Olupe wihina wone muselu dhilimo

Olupele muselu wogwaddela

Ohudhera 38

Okale a thotho mudhidhi wa murenddele

Okale a thotho mudhidhi wa murenddele

Murudda yole yahikanna murenddele ni kavo awanile goddo nuliye yaka dhendhe, woona wi Yehova ahinvaha withuwa.’ — 2 CRÓ. 14:6.

JHIBO 60 A mensagem de vida

MUSELU NNAFUNIHU OSUZA *

1. Mudhidhi baani enakaliwa yoorusa omulabela Yehova?

ONOWOONA ninga ethu yorusa omulabela Yehova wafwanyiwaga makathamiho, obe mudhidhi wa murenddele? Sokweya omuroromela Yehova naafwanyiwaga makathamiho. Ki nakanna murenddele, ethu baani nnerihuna? Nnoddiwala wi omulabela Yehova sathimaya? Oliye ahawaddela amwaana Ezarayeli wi eyo yere opadduwa. — Deut. 6:10-12.

Mwene Aza ahigujhula webedha wowoota (Osugwe ddima 2) *

2. Yotajhiha baani Mwene Aza ahiyile?

2 Mwene Aza yotajhiha yapama ya muthu alabihedhe thotho. Oliye ahimuroromela Yehova ni ahimulabela mudhidhi woorusa ni mudhidhi wa murenddele. Oromana ezombwe yaye, ‘Aza oomwiwelela Yehova mwa yaka dhaye dhatedhene dha egumi yaye.’ (1 Reis 15:14, nota) Aza otonyihedha wi oomwiwelela Yehova, mwaha ofufutha webedha wowoota waali Oojuda. Bibliya onowoga wi oliye ‘waabwanyula aaltare aamulugu ohunoneya ni mapwathapwatha ootaleleya, ni waapadhanya matxikwa ootaleleya ni wanyenya.’ (2 Cró. 14:3, 5) Aza wakitiha avwaye vampaddoni. Mwahaya bwaddi? Mwaha wi avwaye yotetedha webedha wa ekwamuthu dhosema.—1 Reis 15:11-13.

3. Muwari mwa yohudhera ela nnaasuze ddi?

3 Aza aherana ethu emodha ohiya ofufutha elabo yaye wa webedha wowoota. Oliye otetedha webedha onarumedhiwa ni Mulugu, okavihera wi athu Oojuda ehogolowele wa Yehova. Mwaha wa yeyo, Yehova omureeliha Aza ni amwaana Ezarayeli ni mudhidhi wa murenddele. Yaka kumi wa onamathonga wa Aza ‘murudda yole yahikanna murenddele.’ (2 Cró. 14:1, 4, 6) Yohudhera ela nnere woona makalelo baani Aza alabihedhiye mudhidhi ola wa murenddele. * Namala nnere woona yotajhiha ya makiristawu akale. Ninga Aza aliwa yahinona olabihedha pama mudhidhi wa murenddele. Omagomihedho nnere wakula nikoho nna: Akala elabo onakaliwe wihikala ofuru oomulabela Yehova ni murenddele, onalabihedhe addi mudhidhi ola wa murenddele?

AZA ALABIHEDHA AVI MUDHIDHI WA MURENDDELE

4. Ninga munawogela 2 Crónicas 14:2, 6, 7, Aza alabihedhe ni makalelo baani mudhidhi wa murenddele?

4 Omwileri 2 Crónicas 14:2, 6, 7Aza owoga ni nlogo wi Yehova ‘ohunivaha murenddele wa amwiddanihu atene’. Aza koonile mudhidhi wa murenddele ninga mudhidhi wowiitaala. Mbwenye oliye opatha mudhidhi ole wi amage sidadi, muuru, nyumba dhootama ni musiwodha. Aza owoga ni amwaana Ezarayeli, wera: ‘nihikanna mburo wowinjhiva’. Eyo yatapulela ddi? Yatapulela wi nlogo, yahikanna ofuru wowedda ni omaga mburo buumburo yafuniwa sooharahariwa ni amwiddaniwa. Aza ahikongomedha mulogo olabihedha pama mudhidhi ola wa murenddele.

