1. Ethu baani enahoweleya weriwena ni makiristawu obaddiziwa?

WE OHUBADDIZIWA? Akala ohubaddiziwa ohulibela vathaddo wi ohukanna nroromelo ni Yehova, teto oli owipelekeene wihina omulabelege vamodha nnikuru naye. * Ninga mukiristawu obaddiziwe enohoweleya wenjhedha nroromelo yawo ni Yehova. Ni ororomele wi Yehova onna olabihedha nikuru naye peeno.

2-3. Yehova oneeddiha addi nikuru naye? Owoge dhotajhiha.

² Movanene Yehova oneeddiha nikuru naye ni makalelo enonihera emuthu yaye, dhofuna ni malamulo aye. Nnafuna noone dhikalelo tharu dha Yehova dhinoneya munikuruni mwaaye.

³ Yobajha, ‘Mulugu kahiyo nsakulo.’ (At. 10:34) Ni odhivela Yehova ohumuleva mwanaye ninga ‘mukutho wawobola athu atene.’ (1 Tim. 2:6; João 3:16) Yehova anofuna wihina athu ekanne nroromelo ni wobola, wihina evuluwe. Bumwahaya onolabihedha nikuru naye wihina elaleye muthenga muxa wa atene yale enafuna ovuruwana. Yanabili, ‘Yehova Mulugu kahi oodawa, mbwenye da murenddele.’ (1 Cor. 14:33, 40) Bumwahaya egajhehereyaga wi nikuru naye emulabelege oliye ninga nikuru nodhuwanyeya ni na murenddele. Yanatharu, ‘Yehova di Namahudhiha Munlubale.’ (Isa. 30:20, 21) Bumwahaya nikuru naye nnafuna baahi omuhudhiha Bibliya mmulogoni ni mmalaleyelo. Dhikalelo ndha tharu dha Yehova dhoneyile addi muwari mwa mulogo ansaka noobajha? Ki peeno nnande addi woona? Ki muzimu  wotxena onuukavihere addi omulabela Yehova munikuruni mwaaye?

4. Ninga munawogela Atos 1:8, nlamulo baani Yesu avahiliye anamahara aye, ki nikavihero baani yakele aliwa?

⁴ Nsaka noobajha. Yesu owalaleya athu atene muthenga wa ejhehero. (Luc. 4:43) Teto wakongomedha anamahara aye wapara mabasa yala, yohoweleya aliwa olaleya ‘ofiyedha winagomela elabo.’ (Omwileri Atos 1:8.) Ebaribariya sowi anamahara ale kiyawedhe wapara mabasa ala yekiwa. Yohowela okaviheriwa ni muzimu wotxena — ‘namakavihera’ aamuroromelihe Yesu. — João 14:26; Zac. 4:6.

5-6. Muzimu wotxena wakavihere addi anamahara a Yesu?

⁵ Anamahara a Yesu yahikuthuleliwa muzimu wotxena pentekoste yaka ya 33 M.W. Nnikavihero na muzimu ola aliwa wambela olaleya mowaguva nuuvira mwana mudhidhi matxikwi ni matxikwi athu yahirumedha muthenga dhixa. (At. 2:41; 4:4) Nuwambela oharahariwa anamahara kayovile nahuna yahimukuluvela Yehova. Aliwa olobela: ‘Mwakavihere adhari awo wihina edidele olaleya muthenga nuuliba murima.’ Vano aliwa wakela muzimu wotxena, wambela ‘olaleya madhu a Mulugu nuuliba murima.’ — At. 4:18-20, 29, 31.

⁶ Anamahara a Yesu yahifwanyiwa dhoweha dhimodha. Motajhiha, kopiya dha madhu a Mulugu kadhali dhowinjhiva. Newene kiyanna malivuru enasoriha dholebela ninga dhinereya peeno. Aliwa yohowela walaleya athu yawoga dhiwogelo dhohiyana-iyana. Naari eganna makathamiho ala anamahara ala oviheya yahanda werana ele yaali ninga yorusa — muwari mwa yaka 30 baahi aliwa yahiwedha olaleya muthenga wapela elabo yatene. — Col. 1:6, 23.

