1. Yehova baanihu?

YEHOVA ohukanna emudhi enamwebedha. Musolo wa emudhi ela di Yesu ali muthu ‘oobajha wa dhopaddusiwa dhamutene’ ni muthithi wa angero. (Col. 1:15; Sal. 103:20) Ohiya eyo Yesu agaali elabo ela yavati oliye ohuhudhiha wihina athu oororomeleya podi omwithanaga Yehova ninga Babi. Awogaga ni anamahara aye Yesu ohumwithana Yehova ninga ‘aBaba, ni Babi enyu.’ (João 20:17) Iyo niipeleka mmadani mwa Yehova ni nabaddiziwa nnokosa epaddi ya emudhi yaddibila ni arogola enandhivela. — Mar. 10:29, 30.

2. Yohudhera ela nnaasuze ddi?

² Athu amodha onowarusa omoona Yehova ninga Babiwa oodhivela. Amodhaya kinanda wawoniha odhivela addibiliwa ni arogoliwa amunroromeloni. Yohudhera ela enere onitonyihedha makalelo Yesu anikaviheriye omoona Yehova ninga Babihu ananidhivela, oliye anafuna wi ninfiyedhege. Ohiya eyo nnere ohudhera makalelo omutajhiha Yehova naaweddihaga addibilihu ni arogolihu a munroromeloni.

3. Dhithu baani dhisorihiwe muwari mwaha nlobelo dhinanikavihera onfiyera Yehova?

³ Yehova Babi oodhivela. Yesu anafuna wi nimonege Yehova ninga oliye anamoneliye. Ninga Babi oodhivela anafwanelela wi ninfiyedhege, ohiya omonaga ninga muthu anna onamathonga ahinaaddameleya. Eyo enowiwanana ni nlobelo Yesu aahudhihiye anamaharaye olobela. Oliye ambele ni madhu enihina ‘Babihu.’ (Mat. 6:9) Ahere afuna, Yesu ere onihudhiha omwithana Yehova ninga ‘Akopolo Dhatedhene,’ ‘Mpaddusi,’ ‘Mwene amukalakala’ — makalelo yala oomuthithimiha bapama teto mBibliyani ehikalamo. (Gén. 49:25; Isa. 40:28; 1 Tim. 1:17) Mbwenye Yesu anihudhihe omwithana Yehova ninga ‘Babihu,’ nthithimiho nnanikavihera onfiyera oliye.

4. Nnonne addi wi Yehova anoofuna okala vakukuvi ni iyo?

 ⁴ Enowurusa omoona Yehova ninga Babi oodhivela? Amodhaya enoonamo ndo. Podi wera enereya ndo mwaha wa makalelo eleliwiwa. Solibiha onona wi Yehova onowoona dhithu dhinereya mwigumini mwehu. Oliye anoofuna okala vakukuvene ni iyo. Bumwahaya madhu aye eganikongomedha: ‘Mmwaddamele Mulugu, oliye anere wuwaddamelani.’ (Tia. 4:8) Yehova anonidhivela, oliye anafuna wi nimonege ninga Babihu athima nahinakannegihuna.

5. Mowiwanana ni Lucas 10: 22, Yesu ananikavihera addi onfiyera Yehova?

⁵ Yesu podi onikavihera onfiyera Yehova. Kaavo amunonne Yehova opitha Yesu. Oliye ohutajhiha dhikalelo dhaababe mwamakalelo ologomana, bumwahaya adhe erege: ‘Onagona miyo, onawoona aBaba.’ (João 14:9) Yesu ari ninga ddibilihu apogoya ananihudhiha makalelo oomwiwelela ni omuriha Babihu. Ki nnawedhe addi omuhagalasa ni orumedhiwa vamentoni vaye. Yathimaya, Yesu ononikavihera woonelamo dhikalelo dha Yehova ninga odhivela waye, nuupama. (Omwileri Lucas 10:22.) Kabeni noone dhotajhiha dhimodha dhinatonyihedha wi Yehova Babi oodhivela.

