1. Enanlibiha ddi noonaga wi nili yekihu mwaha wa makathamiho enanifwanya mwilaboni muna? (Salmos 118:5-7)

ONOFWANYIWAGA makathamiho ogona wi ori yekawo, newene ohumonaga muthu owuukavihera? Athu amodha ehiviramo, ni adhaariya a Yehova. (1 Reis 19:14) Akala enowupadduwelaga wubuwele mpaganyo wa Yehova oni: ‘Miyo kagidha guhiya newene kagidha gunyanyala.’ Ni mpaganyo yola iyo podi owoga ni ebaribari yatene: ‘Yehova dinamakavihera aaga, kagidha goova.’ (Heb. 13:5, 6) Murumiwi Pawulo aalebele madhu ala makiristawu oJudeya vaari va yaka 61. Aliwa enonubusedha mubuwelo onafwanyeya va Salmos 118:5-7. — Omwileri.

2. Dhithu baani nnafunihu ohudhera, ki mwahaya bwaddi?

² Ninga Salmista, dhithu dhampadduwele murumiwi Pawulo dhahimoniha wi mwebaribarene Yehova Dinamakavihera aye. Motajhiha, ahinalebele meberewu karta nna, oliye ahifwanyiwa nipevo nowopiha mbara. (At. 27:4, 15, 20) Olenddo yole ni yaka dhimodha mundduli Yehova ahimoniha murumiwi Pawulo wihina mwebaribarene dinamakavihera aye. Nnafuna noone dhithu tharu. Yehova ahimukavihera Pawulo amulabihedhaga Yesu ni angero, anamathonga ni addibila amunroromeloni. Wubuwela dhithu dhereyile mwigumini mwa Pawulo dhinere wenjhedhedha nroromelo nehu wihina Mulugu podi onikavihera.

3. Ethu baani murumiwi Pawulo ikonhiye, ki mwahaya bwaddi?

³ Pawulo ohowela okaviheriwa. Muwari mwa yaka 56 M.W.; muthithi waathu omburulela ode wa tempulu ya oJeruzale wi empe. Labo noharela othukuleliwa oSinediriyu, amwiddani aye yahanle vang’ono wi emuzomge. (At. 21:30-32; 22:30;  23:6-10) Mudhidhi yole podi wera murumiwi Pawulo ahikoha egi: ‘Dhithu ndha ginande ofiyedha alini?’

4. Yehova amukavihere avi Pawulo amulabihedhaga Yesu?

⁴ Nikavihero baani akenle murumiwi Pawulo? Emahiyu Pawulo ahinamagiwe, ‘Nabwiya’ Yesu ahimuthanyuwedha owoga nuliye egi: ‘Olibe murima! Mwaha, ninga ovahiliwe onamona wodhela miyo oJeruzale, onere ovaha onamona oRoma.’ (At. 23:11) Olibihiwa wula wafinye mudhidhi wofwanelela. Yesu ahimutamalela Pawulo mwaha onamona avahiliye oJeruzale. Oliye opaganya wi Pawulo ere ovuluwa ni ere ofiya apamene oRoma, wadhowiye ovaha onamona. Mpaganyo ola wahimulibiha vanlubale murumiwi Pawulo ninga mwana akala mmadani mwa ababe.

5. Yehova amukavihere avi Pawulo amulabihedhaga mungero? (Osugwe fotu yavakapani.)

⁵ Makathamiho baani yanfwanyile murumiwi Pawulo? Dhigavinre yaka bili dhigapadduwe dhithu ndhe oJeruzale, Pawulo aali munaviyuni adhowaga Witaliya. Egaali mulenddoni mudhidhi yole obajha nipevo nowopiha, anyakambura vamodha naathu amodha woonaga wi yere okwa. Mbwenye Pawulo koovile. Mwahaya bwaddi? Oliye owoga naathu atene yaali mbarkuni egi: “Emahiyu evinre ahigithanyuwedha mungero a Mulugu aaga ginamparelimi mabasa ootaleleya, oliye wera: ‘Pawulo kuwoove. Onere ofiyedha ogumana ni Sezare, ohiya eyo Mulugu ohuvahedha dhigumi dhatedhene dha athu enedda olenddo ni we.’” Yehova ohumulabihedha mungero wihina awoge ethu emodhave Yesu aawogiliye. Ninga mpaganyo ola wasorihiwa, Pawulo ofiya oRoma. — At. 27:20-25; 28:16.