7. Anamahudhera a Bibliya a yaka zana mundduli yanonne addi ele Yehova afuniye wihina yerena? Aliwa yerilena ddi?

⁷ Malabo yala a peeno. Yehova onna weeddihave nikuru naye aavahaga kopolo. Mukalelo mmodha wathima waweddiha nikuru naye, di Bibliya ovetheliwe ni muzimu wotxena. Mabasa olaleya a Yesu Kiristu enafwanyeya mwemwene, vamodha ni nlamulo nnonihera odidelave wapara mabasa yala awambeliye. (Mat. 28:19, 20) Malabo a mundduli yaka ya 1881 mweri wa Julho revista nna noosoriha: “Kanithaniwe newene kanili oothikitheliwa wihina nithithimihiwe ni naakele dhorela, mbwenye nnoonge dhokanna dhihu vamodha ni aliwaya wihina nilaleye muthenga dhapama.” Mwana livuru anna musulo A quem se confia a obra ni engeleji yaka ya 1919, ahisoriha egi: “Mabasa ala enakala ninga owopiha mbwenye mabasa a Nabwiya, ni kopolo dhaye nnere wapara.” Ela enoneyiha wi ninga makiristawu ansaka noobajha, anamahudhera Bibliya yahikanna oliba murima ni yowapara mabasa yala ni murima watene aliwa yororomela wi muzimu wotxena were wakavihera ofiyedha olaleya malogo matene eri mwilaboni. Teto peeno iyo nikanna ebaribari emodhave.

8-9. Nikuru Nanamona a Yehova ninanda addi walaleya athu awaadda?

⁸ Nikuru na Yehova obajha kale nnolabihedha faramenta dhapama wihina elaleye muthenga wa Omwene. Faramenta dhendha enovolowelavo marevista epidiwe, porogarama a muradiyoni “Fotodrama da criação,” fonógrafos, karo dha radiyu, komputadori vamodha ni interneti. Ohiya yeyove, nikuru na Yehova ninna wapara mabasa manlubale ootapulela! Mwaha wa ddi? Wihina malogo amatene aathu evuruwane muthenga dhapama ni dhiwogelo dhewa. Yehova kahi a nsakulo; oliye ahipaganya wi muthenga dhixa dhere ‘olaleyiwa mmalogoni mwatene, mahimo, dhiwogelo ni athu.’  (Apo. 14: 6, 7) Oliye onafuna wi muthenga womwene wafwanye athu atene.

⁹ Ki ale enakala murudda worusa ofiyawo, ninga ale enakala kintale dhofugeya. Wihina athu yayo elaleyiwe nikuru na Yehova nihipendda makalelo owaadda oolaleya vaanamwinjhi. Motajhiha, yaka ya 2001, Nikuru Nolamulela ehirumedha wi addibila o França elabihedhege karinyu ni displays dha malivuru ehu, vasogolova anamalaleya adhilabo dhimodha ehambela olabihedha makalelo yayo. Mareeliho yakumelele boolibiha vanlubale. Yaka ya 2011, makalelo maxa oolaleya ehilabihedhiwa luwani eriwo athu owinjhiva elabo yo Nova York, EUA. Yaka yabajhiliwa olabihedha makalelo yala maxa ehigawiwa malivuru owakwana 102 129 ni 68 911 marevistave, teto athu owakwana 4701 ehiloba ohudhere wa Bibliya! Yaka yele kuwaali wanganyedha wihina mabasa ala atene bimahala a muzimu wotxena. Vano nikuru nolamulela nihirumedha wi addibila a dhilabo dhatedhene elabihedhege karinya ni displays yaalaleyaga.

10. Nerena ethu baani wihina nikale anamalaleya apama?

¹⁰ Enahoweleya weriwana ni we. Olabihedhe pamadhene oxagiha winavahiwa ni Yehova mmutugumanoni mwehu. Olabege malabwene nnikuru nawo na mmalaleyelo, onikuruni wengo we podi ovahiwa nikavihero onahoweliwe wihina okale namalaleya apama obe namahudhiha, teto we podi okala oolibene ni dhopadduwa dha addibila amodha. Kahiyo oselela olaleya naari ofwanyiwaga makathamiho. Ninga munawogela yolebela ya yohudhera ela iyo nnerana efunelo ya Mulugu, ohiya ni owedhawehu mbwenye ni kopolo dha muzimu wotxena. (Zac. 4:6) Hee mabasa nnaparihu kahiyo ehu mbwenye ba Mulugu.