6. Nnonne addi wihina Yehova onvuruwana Yesu alobelaga?

⁶ Yehova onowavuruwana anaaye. Kasugwa ethu yereye. Yehova anvuruwaniye mwanaye oobajha. Oliye agaali velaboni yavati, Yesu ohulobela dila dhowinjhivadhene, ni mwebaribarene Yehova onvuruwana. (Luc. 5:16) Yehova ahinvuruwana mwanaye alobelelaga dhothoma dhathima afuniye werana ninga motajhiha anamahara kumi nabili afuniye wasakula. (Luc. 6:12, 13) Teto oliye ahinvuruwana Yesu alobelaga mwaha wothuwathuwa. Mudhidhi vang’no ahinathi ogulihiwa, Yesu ahilobela ni murima watene wa Babe mwaha wowehiwa winlubale waddamela. Mudhidhi yole, Yehova kere onvuruwana baahi Yesu alobelaga, mbwenye ahimuruma mungero wihina amulibihe mwanaye oofuneya. — Luc. 22:41-44.

7. Onakala aavi wanona wi Yehova onowakula malobelo ehu?

 ⁷ Peeno Yehova onovuruwana malobelo adharaaye ni onowawakula aliwa yalobelaga mudhidhi wofwanelela ni mwamakalelo apama. (Sal. 116:1, 2) Murogola dhala, anakala o Indiya, onowonaga eyo ni mento aye mwigumini mwaaye. Oliye era ofwanyiwa makathamiho oorusa mwigumini ni mmubuweloni. Oliye olobela ni murima watene wa Yehova omwaddela dhatedhene dhampadduwela. Oliye ohuleba egi: “Porogarama JW Broadcasting^® a mweri wa Maio a 2019 anna musolo, makalelo oogonjhiha othuwathuwa ni makathamiho, diyola gamuhowilimmi mudhidhi yole. Porogarama ola ari ninga yowakula wa malobelo a Yehova.”

8. Yehova atonyihedhile addi wi oomudhivela Yesu?

⁸ Yehova ohumudhivela Yesu ni oomuthuwathuwela malabo amatene afwanyiwiye dhithu dhorusa agaali velaboni yavati, teto ofiyera peeno ononithuwathuwelave. (João 5:20) Yehova oomusamalela Yesu epaddi yomuzimuni, yomubuweloni ni yomwilini. Oliye kamwanganyihedhile mwanaye wihina oomudhivela ni omurumedha. (Mat. 3:16, 17) Mwaha wonona wi Babe oodhulu erege omukaviherave, Yesu kanakalege yeka suthukumwee ikubanyedhaga. — João 8:16.

9. Dhithu baani dhinatonyihedha wi Yehova anonidhivela?

⁹ Mowindala ninga Yesu, iyo atene kannanganyedha wi Yehova anonidhivela. Kubuwela ayi: Yehova anowenya wihina nandane nuliye ni onoosamalela epaddi yehu yomubuweloni wodhela addibilihu amunroromeloni enanihagalasa vanlubale. (João 6:44) Yehova anonsamalela epaddiihu yomuzimuni anivahaga dhatedhene nnahowelihu wihina nikanne nroromelo nooliba. Oliye ononikavihera epaddi yomwilini wihina nahirabulelege dhithu nnahowelihu. (Mat. 6:31, 32) Nakirati nubuwela odhivela anna Yehova ni iyo, odhivela wehu nuliye winowenjhedhedheya.

10. Nnande addi omutajhiha Yehova?

¹⁰ Yehova anowaweddiha addibila ni arogola nuudhivela. Mbwenye podi wera iyo enonirusa woona akala addibila enonidhivela, obe iyo watonyihedha odhivela. Mwahaya bowi iyo atene ninna mweddelo ni dhilemelelo dhohiyana-hiyana. Teto iyo atene nnowerana dhithu dhovirigana dhinawukula addibilihu. Naarive dhigarive ndo, kadda muthu wa iyo podi werana ethu-sithu wihina odhivela ninnihuna mwimudhini mwehu okale woliba. Ni makalelo baani? Mwaha womutajhiha Babihu ni watonyihedha odhivela addibilihu ni arogolihu. (Efé. 5:1, 2; 1 João 4:19) Kabeni noone ethu nnafunihu ohudhera ni yotajhiha ya Yehova.

11. Yesu amutajhihe addi Yehova mwaha wokanna ‘thagaraga’?

¹¹ Yehova ohutonyihedha ‘thagaraga.’ (Luc. 1:78) Anna thagaraga onothuwathuwa amonaga mukwaye oonaga goyi ni onosayela makalelo wihina amukavihere ni amulibihe muthu yoyo. Yesu ohutonyihedha wihina ahikanna thagaraga ninga Yehova mwamakalelo aweddihiye athu amodha. (João 5:19) Nuwoona muthithi waathu Yesu ‘oowaweddela thagaraga, mwaha yaali owukuwene ni yeedda burebure ninga mambila ehinna namakukula.’ (Mat. 9:36) Yesu kere wakalelave thagaraga baahi, oliye aherana ethu emodha wihina aakavihere. Oliye ahavulumusa aredda ni ahahagalasa ale ‘enalaba nuuviheya ni enyemeliwe.’ — Mat. 11:28-30; 14:14.

