1. Dhikalelo dha muthu a thagaraga sivi?

MUTHU a thagaraga duule anna dhikalelo ninga, opama, odhivela, nthebwa ni okanna ekalelo yovaha. Dhikalelo nda dhinonubudhedha nladdaniho awogile Yesu na musamaritano apama. mulobwana ole kaali muJudewu mbwenye ‘omweddela thagaraga’ aganfwanye muJudewu iyedhiwe ni abubuddiwe ni ambava musamaritano ole ‘ahimweddela thagaraga’ muJudewu ole aporosiwe ni ahimusamalela ni odhivela. (Lucas 10:29-37) Yoladdaniha ela enowoniha ekalelo yapama ya Mulugu ehu — thagaraga. Kadda labo Yehova ononeddela thagaraga mwamakalelo ohiyana-iyana, oliye ononeddela thagaraga mwaha wi ononidhivela.

2. Madhu owi thagaraga enanubudhedha ethu baani?

² Madhu owi thagaraga enonubudhedha ethu emodhaya, thagaraga podi otapulela, omulevelela muthu atheegile ni athwaruwile. Mwebaribarene Yehova anowoniha ekalelo yela ya thagaraga. (Sal. 103:10) anawoga egi: ‘Oliye kananeddiha mowiwanana ni dhothega dhehu’ malabo mamodha Yehova podi omusinyusa muthu atheegile ahimukalele thagaraga.

3. Ohudhera wula nnawakule makoho baani?

³ Ohudhera wula nnere woona makalelo Bibliya anawakuliye makoho ala: Mwahaya bwaddi Yehova da thagaraga? Omutxosa muthu onowoniha thagaraga? Enaanikavihere ddi okala a thagaraga?

4. Mwahaya bwaddi Yehova agoniha thagaraga?

⁴ Yehova dathagaraga. Murumiwi Pawulo ohuleba wi, ‘Mulugu dodhaleliwa thagaraga.’ Yolebela ela enowoniha mwahaya  bwaddi murumiwi Pawulo adhe aalebege madhu ala, mwaha Yehova ohavaha athu ohulogomana ejhehero yokala odhulu. (Efé. 2:4-7) Mbwenye thagaraga dha Yehova kadhinagomela vavala. Davidi ohuleba egi: ‘Opama wa Yehova kunamusakula muthu, Teto mabasaye amatene enowoniha wihina Yehova dathagaraga.’ (Sal. 145:9) Yehova onowadhivela athu, bumwahaya amoona muthu wi ohukanna murima wa pama onomweddela thagaraga.

5. Yesu ahudhere nimakalelo baani thagaraga dhaababe?

⁵ Iyo ni Yesu athabwile onona odhivela ni thagaraga dha Yehova di Yesu. Ahinadhe velaboni yavati Yesu ohukala ni aBabe odhulu yaka dhowinjhivadhene. (Pro. 8:30, 31) Yesu omoona Yehova aweddelaga thagaraga athu othega. (Sal. 78:37-42) Agaali velaboni yavati Yesu ohahudhiha athu amodha wodhela ekalelo ela ya Babe.

6. Yesu anikavihere addi iyo wonelamo wi Yehova dathagaraga?

⁶ Ninga nonilihu ohudhera ovirile, Yesu ahiwoga nladdaniho na mwaana ohiwelela wihina anihudhihe thagaraga dha Yehova. Mwaana ovenyavo vade: ‘Nuufiya wule, oliye ojha dhoreela dhatedhene omala.’ (Lucas 15:13) Nuuvira mudhidhi oliye othwaruwa dhothega dhaye, wiyeviha ni ohogolowela vade. Ki ababe nuumona yere ddi? Voharela mwaana ole ahoona yapadduwe. Yesu ohusoriha egi: ‘wolapelawene, ababe omoona ni omweddela thagaraga aliwa omuthamagela, omukubarela ni ombejari.’ Babi kamoobele owali mwanaye. Ohiya eyo ahimweddela thagaraga ahimulevelela ni ahimwakela ni malada menli. Yothega erilena mwana ole yaali enlubale, mbwenye woona wi ahithwaruwa babe omulevelela. Babi a thagaraga aanladdaniho nna di Yehova. Ni yoladdaniha ela yodahinya murima Yesu ohoniha wi Yehova onofuna walevelela ale enafuna othwaruwa ni murima wamutene.​—Lucas 15:17-24.

