1. Konviti baani Yesu aakosiliye anamameza annayi, ki aliwa yaakunle avi?

ANAMAHARA Peduru, Andire, Tiyagu ni Juwawu yalabesa ninga anamameza. Mubuwele, yamwiwaliwa Yesu nuwawithana eraga: ‘Mugihare, miyo ginere wukosani wihina mukale anamameza aathu.’ * Aliwa yaakunle avi? Bibliya onowoga wi: ‘Aliwa wahiya mowaguva mathaviwa owumbana ni omuhara.’ (Mat. 4:18-22) Yosakula ela yahisaddula dhigumi dhaanamameza ale. Aliwa kiyaamezege oba, mbwenye ‘yaamezege athu.’ (Luc. 5:10, nota) Peeno Yesu onomukosa konviti mmodhave wa ale enna murima wapama ni enna odhivela ni ebaribari. (Mat. 28:19, 20) Kiwe, ohumurumedha konviti a Yesu ookala namameza aathu?

2. Mwahaya bwaddi egahoweleya opendda pama naafunaga othoma okala namameza aathu, ki vano ethu baani enaanikavihere othoma?

² Podi wera we oli namahudhera a Bibliya owunnuwelavo omuzimuni ni onohowela othoma akala onere okala namalaleya. Akala onowoova omurumedha konviti a Yesu, kukubanye. Mwaha wi, woova wula winowoniha wi we ohunona wi omurumedha konviti ola mutholo munlubale. Mwebaribarene Bibliya onowoga wi Peduru naakwaye yahahiya ‘mowaguva’ mathavi owumbana wihina emuhare Yesu. Teto aliwa kithomile ni marulu. Dhahivira mweri mitanu nammodha Peduru ni Andire egamurumedhile Yesu ninga Mesiya. (João 1:35-42) Mwamakalelo mamodhave, podi wera dhithu dhatedhene ohudheriwe wodhela Yehova ni Yesu dhinere wuthukulela  wunnuwelavo epaddi yomuzimuni. Teto kuthome okala namalaleya wahirajhihile opendda ethu enavolowelavo. Ethu baani emukavihere Peduru, Andire ni amodha omurumedha konviti ola ookala namameza aathu?

3. Dhikalelo baani dhinukavihere omurumedha konviti a Yesu?

³ Anamahara oobajha a Yesu yahikanna ethu yaakavihere, aliwa yahinona pamadhene mabasiwa, yaali ooliba murima ni yahinona wisamalela yekiwa. Mohanganyedha, ndhikalelo ndha dhanniwana, dhahakavihera aliwa okala anamameza apama aathu. Mwamakalelo mamodhave, dhikalelo ndha podi wukavihera we okala namahara a Kiristu. Yohudhera ela enere wukavihera osayela okanna dhikalelo ndha.

4. Ethu baani yamuthukulela Peduru okala namameza?

⁴ Peduru amezesa wi aajhihe amudhaaye, mbwenye oliye koonelamo omeza wule ninga mabasa bure-bure. Oliye oodhiveliwa omeza. (João 21:3, 9-15) Vano, oliye wambela odhiveliwa mabasa ala owameza athu. Nnikavihero na Yehova, Peduru ooviheya ni mabasa ala. — Atos 2:14, 41.

5. Ninga munawogela Lucas 5:8-11, mwahaya bwaddi Peduru adhe oovege, ki vano noovaga ninga Peduru ethu baani enaanikavihere?

⁵ Iyo nnolaleya mwaha nnomudhivela Yehova; fudhivela wula winanithukulela wapara mabasa yala. Odhivela ninnihuna ni Yehova podi onikavihera naarive nubuwelaga wi kannanda wapara mabasa yala. Amwithanaga Peduru wihina akale namameza aathu, Yesu wera: ‘Kuwoove.’ (Omwileri Lucas 5:8-11.) Yamuthukulela Peduru woova, kadhaari dhithu dhaapadduwe oliye akala namahara. Mwebaribarene, oliye ubuwela wi mabasa yala kiyanfwanelela mwaha okala mabasa athima.  Oliye ahoona matikiniho oomeza awerilena Yesu, vano oliye woonaga wi mabasa ala oolaba ni Yesu bathima ni kiyanfwanelela. Ninga Peduru, podi wera wubuwelaga muselu ola wookala namahara a Kiristu, onodheliwa woova vang’ono mwaha dhithu dhatedhene dhinavolowelavo. Yapadduwa eyo, wunnuwihe odhivela onniwena ni Yehova, Yesu vamodha ni amwanddamani awo. Eyo enere wukavihera omurumedha konviti a Yesu ookala namameza aathu. — Mat. 22:37, 39; João 14:15.