6. Mpaganyo wa Yesu onanivaha kopolo, buuvi, ki mwahaya bwaddi?

⁶ Nikavihero baani nnakelihu? Yesu anere onikavihera ninga amukaviheriye Pawulo. Yesu ohapaganya anamahara aye atene egi: ‘Miyo giri ni nyu malabo amatene ofiyedha omakuthulo wa dhithu.’ (Mat. 28:20) Madhu a Yesu enonlibiha vanlubale. Mwaha wa ddi? Mwaha atene iyo nnofwanyiwa makathamiho oorusa. Motajhiha, mmudhihu obe mukwihu akwa nnowanana ni makathamiho ala ohiya nlabo nimodha baahi, mbwenye yaka dhowinjhivadhene. Amodhaya enowoanana makathamiho mwaha wuluvala. Amodhaya enofwanyiwa makathamiho owubuwela obe depresawu. Naari dhipadduwaga dhithu ndha nnokanna kopolo dhodhowave osogolo mwaha onona wi Yesu ali epaddi yehu  ‘malabo amatene’, vamodha ni malaboya oothabwa orusa. — Mat. 11:28-30.

7. Ninga munawogela Apocalipse 14:6, Yehova ananikavihera avi peeno?

⁷ Bibliya anowoga wihina Yehova anonikavihera alabihedhaga angero. (Heb. 1:7, 14) Motajhiha, angero enonikavihera ni enosogolela mabasa oolaleya ‘muthenga wapama wa Omwene’ waathu ‘amalogo, mahimo ni dhiwogelo dhohiyana-hiyana.’ — Mat. 24:13, 14; omwileri Apocalipse 14:6.

8. Yehova amukavihere addi Pawulo amulabihedhaga namasogolela koddo?

⁸ Nikavihero baani akenle murumiwi Pawulo? Yaka ya 56 M.W.; Yesu ahipaganya wi Pawulo ere ofiya oRoma. Mbwenye maJudewu mamodha oJeruzale yahiluba ompa murumiwi Pawulo. Vano, namasogolela a koddo oRoma Kalawudiyu Lisiya nunona dhaali mmurimani mwa maJudewu omukavihera Pawulo. Mowaguva, Kalawudiyu oruma wihina muthithi waanyakoddo omuthukule Pawulo edhowena oSezareya, olapenle oJeruzale makilometru owakwana 105. Nuufiya oSezareya musadoro Felixi othoma wi oliye ‘afugeliwe opalasiyu wa Erodi.’ Amwiddani a Pawulo kiyandile wera ethu. — At. 23:12-35.

9. Musadoro Festu amukavihere avi Pawulo?

⁹ Dhigavinre yaka bili nivanove murumiwi Pawulo aali mukambura oSezareya. Felixi ahabiwe ni musadoro Festu. Ajudewu odidela owoga wihina murumiwi Pawulo adhowe oJeruzale wi athongiwe, mbwenye Festu okoodda. Podi wera Festu ahinona wi aJudewu ‘yareya murako wihina empe Pawulo mudila.’ — At. 24:27–25:5.

10. Musadoro Festu erile ddi Pawulo valonbiye wihina athongiwe wa Sezare?

¹⁰ Nuuvira mudhidhi Pawulo odhowa othongiwa oSezareya. Festu ‘afuna ooniwe nuupama ni majudewu,’ bumwahaya omukoha Pawulo egi: ‘We onofuna odhowe oJeruzale wihina wathongiwe wengo, vamentoni vaga?’ Pawulo ahinona wi ahadhowe oJeruzale podi wera ere opiwa. Teto oliye ahinona yowera wihina avuluse egumi yaye, afiye oRoma ni alaleye muthenga wapama. Oliye wera: ‘Ginafuna wa Sezare!’ Agavuruwanihe anamalaga aye, Festu owoga ni Pawulo egi: ‘We omusakule Sezare, wa Sezare onere odhowa.’ Madhu ala a Festu yahimbarela Pawulo mmadani mwa amwiddani aye. Ndala Pawulo ere odhowa oRoma — wolapela ni majudewu yafuna ompa. — At. 25:6-12.

