1-2. Madhu eli va Eclesiastes 11:6 eniwanana addi ni mabasa oolaleya muthenga dhixa dha Omwene?

DHILABO dhimodha athu enowarumedha mabasihu oolaleya. Mwaha wi muthenga nnalaleyihu siyeyo enafuniiwa wiwa. Mbwenye dhilabo dhimodha athuya kinnampwatha Mulugu newene dhohudhiha dha mBibliyani. Ki athu a murudda wawo enoonamo avi wodhela Mulugu ni dhohudhiha dha mBibliyani? Ebaribari sowi, kinapwathiwa makalelo ewa owoona dhithudha. Yehova anajheha wi iyo ndhowegenave mabasa oolaleya ofiyedha labo oliye anawogiye wihina egomele vevala.

² Yehova ohuthoma labo ni maworaya mabasa oolaleya enafuniiwa omala ‘vano omakuthulo wifiye.’ (Mat. 24:14, 36) Ofiyedha mudhidhi yoyo nnawedhe addi wawiwelela madhu owi: ‘kuwavumihe maladawo’? * — Omwileri Eclesiastes 11:6.

3. Yohudhera ela nnaasuze ddi?

³ Yohudhera evirile ehiwoga dhithu tharu muthu anahoweliye werana aafunaga okala ‘namameza apama aathu.’ (Mat. 4:19) Yohudhera ela nnere owoga dhithu tharu dhinaanikavihere odhowaganave mabasa oolaleya, naari nifwanyiwaga makathamiho bi makathamiho. Ni nnere ohudhere mwahaya bwaddi ekala yathima, (1) odhowagave nigaali txithi, (2) okala ovilela ni (3) okanna nroromelo nooliba.

4. Mwahaya bwaddi egahoweleyaga waparagave mabasa Yehova anirumiliye?

⁴ Yesu ohuwoga makathamiho yafuna okalawo omakuthulo wa elabo. Oliye ahinona wi makathamiho yala yere waholosa anamahara aye wapara mabasa oolaleya. Bumwahaya adhe awaddelege anamaharaye egi: ‘mukale mento.’ (Mat. 24:42) Mutokora ohunafiye athuya yathuwathuwelesa mabasiwa a labo ni labo, bumwahaya kiyavaha thima ele alaleya Nowe. (Mat. 24:37-39; 2 Ped. 2:5) Peeno athu enowathuwathuwela bure mabasa a labo ni labo. Mwaha wa yeyo enohoweleya niimele txithi wihina nawerena mabasa anivahile Yehova.

5. Ninga munawogela Atos 1:6-8 mabasa oolaleya enaagomele waani?

⁵ Olaleya muthenga dhomwene mabasa nnahowelihu wathuwathuwela. Yesu ahiwoga wi avenyihiwa muukwani mabasa oolaleya yere opariwa mudhidhene wowinjhiva ni yere ofiya murudda dholapela. (João 14:12) Yesu nuukwa anamahara aye amodha, yahahogolowela mabasiwa oomeza oba. Vano agavenyihiwe, Yesu wawerana matikiniho wi anamaharaye emeze oba dhowinjhiva. Oliye opatha mudhidhi yola wihina aalibihe wi, okala namameza aathu yaali mabasa a thima okwaranya mabasa bi mabasa yafunegiwa wapara. (João 21:15-17) Yesu ahinadhowe odhulu oliye owoga ni anamaharaye wi mabasa oolaleya awambeliye yere ofiya murudda dholapela, ohiya wizarayeli baahi. (Omwileri Atos 1:6-8.) Yaka dhigavirile, Yesu omweriha murumiwi Juwawu wi oone dhithu dhafuna opadduwa ‘labo na Nabuya.’ * Ethu emodha Juwawu oniliye yaali yootikiniha: ahawona angero eholelaga mabasa oolaleya ‘muthenga dhapama’, elaleyiwaga ‘malogo matene, mahimo, ni dhiwogelo  dhatedhene.’ (Apo. 1:10; 14:6) Eyo enowoniha wi Yehova anafuna wi iyo naaparege mabasa oolaleya ofiyedha omagomihedho.