6. Ethu emodha enanithukulela olaleya siivi?

⁶ Dhihikalawo dhithu dhimodha dhinanithukulela olaleya. Ethu emodhaya sowi nnafuna nimwiwelele Yesu wodhela ele oliye awogiliye egi: ‘Dhowani . . . mwaahudhihe athu.’ (Mat. 28:18-20) Emodhaya sowi nnowaweddela thagaraga athu ‘owukuwa ni enedda bure-bure’ ni enafuna ohudhera ebaribari wodhela Omwene. (Mat. 9:36) Ohiya eyenove, Yehova anafuna wi athu atene ekanne enonelo wodhela ebaribari ni evulusiwe. — 1 Tim. 2:4.

7. Romanos 10:13-15 anoniha addi wi mabasa oolaleya ehikanna thima?

⁷ Onona wi olaleya winovulusa dhigumi, winonithukulela omurumedha konviti a Yesu. Yoluba ya namameza oba fuureha obe oguliha, mbwenye yoluba yehu ‘naamezaga’ athu fuvulusa egumi yewa. — Omwileri Romanos 10:13-15; 1 Tim. 4:16.

8-9. Namameza ahinathi odhowa omeza yahoweleya anone ddi, ki mwahaya bwaddi?

⁸ Malabo a Yesu, namameza mwizarayeli ohowela onona oba baani oliye afuniye omeza. (Lev. 11:9-12) Teto ohowela onona murudda baani anafuniye ofwanyawo oba. Oba dhinadhiveliwa okala vili manjhe apama ni dhoojha dhowinjhiva. Omeza winookanna maworaya? Hee. Kasugwa epadduwile mwihinjhe onakala murudda wo Pacífico. Ddibila mmodha omwerela misiyonariyu wi edhowe yameze. Misiyonariyu wera: “kaviri muladdu, nigumane mangwaana mambesi 9 woora.” Ddibila ole wakulawa, wera: “Ginona wi kunoonelamo nnawogihu. Kahiyo iyo anawoga mawora ojhela oba, mbwenye obadha sinawoga.”

⁹ Siyeyo yerana anamameza aathu ansaka noobajha. Aliwa yadhowesa mburo ni mudhidhi wofwanelela ofwanya ‘oba’. Motajhiha anamahara a Yesu yalaleyesa mutempulu, mmasinagoga, nyumba ni nyumba ni mburo mwakalesa athu owinjhiva. (Atos 5:42; 17:17; 18:4) Ninga anamahara a Yesu, iyo nnohowela onona dhilemelelo dhaathu enakala murudda wa mulogo wehu. Nnohowela naguve wi nalaleye athu mburo ni mawora nnafunihu wafwanyamo. — 1 Cor. 9:19-23.

10. Malivuru baani mulogo wa Yehova onanivahiwa ?

¹⁰ Namameza anohowela okanna dhipano dhomezana ni anone olabihedhawa. Emodhave, iyo nnohowela okanna dhipano dholabana mabasa ehu oolaleya, teto ninone olabana kadda epano. Yesu ahavaha dholaga dhapama anamahara aye wodhela wameza athu. Oliye ahawaddela dhithu dhafunigiwa othukula, murudda wolaleya ni makaleloya oolaleya. (Mat. 10:5-7; Luc. 10:1-11) Peeno mulogo wa Yehova ononivaha malivuru oohudhihana enanikavihera waparana mabasa oolaleya. * Teto mulogo ola ononihudhiha makalelo owalabana malivuru ala. Mwamakalelo yala nnokanna ebaribari wi nnere olaleya ni thotho sowanganyedha. — 2 Tim. 2:15.

