Ohudhera 45
Yehova ananikavihera nimakalelo baani wawakwaneliha mabasihu
‘Mohanganyedha enere onona wihina ahikalawo namavuhulela vaari vewa.’ — EZE. 2:5.
JHIBO 67 “Nilaleye muthenga”
DHITHU NNAAHUDHERIHU a
IYO NIHINONA wi podi oharahariwa naaparaga mabasihu oolaleya. Teto podi wera oharahariwa wula winere othabwa osogolo. (Dan. 11:44; 2 Tim. 3:12; Apo. 16:21) Mbwenye iyo podi okanna ebaribari wihina Yehova anere onikavihera ni dhithu nnahowelihu. Mwahaya bwaddi? Mwaha Yehova ohakavihera adhaari aye wakwaneliha mutholo dhewa naarive yakelaga mutholo dhorusa. Motajhiha, nnere woona dhithu dhampadduwele namavuhulela Ezekiyeli aalaleye majudewu yaali adhaari oBabiloniya.
2. Athu aalaleye Ezekiyeli yaali owi ddi, ohudhera wula nnasunze ddi? (Ezequiel 2:3-6)
2 Munyaathu baani Ezekiyeli ahoweliye walaleya? Yehova ohuwoga egihina yaali athu ‘owikubanyedha,’ yanna ‘murima wowukuwa’ ni yaali ‘avuruvuru.’ Yakala ninga aali vaari va mwinga ni vaawarize. Kannatikina mwahaya Yehova adhe awogege dila dhowinjhivadhene egihina: ‘Kuwoove’! (Omwileri Ezequiel 2:3-6.) Ezekiyeli anndile wakwanihedha mutholo waye mwaha (1) di Yehova aamurumile, (2) muzimu wotxena wahinvaha kopolo ahoweliye (3) madhu a Mulugu yahilibiha nroromelo naaye. Dhithu ndha thaaru dhimukavihere aavi Ezekiyeli? Ki iyo dhinanikavihere aavi peeno?
YEHOVA — OMURUMA EZEKIYELI
3. Madhu baani yamulibihe Ezekiyeli, ki Yehova oonihile addi wihina eere okala epaddi yaye?
3 Yehova omwaddela Ezekiyeli egihina: ‘Ginowuruma.’ (Eze. 2:3, 4) Madhu ala yahimulibiha vanlubale Ezekiyeli. Podi wera oliye ahubuwela wihina oliye ahalabihedha madhu ala mudhidhi amurumaga Izayiya ni Moyizeji ninga anamavuhulela. (Êxo. 3:10; Isa. 6:8) Ezekiyeli ahinona wihina Yehova ahakavihera adhaari ala wagonjhiha makathamiho. Bumwahaya Yehova nuuwoga dila biili egihina: ‘Ginowuruma,’ ahiikanna ebaribari wihina eere okanna nikavihero na Yehova. Ohiya eyo mulivuruni na Ezekiyeli enofwanyeyamo dila dhowinjhivadhene madhu ala a Ezekiyeli: ‘Gihawiwa madhu a Yehova.’ (Eze. 3:16) Ezekiyeli ohuleba dila dhowinjhivadhene egi: ‘Yehova owogave ni miyo egihina.’ (Eze. 6:1) Mohanganyedha Ezekiyeli ahinona wihina aarumiwe ni Yehova. Ezekiyeli aali mwaana anamakutha, teto podi wera ahiiwa dila dhowinjhivadhene wihina Yehova eere wakabelela anamavuhulela aye. Yotajhiha modha siile awogile Yehova ni Izayiya, Jako ni Jeremiya egi: ‘Miyo gili ni we.’— Gén. 26:24; 28:15; Jer. 1:8.
4. Madhu baani emulibihe Ezekiyeli?
4 Amwaana Ezarayeli yaakale aavi ni ndhe alaleya Ezekiyeli? Yehova ohuwoga egihina: ‘Nyumba yaamwaana Ezarayeli kinuvuruwane mwaha aliwa kinafuna ogivuruwana.’ (Eze. 3:7) Yaakoddaga onvuruwana Ezekiyeli, amwaana Ezarayeli yamukoodda Yehova. Makalelo nakale nlogo nne kiyatapulela wihina Ezekiyeli kaali namavuhulela apama. Yehova ahimpaganya Ezekiyeli wihina muthenga ndhe dhotoriha dhabajha wakwanela, nlogo neere ‘onona wihina ahikalavo namavuhulela vaari vewa.’ (Eze. 2:5; 33:33) Mohanganyedha Yehova ahinvaha Ezekiyeli kopolo ahoweliye wihina awakwanelihe mabasa aye.
