1. Athu amodha enakala avi ole enamodhiveliwa ahiya omulabela Yehova?

OHUKANNA mmudhaawo obe mukwawo atxosiwe mmulogoni? Eyo yapadduwa enowukuula! Murogola anithaniwa Hilda, onosoriha egi: “Mamunaga nitelanihu yaka 41 mundduli nuukwa, miyo gubuwela wihina ela yaali ethu yathabwile ogukuula. * Mbwenye mwanaga nuuhiya omulabela Yehova, nuwaanyanyala amudhaaye eyo yahithabwa ogukuula opitha okwa wa mamunaga.”

2-3. Mowiwanana ni Salmos 78:40, 41, Yehova anakala avi adharaaye yahiya omulabela?

² Kubuwela makalelo ukuwe Yehova, angero ahima emudhi yaye numusadduwela. (Judas 6) Teto kubuwela makalelo ukuwe Yehova amwaana Ezarayeli nlogo adhiveliye numusadduwela dila dhowinjhivadhene. (Omwileri Salmos 78:40, 41.) Okanne ebaribari wihina mukwawo obe mmudhaawo ahiya omulabela Yehova oliye anowukuwa vamlubale. Babihu oodhivela, oodhulu, onowonelamo opa onafwanyiwiwe. Nimakalelo apama Yehova anere wukavihera ni anere wulibiha mwamakalelo onahoweliwe.

³ Yohudhera ela nnere woona ethu nnahowelihu werana wihina naakele nikavihero na Yehova. Namala nnere woona makalelo owakavihera addibilihu mmulogoni enafwanyiwa makathamiho yala. Mbwenye nihinathi nnafuna none mubuwelo baani wabure nihinafunihu okanna.

4. Ababi owinjhiva enakala avi mwaniwa ahiya omulabela Yehova?

⁴ Mwaana, ababi enamudhiveliwa ahiya omulabela Yehova aliwa enowikoha egi: Ethu baani gahowelimi werana wihina  mwanaga akaleve mwibaribarini. Ddibila Lucas mwaanaye nuutxosiwa oliye ahisoriha egi: “Miyo gowivaha nibili, mubuwelo woginyemela. Malabo mamodha gowunla ni murima wogipa.” Elisabeti murogola afwanyiwe makathamiho mamodhave malabo owinjhivene owikoha: “Giviriganihe vaavi akwaga? Podi wera kagilibihedhe wihina gimuhudhihe ebaribari mwanaga.”

5. Muthu ahiya omulabela Yehova, nibilina thawani?

⁵ Iyo nnohowela wubuwela wihina Yehova ohunvaha kadda muthu wa iyo ofuru wosakula. Eyo enatonyihedha wi kadda muthu wa iyo, podi osakula akala anofuna omulabela Yehova obe naari. Motajhiha, azombwe amodha eleliwe murala ababiwa ehiliwa makiristawu. Mbwenye aliwa ehisakula omulabela Yehova. Ehikalawo azombwe amodha, eleliwe ni makolo ewa eli makiristawu. Yilibihedha vamlubale walela ni dholaga dha mBibliyani. Mbwenye aliwa kifunne omulabela Yehova. Eyo enanihudhiha ddi? Enanihudhiha wi kadda muthu wa iyo, vilegele obe vihilegele, anere othoma akala anere omulabela Yehova obe naari. (Jos. 24:15) Bumwahaya akala oli babi obe oli mayi, ni ohuukuwa mwaha mwanawo ohiya omulabela Yehova, wubuwele wi kunna nibili. Ni enohoweleya owanena mubuwelo ola wabure.

6. Mwana-muzombwe anakala avi makolo aye yahiya omulabela Mulugu?

⁶ Malabo mamodha babi podi ohiya omulabela Yehova, ni waanyanyala amudhaaye. (Sal. 27:10) Eyo yapadduwa enowawitha mwiili ahima. Mwaha wi aliwa enona mweddelo waababi wihina esakule omulabela Yehova. Ester awoonale ababe emunyanyalaga Yehova anowoga egi: “Malabo mamodha miyo gowunla mwaha ababa yohiya vang’ono-vang’ono ebaribari. Aliwa yerilena yothoma ela pudhave. Miyo ginowadhivela ababa bumwahaya aliwa nuutxosiwa eyo yahigithuwathuwiha. Mwaha wi ginowafunana opama.”