12. Kasoriha makalelo ootonyihedha thagaraga?

¹² Negi natonyihedhe addibilihu wihina nikanna  thagaraga, nnohowela wanona makathamiho enafwanya. Motajhiha, podi wera ohukalawo murogola anna oredda onamwitha mwiili. Mbwenye oliye kanunliha dhammurimani, naari dhigarive ndo oliye anohowela nikavihero. Nerege oliye onowanda osamalela murala waye? Oliye kahagalale ahakanne muthu amukaviheraga opiye ni oxela vaade vaye? Obe podi wera akala ddibila ayelele mabasa. Kiyakale yapama omukavihera wula asayelaga mabasa mamodha? Obe we podi onvaha ethu-sithu ninga mwana korowa.

13-14. Nnatonyihedhe addi wi nili oovaha ninga Yehova?

¹³ Yehova doovaha. (Mat. 5:45) Iyo kanyijherege wihina addibila enilobe nikavihero negi natonyihedhe wi nili athagaraga. Mowindala ninga Yehova iyo podi okala oobajha wawoniha thagaraga. Malabo amatene oliye anokumiha nduwa naari nahimulobile! Oviha wanduwa winokavihera dhigumi dhatedhene, naleya yahinonne omutamalela Yehova. Mwaha wonivaha dhatedhene nnahowelihu eyo enatonyihedha wi Yehova anonidhivela. Teto iyo nnomudhivela mwaha oliye dapama ni doovaha!

¹⁴ Emutajhihaga Babihu oodhulu, addibila ni arogola owinjhiva enakala obajha otonyihedha wi athu oovaha. Motajhiha, yaka ya 2013, oddiginyeya weelabo withaniwa Haiyan wahinonga dhithu dhowinjhiva elabo yo Filipina. Addibila owinjhiva ni arogola yahiyelela nyumba dhewa ni dhoreela dhewa. Mbwenye emudhi yehu yomuzimuni yapele elabo yatene othamagelawo wihina yaakavihere nithu-sithu yahoweliwa. Owinjhiva yaherana dhovelela dhewa ni yahiivelela wihina evenyihedhe ni emage nyumba dhowakwana 750 muwari mwa yaka modha! Koronaviru agaali vamulaloni, Anamona a Yehova ehiilibihera wihina yakavihere addibila ni arogola dhithu yahoweliwa. Nakala owaguva okavihera emudhi yehu yomuzimuni nnotonyihedha wi nnowadhivela.

15-16. Mowiwanana ni Lucas 6:36, mwahaya bwaddi sathima omutajhiha Babihu oodhulu?

¹⁵ Yehova dathagaraga ni doovaha. (Omwileri Lucas 6:36.) Malabo amatene nnokalela onamona thagaraga dha Babihu oodhulu. (Sal. 103:10-14) Yesu ohumutajhiha pamadhene Babe. Naarive aganonne wi anamaharaye  kayali athu ologomana, oliye owaweddiha ni thagaraga ni owakurumuwela. Yesu ohukutha mukutho egumaye wihina dhothega dhewa dhileveleliwe. (1 João 2:1, 2) Onona wi Yehova ni Yesu bathagaraga ni boolevela mwebaribarene winowenjhedhedha odhivela ninnihuna naaliwa.

¹⁶ Odhivela winiiwananiha emudhi yehu yomuzimuni winoliba nalevelelagana ni murima watene. (Efé. 4:32) Hee mwebaribarene malabo mamodha kahiyo ethu yokweya olevelela; mowindo nnohowela wilibihera epaddi yela. Ethu emukavihere murogola dhaala di Sentinela awoga wi “Perdoem uns aos outros liberalmente.” * Oliye ohuleba egi: “Ohudhera musolo wa Sentinela ola ohugikavihera osaddula mubuwelo waaga ni okanna monelo wapama, ni wawoona nimakalelo apama addibila. Sentinela ola ohusoriha wihina onona walevelela athu amodha kinatapulela wihina dhineriwana kadhinanipa mbani obe naari dhinonidhivela. Olevelela enatapulela othimiha ntxiga ninnihuna wihina murenddele ninnihuna odhowegeve vasogolo.” Nalevelelaga ni murima wehu watene addibila ni arogola, enotonyihedha wihina nnowadhivela teto nnamutajhiha babihu oodhulu, Yehova.