YEHOVA ONONIRUMA IYO — PEENO
Ninga Ezekiyeli iyo podi oharahariwa murudda wehu, mbwenye nihinona wihina Yehova ali epaddi yehu (Osugwe ddima 5 ofiyedha 6)
5. Mowiwanana ni yolebela ya Isaías 44:8, enanilibiha ddi?
5 Ninga Ezekiyeli, ni iyoya nnooliba murima mwaha nihinona wihina di Yehova anirumile. Yehova ohunithoma wihina nikale ‘anamoona’ aaye. (Isa. 43:10) Ela gari enlubale ninnihuna! Ninga Yehova awogiliye ni Ezekiyeli egihina: ‘Kuwoove,’ Yehova onowoga ni iyo egihina: ‘Kuthuwathuwe.’ Mwahaya bwaddi nahihowelaga wawova ale enaniharahara? Mwaha ninga Ezekiyeli, iyo nere orumiwa ni Yehova ni nihikanna nikavihero naye.— Omwileri Isaías 44:8.
6. a) Madhu baani awogile Yehova enanivaha ebaribari wihina anere onikavihera? b) Enanivaha kopolo ni enanitodola ddi?
6 Yehova anopaganya wihina anere onikavihera. Motajhiha, Yehova ahinathi owoga egi: ‘Nyu muli anamoona aaga,’ oliye ohuwoga egihina: ‘Waaviraga mmanjheni, ginere okala ni we. Ni waabuwaga muhinjhe, kunaaddadde. Naarive weddaga vaari va mootho kunaaje, newene kunutotele makwadda.’ (Isa. 43:2) Nalaleyaga malabo owinjhivene nnofwanyiwa makathamiho enakala ninga manjhe yadhala vego ni mahoso enakala ninga mootho. Naari dhigalive ndo nnikavihero na Yehova nnodhowave nlaleyaga. (Isa. 41:13) Moligana ni malabo a Ezekiyeli, malabo a peeno athu kinafuna ovuruwana muthenga nnalaleyihu. Mbwenye iyo nihinona wihina makalelo ewa owakela muthengaya kinatapulela wihina iyo kanili “Anamoona” apama vamentoni va Mulugu. Enanitodola ni enanivaha kopolo funona wihina Yehova anohagalala naadidelagave olaleya nuuliba murima. Murumiwi Pawulo ohuwoga egi: ‘Kadda muthu anaakele mukono waye mowiwanana ni mabasa aapariliye.’ (1 Cor. 3:8; 4:1, 2) Murogola dhaala ali piyonera muwari mwa yakadhene ohuwoga egi: “Enagihagalasa funona wihina Yehova anna oreeliha wilibihedha wehu.”
EZEKIYELI — AHOONA MAKALELO MUZIMU WOTXENA WAALIWA WAKOPOLO
Ezekiyeli woona karo yomuzimuni ya Yehova, yalibinhe nroromelo naaye nowihina Yehova eere omukavihera wapara mabasaye oolaleya (Osugwe ddima 7)
7. Ezekiyeli oonamo aavi iimela ubuwela yowoona ele ooniliye? (Osugwe fotu yavakapani.)
7 Ezekiyeli ahoona makalelo muzimu wotxena onniwana kopolo. Oliye ahikanna yowoona yamukavihere wonelamo wihina muzimu wotxena weere wavaha akopolo angero yeddihaga maroda manlubale a karo yomuzimuni. (Eze. 1:20, 21) Nuwoona dhithu ndhe Ezekiyeli aali aavi? Oliye ohuleba yaapadduwile egihina: ‘Nuwoona dhithu ndhe, miyo omothela vati.’ Ezekiyeli ahithabwa otikina ele ooniliye ofiyedha omotha (Eze. 1:28) Nuwindo, mudhidhi wamutene ubuweliye yowoona ele podi wera oliye ooliba murima mwaha onona wi ni kopolo dha muzimu wotxena wa Mulugu oliye eere wanda wakwanihedha mutholo waye.