7. Muzombwe, ababe obe amaye yatxosiwa Yehova anakala avi?

⁷ Azombwe akala babinyu obe mayinyu ere otxosiwa, mukanne ebaribari wi iyo nnowukubanyedhani! Teto mukanne ebaribari wihina Yehova anowoona opa weenyu. Oliye anowudhivelani ni anovaha thima ororomeleya weenyu. Nihiyowa addibilinyu a munroromeloni, nnowudhivelani vanlubale. Ohiya eyo wubuwele wihina yothoma yerilena ababo obe amawo, we kunna nibili. Ninga nonilihu mundduli, Yehova ohunivaha ofuru wosakula. Kadda muthu wa iyo, iipeleke mmadani mwa Yehova ni abaddiziwe ‘anaathukule mutholo waye.’​—Gál. 6:5, nota.

8. Omujhehaga mmudhaawo atxosiwe wihina ahogolowele omulabela Yehova ethu baani onafuniwe werana? (Osugwe kwaduru “ Omuhogolowele Yehova.”)

⁸ Muthu onamudhiveliwe atxosiwa, kahi yabure okanna ejhehedho wi oliye anere ohogolowela omulabela Yehova. Akala eyo ehupadduwela onere ddi? Sapama olibiha epaddi yawo yomuzimuni. Werana yeyo onere wawoniha amudhawo ehanle ni we mmulabelaga Yehova, nuule atxosiwe, wihina ori yotajhiha yapama. Teto onere wakele kopolo dhinahoweliwe wihina owanena mubuwelo wabure. Nnafuna noone dhithu baani onahoweliwe werana ovanene.

9. Enahoweleya were ddi, wihina wakele kopolo dhinadhela wa Yehova? (Osugwe kwaduru “ Dholebela dhinukavihere muthu onamudhiveliwe ahiya omwebedha Yehova.”)

⁹ Odidele wapara mabasa oomuzimuni. Kuhiye owaraliha nroromelo nawo ni namudhawo. Onande addi? Okanne elemelelo yapama yomwileri Bibliya, opendda ndhe onileriwe ni odhowa omutugumanoni. Eyo enere wukavihera wakela kopolo dha Yehova. Murogola anithaniwa Jowana ababe ni ddibile etxosiwe anowoga egi: “Miyo ginakala opwaseyene gilerigi dhopadduwa dha mBibliyani ninga dha Abigayili, Estere, Jo, Juze ni Yesu. Dhopadduwa ndha dhinokurumusa murimaga. Teto kaginadduwala jhibo dha vidiyu dhinadha mu site jw.org, gavuruwanaga dhinogihagalasa ni dhinogilibiha.”

10. Wukuuwa, Salmos 32:6-8 anukongomedha wera ddi?

¹⁰ Wukuuwa, omwaaddele Yehova dhithu dhinupadduwela. Teto kujhombele olobela. Omulobe Yehova wihina ukavihere woona dhithu dhinupadduwela ninga oliye anoneliye. Ni omulobe Yehova wihina ‘uvahe enonelo ni uxagihe mu dila onaafunegiwe weddagamo.’ (Omwileri Salmos 32:6-8.) Ebaribari wihina kinuukweyele omwaddela Yehova makalelo oriwe. Mbwenye okanne ebaribari wihina oliye anowoona opa wawo. Oliye anowuudhivela ni anowukongomedha wihina ompigireyelege malabo amatene.​—Êxo. 34:6; Sal. 62:7, 8.

11. Mowiwanana ni Hebreus 12:11, Yehova amusinyusaga muthu, mwahaya bwaddi sapama ohuvanyiha? (Osugwe kwaduru “ Otxosiwa makalelo a Yehova owoniha odhivela waye ni ole anamusumululiye.”)

