1. 2 Coríntios 3:1-3 onanikavihera addi wonelamo oneti ninnihuna womukavihera namahudhera ofiyedha obaddiziwa? (Osugwe foto ya vakapani.)

ONONAMO avi wawonaga anamahudhera ammulogoni mwawo ebaddiziwaga? Mohanganyedha, onohagalala vanlubale! (Mat. 28:19) Akala di we wasuziha, ohagalalawa winoothabwa! (1 Tes. 2:19, 20) Anamahudhera enabaddiziwa ‘karta napama,’ ohiya baahi wa ale yahudhiha, mbwenye mulogo watene. — Omwileri 2 Coríntios 3:1-3.

2. a) Nikoho baani nathima nnahoweleya werana, ki mwahaya bwaddi? b) Ohudhera wa Bibliya ddiniyani? (Osugwe nota.)

² Sapama woona wi yaka nayi dhogomihedha ohudhera wa Bibliya oneriwana elabo yatene kadda mweri ohufiyedha 10 000 000. * Mudhidhi yoyo athu ebaddiziwe kadda yaka ehifiyedha 280 000. Nere ddi wihina nakavihere matxikwi ni matxikwi aanamuhudhera ofiyedha obaddiziwa? Yehova onoojhehera vanlubale; oliye onna wavaha ofuru atene wihina ekale anamahara a Kiristu. Vano enohoweleya werana dhatedhene nnandihu wihina nakavihere athu yala wi ebaddiziwe mowaguva. Mudhidhi onna ovira! — 1 Cor. 7:29a; 1 Ped. 4:7.

3. Ohudhera wula winafuna wisorihe ddiniyani wodhela omuhudhiha Bibliya?

³ Mwaha wofuneya wi ekalewo anamalaleya owinjhiva, Nikuru Nolamulela nihikohera Filiyale dhowinjhiva wi nnone ethu baani enahoweleya wihina ekaviheriwe anamahudhera  a Bibliya ofiyedha obaddiziwa. Ohudhera wula ni ohudhera onaharela winere woniha ethu nnahudherihu ni mapiyonero, amisiyonariyu ni anameddelela mulogo ekovelele mabasa ala. * (Pro. 11:14; 15:22) Dhohudhera ndha bili dhinere osoriha dhinahoweleya weriwana ni ole anamuhudhiha Bibliya vamodha ni ole aanamuhudhera Bibliya wihina ohudhera wewa weedde pama. Epaddi ela yobajha enere osoriha dhego tanu dhinahoweleya weriwana nnamahudhera a Bibliya wihina unnuwelevo omuzimuni ofiyedha obaddiziwa.

4. Ekalele ddi yapama wabiha opendda makalelo ehu omuhudhiha mwanamurala mowaguveya vamulago vaye?

⁴ Anamalaleya owinjhiva enna wahudhiha anamurala vamulago vewa mudhidhi mung’onove. Naari ala egari makalelo ovenyihedha efunelo ya mwanamurala, othapanya wewa onakala wowaguveya teto kunereya sumana yatene. Wihina adidele ovenyihedha efunelo ya mwanamurala malabo mamodha namalaleya onoomuloba namahudhera numero naye. Yavira mwana malabo, namalaleya onomuligarela obe onomulebela mensaje wihina ethapanyedhe muselu dha mBibliyani. Makalelo ala oothapanya podi omala mweri dhowinjhivadhene. Naari dhigarive ndo, kunasadduwa okala ohudhiha wa Bibliya onavaha dhowima. Vano kubuwela: mwanamurala iilibihera wi amuhudhere Bibliya mbwenye othapanyawa wikala wokapulela, oliye * onere wipeleka ni obaddiziwa? Podi wera naari.

