1. Ninga munawogela Mateus 7:13, 14, mwahaya bwaddi nigawoga wi nili mulenddoni?

ATENE iyo nili mulenddoni. Yofuna yehu fuukala elabo exa enalamuleliwa ni babihu oodhivela, Yehova. Kadda labo nnohara dila enathukulela egumi yohimala. Mbwenye ninga Yesu awogiliye dila ela sopurana, malabo mamodha soorusa ohara. (Omwileri Mateus 7:13, 14.) Mwaha ohulogomana sokweya ohuhara dila yela. — Gál. 6:1.

2. Muselu baani nnahudherihu? (Osugwe kwaduru “ Wiyeviha winonikavihera owomihedha thalo dhehu.”)

² Wihina ndidele weedda dila ela yopurana enathukulela egumi yohimala, nnohowela wogolela mubuwelo, monelo ni dhowera dhehu. Murumiwi Pawulo ohakongomedha makiristawu oKorinto egi: ‘Mudidele wogoleliwa.’ (2 Cor. 13:11) Yolaga ela enolabave ofiyedha peeno. Ohudhera wula nnere woona makalelo Bibliya ananikaviheriye owomihedha mweddelo wehu ni makalelo addibila owithwelavo omuzimuni enanikaviheriwa odidelave weedda dila yela enathukulela egumi yohimala. Teto nnere woona mwahaya bwaddi soorusa ohare dholaga dha nikuru na Yehova. Yohudhera ela enere onikavihera woona makalelo wiyeviha onanikaviheriwa orugunusa mweddelo wehu nihiyelele ohagalala womulabela Yehova.

3. Madhu a Mulugu enere ddi mwigumini mwehu?

³ Opendda mubuwelo wehu ni moonelo wehu podi okala ethu yorusa. Mwahaya bwaddi? Mwaha murima wehu oleketha, malabo mamodha winorusa onona winanthukulela murima wehu. (Jer. 17:9) Sokweya wileketha ni ‘yubuwelo dhowoota.’ (Tia. 1:22) Bumwahaya nlabihedhe Madhu a Mulugu wihina niipendde. Madhu a Mulugu enere ononiha  eli mmurimani mwehu, ‘dhowubuwela ni dhofuna’ dha vati vamurima. (Heb. 4:12, 13) Madhu a Mulugu makina a rayu X, aliwa enonooniha ethu eri mmurimani mwehu. Mbwenye wihina nrumedhe dholaga dha Bibliya ni dha addibila Mulugu analabihedhiye wihina enikavihere, nnohowela okala owiyeviha.

4. Nnonne avi wi mwene Sawuli ahikala muthu owithukula?

⁴ Emwereyele mwene Sawuli enowoniha ethu enapadduwa nahikala owiyeviha. Wahifiya mudhidhi mwene Sawuli kuhonaga wi ohowela osaddula makalelo aye owubuwela ni makalelo aye owerana dhithu. (Sal. 36:1, 2; Hab. 2:4) Eyo yahoneya pamadhene mudhidhi Sawuli agonjhihiliye akudda aamalekita. Yehova ahinvaha yoholela wihina Sawuli erena, mbwenye oliye kiwelele. Teto namavuhulela Samuweli adhonwiye owoga ni Sawuli wodhela muselu yoyo, oliye keenyile yothega yaye. Mbwenye osayelaga makalelo ovita dhowera dhaye onelihagamo wihina yothega yaye kiyaali enlubale, teto wawinkedhaga athu amodha. (1 Sam. 15:13-24) Mudhidhi mundduli oliye aherana ethu emodhave. (1 Sam. 13:10-14) Mowukula Sawuli ohiya wihina murima waye okale wowithukula. Oliye kawomihedhe makalelo aye owubuwela, mwaha wa yeyo Yehova omusukuma.