8-9. a) Yehova amurumme ddi Ezekiyeli? b) Nikavihero baani Yehova anvahiliye Ezekiyeli wihina aagonjhihe makathamiho yanfwanya vamuruddani vaye?
8 Yehova owoga ni Ezekiyeli egihina: ‘Mwaana muthu, karajhiha wimmela ginafuna giwoge ni we.’ Madhu ala vamodha ni muzimu wootxena wahinvaha kopolo ahoweliye wihina akale owimelene. Ezekiyeli oleba egihina: ‘Muzimu ogivaha kopolo, vano miyo wimela.’ (Eze. 2:1, 2) Obajha mudhidhi yole odhowa osogolo Ezekiyeli eeddihiwa ni ‘nlada’ na Yehova — obe ni muzimu wotxena mmabasani oolaleya. (Eze. 3:22; 8:1; 33:22; 37:1; 40:1) Muzimu wotxena wa Mulugu wahimulibiha Ezekiyeli wodhela mutholo aakenliye — walaleya athu oovadda muru ni a murima wowukuwa. (Eze. 3:7) Yehova owoga ni Ezekiyeli egi: ‘Giheriha wihina kove yawo ekale yolibiha ninga kove dhewa, ni giheriha wihina murima wawo okale wooliba ninga murima dhewa. Giheriha murima wawo wihina okale wovadda ninga nibwe na diyamanti, noliba okwaranya mujhila. Kuwawove mwaha ekalelo eli omentoniwiwa.’ (Eze. 3:8, 9) Yakala ninga Yehova awoga ni Ezekiyeli egihina: ‘Kuhiye wihina ovuruvuru wa nlogo nno wukwerebeyihe.’
9 Mowindo, muzimu wa Mulugu womukavihera Ezekiyeli mwaatemwene aviriyemo. Oliye ohuleba egi: ‘Nlada na Yehova nahigilibiha vanlubale.’ Yahivira sumana modha Ezekiyeli avedaga wonelamo muthenga aanniyena wihina alaleye nimurima wamutene. (Eze. 3:14, 15) Vano Yehova omwaddela Ezekiyeli wihina adhowe omwangoni wengo ‘aakeliye kopolo dha muzimu wotxena.’ (Eze. 3:23, 24) Vano Ezekiyeli aali owiwegeredhene wihina awambele mabasa aye oolaleya.
MUZIMU WOTXENA WINONILIBIHA
Ninga epadduwe ni Ezekiyeli enaanikavihere ddi odhowagave naaparaga mabasa oolaleya?(Osugwe ddima 10)
10. Nikavihero baani nnahowelihu wihina nande olaleya, ki mwahaya bwaddi?
10 Nikavihero baani nnahowelihu wihina nande wakwanihedha mabasihu oolaleya? Negi nakule, kabiha wubuwela yampadduwele Ezekiyeli. Ezekiyeli ahinabajhe olaleya, teto muzimu wotxena wahinvaha kopolo ahoweliye. Peeno ninga yampadduwele Ezekiyeli iyo nnanda olaleya nnikavihero na muzimu wotxena. Mwahaya bwaddi? Mwaha Saddana anowana ni iyo ni anafuna anihihe olaleya. (Apo. 12:17) Vamentoni vaathu iyo podi okalaga ninga kaavo ananibarela mwilaboni ela ya Saddana. Mbwenye wodhela mabasa oolaleya iyo ninna omugonjhiha Saddana! (Apo. 12:9-11) Nimakalelo baani? Naaparaga mabasa oolaleya nnowoniha wi kannoova dhoweha dha Saddana. Mudhidhi wamutene nalaleyaga ninna omugonjhiha. Ki vano, ethu baani nnahowelihu wubuwelaga, nanona wihina nnohowela odhowagave nlaleyaga naarive nifwanyiwaga dhoweha? Eyo enowoniha wi Yehova anonirumedha vamentoni vaye ni anonikavihera ni muzimu waye wotxena. — Mat. 5:10-12; 1 Ped. 4:14.
