1-2. a) Makoho baani nnawakulihu? b) Enoniha ddi wihina Yehova onofuna onikavihera?

 YEHOVA podi onikavihera wawanana makathamiho enanifwanya mwigumini mwehu ni okanna murenddele mmabasani mwaaye. Yehova anera ni makalelo baani? Nnande addi opurelamo nikavihero ananivahiye? Ohudhera wula winere onikavihera ofwanya yowakula ya makoho ala. Mbwenye nihinathi, nnere wakula nikoho nna, Yehova mwebaribarene onofuna onikavihera?

² Karta murumiwi Pawulo alebeliiye meberewu enofwanyamo madhu enanikavihera wawakula makoho ala. Oliye oleba egi: ‘Yehova dinagikavihera; kaginoove muthu anaagerele ddi?’ (Heb. 13:6) Anamahudhera amodha a Bibiliya ewogile wihina “namakavihera” alabihedhiwa va versuni vala, anagiwana muthu anathamaga wihina amukavihera ole anahowela nikavihero. Kamubuwele Yehova athamagaga wihina amukavihere ole ali vangovini. Mwebaribarene epaddi ela enowiwanana ni Yehova. Oliye onofuna vanlubale okala namakavihera ehu. Nnikavihero na Yehova iyo nnere wanda ogonjhiha ethu-sithu ni ohagalala.

3. Dhikalelo baani tharu Yehova analabihedhiye wihina nagonjhihe makathamiho ni ohagalala?

³ Nimakalelo baani Yehova ananikaviheriye wagonjhiha makathamiho nuuhagalala? Wihina naakule nikoho nna, nnere woona dhipaddi ngaasi-ngaasi na livuru na Izayiya. Mwahaya bwaddi? Mwaha dhovuhulela dhowinjhiva Izayiya alebeliiye dhinonikavihera iyo peeno. Ohiya eyo, dila dhowinjhivadhene  Izayiya ahileba wodhela Yehova nimakalelo okweya wonelamo. Motajhiha kasugwa kapitulu 30 ya Izayiya, vala namavuhulela Izayiya ahilabihedha dholaddaniha dhowinjhiva dhinanikavihera wonelamo makalelo Yehova anasamaleliye nlogo naaye. Oliye onowerana eyo (1) wodhela wavuruwana malobelo ehu ni wawakula, (2) wodhela onivaha dhoholela, (3) wodhela onreeliha ovanene ni osogolo. Vano nnere woona dhikalelo ndha tharu Yehova analabihedhiye wihina anikavihere.

4. a) Yehova awogile ddi wodhela majudewu a mudhidhi wa Izayiya, ki Yehova enyile wihina yapadduwele ddi? b) Ejhehero baani Yehova aavahiliye majudewu oororomeleya? (Isaías 30:18, 19)

⁴ Omabajho wa kapitulu 30 a Izayiya Yehova onowasoriha majudewu ninga ‘ahima oovururu’ ni ‘Yiwugela dhothega.’ Oliye onodhowave egi: ‘aliwa nlogo nohiwelela yahinafuna wawiwelela malamulo a Yehova’ (Isa. 30:1, 9) Izayiya usoriha egi Yehova eere weenya wi nlogo naaye osinyusiwa mwaha wohawiwelela madhu aye. (Isa. 30:5, 17; Jer. 25:8-11) Teto siyeyo yapadduwe nlogo othukuleliwa oBabiloniya wihina yakale adhaari. Mbwenye yahikalawo maJudewu amodha yaali oororomeleya wa Yehova. Teto namavuhulela Izayiya ahikanna muthenga wa ejhehedho wihina awaddele, oliye owoga wihina Yehova eere weenya wihina nlabo nimodha aliwa ehogolowele oJeruzale. (Omwileri Isaías 30:18, 19.) Mpaganyo ola wahakwanela mudhidhi oobonliye nlogo naaye oBabiloniya. Mbwenye dhithu ndha kadhapadduwe dhiharanaga. Madhu owi ‘Yehova onojheha nuuvilela wihina eeddele thagaraga nlogo naaye,’ yoniha wihina Yehova eere weddela thagaraga nlogo naaye osogolo. Amwaana Ezarayeli yahimala yaka 70 egaali oBabiloniya yahenyiwe wihina ehogolowele oJeruzale. (Isa. 10:21; Jer. 29:10) Vano nuwenyiwa, okubanya watewene yanniwana egaali oBabiloniya, vano osadduwa okala murenddele.