7. Yehova analabihedha addi thotho dhaye wihina aweddele athu thagaraga?

⁷ Yehova dathagaraga mwaha wa thotho dhaye dhohimala. Thotho dha Yehova kadhinapimeya. Thotho nda dhinoomukavihera wubuwela ethu yapama wa iyo atene. Bibliya anowoga egi: ‘Thotho dhinadhela odhulu sodhaleliwa thagaraga ni dhinokanna dhowima dhapama.’ (Tia. 3:17) Ninga babi oodhivela Yehova ohunona wi thagaraga  dhinowakavihera anaaye. (Sal. 103:13; Isa. 49:15) Mwaha wa thagaraga dha Yehova adharaaye podive egaari ohulogomana ehikanna ejhehero yosogolo. Vano mwaha wa thotho dhohimala dha Yehova dhinomuthukulela okala a thagaraga eyo yahoweleyaga. Mbwenye oliye ohunona mudhidhi wowoniha thagaraga. Yehova da thotho bumwahaya oliye ohunona pamadhene ohiyana orivo wodhela woniha thagaraga ni odumera.

8. Enapadduwa ddi muthu erana yothega ahithwaruwaga, ki mwahaya bwaddi agatxosiwa?

⁸ Kubuwela mukiristawu anathoma okanna mweddelo wabure. Eyo yapadduwa nnere ddi? ‘mugwadde nnyalo’ bumuthenga yola Yehova amurumiliye pawulo wihina addele mulogo. (1 Cor. 5:11) Ale enerana yothega ni ehinathwaruwa enohoweleya watxosa mmulogoni. Sapama werana yeyo wihina ebareliwe addibila ni arogola oororomeleya ni atene nikale otxena ninga Yehova. Mbwenye athu amodha enubuwela wi muthu atxosiwa Mulugu kamweddele thagaraga. Eyo ebaribari? Nnere woona.

9-10. Mowiwanana ni Hebreus 12:5, 6, mwahaya bwaddi nigawoga wihina otxosiwa onowoniha thagaraga? Owoge yoladdaniha.

⁹ Niiwa yovuwiha omutugumanoni wi muthu nimunonilihu ni nnamudhivelihu “vano kahiyo Namona a Yehova, “nnowukuwa vamlubale. Podi wera nnokala nuwikoha, akala oliye ofwanelela otxosiwa. Ebaribari wi omutxosa muthu winowoniha thagaraga? Hee. Ohumusinyusa muthu anafwanelela osinyusiwa kunoniha odhivela, thotho newene thagaraga. (Pro. 13:24) Nerege otxosiwa podi omukavihera muthu ole atheegile ni ahinathwaruwa osaddula mubuwelo waye? Hee. Mwaha athu owinjhiva yerilena yothega enlubale ehirumedha wihina yohowela otxosiwa wihina esinyuwe ni ehogolowele mukapwani mwa Yehova.​—Omwileri Hebreus 12:5, 6.

¹⁰ Kubuwela yoladdaniha ela. Namakukula woona wihina nimbila naaye niredda. Oliye ohunona wihina egi asamalele oredda wa nimbila nne enohoweleya ahele wayewene. Mbwenye mambila enodhiveliwa okala vamodhave. Bumwahaya nimbila nakala yekiwa kanoona oriya. Ki vano eyo enatapulela wihina namakukula ole anathoma ohiya nimbila nne wewawene kanna odhivela ni dabure? Yowakulaya sowi naari. Oliye ohunona wihina ahiya nimbila nne nli niredda, ni mambila mamodha, oredda ole onere omwadheya. Mwaha wovenyihavo nimbila nne nli niredda oliye onowabarela mambila mamodha.​—Oliganihe ni Levítico 13:3, 4.

11. a) Muthu atxosiwa analigana addi nnimbila nli niredda? b) ale etxosiwe ehiselele wera ddi, ki nikavihero baani enakeliwa?

¹¹ Mukiristawu atxosiwa nimonege ninga nimbila nli niredda. Mbwenye oredda waye boomuzimuni. (Tia. 5:14) Ninga oredda dhimodha ninonilihu oredda ola womuzimuni, podi ovaliwa mowaguva. Bumwahaya malabo mamodha enohoweleya ovenyihavo nimbila nne nli niredda mmulogoni. Osinyusa wula onowoniha odhivela wa Yehova ni mambila aye oororomeleya ehanle mmulogoni. Teto podi omukavihera muthu ole atheegile othwaruwa. Mbwenye muthu ole atxosiwe kanakoddihiwa otugumana wihina ijhihege eepaddi yomuzimuni ni alibihege nroromelo naaye. Teto oliye podi wawakelaga malivuru ehu wihina aalabihedhege eragana ohudhera waye wavayeka ni podi omonaga JW Broadcasting^®. Vano mudhidhi wavira ni anamaholela mulogo yoona wi oliye anna wawerana masadduwo, enonvaha dhoholela ni dholaga wihina avenyihedhe epaddaaye yomuzimuni, teto  eyo podi omukavihera ohogolowela mmulogoni ninga Namona a Yehova. *