5. Ethu baani nnahudherihu ni yopadduwa ya Sawuli?

⁵ Wihina nrabele okala ninga Sawuli nnohowela wikoha ayi: ‘Gilerigi dholaga mBibliyani ginosayela makalelo ohurumedha mubuwelo waaga? Ginowubuwelesa wi dhothega dhaaga kahi dhinlubale? Gaviriganiha ginawinkedhesa athu amodha?’ Naakula nikoho naari nigaali nimodha negi hee, nnohowela osaddula makalelo ehu owubuwela. Mwaha naherana yeyo murima wehu podi okala wowithukula ofiyedha Yehova anisukume. — Tia. 4:6.

6. Yohiyana erivo ya mwene Sawuli ni mwene Davidi sivi?

⁶ Vano woone ohiyana wa mwene Sawuli ni wa mwene Davidi adhivela ‘malamulo a Yehova.’ (Sal. 1:1-3) Davidi ahinona wi Yehova anavulusa athu owiyeviha ni anowawidda athu owithukula. (2 Sam. 22:28) Bumwahaya adhe ahiyege wihina nlamulo na Mulugu niwomihedhe makalelo aye owubuwela. Oliye ohuleba egi: ‘Ginere omwibela Yehova anagilagesa, ni mahiyu anowogolela yubuwelo dhaaga dha vati va murima.’ — Sal. 16:7.

7. Nakala athu owiyeviha ethu baani nnerihuna?

⁷ Nakala athu awiyeviha nnere weenya wi Madhu a Mulugu ewomihedhe mubuwelo wehu wahinafiye mudhidhi wihina nerena ethu yothega. Madhu a Mulugu enakale ninga ndhu nnawoga negi: ‘Dilaya siyela weddege mwemuna.’ Aliwa enere onikavihera nabajha ohiya dila yofwanelela weeddamo. (Isa. 30:21) Onvuruwana Yehova winonikavihera vanlubale. (Isa. 48:17) Motajhiha, kaninkanna manyazo mwaha wa olagiwa ni muthu mmodha. Teto nnowandana pama ni Yehova mwaha nihinona wihina oliye anonsamalela ninga babi odhivela. — Heb. 12:7.

8. Ninga munawogela Tiago 1:22-25, Madhu a Mulugu enaanikavihere addi ninga espelyu?

⁸ Madhu a Mulugu podi oliganihiwa ni espelyu. (Omwileri Tiago 1:22-25.) Athu owinjhiva ehikanna elemelelo yowisugwa va espelyuni yaafunaga ovenyavo. Ndala aliwa podi wegeredha ethu yahoweleyege muthu mmodha wegeredha. Enooligana ni omwileri Bibliya malabo amatene, nerena ndo iyo podi woona ethu mmubuweloni mwehu obe dhithu nnerihuna dhinahoweleya wegeredha. Athu owinjhiva enowona okala yapama wileri yolebela ya labo ehinakume vaade. Aliwa enohiya wihina labo nenne yubuwelege yolebela ele. Yeddaga enosayela makalelo ohara dholaga  dha Madhu a Mulugu. Ohiya eyo enohoweleya omwileri Bibliya ni opendda malabo amatene. Podi okalaga ninga ethu yokweya, mbwenye enonikavihera okalave mudila yopurana enanithukulela wigumini.

9. Ethu baani yamwerinhe mukwawo wuvaha yolaga?

⁹ Onoharaga dila yabanjhe wulapeliha ni Yehova? (Sal. 73:2, 3) Podi wera mukwawo owithwelavo omuzimuni ahimaga murima wihina adhe uwogolele. Wonelemo avi? Wahivuruwana ethu awogiliye ni wahilabihedha yolagaya? Akala ohulabihedha oherana ethu yapama. Mwebaribarene ohuhagalala mwaha mukwawo wukavihera. — Pro. 1:5.