5. Isaías 30:19, ananiroromeliha ddi?

⁵ Iyo podi olibiheya vanlubale ni madhu enafwanyeya va Isaías 30:19 enihina: ‘Wampigiriyela Yehova olobaga nikavihero, anere wuweddela thagaraga.’ Izayiya ononroromeliha wihina Yehova ‘onopwasedha onivuruwana naalobaga nikavihero.’ Madhu ala ootodola enonubusedha wihina baabihu onofuna — vanlubale — wakavihera ale enanfiyedhe oliye. Onona eyo enere onikavihera ovilela ni ohagalala.

6. Madhu a namavuhulela Izayiya enoniha addi wihina Yehova onowapwasedha wavuruwana malobelo a kadda muthu?

⁶ Yolebela ya Isaías 30:19 enanroromeliha ethu baani wodhela malobelo ehu. Yehova onoopwasedha pama ovuruwana nlobelo na kadda muthu wa iyo. Mwahaya bwaddi nigawogaga ndo? Versu dhobajha dha kapitulu 30 a Izayiya, Yehova onowithana nlogo naye alabihedhaga madhu owi “nyu” obe, onowawithana ninga nikuru. Mbwenye versu 19 oliye onowalabihedha madhu owi “we” mwaha oliye anafuna awoge muthenga waye ni kadda muthu wa iyo. Izayiya ohuleba egi: ‘We kunadha wunlaga’; ‘we wampigiriyela omulobaga nikavihero oliye anere wuweddela thagaraga’; ‘ni anere wuwakula.’ Ninga baabi odhivela, Yehova kanaawoge ni mwanaye egi: We onohowela okala oliba ninga ddibilo obe murogoliyo. Ohiya eyo, oliye ononthuwathuwela wa kadda muthu wa iyo ni ononipwasedha onivuruwana nalobelaga. — Sal. 116:1; Isa. 57:15.

7. Nimakalelo baani Izayiya ni Yesu yonihiliwa wi sofuneya odidela olobela?

⁷ Nalobelaga wa Yehova wodhela ethu sithu  enanithuwathuwiha, podi wera ethu yobajha Yehova ananivahiye sikopolo wihina nande owanana yoweha ele. Mbwenye makathamihoya yaadhowagave, podi wera kannaselela oloba kopolo wa Yehova wihina anikavihere wawanana makathamihoya. Mwebaribarene Yehova anafuna wi iyo nerena eyo, teto siyeyo enatapulela madhu a Izayiya. Oliye ohuleba egi: ‘Kammuhiye [Yehova] withuwa.’ (Isa. 62:7) Eyo enatapulela ddi? Nnohowela odidelave olobela ofiyedha ohumuhiya Yehova withuwa. Madhu a Izayiya enonubusedha madhu a Yesu awogiliye wodhela malobelo enafwanyeya va Lucas 11:8-10, 13. Vala Yesu ononikongomedha olobela ni ntidi ni odidela oloba muzimu wotxena. Iyo podi ompigiriyela Yehova nimulobaga enonelo wihina nerena yothoma yapama.

8. Yolebela ya Isaías 30:20, 21, yaakwanele nimakalelo baani?

⁸ Omwileri Isaías 30:20, 21. Anyakoddo oBabiloniya nuumurijha Jeruzale muwari mwa yaka modha ni meya makathamiho obajha wenjhedhedheya. Mbwenye mowiwanana ni versu 20 ni 21, Yehova opaganya wihina majudewu yahatwaruwe ni yahasaddule dhowera dhewa eere wawobola. Izayiya amwithana Yehova ninga “Namahudhiha Munlubale,” oliye owoga ni nlogo egi: Yehova eere wahudhiha makalelo apama oomwebedha. Eyo yakwanele maJudewu nuwoboliwa oBabiloniya. Mwebaribarene Yehova aali namahudhiha munlubale a majudewu. Eharaga dhoholela dha Yehova yahanda ovenyihedha webedha webaribari. Peeno iyo nihirelihiwa vanlubale wodhela okanna Yehova ninga namahudhiha ehu.

9. Makalelo mamodha Yehova analabihedhiye peeno wihina anivahe dhoholela baavi?

⁹ Va Isaías 30:20, 21, Izayiya ononiliganiha ni anamahudhera enahudhihiwa ni Yehova. Oliye onolabihedha makalelo menddi wihina anihudhihe, Izayiya onowoga makalelo oobajha egi: ‘We onere omoona namahudhiha awo ni mento awo.’ Yoladdaniha ela eli ninga namahudhiha anakala osogolo wanamahudheraye. Iyo nli ninga anamahudhera ala, nihikanna gari enlubale yohudhihiwa ni Yehova. Ananihudhiha ni makalelo baani? Oliye onowerana eyo wodhela nikuru naaye. Teto iyo nnotamalela vanlubale wodhela waakela dhoholela dhinadhela munikuruni mwaaye! Dhoholela dhatene nnakelihu mmutugumanoni, vamusonkanoni, malivuru ehu, porogarama a JW Broadcasting ni makalelo mamodha enalabedhiwa, dhinonikavihera  wavilelana makathamiho nuuhagalala ni dhoweha dhimodha dhinadhege osogolo.

