1-2. Ninga anawoga 1 Timóteo 6:20, Timotiyu avahedhiwe ddi?

NIHIKANNA elemelelo yowahiyedha athu amodha wihina esamalelege dhithu dha thima vamburoni vehu. Motajhiha, owinjhiva wa iyo nnakoya korowa mbanko. Iyo nnubuwela wi dhinokoyeya pama, kadhiniyiwe newene kadhinarimele. Mowindo, iyo nihinona enatapulela ddi omuthomela muthu wihina akoye ethu yathima vamburoni vehu.

² Omwileri 1 Timóteo 6:20. Murumiwi Pawulo ahimubusedha Timotiyu wi oliye ahivahiwa ethu yathima, enonelo yapama wodhela ele Mulugu anafuniye wawerela athu velaboni yavati. Teto Timotiyu ahivahiwa mabasa ‘oolaleya madhu’ ni ‘wapara mabasa oolaleya muthenga dhapama.’ (2 Tim. 4:2, 5) Bumwahaya Pawulo adhe amukongomedhege Timotiyu okoya ele avahedheliwiye. Ninga eriliyena ni Timotiyu Yehova ohunivahedhela dhithu dhathima. Dhithu baani? Ki nnakoye ni makalelo baani dhorela nda Yehova anivahiliye?

3-4. Dhithu baani eneriha ebaribari okala yathima?

³ Ni opama waye Yehova ononivaha enonelo yowakwanela yeebaribari yofuneya eli mmadhuni mwaaye ali Bibliya. Ebaribari ndha sofuneya mwaha enonaddela makalelo nnafunihu wandana ni Yehova ni enonitonyihedha ethu baani enadhana ohagalala mwigumini. Narumedha ebaribari ela ni nakalagawo neragana ndhe nnahudherihu mwibaribarini muna nnofwanya woobowa. Nnohiya okala adhari a wowebedha wowoota ni wawerana mararuwo. — 1 Cor. 6:9-11.

 ⁴ Ethu emodha eneriha ebaribari yamBibliyani okala yathima sowi, Yehova anamukavihera wonelamo ole ali owiyeviha ni anna ‘efunelo yapama.’ (Atos 13:48) Athu ala enorumedha nikuru Yehova analabihedhiye peeno wihina elaleye ebaribari. (Mat. 11:25; 24:45) Yekihu kannaawedhe ohudhera ebaribari ela, teto mwilaboni muna kavo ethu yathima okwaranya ebaribari ela. — Pro. 3:13, 15.

5. Dhithu dhimodha Yehova anivahiliye siivi?

⁵ Yehova ohunivaha oneti wowahudhiha athu amodha odhela oliye ni ele anafuniye werana. (Mat. 24:14) Muthenga nnalaleyihu bwathima. Onowakavihera athu witaganyihedha mwimudhini ya Yehova ni onowavaha ejhehedho yokalawo malabo matene. (1 Tim. 4:16) Ethu si ethu nnandihu werana mmalaleyelo, vang’ono obe wowinjhiva, atene nnowapara mabasa athima enapariwa peeno. (1 Tim. 2:3, 4) Mohanganyedha, olaba ni Mulugu oneti munlubale.— 1 Cor. 3:9.

6. Ethu baani yaapadduwela makiristawu amodha yahiyile okala txenjhewa?

⁶ Makiristawu amodha yaliwo mudhidhi wa Timotiyu, yahahiya ovaha thima mabasa oolaba ni Mulugu. Motajhiha, Demas oodhivela elabo bumwahaya adhe ahiyege olaba ni Pawulo. (2 Tim. 4:10) Fijelu ni Hermojeni yahahiya mabasiwa yovaga wi yere otabusiwa ninga Pawulo. (2 Tim. 1:15) Himenewu, Alexandire ni Filetu aliwa yoova opokihiwa mwaha wa yeyo ohiya ebaribari. (1 Tim. 1:19, 20; 2 Tim. 2:16-18) Podi wera addibila atene ala yaali owithwelavo omuzimuni, mbwenye oyelela ele yaali yathima.