5. Ninga thalo dhiwogile Yesu va Lucas 14:27-33, dhinanikavihere addi wodhela mabasa ehu owasayela anamahara?

⁵ Labo nimodha, Yesu Kiristu ahiladdaniha mabasa enakalawo wodhela okala namahara aye. Vobajha, oliye ahimusoriha muthu anafuna omaga nyumba. Muthu yoyo enohoweleya ‘aabihe okarati ahelele konta’ akala onere owedha omariha nyumba onafuniye otatamula. Vasogolova, Yesu Kiristu ahimusorihavo mwene onafuna owana ni mwene mukwaye. Mwene yoyo enohoweleya ‘akarati ni iisumulule wihina oone akala atoropaye enere owedha ogonjhiha.’ (Omwileri Lucas 14:27-33.) Yesu ahinona wihina enapadduwa emodhave ni ole onafuna okala namahara aye. Kadda muthu iipenddege nupwaseya oone ethu enafuneya wi akale namahara a Yesu. Teto iyo podi wakavihera anamahudhera a Bibliya wihina yiipendde wodhela ohudhera wewa wa Bibliya. Nnande addi werana yeyo?

6. Nnere ddi wihina nikanne ohudhera wa Bibliya winavaha dhowima?

 ⁶ Thalo yobajha sowenjhedhedha mudhidhi wohudhera vamulago va mwanamurala. Wenjhedhedhe muselu dha mBibliyani kadda waredhela. Mwanamurala alemela othapanya mudhidhi wowinjhiva vamulago vaye, omukohe: “Ohukalawo mburo mmodhaya wofwanelela okarati wihina nithapanyege?” Wakula waye winere otonyihedha akala oliye onofuna omuhudhera Bibliya obe naari. Nahuna, wihina unnuwelevo mowaguva epaddi yomuzimuni omukohe: “Ononamo avi osuza dila bili vasumanani?” Naari dhigarive ndo, ohiya osuzave dila bili vasumanani, enohoweleya ethu emodhaya.

7. Ninga namahudhiha, onande addi wiwegeredha kadda ohudhera?

⁷ We ori namahudhiha, enohoweleya wiwegeredha pamadhene kadda ohudhera. Wabihege wileri ohudherawa ni dholebeladha dhitonyiwe. Thalo dha mutomadha opwehe mmuruni kahiyo odduwala. Wabihege opendda musolo wa yohudheraya, mwana musolodha, makoho matene a yohudhera, dholebela dheriwe “wileri”, muwari mwa ddima dhatedhene ni vidiyu si vidiyu enakavihera wonelamo museludha. Wamala omubuwele namahudherawo. Ohunathi odhowa omuhudhiha, wabihe wubuwela onande addi ohudhiha ni makalelo ookweya woneleyamo. Werana yeyo namahudherawo anere wonelamo ni oparihedha mabasa dhihudhenreye mBibliyani. — Nee. 8:8; Pro. 15:28a.

8. Colossenses 1:9, 10 onanikavihera addi wodhela walobelela anamahudhera ehu?

⁸ Ethu enahoweleya wiwegeredhaga, omulobelelege namahudhera awo omwaddelaga Yehova dhego dhinamuhalela. Omulobe Yehova ukavihere omuhudhiha Bibliya nimakalelo odahinya murima wa muthu onayiwe omuhudhiha. (Omwileri Colossenses 1:9, 10.) Wabihege wubuwela thomo ononiwe wi enere omurusa wonelamo ni orumedha. Kahiyo odduwala wi yoluba yawo fumukavihera ofiyedha obaddiziwa.

9. Kawogamo, namahudhiha onaamukavihere addi namahudhera aye, wiwegeredha kadda ohudhera?

⁹ Munigwa wehu bowi ole onamuhudhera Bibliya ni iyo amutamalele Yehova ni mwanaye Yesu Kiristu. Ni wimuthukule murima wi amuhudheregeve Bibliya. (Mat. 5:3, 6) Wihina namahudhera apuremo ethu amuhudheraga Bibliya, enohoweleya ohuddiwala dhego dhinahudheriye. Wi ande werana yeyo omukongomedhege wi aabihege wiwegeredha kadda  ohudhera. Omwaddelihemo wi sofuneya wileri ddima yatene ni ubuwelege kadda muselu makalelo oniwananiwa ni egumi yaye. Ki onaawedhe addi omukavihera? Osakule yohudhera modha wi mwegeredhe vamodha wihina omonihe makalelo owiwegeredha. * Omwaddelihemo makalelo oofwanya mowaguva yowakula ya kadda nikoho muwari mwa kadda ddima. Omukavihere okwereta madhu enaamukavihere ohuddiwala dhowakuladha. Wamala, omulobe aakule ni madhu aye avati va murima. Namahudhera eragana yeyo enokweya wonelamo akala dhinahudheriye onowonelamo obe naari. Nahuna ehikalawo ethu emodhaya enahoweleya omukongomedha namahudhera awo wi eeregena.