10. Mukwawo uvaha yolaga ononelemo avi?

¹⁰ Madhu a Mulugu enonubusedha yegi: ‘Apama bimakwadda anuutula mukwawo.’ (Pro. 27:6) Ela enatapulela ddi? Kubuwela yopadduwa ela: We were wimela ojhehaga karo dhivire nuwindo olupe, mbwenye obajha oddabunya telefoni yawo wula olupaga dila ohisungwe wula ni wula. Mudhidhi yoyo mukwawo odha wuweta wuhogolosela mundduli. Podi wera uhona overeya mwaha wa makalelo uwetile mukwawo, mbwenye ela erilena mukwawo ehukavihera ohupidiwa. Naarive moono wawo wuwiddelaga malabo owinjhiva ogahimunyanyuwela mukwawo? Naari! Ohiya eyo were omutamalela. Bumwahaya podi okala yowiddela mukwihu aanivahaga yolaga mwaha wa yego nerilihuna obe niwogilihu. Kunyanyuwe newene kutakaleliwe, mwaha werana eyo wakale ootaduwa. (Ecl. 7:9) Mbwenye ohagalale mwaha mukwawo omaga murima wihina adhe awoge ni we.

11. Enamuthukulele muthu okoodda yolaga ya mukwaye ddi?

¹¹ Yerihe wihina muthu ahirumedhe yolaga yapama yamukwaye ddi? Withukula. Athu owithukula ‘enodhiveliwa olekethiwa.’ Aliwa ‘kinafuna wiwa ebaribari.’ (2 Tim. 4:3, 4) Athu owithukula enadhiveliwa widhona ninga athu oothabwa onona obe athu athima wapitha akwiwa. Mbwenye murumiwi Pawulo ohuleba egi: ‘Akala muthu onubuwela wi yego wula ahili ethu anna wileketha yekaye.’ (Gál. 6:3) Mwene Salomawu ohukweyiha muselu ola alebaga egi: ‘Apama di muzombwe ohawa mbwenye athotho, ohiya mwene owunnuwelavo wula agali taduwa, mwaha kanna ekalelo yapama yorumedha dholaga.’ — Ecl. 4:13.

12. Murumiwi Peduru onenlemo avi ele yampadduwele ninga munawogela Gálatas 2:11-14, ethu baani nnahudherihu?

¹² Kasugwa yopadduwa ya murumiwi Peduru. Oliye ahisinyusiwa ni murumiwi Pawulo vaari vaathu owinjhiva. (Omwileri Gálatas 2:11-14.) Peduru podi wera ere otakaleliwa mwaha murumiwi Pawulo omusinyusa vaari vaathu ni makalelo oliye awongiyena. Mbwenye Peduru ahilabihedha thotho, oliye katakaleliwe newene kanyanyuwile, ohiya eyo Peduru omwithana Pawulo ninga ‘ddibile amudhiveliye.’ — 2 Ped. 3:15.

13. Wahinadhowe onvaha dholaga muthu dhithu baani dhinahoweliwe wubuwela?

¹³ Akala onna wubuwela onvaha yolaga mukwawo, ethu baani enahoweleya wubuwela? Wahinathapanyena wabihe wikoha: “Ginna othabwa ‘osayela wogowa’?” (Ecl. 7:16) Muthu othabwa wogowa kanahiya wihina malamulo a Yehova emweeddihe, mbwenye oliye onasayela malamulo ayene aatorihagana akwaye. Eragana yeyo kanoniha thagaraga. Vano wamala opendda woona wi enohoweleyave othapanya ni mukwawo, werena ela: Onone pamadhene muladduya. Walabihedhe makoho wihina omukavihere mukwawo oviriganihe. Okanne ebaribari wihina dholaga dhawo dhinadhela  mBibliyani. Teto wubuwele wihina anamutorihe mukwawo di Yehova ohiya we. (Rom. 14:10) Ororomele thotho dha Madhu a Mulugu. Wadhowaga onvaha dholaga muthu mmodha, okanne thagaraga ninga Yesu. (Pro. 3:5; Mat. 12:20) Mwahaya wa ddi? Mwaha Yehova anaaneddihe ninga nnaweddihihu athu amodha. — Tia. 2:13.

