1. Nuuluvalaga, yoluba yehu ekale eevi?

NUULUVALAGA, iyo podi wambela odheliwa woova. Nubuwelaga wihina Yehova kanagilabiherege ninga gaalimi muzombwe. Ebaribari wi nuuluvala kannakanna kopolo ninga naarihu azombwe, mbwenye mudhidhi ohunivaha thotho. Teto nihixagela dhithu dhowinjhiva dhinafwanelela wakaviherena azombwe wihina enone olabihedha kopolo dhinniwana wi yakele mutholo dhixa. Eyo enowiwanana niile asorihe namaholela mmodha egihina: “Nuwona wihina ginna wuluvala, gahihagalala onona wi mmulogoni mwihikala azombwe ofwanelela enahalena mutholo gannimina.”

2. Yohudhera ela nnaasuze ddi?

² Ohudhera ovirile nihisuza mwahaya bwaddi edhe ekalege yapama azombwe wandana ni addibila owuluvala. Yohudhera ela nnere woona dhikalelo nayi dhapama addibila owuluvala enafuniwa otonyihedha. Wiyeviha, onona manddile, otamalela ni okala athu oovaha. Dhikalelo ndha dhinere wakavihera addibila owuluvala olaba vamodha ni azombwe. Eyo enere otxova mulogo watene.

3. Mowiwanana ni Filipenses 2:3,4, wiyeviha ddi? Addibila eri anakalaba enawedhe addi okala owiyeviha?

³ Wihina ewedhe wakavihera azombwe, addibila eri anakalaba enofwanelela ekale owiyeviha. Muthu owiyeviha duule anaavaha thima athu amodha opitha oliye. (Omwileri Filipenses 2:3, 4.) Addibila eri anakala ehikanna makalelo ohiyana-hiyana otonyihedha wiyeviha. Motajhiha, mabasa owinjhiva ammulogoni podi opariwaga ni makalelo ohiyana-hiyana, teto yiwananege niile Bibliya anawogiye ni yeddege pama. Mwanakalaba ari owiyeviha, kanajheha wihina dhithu dhatedhene dheriwegena mwamakalelo ninga oliye eriyena. (Ecl. 7: 10) Naarive exagele dhithu dhowinjhiva dhinahoweleya wawaddela azombwe, addibila owiyeviha eri anakalaba ehinona wihina ‘elabo ela enna osadduwa.’ Bumwahaya, yere okala yapama naaliwaya ohudhera makalelo maxa owapara mabasa.​—1 Cor. 7:31.

4. Anameeddela mulogo, enatonyihedha addi muzimu mmodhave yanna malevita?

⁴ Anakalaba owiyeviha ehinona wihina yathabwaga wuluvala, kinawedhege wapara mabasa ale yaparesiwa egaali azombwe. Kasugwa yotajhiha, anameeddela mulogo ehu yakwaniha yaka 70, aliwa enowithaniwa odhowa waaparaga mabasa mamodha. Ale enarajhihaga olawiha masadduwo yala ehinona wihina kahiyo ethu yokweya, mwaha aliwa yodhiveliwa ofuru yanniwana wowalabela addibila. Odhivela enniwana ni mabasa ala oweeddela mulogo onna otanuwave mmurimani mwewa. Naarive dhigarive ndo, aliwa ehinona wihina mabasa ala enafwanelela wapara baazombwe. Addibila ala oofuneya, enotonyihedha muzimu mmodhave wanna malevita mudhidhi wamwaana Ezarayeli. Aliwa yakwaniha yaka 50, yowahiya mabasa yaparesiwa otabernakulu. Mbwenye ohagalala wamalevita ale yaali anakalaba, kawadhela baahi mwaha wamabasa ale yaparesiwa. Naari dhigarive ndo, aliwa yowarumedha wapara mabasa-bi-mabasa yavahiwiwa ni kopolo dhewa dhatedhene. Ohiya eyo, yowakavihera ale yaari azombwe. (Núm. 8:25, 26) Eyo enowereya naale ehiyile okala anameeddela mulogo. Naarive egahiyile ofuru ola woweddela mulogo ni wowalibiha  addibila, aliwa enooniwa ninga mareeliho manlubale mmulogoni eriwamo peeno.