7. Murako baani Saddana analabihedhiye wihina anihihe ebaribari?

⁷ Peeno Saddana anafuna wi iyo nihiye dhorela dhinivahile Yehova. Murako baani oliye analabihedhiye? Woroma, Saddana onolabihedha internet ni waredha. Alabihedhaga dhithu dhenda, oliye onoononiha mubuwelo ni dhithu dhinaanithukulele ohiya ebaribari. murako wanabili, fuwoova. Saddana onowalabihedha ale nnasuzihuna obe nnalabihunna omabasani wihina eniteyege, obe eniharaharege wihina enihihe olaleya. Wanatharu ovanyihiwa muthenga nnalaleyihu. Saddana onowalabihedha ale enonile ebaribari enoohiya vano eniwogaga obure. Teto oliye onoxixa oninyegetha alabihedhaga dhithu ‘dhowoota dhinithaniwa enonelo’ aliwa enavuwihiwa ejheehaga wi iyo nihiye ebaribari. — 1 Tim. 6:20, 21.

8. Ohudhere ddi ni ele empadduwele ddibila Daniel?

⁸ Nahikala pasope, iyo podi oroma ohiya vang’ono vang’ono ebaribari. Kasugwa  empadduwele Daniel, * oliye oodhiveliwa ojogari jogo dha mwinternetini. Oliye onosoriha egi: “Giromile ojogari nganna yaka 10. Omaromo, goona wi jogo ndha kamwali yabure. Vasogolova miyo wambela ojogari jogo dha makofi ni dhamakanga.” Nuuvira mudhidhi, Daniel obajha ononga mawora owakwana 15 kadda labo ajogarigi jogo dhendha dha mwinternetini. Oliye onowogave egi: “Mmurimani mwaga gahinona wi mudhidhi ganongimi gijogarigi, ni mukalelo a jogoya gajogarimi wera ogilapeliha vang’ono vang’ono ni Yehova. Mbwenye murimaga kuwapwatha yeyo. Miyo gonelamo wihina dholaga dha mBibliyani kadhana mabasa mwigumini mwaga.” Eyo podi opadduwa ni iyo atene. Dhithu dhowaredhana podi ovolowela mubuwelelo wehu nimakalelo ohoneya ofiyedha iyo ohiya ebaribari vang,ono vang’ono. Eyo yapadduwa podi wera nnoyelela dhithu dhathima ananivaha Yehova.

9. Ninga munawogela 1 Timóteo 1:18, 19, Pawulo amuladdanihe Timotiyu nnani?

⁹ Omwileri 1 Timóteo 1:18, 19. Pawulo ahimuladdaniha Timotiyu ni mutoropa, vano oliye omukongomedha wera: ‘odhowegeve owanaga goddo.’ Koddo ela kiyaali yomaningoni, mbwenye yaali yomuzimuni. Ki wiwanana baani orivo wodhela anyakoddo ni makiristawu? Dhikalelo baani anyakoddo a Kiristu enahoweliwa okanna? Nnafuna none dhithu tanu dhinanihudhiha nladdaniho na Pawulo. Dhithu ndho dhinere onikavihera ohiddela pamadhene ebaribari.

10. Ororomeleya wa Mulugu enatapulela ddi, ki mwahaya bwaddi nigahowela?

¹⁰ Okale ororomeleya wa Mulugu. Mutoropa apama dororomeleya. Oliye onowana ni kopolo dhatedhene wihina ambarele ole anamudhiveliye obe abarele ethu anonniye wi sathima vamentoni vaye. Pawulo ahimukongomedha Timotiyu wihina akale ororomeleya wa Mulugu obe ahimusukume Yehova. (1 Tim. 4:7) Odhivela wehu ni Mulugu wunnuwa efunelo yehu yohiddeela pamadhene ebaribari enere wunnuwa. — 1 Tim. 4:8-10; 6:6.