11. Mwahaya bwaddi anamameza aathu egahowelaga oliba murima?

¹¹ Anamameza annya nviha enohowela oliba  murima. Malabo mamodha enofwanyiwa makathamiho manlubale, malabo mamodha yalabaga ni mahiyu podi ofwanyiwa nipevo mwiiko mwemwene. Emodhave enapadduwa ni anamameza aathu, aliwa enohowela oliba murima. Mwaha wi labo nnaromihu olaleya ni nnaromihu ononiwa ninga anamona a Yehova, iyo podi ofwanyiwa “makathamiho” ninga oharahariwa ni amudhihu, onyemuliwa ni akwihu obe okoddiwa muthenga nnalaleyihu. Mbwenye opadduweliwa dhithu ninga dhendho kadhinnantikiniha. Mwaha wi Yesu ahawaddela anamaharaye wi aliwa yere walaleya athu yakoddege muthengadha. — Mat. 10:16.

12. Ninga anawoga Josué 1:7-9 ethu baani nnahowelihu werana wihina nikale ooliba murima?

¹² Ethu baani onahoweliwe werana wihina okale ooliba murima? Ethu yoroma sowi, we onohowela okanne mmurimani wi Yesu ali odhulu ni dinaweeddiha mabasa oolaleya. (João 16:33; Apo. 14:14-16) Voharela, ororomele wi Yehova anere wukavihera. (Mat. 6:32-34) Nroromelo nawo nakala nooliba onere okala ooliba murima. Peduru ni akwaye yahoniha wi yaali ooliba murima mwaha wahiya mathavi ewa yaparesiwana oba ni omuhara Yesu. We wahoniha wi ohukanna nroromelo mwaha wawaddela amudhawo ni akwawo wi ginoomuhudhera Bibliya ni Anamona a Yehova ni ginootugumana ni aliwa. Mohanganyedha we ohusaddula egumawo wihina wawiwelele malamulo owogowa a Yehova. Wihina wande werana eyo yohoweleya oliba murima ni okanna nroromelo, mowindo odhowegeve  wilibihedhaga wi okale ooliba murima. Eyo enere wukavihera we ororomela wi ‘Yehova, Mulugu awo, anakale ni we mburo dhatedhene onadhowigiwe.’ — Omwileri Josué 1:7-9.

13. Olobela ni opendda pama ndhe onahudheriwe winuukavihere addi okala oliba murima?

¹³ Ethu emodha onahoweliwe werana sivi? Fulobela wa Yehova olobaga oliba murima. (Atos 4:29, 31) Oliye anere wawakula malobelo awo newene kadha unyanyala. Yehova ali ni we malabo matene wihina wukavihere. Ohiya olobelave, wubuwele makalelo Yehova aavulusiye athu amodha mundduli. Kuwanganyedhe wi ole afugule niya yoofila wihina amwaana Ezarayeli yaabuwe, podi wukavihera we okala namahara a Kiristu. (Êxo. 14:13) Okanne nroromelo ninga namaleba a Salmo awogile wi: ‘Yehova ali ni miyo; kaginoove. Muthu baani anaagerele obure?’ — Sal. 118:6.

14. Ohudhere ddi ni yotajhiha ya Masae ni Tomoyo?

¹⁴ Makalelo mamodha ookala muthu ooliba murima, fuhudhera makalelo Yehova ahudhihiliye athu yanna manyazo olaleya nuuliba murima. Kasugwa yopadduwa ya murogola anithaniwa Masae. Oliye aali a manyazo ni ubuwela wi kadha awedhaga olaleya. Wubuwela othapanya ni muthu ahamunoniliye yakala ninga mwango woolapa ahandiye ogwelela. Vano Masae othoma wilibihera wihina atonyihedhe odhivela anniyena ni Yehova vamodha ni athu amodha. Oliye owoona wi yaali ethu yathima olaleya mowaguva malabo ala ookuthula, vano oliye olobela wihina Yehova anvahe oliba murima wi awedhe olaleya. Masae ogonjhiha woova waye, vano oliye olaba ninga piyonera a mudhidhi wamutene. Yehova amukavihere Masae podi wakavihera anamalaleya axa “okala ooliba murima.” Kasugwa yotajhiha emodha ya murogola anithaniwa Tomoyo. Abajhiliye odhowa mmalaleyelo, muthu oroma aanfwanyiliye owoga ni owali, wera: “Kaginafuna wiwa wodhela anamona a Yehova.” Ni ofuga musiwo waye. Ohiya okala owovene Tomoyo owoga ni mukwaye aali ni oliye wera: “onowoona. Kagihowele ofugula mulomo. Oliye woona wi gili Namona a Yehova. Gili ohagalalene.” Peeno Tomoyo piyonera a mudhidhi wamutene.