5. Mwahaya bwaddi Aza adhe egeredhege nikuru naye naatoropa?

5 Aza ahilabihedha mudhidhi ole wa murenddele wihina egeredhe nikuru naye naatoropa. (2 Cró. 14:8) Nerege wi eyo yoniha wi aliwa kiyamuroromela Yehova? Naari. Aza ahinona wi ninga mwene, mabasa aye yaali wegeredha nlogo wa ethu siithu yafuna wereya osogolo. Oliye ahinona wi mudhidhi ole wa murenddele waali Oojuda kuwaakale malabo matene. Siyeyo yapadduwe.

MAKISTAWU AKALE YAALABIHEDHE AVI MUDHIDHI WA MURENDDELE

6. Makiristawu akale yaalabihedhe avi mudhidhi wa murenddele?

6 Podive malabo mamodha eharahariwaga, makiristawu akale yahikanna mudhidhi wa murenddele. Anamahara a Yesu yera ddi wafiya mudhidhi yola? Aliwa yolabihedha mudhidhi yole wihina elaleye ni kopolo dhatedhene. Ninga nnawogela livuru na Atos, alobwana ala ni ahiyana oororomeleya ‘yomwiwelela Yehova’. Aliwa yodhowave elaleyaga, mwaha wa yeyo ‘yowinjhivana’. Mohanganyedha Yehova oreeliha wilibihedha wewa mudhidhi olena wa murenddele. — Atos 9:26-31.

7-8. Pawulo ni makiristawu mamodha yera ddi yakanna ofuru? Kawogamo.

7 Makiristawu akale yahilabihedha mudhidhi watene wihina elaleye muthenga. Motajhiha, murumiwi Pawulo ahonelamo wi musiwo wahifuguliwa o Efesu wihina alaleye. Oliye opatha mudhidhi yoyo wihina alaleye ni aahudhihe athu wihina ekale anamahara. —1 Cor. 16:8, 9.

8 Pawulo ni makiristawu amodha yahona ofuru mmodha wakumelele yaka ya 49, muselu wowineliwa ogamanle owogiwa. (Atos 15:23-29) Mulogo nuumala onona yowakula yogomihedha, anamahara yahiilibihedha olaleya ‘muthenga dhapama dha madhu a Yehova.’ (Atos 15:30-35) Mareeliho baani yanniwana mwaha wa yeyo? Bibliya onowoga wi ‘mulogo dhoolibihiwa munroromeloni, ni dhowunnuwa kadda labo.’ — Atos 16:4, 5.

NIPATHE MUDHIDHI WA MURENDDELE PEENO

9. Peeno dhilabo dhowinjhiva dhili avi, ki makoho baani enahoweleya kadda muthu wikosa?

9 Peeno nnowedha wapara mabasa oolaleya dhilabo dhowinjhiva. Ohukanna ofuru womulabela Yehova elabo yawo? Akala wakule hee, wikohe: ginalabihedha avi ofuru ola? Malabo ala ookuthula nikuru na Yehova ninosogolela mabasa athima oolaleya ni owahudhiha athu wapela elabo yatene. (Mar. 13:10) Musiwo dhowinjhiva dhihifuguliwa wa nlogo na Yehova.

Addibila owinjhiva yahireelihiwa mwaha olaleya elabo emodha obe olaleya ni ewogelo emodha (Osugwe ddima 10-12) *

10. 2 Timóteo 4:2 ananikongomedha wera ddi?

10 Onalabihedhe avi mudhidhi wa murenddele? (Omwileri 2 Timóteo 4:2.) Onoonamo avi wiyegeredha wi we obe muthu mmodha vemudhini vawo awenjhedhedhe mabasaye oolaleya, ninga okala piyonero? Ola kahiyo mudhidhi wothuwathuwela dhoorela, dhithu dhendha kannathukule nafwanyiwa mahoso manddimuwa. — Pro. 11:4; Mat. 6:31-33; 1 João 2:15-17.

11. Anamalaleya owinjhiva ethu baani eneriwana wihina yalaleye athu?

11 Anamalaleya owinjhiva enoohudhera ewogelo exa, wihina elabihedhe mmalaleyelo yahudhihaga athu. Nikuru na Yehova ninawakavihera alobwana ni ahiyana ala, wodhela wasasanya malivuru a dhiwogelo dhowinjhiva. Motajhiha, yaka ya 2010, nowasasanya malivuru a dhiwogelo owakwana 500, peeno nnowasasanya malivuru a dhiwogelo okwaranya 1 000.

