1. Ethu yapama enafwanelela athu osakula siviniya?

DHOSAKULA dhinerana ababi dhinowapata aniwa mudhidhene. Ababi yasakula dhithu dhabure podi watotela aniwa makathamiho. Mbwenye yasakula dhithu dhapama podi okanna egumi yapama osogolo. Teto naahimaya enohoweleya esakulege dhithu dhapama. Yapamaya enafwanelela muthu osakula fuusakula omulabela Yehova babihu. — Sal. 73:28.

2. Dhosakula baani dhapama dherilena Juze Mariya ni Yesu?

² Ababi a Yesu Juze ni Mariya, aliwa yaali owikomeene wi emulabele Yehova. Dhosakula dhewa dhowonihera wihina eyo yaari ethu yathima mwigumini mwewa. (Luc. 2:40, 41, 52) Yesu kiristu ahisakula dhego dhapama mwigumini mwaaye. Bumwahaya adhe eeregena dhithu dhatedhene ajheha Yehova. (Mat. 4:1-10) Yesu kiristu aari pogo apama orolomeleya ni oliba murima. Ababi enohagalala aniwa yakanna dhikalelo ninga dhendha aanna Yesu.

3. Makoho baani nnawakulihu muwari mwa yohudhera ela?

³ Muwari mwa yohudhera ela nnere osuza dhowakula dha makoho ala mararu. Noobajha, dhosakula baani dhapama erilena Yehova dhamukavihere Yesu? Ababi enahudhera ddi ni dhosakula dha Juze vamodha ni Mariya? Ki azombwe enahudhera ddi ni dhosakula dha Yesu?

4. Dhosakula baani dhapama erilena Yehova dhamukavihere Yesu?

⁴ Yehova ahasakula ababi apama a Yesu. (Mat. 1:18-23; Luc. 1:26-38) Mariya oomudhivela Yehova vamodha ni dholebela  dhaye, ela enowoneya wodhela madhu aye eri mBibliyani. (Luc. 1:46-55) Juze oomudhivela Yehova ni oofuna omuhagalasa. Yehova anvaha dholaga, Juze ohara mowaguva.— Mat. 1:24.

5-6. Dhopadduwa baani dhenyile Yehova wi dhimwereyele Yesu?

⁵ Yehova kaasakule ababi orela wihina emulele mwanaye. Mukutho aavahile Juze vamodha ni Mariya Yesu nuubaliwa, enowoniha wihina aliwa yaali athu ohawa. (Luc. 2:24) Podi wera Juze ari kalapintero vade vaye elabo yo Nazare, iyo podi wera aliwa yahikanna egumi yojajala. Ethu modha enoniha yeyo sowi aliwa yanna ahima atanu nabili. — Mat. 13:55, 56.

⁶ Yehova ahimbarela Yesu mwa dhego dhowopiha, mbwenye kadhaari dhatedhene. (Mat. 2:13-15) Motajhiha, Yesu Kiristu ahikanna amudhaaye yahari adhari a Yehova. Kubuwela: Omambelelo amudhaaye kiyarumedha wi oliye di Mesiya. Ela yaali ethu yowuukuliha vanlubale mwa oliye. (Mar. 3:21; João 7:5) Ohiya yeyove, podi wera Yesu ahukuuwa vanlubale mwaha womuyelela babe Juze muukwani. Woona wi Yesu aari mwana a pogoya a Juze, podi wera oliye dahanlena mabasa okalapintero. (Mar. 6:3) Mudhidhi unnuweye, oliye ahihudhera okavihera emudhaye. Podi wera, dahanlena mutholo wowapara mabasa wihina asapele emudhi. Mwaha wa yeyo podi wera ahinona enatapulela ddi ogoma muthu athabwa olaba bure.

7. a) Ale etelane makoho baani enahoweleya wawerana wodhela walela aniwa? b) Provérbios 2:1-6 onaakavihera addi ababi walela ahima?

⁷ Akala we ohutela ni onofuna okanna ahima, wikohe: ‘Iyo niri owiyeviha teto owunnuwelavo omuzimuni? Yehova onere orumedha wi nisamalele egumi exa ni yathima?’ (Sal. 127:3, 4) Akala we ohukanna ahima wikohe: ‘Ginowahudhiha anaga wonelamo thima enna mabasa?’ (Ecl. 3:12, 13) ‘Woona wi elabo ela ya Saddana dhihikalamo dhego dhowopiha dhomwilini ni dhomuzimuni ginowilibihera wi gabarele?’ (Pro. 22:3) We kunande wabarela anawo ofiyedha ohufwanyiwa makathamiho; eyo kinandeya. Enenyeya fuwakavihera ahima onona makalelo owanana makathamiho a mwilaboni. Nuudhivela wakavihere anawo ororomela  dholaga dhiri mBibliyani yaafwanyiwaga makathamiho. (Omwileri Provérbios 2:1-6.) Motajhiha, akala mmudhi ohusakula omusukuma Yehova, we podi omulabihedha Bibliya wi wawonihe mwahaya bwaddi ekala yathima omulabela Yehova malabwene. (Sal. 31:23) Obe akala momuyelela mmudhi muukwani, wawonihe anawo makalelo Bibliya onanikavihereye okala otodoleyene ni a murenddele naari nigari vaari va makathamiho. — 2 Cor. 1:3, 4; 2 Tim. 3:16.

