egumi yehu. Bumwahaya othome okavihera nikuru naaye nnahara pamadhene malagano ala. Mowindo kannapwatha athu angasi enanibedda, iyo kannahiye wihina ethu-siithu obe muthu animwalanihe ni Yehova. — Omwileri Salmos 119:50-52.

15. Mwahaya bwaddi Brizit adhe abeddiwege?

¹⁵ Kasugwa empadduwele Brizit, murogola dhaala o Indiya abeddiwa naamudhaye. Numala obaddiziwa yaka ya 1997, mamune ahaali Namona a Yehova wigariwa omabasani. Mwaha wa yeyo aliwa otamela luwani emodha wihina yakalege naababe. Elabo yele Brizit ahifwanyiwa makathamiho manlubale, motajhiha woona wihina mamune kaalaba oliye ohowela olaba nduwa nantero wihina asapele emudhaye. Ohiya eyo Salawu yaddamele luwani ele yakaliwa yahilapela makilometuru 350. Ethu yowukulihaya amudhi a mamune yothabwa omuharahara mwaha ndhe aarumedhiye. Dhithudha othabwaga orusa ofiyedha aliwa otama dila biili, vasogolova mamune okwa. Nuuvira mudhidhi mwanaye aanna yaka 12 okwa ni kanser. Yothabwaya amudhi a Brizit owoga yegi oliye danna nibili wodhela ngovi ele, aliwa wera, ahere ahikala Namona a Yehova, dhithu nde kadhapadduwe. Naari dhigarive ndo oliye kaselele omuroromela Yehova teto kasukumme nikuru naaye.

16. Brizit aarelihiwe nimalakelo baani wodhela omuroromela Yehova vamodha nnikuru naaye?

¹⁶ Woona wihina Brizit akala wolapela ni mulogo waye nnameddela mulogo omukongomedha olaleya murudda waye ni werana mutugumano vade vaye. Omambelelowene oliye oona ninga ethu yorusa, naarive dhigari ndo oliye othoma wiwelela yolaga ele. Brizit owapara mabasa oolaleya, owerana mutugumano vade vaye ni ahikanna webedha weemudhi kadda labo naanaaye. Mareeliho baani awakeliye? Oliye ahiwedha okanna anamahudhera owinjhiva teto amodha ofiyedha obaddiziwa. Yaka ya 2005 oliye obajha  olaba ninga piyonera amudhidhi wamutene. Ororomeleya wa Brizit wodhela Yehova nnikuru naaye wahidhana mareeliho owinjhiva. Anaaye enna omulabela Yehova nuroromeleya teto peeno wikala mulogo minli murudda alaleyisiyewo! Brizit ohukanna ebaribari wihina Yehova ohunvaha kopolo ahoweliye wihina awedhe wawanana makathamiho ni ovilela naarive abeddiwaga naamudhaye.

17. Nithome wera ddi?

¹⁷ Saddana anafuna wihina nubuwelege wi Yehova ononsukuma nafwanyiwaga makathamiho ni wihina okalave oororomeleya nnikuru naaye winere onitotela makathamiho. Oliye anafuna wihina iyo nikalege ookwerebeyene akala addibila enaholela enoruwaniwa, enoharahariwa ni enoovokedhiwa mukambura. Ni wodhela obeddiwa oliye anafuna eehe ororomeleya wehu wa Yehova nnikuru naaye. Mbwenye kudduwale wi Yehova kanadha usukuma. (2 Cor. 2:11) Othome okoodda dhowoota dha Saddana, mbwenye othome okalave oororomeleya wa Yehova. (Sal. 28:7) Teto kuhiye wihina ethu-sithu obe muthu umwalanihe ni Yehova! — Rom. 8:35-39.

18. Ohudhera winaharela nnaasuze ddi?

¹⁸ Ohudhera wula nihawoona makathamiho enanifwanya, mbwenye ehinadhela mmulogoni. Teto nihoona wi ororomeleya wehu wa Yehova vamodha nnikuru naaye podi wehiwa ni makathamiho enadhela mmulogoni. Ki nnande aavi wawanana makathamiho ayo? Ohudhera winaharela Nnere woona yowakulaya.