15. Wilela enatapulela ddi, Ki mwahaya bwaddi odhe okalege wathima wa makiristawu?

¹⁵ Anamameza ooleleya, dhewa dhinowaweddela pama. Oleleya winotapuleliwa ninga makalelo owilibihedha “werana ele enahoweleya weriwana.” Ale enamezela oguliha enohowela olemela ovenya mambeseene evireliwe labo nantero omamezelo wengo, podi akala nduwa nnowapaha bure, wihikala nipevo obe muzongwe. Ninga anamameza oba, iyo nnohowela wilela wihina naamarihe mabasa ehu oolaleya.  — Mat. 10:22.

16. Nnawedhe addi okala athu oleleya pama?

¹⁶ Iyo kannabaliwa niganone makalelo owilela. Ohiya eyo ekalelo yehu sofunaga dhithu dhomaladhene. Oleleya pama winohoweleya okala owivanya. Mwaha wa yeyo, nafunaga wixagiha wi nerena dhithu dhinonihu wi ndha soorusa, nnere ohowela nikavihero, Yehova dinanivaha nikavihero nna alabihedhaga muzimu wotxena. — Gál. 5:22, 23.

17. Dhithu baani Murumiwi Pawulo awogiliye va 1 Coríntios 9:25-27 wodhela wilibihedha waye wi akale muthu oleleya?

¹⁷ Murumiwi Pawulo aali muthu oleleya. Mbwenye oliye ahinona wi ohowela ‘osumulula’ mwili waye wihina ande werana ele eli yapama. (Omwileri 1 Coríntios 9:25-27.) Oliye ahakongomedha makiristawu wi ekale oleleya ni yeregena dhithu dhatedhene ni ‘makalelo apama ni owegeredheyene.’ (1 Cor. 14:40) Iyo nnohowela okala athu oleleya wihina nikanne  elemelelo yowapara mabasa owameza athu.— Atos 2:46.

18. Ethu baani enaamwerihe Yehova onreeliha?

¹⁸ Oganyari wa namameza oba anamezela oguliha, winadhela mwaha winjhiva obe oyeva wa oba ameziliye. Mbwenye oganyari wehu kawindha mwaha athu owinjhiva nnandihu wadhana mmulogoni mwa Mulugu. (Luc. 8:11-15) Nadhowagave nilibihedhaga wapara mabasa olaleya ni wahudhiha athu wihina ekale anamahara, Yehova anere onreeliha. Mwahaya bwaddi? Mwahaya bowi nnomwiwelela oliye ni mwanaye. — Mar. 13:10; Atos 5:28, 29.

19-20. Ethu emodha enanithukulela wapara mabasa oolaleya sivi?

¹⁹ Dhilabo dhimodha winarumedhihiwa omeza mweri vang’ono. Murudda dhenda, namameza podi wilibihedha vanlubale anona wi mweri dhogomihedha dhomeza dhinna waddamela. Iyo nili anamameza aathu nihikanna ethu enanithukulela olaleya ovanene: Elabo ela enathongiwa ni saddana enofiya omakuthulo mowaguva. Ohanle mudhidhi vang’ono wi nikavihere ovulusa dhigumi dhaathu. Mwaha wa yeyo, kugonele newene kujhehe wi dhithudha dhikale pama wihina wapare mabasa ala a thima. — Ecl. 11:4.

²⁰ Opathe mudhidhi ovanene wi olibihe ele othomiliwe werana, okanne enonelo yamBibliyani ni okale oleleya. Witaganyihedhe ni mbwabwadda waanamameza aathu owakwana 8 milhões ni ovede makalelo okanna ohagalala wa Yehova mwigumini mwawo. (Nee. 8:10) Othome wilibihedha mmabasani olaleya ni waparegeve ofiyedha omagomelo. Ki aale eromile olaba kale yamezaga athu, ethu baani enaakavihere odhowanave yaparaga mabasa yala? Ohudhera onaharela onere owoga dhithu tharu dhinaakavihere.