11. Nikuru nolamulela na nsaka noobajha nalabile addi wihina nlogo na Yehova nikale nowiiwanana?

¹¹ Nsaka noobajha. Nikuru Nolamulela na elabo yo Jeruzale, nalaba mowiwanana wihina nikuru na Yehova nikala nowiiwanana ni nowegeredheyanene. (At. 2:42) Motajhiha, yaka ya 49 nukumela muselu wowineliwa, nikuru nolamulela naheddihiwa ni muzimu wotxena opendda museluya. Mudhidhi yole, mulogo wahakale wogawanyeya mwaha wa muselu yola, mabasa oolaleya egahigwaddeya. Naari anamaholela  ni arumiwi egaali ajudewu, aliwa kiyenyile yosakula yewa etatanyeye ni elemelelo ya majudewu obe naale yabarela dhilemelelo dha murudda. Ohiya yeyo, aliwa yaalabihedhe madhu a Mulugu vamodha ni muzimu wotxena wihina enone ethu yahoweleya aliwa werana. (At. 15:1, 2, 5-20, 28) Ethu baani yakumelele? Yehova oreeliha yosakula yewa. Mulogo odidelave okala wamurenddele ni wowiwanana, teto mabasa oolaleya othabwaga odhowa vasogolo.— At. 15:30, 31; 16:4, 5.

12. Enoniha ddiniyani wi munikuruni mwa Yehova mwihikala wiwanana ni murenddele opitha webedha watene wowoota?

¹² Malabo amundduli. Nikuru na Yehova nahilibihera wihina mwikale wiwanana vamodha ni murenddele vaari vaadhari atene a Mulugu. Yaka ya 1995, 15 a Novembro A Torre de Vigia de Sião e Arauto da Presença de Cristo, ni engeleji, ahilaleya muselu withaniwa Decentemente e em Ordem. Muselu ola wafwanyiwa va 1 Coríntios 14:40 wasoriha wegihina: “Arumiwi yahithabwa osoriha gereja wodhela wiwanana.” Sapama ohariha enonelo dhatedhene dhilebiwe kale, mwaha ‘dhilebiwe wihina dhinikavihere’. (Rom. 15:4) Teto peeno dhinowenyeya woona munikuruni mwa Yehova, efunelo emodhave: wiwanana, murenddele wanna makiristawu oobajha. Wihina nladdanihe: wahadhowe omuhudhera Namasugwera, mulogo mmodhene obe elabo emodhene, ogahinona makalelo weddihiwe ohudherawa, teto ogahifiyedha onona museluya yahudheriwe yakale ninga ori mulogo wa murudda wawo. Wahere ohukala muzimu wotxena wa Mulugu iyo kanakanne wiwanana wula wathima. — Sof. 3:9, osugwe nota.

13. Ni madhu eri va Tiago 3:17, makoho baani enahoweleya iyo wawerana mwigumini mwehu?

¹³ Ethu enahowela wi werena. Yehova anafuna mulogo waye wilibihere wi okanne ‘wiwanana wa muzimu wotxena winadhana murenddele weebaribari.’ (Efé. 4:1-3) Vano wikohe: ‘Miyo ginotonyihera wi mmulogoni mwikale wiwanana ni murenddele? Ginowawiwelela ale enaholela mulogo? Athu amodha podi ogiroromela miyo thabwathabwa gakanna mutholo mmulogoni? Giri muthu onofiya voosavenne? Ginosugwera? Teto gihikanna efunelo yowakavihera amodha?’ (Omwileri Tiago 3:17.) Woonelamo wi dhikalelo dhendha  dhinohoweleya mwigumini mwawo, olobele olobaga muzimu wotxena. Weenya muzimu wotxena osaddula egumi yawo, ofiyedha osaddula makalelo awo, addibila owinjhiva enere okanna odhivela ni we teto enerege wuvaha thima.