11. Muzimu wotxena onanerele ddi, ki nnande aavi odhowagave naakelaga muzimu wotxena?
11 Yororomeliha baani nnakannihuna mwaha onona wihina Yehova aheriha wihina kove ya Ezekiyeli ekale yoovadda ninga nibwe? Enoniroromeliha wihina muzimu wotxena onere onlibiha wihina nande wagonjhiha makathamiho bi makathamiho nnafwanyiwihu mmalaleyelo. (2 Cor. 4:7-9) Ki ethu baani nnahowelihu werana wihina nidhowegeve naakelaga muzimu wotxena wa Mulugu? Nnohowela olobela mudhidhi wamutene, nroromelaga wihina Yehova anere onivuruwana ni anere onivaha muzimu waye. Yesu ohahudhiha anamahara aye egi: ‘Mudidele okoha, . . . mudidele osayela, . . . mudidele ovada.’ Mareelihoya, Yehova anere ‘wavaha muzimu wotxena ale enaamulobe.’ —Lucas 11:9, 13; Atos 1:14; 2:4.
MADHU A MULUGU YAHILIBIHA NROROMELO NA EZEKIYELI
12. Mowiwanana ni Ezequiel 2:9–3:3, rolu ele yaadhele wuuvi, ki yalebiwemo ddi?
12 Muzimu wa Mulugu wahinvaha Ezekiyeli kopolo ni oliba murima ahoweliye wihina alaleye, mbwenye kiyaali eyeneve baahi. Madhu a Mulugu yahilibiha nroromelo na Ezekiyeli. Va yowoona dhaala Ezekiyeli ahoona nlada nahiddele rolu. (Omwileri Ezequiel 2:9–3:3) Elebiwemo ddi? Ki yalibihe aavi nroromelo na Ezekiyeli? Rolu ela enadhela wa mwinnyene Yehova. Podi wera Yehova amulabihedhe mungero mmodha wa angero ale annayi Ezekiyeli awoniliye wihina anvahedhele rolu ele. (Eze. 1:8; 10:7, 20) Rolu ele, yaalebiwevo madhu a Mulugu ni muthenga dhowinjhiva dhotoriha wihina Ezekiyeli alaleye nlogo nohiwelela nooJuda naali adhaari. (Eze. 2:7) Muthenga ola waalebiwe epaddi yosogolo ni yoharela.
13. Ethu baani Yehova amulombiye Ezekiyeli wi erena ni rolu, ki mwahaya bwaddi edhe ethapilege?
13 Yehova omwaddela namavuhulela aye wi ‘ajhe rolu ele ni arubale.’ Ezekiyeli ahiwelela wodhela ojha rolu yaatene. Epaddi ya yowoona ela enatapulela ddi? Ezekiyeli ohowela wonelamo pama muthenga afuniye olaleya. Oliye ohowela orumedha muthenga ola teto ande olaleya ni murima waatene. Mowindo opadduwa ethu yohujhehedha. Ezekiyeli woona wihina rolu ele ‘yothapila ninga enwi.’ (Eze. 3:3) Wa Ezekiyeli, omuthithimiha Yehova yaali gari enlubale ninga othapila wa enwi. (Sal. 19:8-11) Oliye omutamalela vanlubale Yehova mwaha omusakula wihina akale namavuhulela aye.
14. Ethu baani yamukavihere Ezekiyeli orumedha mutholo waye?
14 Nuwindo, Yehova owoga ni Ezekiyeli egihina: ‘Orumedhe ni murima watene ni ovuruwane madhu amatene ginuwaddelimi.’ (Eze. 3:10) Mwaha wa yeyo, Yehova afuna amwaddele Ezekiyeli wi ahadduwale madhu eli va roluni ni wihina aapenddege. Eyo yere olibiha vanlubale nroromelo na Ezekiyeli. Mudhidhi mmodhave, ola waali muthenga Ezekiyeli ahoweliye walaleya malogo amatene. (Eze. 3:11) Ni madhu a Mulugu muwano ni mmurimani mwaaye Ezekiyeli aali owiwegeredhene wihina arumedhe ni aakwanelihe mutholo waye. — Omusugwe Salmos 19:14.