10. Mwahaya bwaddi egahoweleya namahudhera omwilerigi Bibliya malabo matene, ki amwilerigi Bibliya anaande addi opuramo ethu?

¹⁰ Ohiya omuhudherave baahi Bibliya nnamahudhiha sumana yatene, dhihikalawo dhego dhinahoweleya weriwana nnamahudhera malabo matene. Enohoweleya namahudhera othapanya ni Yehova, obe, ovuruwana dhinlodda Yehova ni omwaddela dhinfuneye. Wihina anvuruwane Yehova dhinloddeye, emmahoweleya omwileri Bibliya kadda labo. (Jos. 1:8; Sal. 1:1-3) Omonelihemo makalelo oomparihedha mabasa “Porogarama a wileriwa wa Bibliya”, ori mu jw.org. * Namahudhera egi apuremo ethu aamwilerigi Bibliya, omwaddelihemo wi enohoweleya opendda dhinileriye. Kahiyo omukuwa, wi amwilerigi Bibliya ikohege: ‘Elaya enagihudhiha ddi wodhela Yehova? Ki elaya ginaawedhe addi oparihedha mabasa mwigumini mwaga?’ — At. 17:11; Tia. 1:25.

11. Nnaamukavihere addi namahudhera olobela ni makalelo apama? Ekalele ddi yathima oliye olobela wa Yehova malabo matene?

¹¹ Omukongomedhe namahudherawo othapanya ni Yehova. Wihina ande yeyo, enohoweleya olobela malabo matene. Bumwahaya kadda labo noohudhera obe mwamala ohudhera, olobelege wa Yehova ni murima watene osorihaga ndina naye. Namahudhera uvuruwanaga olobelaga, oliye onere osuza werana malobelo avati vamurima wa Yehova ni ndina na Yesu Kiristu. (Mat. 6:9; João 15:16) Werana yeyo namahudhera awo onere othabwa wandana ni Yehova mwaha wa omwileri Bibliya malabo matene vamodha othapanya ni Yehova wodhela nlobelo! (Tia. 4:8)  Namahudhera alemela dhendha, onere okanna ethu mmurimani enamuthukulele wipeleka ni obaddiziwa.

12. Namahudhiha onaamukavihere addi namahudhera wandana ni Yehova?

¹² Dhatedhene namahudhera anasuziye kahiyo okala mmuruni mwaaye baahi, enohoweleya dhikitele mmurimani mwaaye. Mwahaya bwaddi? Mwaha murima (munigwa, mubuwelo ni dhofuna) sinamuthukulela muthu werana ethu-sithu. Yesu ahinona olabihedha pama dhendha aahudhihaga athu. Nahuna athu yamuharana makalelo aye odahinya murima aahudhihaga. (Luc. 24:15, 27, 32) Enohoweleya namahudhera awo onona wi Yehova muthu, ni wonelamo wi oliye dinafwanelela wandana Yehova. Enohoweleya oliye onona wi Yehova babi, Mulugu, teto, di mukwaye. (Sal. 25:4, 5) Wamuhudhihaga Bibliya, othabwege osoriha ekalelo ya Yehova. (Êxo. 34:5, 6; 1 Ped. 5:6, 7) Muselu bumuselu onahudhihiwe, omukaviherege namahudhera wi amunone pamadhene Yehova. Omukavihere wonelamo wi Yehova okalana dhikalelo dhapama: odhivela, opama ni nthebwa. Yesu ohusoriha egi: “Nlamulo noobajha ninlubale” thinna: “Omudhivele Yehova, Mulugu awo.” (Mat. 22:37, 38) Wilibihere odhala mmurimani mwa namahudhera awo odhivela winlubale ni Yehova.