5. Ohudhere ddi ni yotajhiha yaddibila Dani ni mwariye Katiye?

⁵ Kasugwa yotajhiha ya Dani, alabile ninga nameeddela mulogo yaka dhowakwana 23. Dani nuwakwaniha yaka 70, oliye vamodha ni mwariye Katiye othomiwa ninga mapiyonero avayekiwa. Yawedhile addi wapara mabasa ala maxa yawakenliwa? Dani anihina mabasa ginaparimi peeno ehinjhiva wakwaranya ale gannimina. Oliye onowakwaneliha mutholo dhaye mmulogoni, onowakavihera addibila okala adhaari ookavihera, onowaxagiha addibila amodha owedha olaleya mburo munavira athu vidiga-vidiga, ni olaleya mukambura. Addibila muri anakalaba, podive akala munaapara mabasa amudhidhi wamutene obe naari, nyu podi owedha werana dhithu dhowinjhiva wihina mwakavihere athu amodha. Nimakalelo baani? Mwisaddulege mowiwanana ni mudhidhi murinyu, mukanne dholuba dhixa ni mukalelege ntidi ndhe munawedhinyu ohiya wikubanyaga mwaha wa dhithu muhunawedhinyu.

6. Ekalele ddi yapama wanona manddile ehu? Kawogamo.

⁶ Muthu anonne manddilaye ohunona wi kanakwaniha dhithu dhatedhene. (Pro. 11:2) Mwaha wowanona manddilaye kanawunlela mabasa ahinawedhiye wapara. Mwaha wa yeyo oliye onohagalala ni doviheya ni mabasa. Iyo podi omuliganiha muthu aanone manddilaye ni muliba weddiha karo aagwelelaga mukuma. Wihina awedhe ogwelela mukuma watene, enofwanelela ekemo mudansa mmodhaya, naarive ehoweleyaga ovugula makalelo anathamagihiye, oliye kanawelela mundduli, mbwenye anerege odhowave osogolo. Ni makalelo mamodhave, muthu anonne manddilaye ohunona mudhidhi wofwanelela “ovugula mathamagelo aye” wihina adhowegeve aaparaga mabasa a Yehova.​—Fil. 4:5.

7. Barizilayi atonyihedhile addi wihina ahanona manddilaye?

⁷ Kubuwela yotajhiha ya Barizilayi. Nuwakwaniha yaka 80, mwene Davidi ahimwithana wihina alabege opalasiyu. Mwaha wowanona manddilaye, Barizilayi okoodda ofuru ola aathikeliwiye ni mwene. Oliye ahinona wihina mwaha yaka anniyena, kaawakwanihege mabasa mamodha. Vowindo Barizilayi onvaha zelu mwene Davidi wihina vamburoni vaye asakuliwe muzombwe ithaniwa Kima. (2 Sam. 19:35-37) Ninga Barizilayi, addibila eri anakalaba enohagalala yathomaga azombwe wihina yaparege mabasa mamodha.

8. Mwene Davidi atonyihedhile addi wihina ahanona manddilaye mudhidhi afunesiye omaga tempulu ya Yehova?

⁸ Mwene Davidi di muthu mmodha aanonne manddilaye. Ethu athabwesiye ogana fummagela Yehova tempulu. Mbwenye Yehova omwaddela wihina ofuru ola anakanne di mwanawo, Salomawu. Davidi orumedha mubuwelo wa Yehova ni werana dhatedhene awedhiye wihina aakavihere mabasa ala oomaga tempulu. (1 Cró. 17:4; 22:5) Davidi kubuwele egi: mabasa ala afwanelele wapara dimiyo. Mwaha Salomawu ohuthabwa okala ‘muzombwe ni kanna thotho.’ (1 Cró. 29:1) Davidi ahinona wi yegi mabasa ale yeedde pama yere ohowela nikavihero na Yehova. Ninga Davidi addibila eri anakalaba peeno, naarive mabasa yaparesiwa egamanle osadduliwa, aliwa enna waparave nuuviheya. Teto aliwa kinanganyedha wihina Yehova anere wareliha azombwe enaapara mabasa yaparesiwa.