11. Mwahaya bwaddi egahoweleyaga okala ooleleya?

¹¹ Okale ooleleya. Mutoropa afunaga okala owiyegeredhene enohoweleya okala oleleya. Timotiyu aali owiyegeredhene omuzimuni mwaha oliye oohara dholaga dhatedhene addeliwiye ni Pawulo: Oliye oorabela okalela munigwa dhithu dhabure, owilibihedha okanna dhikalelo dheekiristawu ni ahandana ni addibila amunroromeloni. (2 Tim. 2:22) Wa epaddi yaye oliye ohowela okala oleleya. Eyo enopadduwa ni iyo atene. Enohoweleya okala ooleleya wihina nigonjhihe munigwa dhabure. (Rom. 7:21-25) Enohoweleya oleleya wihina nithukule emuthu yakale vano niware emuthu exa. (Efé. 4:22, 24) Enohoweleya nikalele oleleya wihina okukumuwa wa kadda labo ohunihihe odhowa omutugumanoni. — Heb. 10:24, 25.

12. Nnande addi omulabana pama Bibliya?

¹² Mutoropa onohowela wixagiha makalelo oolabana futhi dhaye. Enohoweleya oliye eeregena yeyo malabo matene wihina akovelele. Ni makalelo mamodhave, enohoweleya okovelela makalelo oolabihedha Bibliya. (2 Tim. 2:15) Makalelo mamodha iyo nahudhera omutugumanoni. Mbwenye naafunaga wawonelihamo athu amodha Bibliya, enohoweleya omusuza malabo matene. Enohowela omulabihedha Bibliya wihina nlibihe nroromelo nehu. Eyo kinatapulela omwileri baahi Bibliya, enohoweleya opendda ndhe nilerihu ni oveda mmalivuruni mwehu, nerana ndo nnere wonelamo pamadhene dhinawoga dholebela  ni olabihedha mwigumini mwehu. (1 Tim. 4:13-15) Nerana yeyo, nnere wanda olabihedha madhu a Mulugu wihina naasuzihe athu amodha. Wihina naande wahudhiha athu ebaribari kahiyo wawilerela baahi athu versu, enohoweleya naatapulelemo enawoga yolebela eyo ni makalelo enalabihedhiwa mwigumini mwewa. Nalemela omusuza Bibliya yekihu, nnere okala anamahudhiha apama a madhu a Mulugu. —2 Tim. 3:16, 17.

13. Ninga anawoga Hebreus 5:14, mwahaya bwaddi egahoweleya wonelamo pama?

¹³ Wonelegemo pama. Mutoropa apama enohoweleya akale owonelamo pama wi ela sowopiha wihina arabele. Nihiyowa enohoweleya wonelamo dhithu dhinanitotele obure ni werana ethu-sithu wihina nirabele. (Pro. 22:3; omwileri Hebreus 5:14.) Motajhiha Enohoweleya osakula pama dhowaredhana dhehu. Filime dhowinjhiva ni porogarama a mutelivizawu dhinoniha dhithu dhamararuwo. Dhithu dhendho dhinomutakalela Mulugu. Vigoneele vihigoneele, dhinere odhana makathamiho. Mowindo, nirabele dhithu dhowaredhana dhinanithukulela oniyeleliha wandana wehu ni Mulugu. — Efé. 5:5, 6.

14. Wonelamo pama wamukavihera addi Daniel?

¹⁴ Daniel awogiwe mundduli ahonelamo wi ojogari jogo dha mwinternetini, dhovahana makofi ni dhamakanga waali muladdu. Vano oliye osayela mu Watchtower Library muselu wodhela makalelo ala owaredha. Yoneyilevo yaali ddi? Oliye oselela ojogari jogo dha mwinternetini dhovahana makofi. Odhowa othiimihamo jogu ndhe teto ogwadda wandana anniyena ni anamajogari amodha. Daniel anawoga: “Ohiya ojogarigi jogo dha mwinternetini miyo wawambela mabasa olapela ni vaade, teto miyo waredhaga ni addibila ammulogoni.” Peeno Daniel piyonero ni namaholela mulogo.