17. Mowiwanana ni Mateus 5:16, nnande addi omuthithimiha Babihu oodhulu?

¹⁷ Gari enlubale okosa epaddi ya emudhi yodhivela yapele elabo yatene. Nnafuna athu owinjhiva yitaganyihedhe ni iyo wihina emwebedhege Mulugu. Bumwahaya nnohowela okala pasope wihina nihitakalihe ekalelo ya Babihu oodhulu Yehova vamodha ni nlogo naaye. Malabo amatene nnowaja makalelo okanna mweddelo wapama wihina ale enafuna ovuruwana muthenga wOmwene erumeedhe. — Omwileri Mateus 5:16.

18. Enaanikavihere ddi ohoova naalaleyaga?

¹⁸ Malabo mamodha nnokoniwa ni nnoharahariwa mwaha womwiwelela Babihu oodhulu. Eyo enowuthusa woovaga wawaddela athu amodha onarumedhiwe? Okanne ebaribari wihina Yehova ni mwanaye enere wukavihera.  Yesu oharoromeliha anamaharaye wihina kiyahowelege othuwathuwela ethu yafuniwa owoga ni makaleloya owoga. Mwahaya bwaddi? Yesu ohutapulela egi: ‘Mudhidhi yoyo munere waddeliwa ethu munafuninyu owoga.’ Mbwenye anawoga kahiyo nyu baahi, mbwenye muzimu wotxena wa Babinyu bunawoga vamburoni veenyu.’ — Mat. 10:19, 20.

19. Owoge yotajhiha ya muthu alaleye nuuliba murima?

¹⁹ Kasugwa yotajhiha ya Robert. Oliye era omuhudhera Bibliya, mbwenye kuwavinri mudhidhi wowinjhivene ni kanonne dhithu dhowinjhiva dha mBibliyani. Vano oliye withaniwa wihina aakulele muladdu tribunale yoAfrika du Sul enawoga muselu wodhowa okoddoni. Nuuliba murima, oliye omutapulelamo namatoriha ole wihina kaafuna okala epaddi ya elabo mwaha owadhivela addibile amunroromeloni. Oliye onotamalela vanlubale mwaha wookosa epaddi ya Yehova! Mohujhehera namatoriha ole omukoha: Addibilo baani? Nikoho nna nahimururumusa Robert. Mudhidhi yole, oliye wubuwela yolebela yalabo, Mateus 12:50: ‘Ole anerena efunelo ya aBaba eli odhulu, oyo di ddibilaga, murogolaga ni amama.’ Naarive Yehova aganonne wi Robert era omuhudherawene Bibliya ni kanonne dhithu dhowinjhiva, oliye onvaha muzimu wotxena wihina amukavihere wawakula makoho owinjhiva ahaajheheriye. Yehova ahihagalala vanlubale mwaha wa Robert! Oliye onohagalala vanlubale mwaha wa iyo naamuroromelaga ni nakala oossliba murima nalaleyaga mburo dhorusa.

20. Enohoweleya wikome wihina were ddi? (João 17:11, 15)

²⁰ Odhowegeve ovahaga thima mwaha ofuru onniwena wokala epaddi ya emudhi yomuzimuni enna odhivela. Nihikanna Babi ahinaligana ni Babi mmodha, addibila ni arogola owinjhiva oororomeleya. Kuwubuwelege wihina okala epaddi ya emudhi yela ethu yahinamala. Saddana naale enamukavihera eneedda oonyanyuweene, enokala nuthika ebaribari ninnihuna wi Yehova anonidhivela ni nikanna emudhi yowiwanana, ni enafuna egujhule emudhi yowiwanana ninnihuna. Mbwenye Yesu ohulobela amulobaga Babe wihina asugwerege emudhi yehu yomuzimuni wi ekalegeve yowiwanana. (Omwileri João 17:11, 15.) Yehova anna wakula malobelo ala. Mowindala ninga Yesu, kuwanganyedhege odhivela wa Yehova. Okanne ebaribari wi Yehova kanadha ahiya wukavihera. Wikome wihina ohuhiye okala epaddi ya emudhi ela yomuzimuni.