9. Ddibila akosa epaddi ya nikuru na Komisawu ya Ofiliyale, atonyihedhile addi wihina ahanona manddilaye?

⁹ Yotajhiha yamudhidhi yola nnakalihu enatonyihedha wihina ohaanona manddilaye  saddibila Shigeo. Yaka ya 1976, nuwakwaniha yaka 30, oliye othomiwa wihina akose epaddi ya Komisawu ya Ofiliyale. Teto yaka ya 2004, okala namasogolela a Komisawu ya Ofiliyale. Nuuvira mudhidhi oliye woonelamo wihina kopolo dhinna ovuguwa, vano makalelo alabesiye kahiyo mamodhave ninga eresiye mundduli. Ddibila Shigeo olobela wodhela muselu ole vano wubuwela akala kiyakale yapama muzombwe ahalena mutholo anniyena. Peeno ddibila Shigeo ohuhiya okala namasogolela a Komisawu ya Ofiliyale. Mbwenye oliye anna olabave nuuviheya nnikuru na Komisawu ya Ofiliyale. Ninga nonilihu yotajhiha ya Barizilayi, mwene Davidi ni ya ddibila Shigeo, muthu owiyeviha ni anonne manddilaye kanubuwela wihina addibila ali azombwe kinonne ethu. Mbwenye anasugwege dhithu dhapama eneriwana. Oliye anasugwege addibila ala ninga akwaye analabiyena vamodha ohiya wawonaga ninga amwiddanaaye.​—Pro. 20:29.

10. Addibila eri anakalaba yawonege aavi azombwe ammulogoni?

¹⁰ Anakalaba enawona azombwe ninga nvaho wa Yehova. Ohiya eyo, aliwa enowatamalela azombwe mabasa enapariwa. Kopolo dhewa dhambela ovuguwa, anakalaba enohagalala onona wihina mmulogoni mwihikala azombwe akopolo owivelela enaahale yaparaga mabasa ale.

11. Rute 4:13-16, anatonyihedha addi wihina enofwanelela otamalela nikavihero naazombwe?

¹¹ MBibliyani Nowemi anasorihiwa ninga mwanakalaba aanonne ootamalela. Oliye ahirumedha okaviheriwa ni nzaliyaye Ruti ari muzombwe ompitha Nowemi. Omambelelowene ahimukongomedha Ruti wihina ahogolowele nlogo naaye. Mbwenye Ruti numuwadelela wihina ginerege wuharani Obele, Nowemi orumedha nikavihero nna noororomeleya. (Rute 1:7, 8, 18) Eyo yahadhana  mareeliho waathu yala abili. (Omwileri Rute 4:13-16.) Anakalaba owiyeviha enohara yotajhiha ya Nowemi.

12. Murumiwi Pawulo atonyihedhe addi wihina ahinona otamalela?

¹² Murumiwi Pawulo akaviheriwa ootamalela. Motajhiha, oliye ahatamalela addibila oFilipu nvaho yarumiliwa wihina ofwanye murumiwi Pawulo. (Fil. 4:16) Ohiya eyo, ahimutamalela Timotiyu makalelo amukaviheriye. (Fil. 2:19-22) Teto Pawulo ahimutamalela Mulugu mwaha addibila yadhile omulibiha mudhidhi athukuleliwaga oRoma ninga munyakambura. (Atos 28:15) Murumiwi Pawulo ali muthu ooviheya eeddile makilometuru oolapela wihina alaleye ni alibihe mulogo. Naari dhigarive ndo, oliye kathabwa withukula akalaga ninga muthu ahinafuna okaviheriwa ni addibila amunroromeloni.

13. Anakalaba enawedhe addi watamalela azombwe?

¹³ Akala oli mwanakalaba, onone wihina ehikalawo makalelo ohiyana-hiyana otonyihedha wi onotamalela nikavihero naazombwe ammulogoni. Amodhaya podi wera enowivahedha wihina yuvahege boleya, yugulelege dhithu onahoweliwe obe yuparelege mabasa-bi-mabasa wafuniwe ninga waweregena mbwenye kunawedha. Bumwahaya enofwanelela watamalelege ni orumedhege yaafunaga wukavihera. Woonege nikavihero newa wihina makalelo Yehova anatonyihedhiye wi ohukanna odhivela niwe. Eyo podi wuthukulela okanna wandana wapama ni muthu yole anukavihera. Ohiya eyo wonihege wihina onowatamalela azombwe yunnuwelagavo epaddi yomuzimuni. Wawaddelege wihina onohagalala wawonaga azombwe yeragana dhithu dhowinjhiva mmulogoni. Dhenyeya, wawaddelege dhithu dhapama dhereye mwigumini mwawo ogaali muzombwe. Weragana ndo, eyo enere ‘wuthukulela omutamalela’ Yehova mwaha wa azombwe anawenyiye wihina ekale epaddi ya mulogo waye.​—Col. 3:15; João 6:44; 1 Tes. 5:18.