6. Enaanikavihere ddi wimela txithi ni mabasa oolaleya?

⁶ Ethu enaanikavihere wimela txithi mmabasani oolaleya, fuwubuwela dhithu dhatedhene Yehova aneriyena wihina anikavihere. Motajhiha ohona mbwabwadda wa dhoojha dhomuzimuni ninihunna? Nihikanna malivuru owapidene, awudiyu, vidiyu ni porogarama dhimodha dhinonihiwa musayitini mwa Anamona a Yehova. Mwemmo nnofwanyamo malivuru ni mavidiyu a dhiwogelo dhohiyana-hiyana. (Mat. 24:45-47) Podive elabo ela egagawanyeye mwaha wa pulitika, dhigereja obe malondda, adhari a Mulugu okwaranya 8 milhões enokosa epaddi ya emudhi yowiwanana. Motajhiha, xixano labo na 19 a Abril a 2019 Anamona a Yehova a elabo yatene yahitugumana wi yoone lemba na siku. Teto omahiyuniwa athu owakwana 20.919.041 yahitugumana wi yubuwele okwa wa Yesu. Woona muthithi ola waathu ni okalavo, oneti munlubale. Nubuwelaga oneti yoyo nnakala owimelene txithi wihina nilaleye Omwene.

7. Yotajhiha ya Yesu enaanikavihere addi wimela txithi?

⁷ Makalelo mamodha odhowanave mabasa oolaleya, fuuhara yotajhiha ya Yesu. Oliye kahiyile ethu-sithu wi empupuruse ovaha onamona webaribari. (João 18:37) Saddana nunvaha ‘Omwene watene wa elabo ela yavati ni nthithimiho wewa’, Yesu kamorele vammurakoni newene kaarumedhile athu amodha yafuniwa omuthikithela wi akale mwene. (Mat. 4:8, 9; João 6:15) Yesu keerela murima thundduru dhorela, newene kahiyile wi oharahariwa nuubure wimwihihe mabasaye oolaleya. (Luc. 9:58; João 8:59) Nroromelo nehu nehiwaga iyo podi odhowagave naaparaga mabasa. Nihare yolaga ya murumiwi pawulo. Oliye wakongomedha makiristawu ohara yotajhiha ya Kiristu wihina ‘ehigomme newene ehihiye!’  — Heb. 12:3.

8. Ovilela enatapulela ddi, ki mwahaya bwaddi nigahowelega?

⁸ Ovilela, ekalelo enamukavihera muthu ojheeha nuuliba murima ofiyedha dhithudha osadduliwa. Malabo mamodha makathamiho enonifwanya, iyo wunddelaga wi emarihiwe mowaguva. Nnowunddela wi ndhe nnafunihu dhereye. Mwamakalelo yala nnohowela okala athu ovilela. Namavuhulela Abakuki oofunesa woona omarihiwa wa obure waali Ojuda. (Hab. 1:2) Anamahara a Yesu yojheha wi omwene ‘otikiteriwe mowaguva’ wihina wawobole mmadani mwakudda Roma. (Luc. 19:11) Teto, iyo nnohowela Omwene wa Mulugu wi wamarihe makathamiho, ni odhena elabo exa yamurenddele. (2 Ped. 3:13) Mbwenye nnohowela nikale athu oovilela ni nijheehe mudhidhi Yehova athomeliye. Osugwe makalelo Yehova ananihudhihiye okala athu ovilela.

9. Dhotajhiha baani dhinoniha wi Yehova doovilela?

⁹ Yehova yotajhiha yapama wodhela ovilela. Mutokora ohunafiye Yehova ahenya wi Nowe asasanye mwanddeya mudhidhi wowinjhivene ni akale ‘namalaleya a muselu dhowogowa.’ (2 Ped. 2:5; 1 Ped. 3:20) Abarawu agawerilena makoho owinjhiva wodhela ogujhuliwa wa Sodoma ni Gomora Yehova onvuruwana nuuvilela. (Gén. 18:20-33) Mwa yaka dhowinjhivadhene amwaana Ezarayeli kiyamwiwelela Yehova, podi dhigalive ndo, oliye ahoniha wi ali muthu oovilela. (Nee. 9:30, 31) Peeno nnowona wi Yehova doovilela. Oliye anna wameza athu ni anna wavaha mudhidhi  wihina ‘ethwaruwe’. (2 Ped. 3:9; João 6:44; 1 Tim. 2:3, 4) Nubuwelaga yotajhiha ya Yehova, kunoonelamo wi nihikanna dhithu dhinanithukulela olaleya ni wahudhiha athu nuuvilela? Vano kasugwa yotajhiha yamBibliyani Yehova analabihedhiye wihina anihudhihe okala athu oovilela.