¹¹ Okavihere yothoma ya anamaholela mulogo. Otxosiwa masasanyedho a Yehova. Makalelo apama oomukavihera ole erilena yothega ni wokavihera mulogo watene. (Omwileri  Hebreus 12:11.) Podi wera we onomwiiwaga muthu awogaga obure anamaholela mulogo egihina: “Kiwogile pama muladdu ole, kiyamutxose muthu ole.” Mbwenye okanne ebaribari wihina muthu yoyo anawoga obure anamaholela mulogo, kanadhiveliwa owoga yothega erilena muthu ole. Mbwenye ebaribariya sowi iyo kannone dhithu dhatedhene erilena muthu ole. Mbwenye anamaholela mulogo ehinona ni ehiilibihera wahara malagano a mBibliyani wihina ethonge muladdu ole mwamakalelo a Yehova.​—2 Cró. 19:6.

12. Mareeliho baani yawakele athu amodha mwaha ohuvanyiha osinyusa wa Yehova?

¹² Iyo nahivanyiha yothoma yanamaholela mulogo nnere omukavihera muthu ole atxosiwe, omuhogolowela Yehova. Elizabeti, nimuwogilihu mundduli anowoga egi: “Ohuthapanya ni mwanaga aatxosiwe, anonile othoma yapama ni yabure kiyaali yokweya. Mbwenye oliye nuhogolowa ahiwoga wi ohowela osinyusa wa Yehova. Mudhidhi nuuvira oliye ohudhera dhithu dhathima. Eyo enogikavihera woona wi osinyusa wa Yehova, winohoweleya.” Mark, mamune Elizabeti anowoga egi: “Mwanaga nuhogolowa, mudhidhi nuuvira, oliye ohusoriha egi: Iyo naherana ethu yapama mwaha ohara dholaga dha mBibliyani. Miyo ginomutamalela Yehova mwaha onikavihera omwiwelela.”

13. Enuukavihere ddi mmudhaawo atxosiwa?

¹³ Othapanye naakwawo enonne enupadduwela. Wandana naaddibila owithwelavo omuzimuni, enere wukavihera okanna mubuwelo wapama. (Pro. 12:25; 17:17) Jowana, nimuwogilihu mundduli anowoga egi: “Mmurimani mwaga gafunesa okala meeka baahi. Mbwenye gaathapanyaga naakwaga ginaroromelimi gokala ootapuwene.” Ki akala ddibila mmulogoni ohuwoga ethu enathabwa wukwerebehiya?

14. Mwahaya bwaddi nigahowela ‘odhowaganave nivilelagana mmodha ni mukwaye nlevelelanaga mmodha ni mukwaye mohihiyedhedha’?

¹⁴ Wandana ovilela. Bumwahaya naavilelagana addibilihu amunroromeloni. Mwaha malabo mamodha aliwa podi owoga ethu yonipiha mbani. (Tia. 3:2) Bumwahaya kutikine muthu awoga ethu enuupihe mbani. Wubuwele yolaga anivahile murumiwi Pawulo enihina: ‘Mudhowegenave nvilelanaga mmodha ni mukwaye mulevelelanaga mmodha ni mukwaye mohihiyedhedha.’ (Col. 3:13) Murogola dhala anna mmudhaye atxosiwe onowoga egi: “Addibila amodha nuwoga ethu yogipiha mbani, Yehova ahigikavihera walevelela.” Ki vano mulogo ethu baani enahoweliwa werana wihina ekavihere emudhi ele yamunroromeloni mmudhiwa atxosiwe?

15. Nnakavihere addi addibila enna mmudhiwa atxosiwe ovanene?

¹⁵ Wandane ni addibila enna mmudhiwa atxosiwe. Murogola anithaniwa Miriam onowoga egi: “Murogolaga nuutxosiwa miyo kagawedha odhowa omutugumanoni mwaha wokwerebeya. Miyo goova wi athu amodha  enadha egiteyege. Mbwenye addibila kayerilena yeyo, aliwa yahigikavihera owanana wukuuwa gannimina. Teto aliwa kiyamuwogile obure murogolaga wodhela ele eriliyena. Mwaha waaddibila yala, miyo kagawannena meeka wukuuwa waaga.” Murogola mmodha anowoga egi: “Mwanihu nuutxosiwa addibilihu oofuneya yahidha onitodola ni onlibiha. Amodha enowoga yegi: iyo nikwile mulagalaga, kaninna yowoga. Mbwenye aliwa yahunla ni miyo ni yahigilibiha, ethu aliwa yeriliwana ehigikavihera vanlubale.”

