Makoho aanamileri
Nerege amwaana Ezarayeli yahikanna dhoojha dhimodha ohiya baahi mana ni abuudhi?
Mudhidhi egaali mwiddeddereni amwaana Ezarayeli yahimala yaka 40 egaali mwiddeddereni ni ethu yathabwiwa ojha yaali mana. (Êxo. 16:35) Teto Yehova ahavaha amwaana Ezarayeli dila biili abuudhi. (Êxo. 16:12, 13; Núm. 11:31) Mbwenye ohiya dhendhave baahi amwaana Ezarayeli yahikanna dhoojha dhimodha.
Motajhiha malabo mamodha Yehova oothukulela nlogo naye mburo wowithuwa wakala manjhe ni dhoojha. (Núm. 10:33) Mburo mmodha aathukulenliyewo waali oElim, ‘waali matxela owakwana 12 ni muthanko dhavaha dhowima dhoojhiwa dhowakwana 70,’ podi wera muthanko ndha dhaali dha tamara. (Êxo. 15:27) Livuru Plantas da Bíblia ni Engeleji nnowoga negi ‘atamarera muthanko dhinunnuwa mburo dhowinjhiva ni yojha enathabwa ofwanyiwa mwiddeddereni. Teto ohiya ojhiwave anosasanyiwana makura ni muthankoya onovaha murunti wapama.’
Podi wera amwaana Ezarayeli yahimmela mburo mmodhaya wothabwa wunnuwa waali manjhe ni muthanko dhinavaha dhowima dhinajhiwa ononiwe peeno ninga Feiran, onakosa epaddi wa musalasala woFeiran. a Livuru Descobrindo o mundo da Bíblia ni Engeleji nnawoga negi musalasala ola “ohukanna malapelo a 130 kilometuru teto musalasala othambwe olapa, woriya ni othabwile ononiwa woSinayi. Mburo ola woFeiran winafwanyeya manjhe ni muthanko dhinavaha dhowima dhinajhiwa onolapela makilometuru 45 ni mburo winagumana muhinjhe ni niya teto ohutama mameturu 610 naliganiha ni niya ni ohukanna malapelo owaddamela 5 meturu. Ohukanna muthanko dhowinjhiva dhoriya ofiyedha oliganihiwa ni mundda wo Ideni. Muwari mwa yakadhene athu owinjhiva enoodhesa mburo yola mwaha muthanko wa tamara.”
Muthanko dha tamara mburo winafwanyeya manjhe oFeiran
Mudhidhi ekumaga Wijipitu amwaana Ezarayeli yahathukula makura, tirigu ookanddiwene wihina esasanyena pawu ni epano yomukanddamo tirigu. Ebaribari wihina dhithu ndha kadhalegenle mudhidhi wowinjhivene, ohiya dhendhave baahi amwaana Ezarayeli yahahisa ‘mambila ni ng’ombe dhowinjhiva.’ (Êxo. 12:34-39) Mbwenye nuuvira mudhidhi mwaha okala mwiddeddereni podi wera anenyama owinjhiva yahikwa, podi wera anenyama amodhaya yahatakuna teto amodhaya yowapeleka ninga mukutho wa Yehova obe wa amulugu amodhaya owoota. b (At 7:39-43) Naarive dhigali ndo, amwaana Ezarayeli yahihalana anenyama. Nihinona eyo mwaha wa madhu Yehova aawogiliye ni nlogo nuuhiya omwiwelela egi: ‘Aniinyu eneere okala anamakukula mwiddeddereni muwari mwa yaka 40.’ (Núm. 14:33) Podi wera anenyama aamwaana Ezarayeli yowavaha mukaka ni malabo mamodha yowajha. Mbwenye ebaribari wihina anenyama ewa kiyaakwana wihina athu owakwana 3 000 000 yaajhihe muwari mwa yaka 40. c
Kivano amwaana Ezarayeli yafwanye wuvi manjhe ni yojha wihina yavahe anenyama? d Podi wera mudhidhi yole oorubwesa muzongwe malabo owinjhivene ni wahikala mpodda wowinjhiva mwiddeddereni. Livuru Estudo Perspicaz das Escrituras, Volume 1 nnowoga wi yaka 3500 mundduli “wArabiya wahikala manjhe owinjhiva okwaranya peeno. Musalasala dhooddiha ni dhowumma dhiliwo peeno dhinowoniha wihina oorubwesa muzongwe owinjhiveene wihina muthamagege manjhe.” Naarive dhigaali ndo mwiddeddereni mwaali mburo wathabwile wunnuwa ni woopiha. (Deut. 8:14-16) Yahere ehikala matikiniho Yehova aaweriliye wihina aavahe manjhe, amwaana Ezarayeli ni anenyama ewa mwebaribarene yere okwa. — Êxo. 15:22-25; 17:1-6; Núm. 20:2, 11.
Moyizeji ahawaddela amwaana Ezarayeli wihina Yehova ahavaha mana ‘wihina yonelemo wi muthu kanakalawo ni yoojhave yomwiilini baahi, mbwenye ni madhu enakumela muwano mwa Yehova.’ — Deut. 8:3.
a Omusugwe Sentinela a 1º a Maio a 1992, epaddi 24-25.
b Bibiliya onowoga wodhela dila biili amwaana Ezarayeli yakuthiliwa anenyama ninga mukutho mwiddeddereni. Yobajha yaali labo noobajha othomiwa anamakutha, yanabili emweragana Paskwa. Dhopadduwa ndha dhabilidhene dhereyile yaka ya 1512 M.W.O., yaka yanabili amwaana eEzarayeli yahinakume Wijipitu. — Lev. 8:14–9:24; Núm. 9:1-5.
c Omagomihedho wa yaka 40 amwaana Ezarayeli egaali mwiddeddereni yahanda okanna anenyama owinjhiva mwaha wa koddo yagonjhihiwa. (Núm. 31:32-34) Naarive dhigaali ndo, aliwa yahididelave omujha mana ofiyedha ovolowa elabo yothomeliwa. — Jos. 5:10-12.
d Kavo ethu enoniwa wihina anenyama yoomujha mana woona wihina Yehova ahawaddela amwaana Ezarayeli wihina kadda muthu amuddoddege mana mowiwanana ni ele andiye ojha. Teto kaavo ethu enawoga wodhela anenyama omujha mana. — Êxo. 16:15, 16.