12. Anamaholela mulogo enonihe addi odhivela ni muthu atheegile ahinafuna othwaruwa?

¹² Kuddiwale wihina ale etheegile ni ehinafuna othwaruwa binatxosiwa. Anamaholela mulogo ehinona wi enohowela wubuwela pama ehinathi omutxosa muthu. Aliwa ehinona wihina osinyusa wa Yehova winohowela ovahiwa ni ‘opimedhedha.’ (Jer. 30:11) Anamaholela mulogo enowadhivela addibila, bumwahaya kinafuna wawerela ethu yahele vangovini wandana wewa ni Yehova. Mbwenye makalelo amodha otonyihedha thagaraga ni odhivela fumutxosa ole atheegile ahinafuna othwaruwa.

13. Mukiristawu elabo yoKorintiyu atxosiwele ddi?

¹³ Kasugwa makalelo murumiwi Pawulo amweddihiye namathega ahifuna othwaruwa. Mukiristawu elabo yoKorintiyu era wagoniha amaye, eyo ethu yonyakavala. Yehova ahiwoga muselu ola ni amwaana Ezarayeli egi: ‘Mulobwana anaagoniha amaye, anowatotela manyazo ababe. Mohanganyedha aabilene enohoweleya epiwe nibilina thewa.’ (Lev. 20:11) Ebaribari wi Pawulo kawonge wihina muthu ole apiwe. Mbwenye ahakongomedha addibila oKorintiyu wihina emutxose. Obure wa mulobwana yole wera wavolowela addibila amodhaya a mmulogoni, mwaha wa yeyo amodha yubuwela wihina oliye aneriyena kahiyo yabure.​—1 Cor. 5:1, 2, 13.

14. Pawulo amweeddele addi thagaraga muthu atxosiwe oKorintiyu, ki mwahaya bwaddi adhe eeregena yeyo? (2 Coríntios 2:5-8, 11)

¹⁴ Mudhidhi nuuvira, Pawulo onona wihina mulobwana ole ahimala osaddula murima waye. Oliye ahithwaruwa mwebaribarene! Mulobwana ole ahithukuliha manyazo mulogo, mbwenye Pawulo wawaddela anamaholela mulogo wihina kaafuna ‘othabwa owoga.’ Teto Pawulo wawaddela mwahaya bwaddi yafuniwa werana yeyo egi: ‘Mmulevelele ni murima watene ni mmutodole.’ Murumiwi Pawulo ahimweddela thagaraga mutheegi ole athwaruwe. “Oliye kaafuna wi mulobwana ole athabwege wikubanyedha” wa ele eriliyena ofiyera oselela waaja nikurumuwelo na Mulugu.​—Omwileri 2 Coríntios 2:5-8, 11.

15. Anamaholela mulogo enoniha addi thagaraga yamutxosa muthu?

¹⁵ Ninga Yehova anamaholela mulogo enodhiveliwa okala athu athagaraga. Muthu  athega ahifunaga othwaruwa aliwa kinahiya omutxosa. Teto wa epaddi emodha aliwa enowilibihera okala athagaraga eyo yahoweleyaga. Anamaholela mulogo ehinona wi ohumusinyusa ole anafwanelela osinyusiwa kahiyo makalelo omweddela thagaraga. Mbwenye wera ndo enatapulela omudumera. Anamaholela mulogo binoniha thagaraga baahi?

16. Mowiwanana ni Provérbios 21:13, Yehova anera ddi muthu ahikanna thagaraga?

¹⁶ Atene iyo nnofuna okala a thagaraga ninga Yehova. Mwahaya bwaddi? Ethu yobajha sowi, Yehova kanaavuruwana malobelo aale ehinna thagaraga. (Omwileri Provérbios 21:13.) Kavo muthu wa iyo anafuna wi eyo empadduwele, bumwahaya nnokala pasope wihina nihikanne murima woduduruwa. Kannakodda omukavihera ddibila anatabuwa, teto nnovuruwana ‘muthu ohawa analoba unlaga’ ohiya eyo kannavudhuwana yolaga ya (Tia. 2:13) ‘Ole ahinaweddela thagaraga athu amodha, nuliyeya kaneeddeliwe thagaraga.’ Nimakalelo owiyeviha iyo nanona wihina nnohowela weddeliwa thagaraga nnere wilibihera waweddela athu amodha thagaraga. Mudhidhi nnafunihu waweddela athu amodha thagaraga bule ole atheegile ahogolowela mmulogoni.