13. Onaamukavihere addi namahudherawo onona dhikalelo dha Yehova? Owoge nladdaniho.

¹³ Wathapanyaga ni namahudhera awo otonyihedhege wi ohukanna odhivela ni Yehova. Eyo enere omukavihera oliye wonelamo wi nuliyeya enohoweleya okanna wandana ni Yehova. (Sal. 73:28) Motajhiha, livuru munahudherinyu obe yolebela akala enoofwanyeyavo madhu enoniha dhikalelo dha Yehova ninga — odhivela, enonelo, wogowa ni owedha, madhu yayo onawonamo aviniya? Enowudahinya murima? Bumwahaya, omwaddele yeyo namahudherawo. Omwaddele wi dhikalelo ndha sinuthukulela omudhivela baabo oodhulu Yehova. Nahuna ehikalawo ethu emodha enahoweleya weriwana ni namahudhera wihina unnuwelevo ofiyedha obaddiziwa.

14. Ninga munawogela Hebreus 10:24, 25, mutugumano dhinamukavihere addi namahudhera wunnuwelavo omuzimuni?

¹⁴ Iyo atene nihikanna munigwa womoona namahudhera ehu unnuwelagavo ofiyedha obaddiziwa. Wihina nimukavihere oliye, enohoweleya omukongomedha oya omutugumanoni.  Anamahudhiha ookovelela, enihina namahudhera ambela oya omutugumanoni onowunnuwelavo mowaguva. (Sal. 111:1) Amodha eneresa omwaddela namahudhera omambelelowene wi ohudhera wewa si epaddi modha ya porogarama yomuhudhera Bibliya, wihina ejhevo epaddi emodhaya, enohoweleya oya omutugumanoni. Omwileri Hebreus 10:24, 25 vamodha nnamahudhera awo, ni omonihe mwahaya bwaddi ekala yapama oya omutugumanoni. Omonihe vidiyu Munereya ddi munyumbani yomwene? * Omukavihere namahudhera wonelamo wi enohoweleya ovaha thima mutugumano mwigumini mwaaye.

15. Werena ethu baani wi omukongomedhe namahudhera awo oya omutugumanoni malabwene?

¹⁵ Akala namahudhera awo kanaambele oya omutugumanoni obe kanayawo sumana dhatedhene, werena ethu baani? Omwaddele ethu yukavihere mwigumini mwawo ohudheriwe omutugumanoni. Dhendho dhinere onvaha munigwa woya omutugumanoni opitha omwithanelave odhowa omutugumanoni. Onvahe Namasugwera obe Mwana livuru na mutugumano nnalabihedhiwa sumana yeyo. Omonihe muselu onafuna ohudheriwa sumana enaharela wamala omukohe akala vihikala muselu onamudahinya murima. Ethu yobajha enafuna woona namahudhera awo adhowa omutugumanoni dila yobajha, enere okwaranya ele ononesiye ogereja waye. (1 Cor. 14:24, 25) Oliye onere wanona athu enna mweddelo wapama enaamukavihere ofiyedha obaddiziwa.

16. Dhego baani dhinahoweleya dhinamukavihera namahudhera ofiyedha obaddiziwa, ki ohudhera winaharela winafuna wisorihe muselu baani?

¹⁶ Ninga nonilihu muwari mwa yohudhera ela, nnakavihere addi anamahudhera ehu ofiyedha obaddiziwa? Omukongomedhe namahudhera awo wi ahivudhuwena ohudhera waye wa Bibliya. Amuhudherege Bibliya sumana yatene ni egeredhege kadda ohudhera. Ohiya yeyove, omukongomedhe othapanya ni Yehova kadda siku ni wenjhedhedha wandana waye ni Yehova. Ethu emodhaya nihudherihu, sowi ninvahe munigwa namahudhera wi ambele oya omutugumanoni mowaguva. (Osugwe kwaduru eli epaddi 12 “ Namahudhera erena ddiniyani wi afiyedhe obaddiziwa.”) Nahuna dhokalawo dhego tanu dhinahoweleya weriwana ni anamahudhiha wihina namahudhera afiyedhe obaddiziwa. Dhego ndho sivi? Ohudhera winaharela winere osoriha dhego dhendho.