10. Nnahudheravo ddi ni nladdaniho nnafwanyeya va Tiago 5:7, 8?

¹⁰ Omwileri Tiago 5:7, 8. Yotajhiha ya namalima enanihudhiha okala athu oovilela. Ebaribari wi dhihikalawo thanga dhinamela mowaguva. Mbwenye thanga dhowinjhiva thabwathabwa ndhe dhinavaha dhowima, dhinovira mudhidhi wowinjhiva wi dhimele. Owizarayeli thanga dhamalesa mweri mitanu nammodha wihina dhunnuwe. Namalima adhalesa thanga dhaye muzongwe oromeene, ni ahadda muzongwe oogomihedha avira. (Mar. 4:28) Ovilela wa namalima yotajhiha yapama. Mbwenye eyo kahi yokweya.

11. Okala athu oovilela winanikavihera addi mmabasani oolaleya?

¹¹ Mwaha wohilogomana, nnofunesa wi dhatedhene nnerihuna dhikumege pama ni mowaguva. Mbwenye wi thanga ndhe dhidhaliwe dhivahe dhowima, namalima onohowela osamalela. Oliye onohowela olima munddaya, odhala thangadha amala akurubele ni ahelege manjhe. Mabasa owahudhiha athu wi ekale anamahara a Yesu enohoweleya wilibihedha. Onovira mudhidhi wowinjhivene wihina namahudhera asaddule mubuwelo waye. Nakala oovilela, makathamiho kinanikwerebeyihe. Podi athu amodha yarumedhaga muthenga ninihunna enohoweleya okala oovilela. Kanimuwaddihedhege namahudhera wihina unuwihe nroromelo naye. Anamahara a Yesu Malabo mamodha kiyaguva ononelamo pama ndhe dhahudhiha Yesu. (João 14:9) Wubuwelege wi mabasihu fuudhala ni ohela manjhe, mbwenye anunuwiha di Mulugu. — 1 Cor. 3:6.

12. Nnatonyihedhe addi wi nili athu oovilela naalaleyaga amudhihu?

 ¹² Iyo podi ohukala athu oovilela naalaleyaga amudhihu ehili anamona a Yehova. Yolaga enaanikavihere enafwanyeya va Eclesiastes 3:1, 7 enawoga wi: ‘Ohukalawo mudhidhi wookala omaleene ni mudhidhi wowoga.’ Malabo mamodha iyo podi okala omaleene, mbwenye ekalelo yehu yapama ewoge vamburoni vehu. Teto yenyeya nnopatha mudhidhi wihina nilaleye ebaribari. (1 Ped. 3:1, 2) Sathima owoga nuuviheya nalaleyaga ni naahudhihaga, mbwenye nikale oovilela ni athu atene, naaleya eli amudhihu oomaningoni.

13-14. Dhotajhiha baani dha ovilela nnahowelihu ohara?

¹³ Iyo podi ohudhere okala athu oovilela ni adhari a Mulugu akale ni amalabo ehu. Abakuki owunddela woona omarihiwa wa obure, mbwenye oliye ahoniha wi ali muthu oovilela ni owoga egi ‘Ginere okala owimelene vamburoni vaga wosugwera.’ (Hab. 2:1) Murumiwi Pawulo oofuna ‘wamariha’ mabasaye oolaleya. Mbwenye oliye ahidhowanave ‘avahaga onamona waathu atene wa muthenga dhapama’ nuuvilela.  — Atos 20:24.

¹⁴ Kubuwela yotajhiha ya ddibila mmodha ni mwariye esuzile eskola yoojeliyadi. Nuumala ohudhera aliwa othomeliwa elabo waali anamona a Yehova vang’ono. Woona wi dhigereja dhili murudda yoyo kahiyo dha makiristawu, anamatelana ale kiyafwanye athu owinjhiva yafuna omuhudhera Bibliya. Teto akwaye asuzaliyena ojeliyadi yathomeliwe olaba dhilabo dhimodha, yathapanyaga yowawaddelesa muthenga dhapama wodhela anamahudhera a Bibliya yanniwana. Podi dhigalive ndo, anamatelana ale yahidhowave okala oovilela. Podi wunnuwelavo omuzimuni wa murudda yole wigali wowalawene, aliwa kiyahiyile mabasa oolaleya. Egalaleyile yaka dhokwaranya tanu natharu murudda yole, wakala ninga kavo aakale namona, yahikanna ohagalala womoona namahudheriwa mmodha abaddiziwaga. Dhotajhiha dhamundduli ni dhapeeno dhiniwanana avi? Aliwa kiyaali amangonya newene kiyavumihe malada ewa, mbwenye Yehova oreeliha ovilela wewa. Mohanganyedha eyo enonithukulela ‘watajhiha ale mwaha wa nroromelo ni ovilela enaakela mpaganyo.’ — Heb. 6:10-12.