8. Dholaga baani dhinafwanyeya va Deuteronómio 6:6, 7 aharihile Juze ni Mariya?

⁸ Juze ni Mariya yahimukavihera Yesu wihina unnuwe wula avahaga thima wandana waye ni Mulugu. Aliwa yohariha dholaga dha Yehova onavahiye ababi. (Omwileri Deuteronómio 6:6, 7.) Juze ni Mariya yomudhivela vanlubale Yehova. Ethu yathima mwigumini mwewa yaari wakongomedha aniwa wihina ekanne odhivela wimodhave.

9. Dhosakula baani dhapama asakule Juze ni Mariya?

⁹ Ababi a Yesu yahisakula mweddelo wapama wakavihere aniwa epaddi yomuzimuni. Mohanganyedha, kadda sumana yodhowa omutugumanoni oSinagoga oNazare, yaka dhatedhene yodhowa opaskwani o Jeruzale. (Luc. 2:41; 4:16) Aliwa yakala vamodha mulenddoni, podi wera Juze ni Mariya yomuhudhiha Yesu ni aniwa amodha thalako dha nlogo na Yehova. Podi wera yodhowa waredhela vamodha mburo dhilebiwe mBibliyani. Murala wewa nuwambela wunnuwa, podi wera kiyari yokweya Juze ni Mariya okalave oowarala epaddi yomuzimuni. Nahuna yahaawakela mareeliho owinjhiva! Mwaha wopweha epaddi yomuzimuni mburo wobajha mwigumini mwewa, murala watene waali wolibeene omuzimuni.

10. Dhego baani enahudhera ababi ni thalako ya Juze ni Mariya?

¹⁰ Ababi enahudhera ddiniyani ni thalako ya Juze ni Mariya? Mwadhatedhene, muhiye wihina dhowera dhenyu ni madhu enyu dhonihe wi munomudhivela vanlubale Yehova. Kahiyo odduwala wi mukono wathima onafwanelela wakela aliwa, fuwakavihera aninyu okanna odhivela ni Yehova. Ethu emodha yathima  enahoweleya wawaddela anawo, fuwawaddela makalelo okalave oowarala omuzimuni — obe wakavihera omusuza Bibliya, olobela, otugumana ni olaleya. (1 Tim. 6:6) Ebaribari wihina enohoweleya wagulela ahima dhatedhene dhinahoweliwa dhomwilini. (1 Tim. 5:8) Nahuna kahiyo odduwala: enakavihere aliwa ovuluwa elabo ela yafiya omakuthulo ofiyedha aliwa ovolowa elabo exa kahiyo dhorela, mbwenye fuwandana wapama ni Yehova. * — Eze. 7:19; 1 Tim. 4:8.

11. a) Yoolaga eri va 1 Timóteo 6:17-19 enakavihera addi ababi osakula dhego dhapama yalelaga aniwa? b) Dholuba baani dhinafwanelela okanna murala wawo, ki enadhana mareeliho baani? (Osugwe kwaduru “ Dholuba baani munninyuna munafuninyu wakwanihedha?”)

¹¹ Sapama onona wi ababi enna osakula dhego dhapama wihina yakavihere aniwa! Aliwa malabwene enamulabela Yehova vamodha. Enodhowa omutugumanoni vamodha, omusonkanoni, ni mmalaleyelo. Murala dhimodha dhinotamela murudda olaleyiwe vang’ono. Murala dhimodha enomukunga porogarama wihina yaredhe oBeteli obe edhowe yakavihere mabasa oomaga Nyumba dhomwene. Murala dhinasakula wapara mabasa yala, podi wera enowilibihera osukuma dhego dhimodha dhinniwana, mwaha wa yeyo podi wera vasogolova enofwanyiwa makathamiho. Naari dhigarive ndo Yehova onowareliha vanlubale mwaha wa yeyo. (Omwileri 1 Timóteo 6:17-19.) Ahima amurala dhendho enohariha dhithu dhatedhene ehudheriwa ni ababi, teto, kinatwaruwa mwaha wa yeyo! *— Pro. 10:22.

12. Mudhidhi Yesu unnuweye yahoweleya ere ddi mwigumini mwaaye?

¹² Babi oodhulu a Yesu, malabwene onosakula dhego dhapama. Ababi aye eelabo yavati aliwaya yahisakula dhego dhapama. Mbwenye mudhidhi oliye unnuwaga, yohoweleya Yesu osakula yeka dhego afuniye werana mwigumini. (Gál. 6:5) Ninga iyo, Yesu Kiristu ahikanna ofuru wosakula. Ahafunage oliye ere osakula mweddelo wamudhivela, mbwenye Yesu ahisakula wandana ni Yehova. (João 8:29) Yotajhiha ya Yesu Kiristu enaakavihera addi azombwe a peeno?