10. Nimakalelo baani nniwihu ndhu na Mulugu odduli wehu?

¹⁰ Izayiya onowawoga makalelo mamodha a Yehova onihudhiha, oliye owoga egi: ‘Mabaru awo enere wiwa odduli wawo ndhu niwogaga.’ Vala Izayiya onomuwoga Yehova ninga namahudhiha ali owiwegeredhene ali odduli wa anamahudhera aye atonyaga osogolo ni awaddelaga dila baani enahoweliwa ohara. Peeno iyo nnovuruwana ndhu na mulugu niwogaga odduli wehu. Ni makalelo baani? Madhu a mulugu enafwanyeya mBibiliyani elebiwe kale, vano namwilerigi Bibiliya enakala ninga nnavuruwana ndhu na Mulugu niwogaga odduli wehu. — Isa. 51:4.

11. Negi nande ovilela ni ohagalala dhithu baani biili nnahowelihu werana, ki mwahaya bwaddi?

¹¹ Nnande addi opurelamo dhoholela ananivaha Yehova wodhela nikuru naaye ni Bibiliya. We uhanda wonelamo wihina Izayiya awogile dhithu biili? Vobajha oliye awogile egi: ‘Ela sidilaya.’ Yanabili ‘muharege.’ (Isa. 30:21) Teto onona ‘dilaya’ kinatapulela wihina ohunona dhatedhene, nnohowela ‘weeddamo.’ Wodhela madhu a Yehova iyo nnohudhera werana ndhe oliye anafuniye. Teto Yehova ononihudhiha oparihedha mabasa ndhe nnahudherihu. Wihina nande ovilela ni mabasa ehu nnamparelihu Yehova, nnohowela onona dilaya siivi ni weddagamo. Nerana ndo nnere okanna ebaribari wihina Yehova anere onreeliha.

12. Mowiwanana ni Isaías 30:23-26, nimakalelo baani Yehova aareelihiye nlogo naaye?

¹² Omwileri Isaías 30:23-26. Yovuhulela ela yahakwanela ni maJudewu yahogolowele elabo yowiZarayeli nuuvira yaka dhowinjhivadhene egaali adhaari oBabiloniya. Aliwa yahaawakela mareeliho owinjhiva, oomwiilini ni oomuzimuni. Mareeliho a Yehova yahaweriha wihina nlogo ekanne dhoojha dhowinjhiva, mbwenye mareeliho manlubaleya fowihina Yehova ahareeliha ni dhoojha dhomuzimuni dhakavihere ohogolowela omwebedha Yehova ni makalelo apama. Nlogo na Mulugu na mudhidhi yoole yahireelihiwa okwaranya mudhidhi wamutene. Mareeliho yawakeliwa mudhidhi yoole, yahikwaranya dhatedhene yoniliwa mundduli. Versu 26 enowoniha makalelo Yehova enjhedhedhiye waara womuzimuni akaviheraga nlogo naaye wawonelamo madhu aye. (Isa. 60:2) Mareeliho a Yehova yahakavihera adhaaraye odhowagave emulabelaga oliye ni murimiwa  watene ni ohagalala ‘wodhela okanna ekalelo ya pama.’ — Isa. 65:14.

13. Ni makalelo baani yovuhulela wodhela ovenyihedhiwa wowebedha webaribari winanivoloweliwa peeno?

¹³ Nerege yovuhulela wodhela ovenyihedhiwa webedha webaribari winonivolowela iyo peeno? Hee, ki nimakalelo baani? Obajha yaka ya 1919 muthithi ni muthithi waathu, ehihiya okosa epaddi ya Babiloniya munlubale obe dhigereja dhowoota. Aliwa ehithaneliwa mburo wapama okwaranya elabo yothomeliwa yaamwaana Ezarayeli. Aliwa yithaneliwe parayizu oomuzimuni. (Isa. 51:3; 66:8) Parayizu oomuzimuni ddi?

14. Parayizu oomuzimuni enagiwana ddi, ki anakalamo peeno baani? (Osugwe Wonelamo pama.)

¹⁴ Obajha yaka ya 1919 alobwana othikitheriwa enakala mParayizuni oomuzimuni. b Teto ale enna ejhehedho yokala mwilaboni ya vati, eli ‘mambila mamodha’ ni aliwaya enokala mparayizuni yomuzimuni peeno. — João 10:16; Isa. 25:6; 65:13.