15. Nroromelo nnanilibiha ni makalelo baani mmabasani oolaleya?

¹⁵ Iyo nihikanna nroromelo wi muthenga nnalaleyihu sebaribari. Bumwahaya nigiilibihedhaga walaleya athu owinjhiva. Teto nnororomela mpaganyo dha Mulugu. (Sal. 119:42; Isa. 40:8) Nnowona dhovuhulela dhakwanelaga malabo ehu. Ohiya eyenove nnowawoona athu evirihagamo ndhe dhinawoga Bibliya ni esaddulaga egumiwa. Dhatedhene dhendho dhinonivaha nroromelo wi atene nnohowela wiwa muthenga dhapama dhomwene.

16. Ninga anawaga Salmo 46:1-3, omuroromela Yehova ni Yesu onanikavihera ni makalelo baani mmabasani oolaleya?

¹⁶ Iyo nnomuroromela Yehova mwinya a muthenga nnalaleyihu, ni nnomuroromela Yesu asakuliwe ni Yehova wihina akale mwene a Omwene waye. (João 14:1) Kannapwatha makathamiho baani enanifwanye, Yehova anakale kopolo dhehu ni nikungu nehu noothawela. (Omwileri Salmo 46:1-3.) Ohiya eyo, nnororomela wi podi Yesu agali odhulu oliye onna wasogolela mabasa oolaleya alabihedhaga kopolo ni onamathonga avahiwiye ni Yehova. — Mat. 28:18-20.

17. Mwahaya bwaddi egahoweleyaga odhowaganave mabasa oolaleya? Owoge yotajhiha.

¹⁷ Nroromelo winonithukulela orumedha wi Yehova anere oreeliha wilibihedha wehu.  Eyo podi opadduwa mwamakalelo nihinubuwelihu. (Ecl. 11:6) Motajhiha nihinona wi mbwabwadda ni mbwabwadda waathu enofiyesa vinakala karinya wi yawone malivuru ehu. Makalelo ala oolaleya enotxova? Hee enotxova. O Nosso Ministério do Reino a Novembro a 2014 ohuwoga wodhela namwali mmodha asuza o wuniversidadi, oliye afuna oleba thalako wodhela anamona a Yehova. Oliye kanonile waali Nyumba Yoomwene, mbwenye ahafwanya meza vaali malivuru a Anamona a Yehova wuniversidadi wewule, ni ahifwanya dhowoga afuniye wi alebe muthalakoni mwaaye. Nuumala, oliye obaddiziwa okala namona a Yehova, peeno piyonera amudhidhi wamutene. Muselu ninga dhenda dhinonithukulela wadhowaganave mabasa oolaleya. Teto ohiya eyenove, dhinotonyihedha wi ehikalawo athu enahowela wiwa muthenga dhomwene.

18. Mwahaya bwaddi nikanna ebaribari wi mabasa oolaleya nnere wakwaneliwa ninga Yehova munafuniye?

¹⁸ Nikanne ebaribari wi mabasa oolaleya enanaagome mudhidhi ethomiwe. Nubuwele malabo a Nowe. Yehova ahoniha wi onowing’anela pama mudhidhi. Dhahivira yaka 120 Yehova agathomile mudhidhi mutokora wafuniwa opadduwa. Yaka dhowinjhiva dhigavirile Yehova omuruma Nowe wihina amage mwanddeya. Podi wera yaka dhowakwana 40 obe 50 mutokora ohunereye, Nowe oodhowave alabaga nuuviheya. Podi athu ehifunaga wiwa, Nowe oodhowanave mabasa oolaleya ofiyedha labo Yehova owogiliye wi mudhidhiya buyola wihina wathukulele anenyama mmwanddeyani. Vano mudhidhi ogaafiyile ‘Yehova ofuga musiwoya.’ — Gén. 6:3; 7:1, 2, 16.

19. Ethu baani nnajhehihu nahavumiha malada ehu?

¹⁹ Mohilegela, Yehova anere owoga wi mabasa oolaleya Omwene egomele vevala. Oliye anere ‘ofuga musiwoya’ wa elabo ela ya Saddana ni anere odhana elabo exa munaakale wogowa. Nijheehaga labo nenno wi nifiye othome omutajhiha Nowe, Abakuki, ni makiristawu amodha yahavumihile malada ewa. Wimele txithi okale oovilela ni okanne nroromelo nooliba ni Yehova ni mpaganyo dhaye.