13. Yosakula baani yathima Yesu eriliyena agali mwana muzombwene?

¹³ Oliye agaari mwana muzombwene, ahisakula wawiwelela ababe Juze ni Mariya. Oliye kaanna ovuruvuru mwaha wonona wi ahikanna enonelo wapitha aliwa. Ohiya yeyo, ‘ahididelave wawiwelela aliwa.’ (Luc. 2:51) Teto Yesu kavudhuwilena ofuru anniyena wokala  mwana apogoya a Juze ni Mariya. Opogo waye ahilabihera wi ahudhere mabasa ni babe Juze. Eyo yahimukavihera ofwanya ganyo wi asapele amudhaaye.

14. Nnonne addi wihina Yesu aari namahudhera apama a Bibliya?

¹⁴ Podi wera Juze ni Mariya yahimuthakelamo Yesu obaliwa waye ni madhuya yawogile angero wodhela oliye. (Luc. 2:8-19, 25-38) Mbwenye Kiristu kahagalale baahi ni ndhe iwaliye naababe; oliye ahilibihera yeka ohudhera dholebela. Nnonne addi wihina Yesu aari namahudhera apama a Bibliya? Mwaha oliye agari mwanamwihima, anamahudhiha oJeruzale ‘yahitikina vanlubale dhowakula dha Yesu ni enonelo yaye ya mBibliyani.’ (Luc. 2:46, 47) Nuwakwaniha yaka 12 Yesu ahinona wi Yehova di babe. — Luc. 2:42, 43, 49.

15. Yesu onihe addi wi ahisakula werana efunelo ya Yehova?

¹⁵ Nunona efunelo ya Mulugu, Yesu ahirumedha wakwaneliha efunelo ya Mulugu. (João 6:38) Oliye ahinona wi anere oharahariwa, naari ahifunaga oharahariwa, oliye nuumala obaddiziwa yaka ya 29 M.W., ethu yathima mwigumini mwaaye yaari werana ele Yehova anafuniye. (Heb. 10:5-7) Ofiyedha mudhidhi akwaga vantxikwani na goyi oliye kaasukumiwe othoma waye womulabela Yehova. — João 19:30.

16. Ahima enasuza ddi ni mweddelo wa Yesu?

¹⁶ Wawiwelelege ababo. Ninga Juze ni Mariya, makolwawo kahiyo oologomana. Yehova davahile mutholo wowusuziha ni wubarela. We wahariha dholaga dhewa wula wiwelelaga othonga wewa ‘dhatedhene dhinere wuweddela pama.’ — Efé. 6:1-4.

17. Ninga munawogela Josué 24:15 yosakula baani enahoweleya kadda muzombwe werana yeka?

¹⁷ Omusakule muthu onafuniwe omulabela. Enohoweleya ohidda ebaribari weka ofiyedha onona Yehova baani, efunelo yaye sivi, ki ela enapatha addi egumi yaga. (Rom. 12:2) Werana yeyo onere owedha osakula ethu yathima mwigumini mwawo eri: omulabela Yehova. (Omwileri Josué 24:15; Ecl. 12:1) Wakanna elemelo ya omwileri ni omuhudhera Bibliya, odhivela wawo ni Yehova winere wenjhedhedheya,  teto nroromelo nawo nnere oliba.

18. Dhosakula baani azombwe enahoweliwa werana, ki marelihoya baavi enakumelele?

¹⁸ Osakule opweha mburo wobajha efunelo ya Yehova mwigumini mwawo. Elabo ya Saddana eni wafunaga okala oohagalala yapama fulabihedha enonelo yawo obe ndhe onandiwe wi okale ooreela. Mwebaribarene ale enafuna okanna korowa ‘enowitotela makathamiho yekiwa.’ (1 Tim. 6:9, 10) Teto wasakula epaddi ya Yehova ni werana efunelo yaye, dhawo dhinere wuweddela pama teto onerege ‘werana dhego ni enonelo.’ — Jos. 1:8.

19. Ethu baani enahoweleya wi ababi yubuwelege malabo amatene?

¹⁹ Ababi, mwerena munandinyu wihina aninyu esakule omulabela Yehova. Mmuroromele Yehova, teto oliye anere wukaviherani osakula dhego dhapama. (Pro. 3:5, 6) Kahiyo odduwala wi aninyu enahudhera ni ndhe munerinyuna ohiya dhithu munawoginyu kadda labo. Bumwahaya, musakulege dhego dhinaakavihere aninyu osakula omulabela Yehova.

20. Mareeliho baani enawakele azombwe yasakula omulabela Yehova?

²⁰ Azombwe, ababi enyu podi wukaviherani osakula dhego dhapama mwigumini mweenyu. Nahuna, omuhagalasa Yehova onasakula di nyu baahi kavo onalupelamo. Bumwahaya, mmutajhihe Yesu musakule omulabela Babinyu oodhivela oodhulu. Mwerana yeyo dhenyu dhinere wuweddelani pama, munere wakela mareeliho ni okanna egumi yohagalasa ovanene. (1 Tim. 4:16) Teto osogolo munere okanna egumi yothabwa ohagalasa opitha ovanene!