12. Ekalele ddi yapama athu ovuruwana muthenga dhomwene ni ewogelo yewa yobaliwana? Owoge yotajhiha.

12 Makalelo athu eniwiwa muthenga dhapama ni ewogelo yewa enooligana yiiwa ni ewogelo ehili yewa? Yotajhiha ya murogola mmodha adhowile okongeresuni wa murudda yawogiwa ewogelo enithaniwa Memphis, o Tennessee, elabo yo EUA. Ewogelo yaye enithaniwa kinyaruwanda, enawogiwa sidadi yo Ruanda República Democrática do Congo o Uganda. Kongeresu ole awogiwe ni ewogelo yiiwa murogola ola. Kongeresu agavirile, murogola ola wera: “dhihivira yaka 17 gikalaga o Estados Unidos wewuno, mbwenye ela dila yoroma kongeresu anagikoliye.” Mohanganyedha, murogola ola ahikumiha mitori mwaha wiwa mutugumano ole ni ewogelo yaye. Akala onowedha, ononamo avi wilibihedhe wi ohudhere ewogelo exa? Podi wera murudda onakaliwe ehikalawo athu enafuna owoga ewogelo yewa. Eyo podi wukavihera ohudhera ewogelo exa? Ebaribari wi kahi yokweya, mbwenye wilibihedha fwapama!

13. Addibilihu elabo yo Rússia yaalabihedhe avi mudhidhi wa murenddele?

13 Kahiyo addibilihu atene enna ofuru woolaleya. Murudda dhimodha anamathonga enowadeliha mabasihu oolaleya. Motajhiha, kawubuwele addibilihu o Rússia. Dhahivira yaka dhowinjhivadhene aliwa eharahariwaga, mbwenye aliwa okanna ofuru woolaleya março a 1991. Mudhidhi yole yahikalawo anamalaleya owakwana 16 000 elabo yo Rússia. Dhigavirile Yaka 20 numero naanamalaleya wenjhedhedheya ofiya 160 000! Enowoneya wi addibilihu yahipatha ofuru wa mudhidhi wa murenddele wihina elaleye. Mudhidhi ole wa murenddele kuwagonedhe. Mbwenye osadduwa wa mudhidhiya kuwakwerebeyihe. Aliwa ennodhowave emulabelaga Yehova ni enolabihedha makalelo eliwo.

MUDHIDHI WA MURENDDELE KUNAGONEDHE

Mwene Aza agalobele ni nroromelo, Yehova waavaha akudda Juda ogonjhiha wodhela watolosa mbwabwadda ni mbwabwadda waatoropa (Osugwe ddima 14-15)

14-15. Yehova amukavihere addi Aza alabihedhaga kopolo dhaye?

14 Mudhidhi wa Aza, murenddele wahigomawo. Mbwabwadda wa atoropa waadhele owetiyopiya. Namasogolela ithaniwa Zera, ahikanna nroromelo wihina yere waagonjhiha akudda Juda. Mbwenye mwene Aza, kaaroromela manumero, mbwenye oomuroromela Yehova Mulugu aye. Aza olobela: ‘Munikavihere, Yehova, Mulugu ehu, mwaha wi iyo nnowuroromelani nyu ni ndina nenyu ni nidhele wi niwane ni muthithi ola.’— 2 Cró. 14:11.

15 Podive anyakoddo Owetiyopiya egali mbwabwadda ni mbwabwadda, Aza oororomela wi Yehova ere werana ethu siithu wihina akavihere nlogo naye. Teto Yehova kamukwerebeyihe Aza, akudda etiyopi yahigujhuliwa. — 2 Cró. 14:8-13.

16. Nnone addi wi mudhidhi wa murenddele kunaagonele?

16 Kannonile makathamiho baani enanfwanye kadda muthu osogolo. Mbwenye ethu nnonilihu sowi, mudhidhi wa murenddele wa nlogo na Yehova Mulugu kunaagonele. Mwebaribarene, Yesu ahiwoga wi anamahara aye yere ‘otabusiwa ni malogo matene.’ (Mat. 24:9) Teto murumiwi Pawulo ahiwoga wi ‘atene ale enaafunege omuhagalaliha Mulugu, emuharaga Yesu, enerege oharahariwa.’ (2 Tim. 3:12) Saddana ohukanna ‘owali’. Wakale obwaalu wehu wi kannafwanyiye makathamiho. — Apo. 12:12.