14. Mwene Davidi atonyihedhe addi wihina aali muthu oovaha?

¹⁴ Yotajhiha ya mwene Davidi enonitonyihedha ekalelo emodha yathima enafwanelela addibila eli anakalaba okanna — okala muthu oovaha. Wihina emagiwe tempulu, Davidi ahivaha muthengo munlubale wa korowa ni dhithu dhimodha akumihiliye. (1 Cró. 22:11-16; 29:3, 4) Oliye aherena ndo naarive aganonne wihina aathabwe ovuwa mwaha woomaga tempulu aakale mwanaye Davidi, Salomawu. Malabo yala a peeno podi wera kaninna ofuru wodhowa okavihera omaga nyumba dhoOmwene munebedhiwa Yehova. Naari dhigarive ndo, iyo podi wakavihera mabasa ala ni dhovelela dhehu mowiwanana ni yele nnaddoddihu. Teto iyo podi wawaddela azombwe dhithu nihudherihu mwigumini mwehu.

15. Dhithu baani dhathima murumiwi Pawulo amwaddeliye Timotiyu?

¹⁵ Nisorihaga muselu ola woovaha, kuubuwela yotajhiha yapama anihiyedhe murumiwi Pawulo. Oliye ahimwithana muzombwe Timotiyu wihina elabege vamodha mabasa oomisiyonariyu. Nimakelelo oovaha, Pawulo omwaddela muzombwe ola makalelo aye oolaleya ni ohudhiha. (Atos 16:1-3) Makalelo Pawulo amuxagihiye Timotiyu yahimuthukulela okala namalaleya apama ni namahudhiha oviheya a muthenga wapama wOmwene. (1 Cor. 4:17) Teto nuwindo Timotiyu, walabihedha makalelo mamodhave wihina aaxagihe athu amodha.

16. Mwahaya bwaddi ddibila Shigeo adhe aaxagihege amodha?

¹⁶ Addibila eri anakalaba kinakubanya waxagiha azombwe yovaga osogolo ohulabihedhiwaga.  Motajhiha, Shigeo ohuvira yaka dhowinjhivadhene aaxagihaga azombwe enakosa epaddi ya Nikuru na Filiyale. Oliye oherana yeyo mwaha ahinona wi mabasa oOmwene elabo anakaviheriye yerege odhowave osogolo. Ki marelihoya ekumelelevo baavi, nufiya mudhidhi wofwanelela wihina asakuliwe muthu mmodha wi akale namasogolela a Nikuru na Komisawu yoFiliyale, ahikalawo ddibila oxagihiwene wihina ahale vamburoni vaye. Ofiyera peeno ddibila Shigeo anna waxagihave azombwe amodha ni dhithu dhihudheriye muwari mwa yaka 45 amanliye akosaga epaddi ya Nikuru na Komisawu yoFiliyale. Addibila ninga Shigeo, mareeliho a nikuru naatene na Mulugu.

17. Mowiwanana ni Lucas 6:38, addibila eli anakala podi wawaddela ddi athu amodha?

¹⁷ Nyu addibila muri anakalaba nnudhivelihuni, muli yotajhiha yapama mwamulabelaga Yehova ni nroromelo mwamakalelo owakwana. Yotajhiha yenyu enowoneya wihina sapama olabihedha dholaga dha mBibliyani ni ovirihamo. Nyu muhona ni mento enyu makalelo dheeddihiwesa dhithu dha mundduli, teto munowonelamo wihina enofwanelela ohudhera makalelo maxa enakuma ovanene. Naarive ninyuwa mbaddiziwe ovanene muhukanna dhithu dhowinjhiva munninyuna dhinahoweleya. Nyu podi othapanya ni azombwe mwawaddelaga ethu enuhagalasani mwaha omunona Yehova naari muguluvale. Azombwe enere odhiveliwa vanlubale yuvuruwanagani mwawaddelagamo thalako yenyu ni dhithu muhudherinyu. ‘Mwakala athu oovaha’ mwathapanyaga ni azombwe wodhela thotho munninyuna, Yehova anere wureelihani vanlubale.​—Omwileri Lucas 6:38.

18. Azombwe vamodha ni addibila eri anakalaba enakaviherana addi mmodha nimukwaye?

¹⁸ Azombwe vamodha ni addibila eri anakalaba yandana, aliwa podi okaviherana mmodha nimukwaye. Ezombwe ehikanna dhithu anakalaba ehinniwana, teto anakalaba ehikanna dhithu azombwe yahinniwana. Anakalaba ehikanna thotho ni ehixagela dhithu dhihudheriwa mudhidhi oviraga. Mbwenye azombwe ehikanna kopolo. Vowindo azombwe ni anakalaba yalabaga vamodha ninga athu owandana, aliwa enomuthithimiha Babihu oodhivela oodhulu. Teto addibila atene ammulogoni enawona ninga mareeliho okanna addibila yala.