16. Mulogo onakavihere addi emudhi enna mmudhiwa atxosiwe?

¹⁶ Kuwanyanyale ale nna mmudhiwa atxosiwe. Aliwa enohowela vanlubale odhivela nnikavihero nakadda ddibila. (Heb. 10:24, 25) Malabo mamodha addibila enonyanyala emudhi enna mmudhiwa atxosiwe okalaga ninga emudhi yatene yere otxosiwa. Eyo kahiyo yapama. Thabwathabwa azombwe enna baabiwa obe mayiwa atxosiwe enohowela nikavihero ni otamaleliwa wilibihedha watewene eneriwana. Maria mamune atxosiwe ni adduddumadhe vade anosoriha egi: “Akwaga amodha yodha onipiyela ni onikavihera ohudhera wehu weemudhi. Aliwa ehona widdeliwa waga ni yowunla ni miyo. Athu amodha nubajha oginkedha dhithu gaherilimina aliwa ehigaakihedha. Aliwa ehigilibiha vanlubale!”​—Rom. 12:13, 15.

17. Anamaholela mulogo, ethu baani enahoweliwa werana wihina yalibihe ale enna mmudhiwa atxosiwe?

¹⁷ Anamaholela mulogo, kaanvudhuwena ofuru munninyuna wolibiha nroromelo naale nna mmudhiwa atxosiwe. Nyu muhukanna mutholo munlubale womulibiha kadda ddibila anna mmudhaye ahile omulabela Yehova. (1 Tes. 5:14) Mutugumano dhihinabajhe obe dhamala, mukalege arajhi oroma omulibiha ole anna mmudhaye atxosiwe. Mwaapadege addibila ala ni mulobelege ni aliwa. Mulabege naaliwa mmabasani oolaleya. Dhandeya mwawithanege wihina ekalevo ohudhera weenyu weemudhi. Anamaholela mulogo ehinona wi enohowela wawoniha odhivela, nthebwa ni wavuruwana mambila a Yehova enona goyi.​—1 Tes. 2:7, 8.

18. Mowiwanana ni 2 Pedro 3:9, Mulugu anafuna ddi naale ehile omulabela?

¹⁸ Yehova ‘kanafuna wi muthu di muthu agujhuliwe, mbwenye anafuna wi atene ethwaruwe.’ (Omwileri 2 Ped. 3:9.) Naari muthu agerilena yothega enlubale egumaye sofuneya vamentoni va Mulugu. Bumwahaya Yehova adhe aagulege athu oothega ni muthengo munlubale — egumi ya mwaanaye oofuneya. Nuudhivela winlubale, Yehova anajheha wi muthu ole ahile omulabela amuhogolowele. Oliye anojhehera wihina muthu yole arumedhe nikavihero na Yehova ninga nifwanafwaniho awogile Yesu na mwaana oohiwelela ahogolowele vaade. (Lucas 15:11-32) Athu owinjhiva yahile omulabela Yehova peeno ehihogolowela munikuruni mwaaye. Teto mulogo ohawakela ni malada menddi. Elizabeti, nimuwogilihu mundduli, ohona eyo epadduwaga mwigumini mwaaye. Mwanaye aatxosiwe ohogolowela omulabela Yehova. Oliye anosoriha egi: “Miyo ginowatamalela athu atene egikavihere ohuyelele ejhehero yaaga.”

19. Mwahaya bwaddi enohoweleya omuroromelaga Yehova egumihu yatene?

¹⁹ Nimuroromelege Yehova egumihu yatene. Dhohudhiha dhatedhene ananivaha Yehova dhapamave. Oliye Babi anthebwa, oodhivela ni anowaakavihera ale enamulabela. Okanne ebaribari wihina Yehova kanunyanyale. Wafwanyiwaga makathamiho oorusa Yehova anere wukavihera. (Heb. 13:5, 6) Mark, nimuwogilihu mundduli anowoga egi: “Naafwanyiwaga makathamiho Yehova kadha aninyanyala. Oliye anakala epaddi yehu.” Yehova anerege wuvahave ‘kopolo dhohikala dha masika.’ (2 Cor. 4:7) Bumwahaya okanne ebaribari wihina mmudhaawo ahiya omulabela Mulugu, Yehova anerege wukavihera okala oororomeleya ni okanna ejhehero.