15. Parayizu oomuzimu anafwanyeya wuuvi?

¹⁵ Peeno nnanfwanye wuuvi parayizu oomuzimuni? Nlogo na Yehova podi ofwanyiwa elabo yaatene. Bumwahaya iyo podi owoga wihina Parayizu omuzimu onofwanyiwa elabo yaatene. Bumwahaya kannapwatha elabo nnakalihuwo, iyo podi okala mparayizuni omuzimuni naakaviheraga webedha webaribari.

16. Ethu baani nnahowelihu weera wihina noone murenddele onna parayizu omuzimuni?

¹⁶ Wihina nidhowegeve nikalaga mparayizuni oomuzimuni, nnohowela wawoniha odhivela addibilihu. Nnande addi weera ndo? Wodhela osugwa dhikalelo dhapama dhaddibilihu, ohiya osugwa dhoviriganiha dhaale enaakale mparayizuni oomuzimuni. (João 17:20, 21) Mwahaya bwaddi eyo ekala ethu yathima? Kabiha wubuwela yotajhiha ela. Nadhowaga waredha oparikini winanidhivela, iyo nnopwasedha woona dhithu dhohiyana-iyana dhoriya. Ni makalelo mamodhave, peeno mmulogoni nnowafwanya addibila ni  arogola ohiyana-iyana enakala ninga dhithu dhoriya nonilihu mparikini. (Isa. 44:4; 61:3) Naarive dhigalive ndo, opariki dhihikawo dhithu dhowinjhiva, mbwenye iyo nnathabwa osugwa ndhe “dhinanidhivela” ohiya ndhe “dhahinanidhivela.” Ni iyowa kannafuna wihina dhoviriganiha dhehu obe dha addibilihu, dhinthukulele ohoona murenddele ni wiwanana onna nlogo na Yehova elabo yaatene.

17. Ethu baani kadda muthu anahoweliye werana wihina adhena wiwanana mmulogoni?

¹⁷ Nimakalelo baani kadda muthu wa iyo nnandihu okavihera wiwanana wula? Nakala athu amurenddele! (Mat 5:9; Rom. 12:18) Naajhaga mudhidhi wihina nandane ni addibila ammulogoni, ninna winjhiviha murenddele mparayizu oomuzimuni. Nnohowela ohuddiwala wihina Yehova dawithane aatene eli mparayizuni oomuzimuni wihina emwebedhe ni makalelo oweela. Kubuwela makalelo Yehova anahagalaliiye anonaga nilibiheraga wihina ndhena murenddele ni wiwanana ni adhaaraye anathabwiye wavaha thima! — Isa. 26:3; Hab. 2:7

18. Nipenddege wodhela ddi, ki mwahaya bwaddi?

¹⁸ Nnande addi wapurelamu mareeliho Yehova ananivahiye? Nnowerana eyo wodhela opendda ndhe nnahudherihu mBibiliyani ni mmalivuruni mwehu. Eyo enere onikavihera woniha dhikalelo dheekiristawu dhinanthukulele woniha ‘odhivela wahinamala’ ni ‘waapwatha amodha’ mmulogoni. (Rom. 12:10) Naapenddaga mareeliho ninnihuna ovanene, nnere wanda olibiha wandana ninnihuna ni Yehova. Teto nawubuwela mareeliho Yehova anaanivahiye osogolo, ejhehedho ninnihuna yomulabela oliye ni mukalakala, winere okala webaribari. Dhatedhene dhendha dhinere onikavihera omulabela Yehova nuuhagalala peeno.

19. a) Mowiwanana ni Isaías 30:18, ebaribari baani nnahowelihu okanna? b) Enaanikavihere ddi ovilela ni ohagalala?

¹⁹ Yehova anere ‘onibarela’ omakuthulo wa elabo ela yabure yafiya. (Isa. 30:18) Iyo kannanganyedha wihina Yehova — ‘Mulugu a opama’ — oliye kaneenye newene elabo ya Saddana okalawo nlabo nimodha. (Isa. 25:9) Iyo nnojheha nlabo Yehova anadhiye anoobole mwilaboni ela ya bure. Mudhidhi yoola, iyo nnafuna noonihe otamalela wodhela okanna gari yoolobela, yohudhera, oparihedha mabasa ndhe nnahudherihu mBibiliyani ni wawubuwela mareeliho nnawakelihu. Neerana ndo, Yehova anere onikavihera ovilela ni ohagalala namwebedhaga oliyeene baani.