MADHU A MULUGU ENOLIBIHA NROROMELO NEHU
15. Wihina nande ovilela mmalaleyelo ethu baani nnahowelihu ‘orumedha mmurimani mwehu’?
15 Wihina nande wavilelana mabasa oolaleya, nnohowela olibiha nroromelo nehu ni madhu a Mulugu. Iyo nnohowela orumedha mmurimani mwehu dhatedhene Yehova ananaddeliye. Peeno Yehova anothapanya ni iyo wodhela Bibiliya. Nnere ddi wihina madhu a Mulugu evolowele makalelo ehu owubuwela ni werana dhosakula?
16. Ethu baani nnahowelihu werana wihina nawonelemo madhu a Mulugu?
16 Najha ni naveda mudhidhi wihina nithuwe vang’ono nnopurelamo vanlubale yojhaya, nimakalelo mamodhave nahudhera madhu a Mulugu ni napendda ndhe nnahudherihu nnolibiha nroromelo nehu. Ela ethu Yehova anafuniye wihina nahidduwale mowiwanana ni yowoona ya rolu. Yehova anafuna wihina naarubale madhu aye, teto eyo enatapulela wihina nnohowela omonelamo pamadhene Bibiliya. Iyo podi werana eyo wodhela olobela, ohudhera ni opendda. Vobajha nnolobela wihina negeredhe murima wehu wihina nonelemo ndhe nnahudherihu mBibliyani. Nuwindo iyo wileri epaddi yoharela ya Bibiliya. Vano waja mudhidhi wihina nipendde ndhe nilerilihu. Mareeliho baani enakumelelavo? Mudhidhi napenddaga nnerege wonelamo ndhe nnahudherihu, ni nnere olibiha nroromelo nehu.
17. Mwahaya bwaddi ekala yathima ele nnilerihu mBibiliyani?
17 Mwahaya bwaddi ekala yathima omwileri Bibiliya ni opendda? Siyeyo enaanivahe kopolo ovanene wihina nande olaleya muthenga dhapama dha Omwene ni osogolo olaleya muthenga wotoriha akala nnere okalawo. Ohiya eyo naapenddaga dhikalelo dhapama dha Yehova wandana wehu winoliba. Eyo enere onihagalasa ni enere onivaha murenddele. — Sal. 119:103.
KOPOLO WIHINA NIVILELE
18. Ethu baani athu a murudda wehu enahoweliwa wonelamo, ki mwahaya bwaddi?
18 Ezekiyeli aali namavuhulela mbwenye iyo kanili. Naari dhigalive ndo, iyo nihithoma wihina nilaleyegeve muthenga ahiliye mBibliyani ofiyedha oliye owoga egi mugomele vevala. Wafiya mudhidhi wotoriha athu enakala murudda wehu kinawoge yegihina iyo kanaddeliwe obe Mulugu ahinidduwala. (Eze. 3:19; 18:23) Ohiya eyo, aliwa enere wonelamo wihina muthenga nalaleyihu dhadhela wa Mulugu.
19. Enanivaha kopolo wihina nande wakwaneliha mabasa oolaleya ddi?
19 Enaanikavihere okanna kopolo wihina nakwanihedhe mabasa oolaleya ddi? Dhithu dhimodhave tharu dhimulibihe Ezekiyeli. Iyo nnalaleya mwaha nihikanna ebaribari wihina nirumiwe ni Yehova, nnolibihiwa ni muzimu wotxena ni nnowijhiha ni madhu a Mulugu. Nnikavihero na Yehova nnokanna kopolo wihina ndhowegeve naaparaga mabasa aye oolaleya nuuvilela ‘ofiyedha omakuthulo.’— Mat. 24:13.
JHIBO 65 Nididelege weedda ni kopolo!
a Ohudhera wula nnere woona dhithu tharu dhamukavihere Ezekiyeli wakwanihedha mutholo waye. Wubuwela makalelo Yehova amukaviheriye namavuhulela ole, winere olibiha nroromelo nehu wi anere onikavihera wakwanihedha mutholo dhehu ninga amukaviheriye Ezekiyeli.