17. Mwene Davidi onihe addi wihina dathagaraga?

¹⁷ Bibliya anosoriha dhotajhiha dhowinjhiva dhinanikavihera okala athu enna thagaraga ohiya ovadda murima. Moladdaniha kasugwa yotajhiha ya mwene Davidi. Mudhidhi wowinjhivene oliye ahooniha wi ahikanna thagaraga. Mwene Sawuli afuna ampe mbwenye Davidi ahimweddela thagaraga muthikitheliwi a Mulugu, newene kasayela makalelo wihina ampe obe amwerele yabure.​—1 Sam. 24:9-12, 18, 19.

18-19. Owoge dhopadduwa bili dhinoniha wi Davidi kaana thagaraga?

¹⁸ Mbwenye wahifiya mudhidhi Davidi ahonihiye thagaraga. Nabal aali muthu abure, omuruwana Davidi ni okoodda onvaha yojha oliye vamodha ni alobwana aye. Davidi onyanyuwa, oliye othoma ompa Nabal vamodha ni athu atene yakala vade vaye. Davidi kaathukule nibili mwaha Abigayili mwadha Nabal aherana ethu-sithu mowaguva, mwaha wa yeyo Davidi okurumuwa.​—1 Sam. 25:9-22, 32-35.

¹⁹ Nlabo nimodha namavuhulela Nata omwaddela Davidi wihina mulobwana oorela wiiya nimbila na mulobwana ohawa. Davidi onyanyuwa ni owoga egi: ‘Ginoolibela vamentoni va Yehova, mulobwana oyo enohoweleya apiwe!’ (2 Sam. 12:1-6) Davidi ahinona pamadhene nlamulo na Moses. Mowiwanana ni nlamulo nna muthu iya nimbila nimodha yohoweleya waweliha mambila mannayi. (Êx. 22:1) Ki mwahaya bwaddi Davidi adhe awogege wi mulobwana ole ofwanelela opiwa? Makalelo ala otoriha yakale abure. Namavuhulela Nata awogile thalako ela wihina amonelihemo Davidi wi  aherana yothega enlubale. Naari dhigalive ndo Yehova ahimweddela thagaraga Davidi, ohiya makalelo Davidi amweddihiye mulobwana ole a muthalakoni yanaTani.​—2 Sam. 12:7-13.

20. Thalako ya mwene Davidi enanihudhiha ddi?

²⁰ Wubuwele wi mwaha Davidi onyanyuwa oliye othoma wihina Nabal vamodha ni athu yakala vade vaye epiwe. Teto mudhidhi mmodha oliye ubuwela wihina mulobwana ole a muthalakoni ya Nata ohowela opiwa. Nilerigi yopadduwa ela yanabili podi wera nnowikoha. Mwahaya bwaddi muthu apama adhe ahiyege okala athagaraga? Kubuwela dhithu dhapadduwa mudhidhi yole. Davidi mudhidhi yole mubuwelo wera omunyemela. Muthu ali oolibene epaddi yomuzimuni kanahiya okala athagaraga. Mbwenye Yesu ahiwoga ni anamaharaye egi: ‘Muselele otoriha mwaha makalelo munaatorihinyu athu amodha, ni nyunwa munere otorihiwa.’ (Mateus 7:1, 2) Bumwahaya enohoweleya wilibihera wihina nihikale athu owumma murima mbwenye ‘odhaaleliwa thagaraga’ ninga Mulugu ehu.

21-22. Nnaweddele addi thagaraga athu amodha?

²¹ Ole ali muthu athagaraga, kanaweddela thagaraga baahi athu amodha, mbwenye “onowerana ethu-sithu wihina akavihere.” Bumwahaya atene iyo nnohowela wilibihera osugwera mwimudhini mwehu, mmulogoni mwehu, obe mburo bu mburo nnakalihuwo akala muthu onohowela nikavihero. Neera ndo nnere woona makalelo owinjhiva owaweddela athu amodha thagaraga. Ohukalawo muthu omwaddameliwe anahowela otodoliwa? We podi werana ethu-sithu ninga omukuruwela, obe wapara mabasa mamodha. Ohukalawo ddibila ahogolowele mmulogoni ovanene, anahowela otodoliwa obe olibihiwa? Obe yere wenyeya watodola athu a muruddihu ni muthenga dhapama? Ala makalelo a thima owaweddela thagaraga athu amodha.​—Jó 29:12, 13; Rom. 10:14, 15; Tia. 1:27.

²² Naathuwathuwelaga athu amodha, nnere woona wihina nihikanna ofuru dhohiyana-hiyana dhowoniha okala athu athagaraga. Noonihaga wi nihikanna thagaraga nnomuhagalasa Babihu oodhulu Mulugu ‘adhaleliwe thagaraga!’