15. Mwahaya bwaddi thalako dhowoota sowopiha?

¹⁵ Ninga Timotiyu, iyo nnohowela wonelamo wi muselu ndha sabure dhinavuwihiwa naale ehiyile ebaribari vano enaniwoga obure. (1 Tim. 4:1, 7; 2 Tim. 2:16) Motajhiha, aliwa podi ovuwiha muselu dhihili dhebaribari wodhela addibilihu, obe enivahege wanganyedha wodhela mulogo wa Yehova. Dhovuwiha dhendha dhowoota podi onivolowela. Nikale pasope wihina nnanyengethiwe naaliwa. Mwahaya bwaddi? Mwahaya bowi, muselu  ndha dhinavuwihiwa ni ‘athu enna mubuwelo wohikala pama ni eli wolapela ni ebaribari’ yoluba yewa ‘fuutota okangana ni ovanyihana.’ (1 Tim. 6:4, 5) Aliwa enafuna wi nrumedhe woota wewa ni, niharoromelege addibila.

16. Dhithu baani dhinaanipupuruse?

¹⁶ Kahiyo opupuruwa. Mwaha wookala ‘mutoropa apama a Yesu Kiristu’ yohoweleya Timotiyu iimelena txithi mabasa aye oolaleya. Kiyahoweleya oliye wahiya mabasaye mwaha wa korowa ni dhithu dhimodha. (2 Tim. 2:3, 4) Ninga Timotiyu kahiyo weenya munigwa wokanna dhoorela dhinipupuruse. ‘Kopolo dhowoota dhinna dhoorela’ podi ogujhula odhivela wehu ni Yehova vamodha ni madhu aye. Podi okwerebeyiha efunelo yowalaleya athu amodha. (Mat. 13:22) Bumwahaya, enohoweleya othukula egumi yowezeya ni olabihedha mudhidhi wehu ni kopolo dhehu wihina ‘nididele waaja omwene.’ — Mat. 6:22-25, 33.

17-18. Ethu baani enahoweleya werana wihina nibarele ekalelo yehu yomuzimuni?

¹⁷ Okale owiyegeredhene wihina waguve werana ethu-sithu. Mutoropa onohowela wiyegeredha mowaguva. Naafunaga obarela ele enivahile Yehova, enohoweleya werana ethu-sithu mowaguva yakumelela ethu yowopiha. Enaanikavihere ddiniyani werana ethu-sithu mowaguva? Enohoweleya onona kale ethu nnafunihu werana nafwanyiwa othusiwa.

¹⁸ Nladdaniho: muthupo dhimodha, aliba enadhowa woona, enotonyihedhiwa mburo woovira waddamele vale ekaratiliwa. Mwahaya bwaddi? Mwahaya bowi, yakumelelavo rurumusa, atene enere owedha othawa mburo yole. Ni makalelo mamodhave, iyo podi wixagiha ethu baani nnafunihu werana noonaga TV obe naamulabihedhaga interneti vano morurumusa okumelelawo ethu yowopiha, ninga fotu ya mararuwo, obe vidiyu enoniha athu ewanaga, dhowoga dhaathu ehiyile ebaribari ni enaniwoga obure. Iyo niyegeredha mutaneene nnere wanda werana ethu-sithu mowaguva. Nnere obarela ekalelo yehu yomuzimuni, teto nnere okala ootxena vamentoni va Yehova. — Sal. 101:3; 1 Tim. 4:12.

19. Mareeliho baani nnawakelihu nabarela dhithu dhathima Yehova anivahiliye?

¹⁹ Iyo nisamalele dhithu dhathima Yehova anivahiliye, ninga ebaribari eli mBibliyani ni oneti ninihunna wowahudhiha athu amodha. Nerana ndo nnere okanna dhithu dhowinjhiva dhapama ninga: Mubuwelo wohinyemela ni egumi yodhuwanyeya, ohagalala mwaha wakavihera athu omunona Yehova. Kuwanganyedhe wi nnikavihero na Yehova we onere oganyari ndhe uvahiliye. — 1 Tim. 6:12, 19.