14. Nikuru na Mulugu nnanivaha ddi?

¹⁴ Yehova analabihedha nikuru nili elabo yavati wihina nnikavihere weedda mudila enanithukulela wigumini. Wodhela nikuru nna nihikanna vidiyu, malivuru, mutugumano dhinanikavihera weddela dholaga dha Madhu a Mulugu. Dhithu ndha sororomeleya mwaha dhinakumihiwa mBibliyani. Addibila a Nikuru Nolamulela yathomaga makalelo enafuniiwa weedda mabasa olaleya, enaroromela muzimu wotxena. Naari dhigarive ndo enoopendda wihina yoone akala enohoweleya osaddula ethu. Ninga nnonilihu ‘dhithu dha elabo ela dhinna osadduwa’ nikuru na Mulugu nnohowela ohara makalelo ala maxa. — 1 Cor. 7:31.

15. Makathamiho enafwanya anamalaleya amodha baavi?

¹⁵ Nikuru na Mulugu nanivahaga dhoholela dhinawoga wodhela omuhudhiha Bibliya, malamulo a Mulugu nnorumedha mowaguva. Ki nnonamo avi nikuru nna nasaddulaga dhego dhinapatha egumi yehu? Motajhiha, yaka ndha dhogomihedha korowa dha omagiwana ni dha ovenyihedhana mburo dhehu dhowebedha dhihikwima, bumwahaya Nikuru Nolamulela owoga wihina mulogo dhilabihedhege pama Nyumba Dhomwene. Vano ohoweleyaga wihina mulogo dhimodha dhitaganyihedhiwe, ni mburo dhimodha waali Nyumba Dhomwene dhigulihiwe. Korowa ndha dhinna olabihedhiwa wihina dhimagiwena Nyumba Dhomwene dhimodha mburo dhinahoweleya. Akala masadduwo ala ehufwanya podi wera kahi yokweya ohara. Anamalaleya amodha enohowela weedda olenddo wihina edhowe omutugumanoni. Amodha enakavihera omaga ni owomihedha Nyumba Dhomwene enowikoha mwahaya bwaddi dhigahowela ogulihiwa. Aliwa podi wubuwela wihina wilibihera wewa kawipurile ethu. Naari dhigarive ndo aliwa enna okaviherave dhothoma dha Nikuru Nolamulela ni enofwanelela otamaleliwa.

16. Ninga munawogela Colossenses 3:23, 24 enaanikavihere okalave ohagalala ddi?

 ¹⁶ Wihina nikaleve ohagalala sapama wubuwela wi nnamulabela Yehova ni anna weddiha nikuru naye. (Omwileri Colossenses 3:23, 24.) Mwene Davidi ohunihiyedha tajhiha yapama mwaha wa ovaha dhovelela dhaye wihina tempulu emagiwe. Oliye ohuwoga egi: ‘Miyo gili aani, nlogo naaga ddi, wihina nivelele doovaha ndha dhatedhe? Dhatedhene dhinadha mmadani mweenyu, iyo nnuhogoloselani ndhe munivahilinyu.’ (1 Crô. 29:14) Naavahaga dhovelela nnamuhogolosela Yehova ndhe onivahiliye. Naari dhigarive ndo Yehova onohagalala vanlubale naalabihedhaga kopolo dhehu, dhokanna dhehu wihina nikavihere mabasa aye. — 2 Cor. 9:7.

17. Mwahaya bwaddi kinahoweleya okwerebeya wawomihedhaga thalo dhawo?

¹⁷ Wihina neddegeve mudila yopurana enanithukulela wigumini, nnohowela ohara thalo dha Yesu. (1 Ped. 2:21) Mbwenye yakala wihina enohoweleya owomihedha thalo dhawo kukwerebeye. Mwebaribarene ethu yapama, enoniha wi ohivelela wihina ohare dholaga dha Yehova. Wubuwele wi Yehova ohunona wi kanilogomane. Oliye kanajheha wi niharege nulogomana yotajhiha ya Yesu.

18. Wihina nifiye winayihu enahoweleya nere ddi?

¹⁸ Odidele osugwa osogolo, owomihedha mubuwelo, monelo ni dhowera dhawo. (Pro. 4:25; Luc. 9:62) ‘Odidele okala owiyeviha ni oohagalala wogoleliwaga.’ (2 Cor. 13:11) Werana yeyo ‘Mulugu odhivela ni a murenddele anere okala ni we.’ Vano kunafiye baahi mburo wawo, mbwenye onere ojhavo olenddo wawo.