14. Ninga munawogela Colossenses 1:9, 10, nsaka noobajha Yehova ahudhiha adhari aye ni makalelo baani?

¹⁴ Nsaka noobajha. Yehova onodhiveliwa vanlubale wahudhiha adharaaye. (Sal. 32:8) Woona nili anaye ohukanna odhivela ni iyo, teto onofuna kadda muthu wa iyo amunone oliye, akanne odhivela nuliye, teto akalewo malabo matene. Eyo kayereye mwigumi mwehu nihihudhenre Madhu aye. (João 17:3) Nsaka noobajha, Yehova ahilabihedha mulogo wa makiristawu wihina aahudhihe nlogo naye. (Omwileri Colossenses 1:9, 10.) Muzimu ootxena ‘namakavihera’ aamusorihe Yesu Kiristu, ahikavihera mabasa yala. (João 14:16) Oliye ahavaha anamahara aye enonelo yootibeya ya madhu a Mulugu, teto ahakavihera wubuwela dhatedhene dhawogile Yesu Kiristu ni dhendhe dhenreyena, dhilebiwe mBibliyani epaddi ya envajelyu. Enonelo ela, kilibihile baahi nroromelo na makiristawu oobajha, nahuna, yahilibiha odhivela yanniwana ni Mulugu, ni mwanaye Yesu Kiristu, vamodha mmodha ni mukwaye.

15. Yehova onakwaneliha addi mpaganyo ori va Isaías 2:2, 3?

¹⁵ Malabo yala apeeno. Yehova ahipaganya wi ‘malabo oogomihera a mudhidhi wookuthula’ athu amalogo matene egahigwelela mwango waye wihina ehudhere dila dhaye. (Omwileri Isaías 2:2, 3.) Peeno, nnowona wakwanelaga mpaganyo ola, webedha weebaribari ori vadhulu opitha webedha watene wowoota, teto Yehova ononivaha dhoojha dhebaribari dhomuzimuni! (Isa. 25:6) Amulabihedhaga ‘mudhari oororomeleya ni ooxaga,’ ohiya dhoojhave baahi dhomuzimuni dhinanivahiye,  ononivaha dhoojha dhohiyana-iyana, obajha ohudhera, mwaha ofiyedha vidiyu ni dezenyu dhaabuneku. (Mat. 24:45) Iyo nnakala ninga Eliyu mukwaye Jo awogile ni marazawu matene egihina: namahudhiha baani onaligana ni Mulugu? — Jó 36:22.

16. Enahoweleya ddiniyani wihina wunnuwelevo omuzimuni?

¹⁶ Ethu enahowela wi werena. Muzimu wa Mulugu winere wukavihera oparihedha mabasa, ndhe dhinileriwe ni dhinavuruwaniwe muwari mwa madhu a Mulugu. Olobele ninga salmista ‘Yehova, kagisuziheni dila dhenyu, ginere weedda mwebaribarini mweenyu. Muube murima waaga wihina woovege ndina nenyu.’ (Sal. 86:11) Odidele ojha dhego dhomuzimuni mwa dhatedhene dhendhe Yehova anavahiye wodhela Bibliya vamodha nnikuru naye. Ebaribari sowi, yoluba yawo kahiyo okannave baahi mmuruni enonelo, onofuna wi ebaribari ekanne musisi mmurimani mwawo, teto onafuna oparihedha mabasa mwigumini mwawo. Muzimu wa Yehova podi wukavihera werana yeyo. Ohiya yeyove, kahiyo oddiwala walibiha addibila awo ammuroromeloni. (Heb. 10:24, 25) Mwahaya bwaddi? Mwaha aliwa baamudhawo. Olobele olobaga muzimu wa Mulugu wihina wakala mmutugumanoni wakulege makoho oolibiha, ni werana onandiwe wathomeliwa epaddi mmulogoni. Werana dhithu dhendha winere omoniha Yehova vamodha ni mwanaye wihina ohukanna odhivela ni ‘mambila’ aye athima. — João 21:15-17.

17. Onatonyihedhe addi wi onokavihera nuuroromeleya nikuru na Yehova?

¹⁷ Mohilegela, nikuru nimohi baahi nnakale elabo ela yavati, nnakale nenne nneddihiwa ni muzimu wa Mulugu. Bumwahaya okavihere ni murimawo waatene nikuru na Yehova. Otajhihege odhivela wa Yehova ohunna nsakulo wodhela walaleya athu atene muthenga dha Omwene. Ninga oliye, otonyihedhe wi onodhiveliwa wiwanana, murenddele wodhela otonyihedha dhikalelo dhapama mmulogoni. Kahiyo olamusa dhoojha dhomuzimuni dhinanivaha Namahudhiha ehu Munlubale, Yehova. Werana yeyo, we kudha okala owoova elabo ya Saddana yafiya omakuthulo, ohiya yeyo, onere okala muwari mwa ale enamulabela Yehova nuuroromeleya vamodha nnikuru naye.