17. Yoweha ya nroromelo enanifwanye siivi?

17 Mohilegela, iyo atene nnere wehiwa. Elabo yatene enere ofwanyiwa ‘mahoso manlubale, ehinakalegewo wambela vipaddusiwe elabo ofiyedha peeno.’ (Mat. 24:21) Podi wera mudhidhi yoyo, amudhihu enere oniidda, teto mabasihu oolaleleya enere okoddihiwa. (Mat. 10:35, 36) Yothoma yawo enakale eevi? Ninga Aza, onere ororomela nikavihero ni obarela wa Yehova.

18. Ninga munawogela Hebreus 10:38, 39, enaanikavihere ddi wiyegeredha wa ele enaapadduwe osogolo?

18 Yehova annonegeredha mwaha wa ele enaadhe osogolo. Oliye annomusogolela ‘mudhari oororomeleya ni athotho’ wihina anivahe dhoojha dhomuzimuni ‘mudhidhi wofwanelela’. Mowindo, iyo podi odhowa nimulabelaga Mulugu. (Mat. 24:45) Mbwenye enohoweleya iyo nerena epaddi yehu. Enohoweleya nerana ethu-siithu wihina nlibihe nroromelo nehu ni Yehova. — Omwileri Hebreus 10:38, 39.

19-20. Ninga anawogiye 1 Crónicas 28:9, makoho baani enahoweleya wikoha, ki mwahaya bwaddi?

19 Ninga mwene Aza enohoweleya ‘nandane ni Yehova.’ (2 Cró. 14:4; 15:1, 2) Thalo yooroma fumunona Yehova ni obaddiziwa. Nipathe ofuru ninihunna wihina nlibihe odhivela wehu ni Yehova. Wihina ononne makalelo baani oriwe, wikohe: ‘ginootugumana malabo matene? Mwaha wi omutugumanoni nnokanna kopolo wihina nidhowegeve nimulabelaga Yehova, nnolibihiwa ni addibilihu ammuroromeloni. (Mat. 11:28) Makoho mamodha enahoweleya wawerana baala, ‘Ginoomuhudhera Bibliya kadda labo? Akala ohukanna emudhi, onowerana ohudhera wemudhi sumana dhatedhene? Akala onakala meeka, onopatha mudhidhi wihina ohudhere Bibliya ninga dhimudhi dhinneriwana? Onowilibihedha mmabasani oolaleya?’

20 Mwahaya bwaddi edhe ekalege yapama wawerana makoho ala? Bibliya onawoga wi Yehova onopendda yubuwelo yehu ni murima wehu, bumwahaya enohoweleya werana emodhave. (Omwileri 1 Crónicas 28:9.) Woona wi enohoweleya osaddula yoluba yawo, dhowera dhawo ni mubuwelo wawo, omulobe Yehova wihina ukavihere. Ola mudhidhi wowiyegeredha wodhela dhoweha dhinaanifwanye osogolo. Kuhiye ethu-siithu yuyelelihe okanna thotho mudhidhi wa murenddele.

JHIBO 62 O novo cântico

^ paragarafu 5 Ohukanna ofuru oomwebedha Yehova elabo yawo? Akala wakule hee, onopatha ofuru ola onniwena? Onolabihedha pamadhene mudhidhi ola wa murenddele? Yohudhera ela enere woniha makalelo onafuniwe omutajhiha mwene Aza Oojuda ni makiristawu akale. Aliwa yahinona olabihedha pama mudhidhi wa murenddele.

^ paragarafu 3 WONELAMO: Yawogiwaga madhu owi “murenddele”, kinaagiwana ohukalawo koddo baahi, ni Ebarayiku madhu ala enatapulela okanna egumi yapama, okala obareleya ni okala ohuthuwathuwa.

^ paragarafu 57 YOTAPULELA YA FOTU eri EPADDI: Mwene Aza ahakitiha avwaye vampaddoni, mwaha wi avwaye yotetedha webedha wowoota. Anamakavihera a Aza oororomeleya yoomutajhiha opwesa dhikwamuthu.

^ paragarafu 59 YOTAPULELA YA FOTU eri EPADDI: Mulobwana ni mwariye enokweyiha egumiwa, wihina yalabe mburo enahoweleya anamalaleya oomwene.