11. Madhu baani anamavuhulela Izayiya yamuhagalase Pawulo?

¹¹ Murumiwi Pawulo ajhehaga mudhidhi wa olenddo waye wodhowa Witaliya, podi wera ahawubuwela madhu anamavuhulela Izayiya awongeye naamwiddani a Yehova egi: ‘Mwerena ethu-sithu mbwenye kinaadhowe vasogolo, muwoge ethu munafuninyu, mbwenye kadhinedde pama, mwaha Mulugu ali ni iyo!’ (Isa. 8:10) Pawulo ahinona wi Mulugu ere omukavihera, eyo yahimukavihera owanana dhoweha dhadha osogolo.

12. Juliyu amweeddihe avi Pawulo, ethu baani Pawulo onenliyemo?

¹² Yaka ya 58, Pawulo obajha olenddo waye wodhowa Witaliya. Mwaha wokala munyakambura oliye era osugweriwa nnamasoglela koddo oRoma ithaniwa Juliyu. Okuma mudhidhi yole odhowa osogolo Juliyu ahikanna ofuru womutabusa obe wa omweddiha ni opama. Juliyu alabihedhe avi owedha waye? Labo noharela egimenle mburo wobajha ‘Juliyu omwerela opama Pawulo, omuhiya wi oliye apaade akwaye.’ Nuuvira mudhidhi Juliyu ofiyedha ovulusa egumi ya Pawulo. Ni makalelo  baani? Anyakoddo yafuna yaape athu atene yaali munaviyuni, mbwenye Juliyu wakoddiha. Mwahaya wa ddi? Mwaha oliye ‘afuna anvuluse Pawulo.’ Podi wera murumiwi Pawulo ahona wihina Yehova dinamulabihedha namasogolela ole wihina amukavihere ni ambarele. — At. 27:1-3, 42-44.

13. Yehova analabihedha avi anamathonga?

¹³ Nikavihero baani nnakelihu? Yehova podi olabihedha kopolo dha muzimu wotxena wihina awerihe anamathonga ele anafuniye. Enaligana ni ele alebile mwene Salomawu egi: ‘Murima wa mwene wakala mmadani mwa Yehova onaligana ni manjhe. Oliye onadhowana winafuniye.’ (Pro. 21:1) Proverbiyu ola anafuna asorihe ddi? Athu podi wabola manjhe odhowagana winafuniwa. Ni makalelo mamodhave, Yehova podi olabihedha muzimu wotxena wihina mubuwelo dha anamathonga dhiharege dila anafuna Yehova. Yereya yeyo, anamathonga enothoma ethu enakavihera nlogo na Mulugu. — Omusugwe Esdras 7:21, 25, 26.

14. Ninga munawogela Atos 12:5 nalobelelege aani?

¹⁴ Ethu baani nnahowelihu wera? Anamathonga yaafunaga othoma ethu enaapathe egumihu ni mabasihu oolaleya ‘iyo nnofwanelela walobelela.’ (1 Tim. 2:1, 2, nota; Nee. 1:11) Podi walobelela nuviheya addibilihu vamodha naarogolihu eli mukambura ninga yerilena makiristawu obajha. (Omwileri Atos 12:5; Heb. 13:3) Ohiya eyo iyo podi walobelela anamasugwera kambura wili addibilihu ni arogolihu. Iyo podi olobela wa Yehova wihina anamasugwera kambura eweddihege ni opama ni ‘emuthu’ addibilihu ninga erilena Juliyu. — At. 27:3, nota.

15-16. Yehova amukavihere avi Pawulo amulabihedhaga Aristarku ni Lukas?

¹⁵ Nikavihero baani akenle murumiwi Pawulo? Mulenddoni mwaaye adhowaga oRoma, ohakela nikavihero na Yehova aalabihedhaga addibila amunroromeloni. Nnafuna noone dhopadduwa dhimodha.

¹⁶ Akwaye abili, Aristarku ni Lukas othoma odhowa vamodha ni Pawulo oRoma. * Enakala ninga kaavo mwabili yala akenle mpaganyo wa Yesu wihina yere ofiya oRoma egaali agumi, naari dhigarive ndo, aliwa oleva egumiwa wihina ekale ni murumiwi Pawulo. Mbwenye nipevo nne nigaavinre aliwa  wonelamo wihina kiyakwe. Aristarku ni Lukas egakinte munaviyuni oSezareya, podi wera Pawulo ahilobela wa Yehova amutamalelaga mwaha waruma akwaye ale abili ooliba murima wihina emukavihere. — At. 27:1, 2, 20-25.

17. Yehova amukavihere avi Pawulo aalabihedhaga addibila amunroromeloni?

¹⁷ Agaali mulenddoni, Pawulo ohukaviheriwa dila dhowinjhiva naaddibile amunroromeloni. Motajhiha, yimenlewa sidadi yoSidoni Juliyu weenya wi Pawulo ‘apaade akwaye ni wihina yamusamalele.’ Vasogolova sidadi yoPuteyoli Pawulo vamodha nakwaye ‘wafwanya addibila yadidenle wihina ekale naliwa sumana modha.’ Asamaleliwaga ni addibila yala, mohanganyedha Pawulo ahipatha mudhidhi wihina aalibihe ni awaddele dhithu dholibiha dhampadduwele. (Omusugwe Atos 15:2, 3.) Agalibihiwe Pawulo vamodha nakwaye ohogolowela olenddo. — At. 27:3; 28:13, 14.

18. Mwahaya bwaddi Pawulo adhe amutamalelege Mulugu ni akale akopolo?

¹⁸ Agaali dila yoRoma Pawulo owubuwela dhithu alembiye yaka tharu mundduli alebelaga mulogo woRoma: ‘Mwa yaka dhowinjhivadhene ginohowela odha wupaadani.’ (Rom. 15:23) Mbwenye oliye kajhehera ofiya wengo ninga munyakambura. Mwebaribarene oliye ahihagalala vanlubale awooniliye addibila oRoma emujhehaga mudila wihina emulojhele! ‘Nuwawona Pawulo omutamalela Yehova ni okala akopolo.’ (At. 28:15) Woone wihina Pawulo ahimutamalela Mulugu mwaha addibila odhowa omoona oliye. Mwahaya bwaddi? Mwaha Pawulo ahanda woona, dila yanabili, Yehova aalabihedhaga addibile amunroromeloni wi emukavihere.

19. Ninga munawogela 1 Pedro 4:10, Yehova ananilabihedhe addi wihina nakavihere addibila amodha?

¹⁹ Ethu baani nnahowelihu wera? Ohukala ddibila a mmulogoni mwawo anoona goyi mwaha wa oredda obe makathamiho mamodha? Obe podi wera ohumuyelela mmudhaye muukwani. Namunona muthu ari mmakathamihoni yala, iyo podi omuloba Yehova wihina anikavihere owoga obe werana ethu enaamukavihere. Madhu ehu obe dhowera dhehu  siyeyo ddibilihu obe murogolihu anahoweliye. (Omwileri 1 Pedro 4:10.) * Aliwa podi ohogolowela ororomela mpaganyo wa Yehova oni: ‘Miyo kagidha guhiya newene kagidha gunyanyala.’ Mwebaribarene eyo enere wuhagalasa vanlubale!

20. Mwahaya bwaddi iyo podi owoga ni nroromelo naatene wi “Yehova dinamakavihera ehu?”

²⁰ Ninga empadduwele Pawulo vamodha nakwaye, iyo podi ofwanyiwa makathamiho oorusa a mwigumini mwehu. Mbwenye iyo podi okala okala a kopolo, mwaha Yehova ari epaddi yehu. Oliye anonikavihera amulabihedhaga Yesu vamodha ni angero. Ohiya eyo yakala efunelo yaye podi onikavihera, alabihedhaga anamathonga. Owinjhiva wa iyo nihinona wi Yehova anolabihedha muzimu wotxena wihina wathukulele addibila amunroromeloni onikavihera. Bumwahaya, ninga Pawulo, iyo podi owoga ni nroromelo natenene negi: ‘Yehova dinamakavihera aga, kaginoove. Muthu anaagerele ddi?’ — Heb. 13:6.