1-2. Nnahare avi yolaga eri va Provérbios 4:25? Owoge dhopadduwa.

WUBUWELE dhopadduwa ndha. Murogola owunnuwelavo onna wubuwela malabo a mundduli. Naari afwanyiwaga makathamiho oliye anna wilibihera wihina amulabele Yehova ni murima watene. (1 Cor. 15:58) Malabo amatene oliye anowubuwela akalaga elabo exa naakwaye anaadhiveliye. Murogola mmodha anowubuwela wihina okala murogola ammulogoni amuthegele, naari dhigarive ndo omulevelela. (Col. 3:13) Ddibila anubuwela dhothega eriliyena mundduli, mbwenye anowilibihera okala ororomeleya adhowaga osogolo. — Sal. 51:10.

² Dhithu baani enna addibila ala dhiniwanana? Aliwa enowubuwela dhithu dhawereyele mundduli, mbwenye murima wewa kuli wengo. Aliwa ‘enosugwa pamadhene osogolo.’ — Omwileri Provérbios 4:25.

3. Mwahaya bwaddi egahoweleya ‘osugwa pamadhene osogolo?’

³ Mwahaya bwaddi sapama ‘osugwa pamadhene osogolo?’ Muthu kanande ohara dila wula mudhidhene asugwaga mundduli. Emodhave, kannande odhowave nimulabelaga Yehova wula nthabwaga wubuwela dhithu nerilihuna mundduli. — Luc. 9:62.

4. Dhithu baani nnahudherihu?

⁴ Yohudhera ela nnere owoga murako miraru dhinanerihe wubuwela dhithu dha mundduli. * (1) Munukwela wa malabo a mundduli, (2) okoya ntxiga, ni (3) wubuwela dhothega nerilihuna. Kadda murako nnere woona malagano a mBibliyani  enaanikavihere oddiwala ‘dhithu dha mundduli’ ni wilibihera wihina nifwanye ‘dhego dhosogolo.’ — Fil. 3:13.

5. Murako onawogiwa va Eclesiastes 7:10 buuvi?

⁵ Omwileri Eclesiastes 7:10. Woone wihina versikulu ela kinawoga wi sabure wikoha wegi: “Mwahaya bwaddi malabo a mundduli edhe ekalege apama?” Wubuwela dhego dhapama nvaho wa Yehova. Yolebela ela enawoga yegi: “Kuwoge wegi: ‘Mwahaya bwaddi malabo a mundduli edhe ekalege apama opitha malabo a peeno?’” Ni madhu mamodha, murako orivo buula, oliganiha malabo a mundduli ni apeeno ni woona wihina peeno dhithudha dhihithabwa orusa. Bibliya mmodhaya anatapulela yolebela ela egi: “Kukohe wegi: ‘Mwahaya bwaddi wale dhaaga dhogeddela pama?’ Nikoho nna kahi na muthu a thotho.”

6. Mwahaya bwaddi kahi ya thotho wubuwelaga “dhego dhapama dha mudhidhi wakale?” Owoge yopadduwa.

⁶ Mwahaya bwaddi kahi yapama wubuwelaga wi egumi yehu malabo a mundduli yahithabwa owomela? Mwaha enere onimoreliha mmurakoni wowubuwela dhego dhapama nindo ndduwale dhego dhabure dhinereyele. Wubuwele yopadduwa ya amwaana Ezarayeli. Nuumala okumihiwa Wijipitu mowaguva aliwa odduwala wihina yowona goyi. Yubuwela dhoojha dhapama yanniwana. Aliwa yawoga yegi: “Nnohowela oba najhihu nihilinve ethu Wijipitu, muhawa, mabubudda, alyo-poro sebola ni alyo!” (Núm. 11:5) Yoojha ele mwebaribarene “yaali yamahala?” Naari. Amwaana Ezarayeli yowonela goyi. Mudhidhi yole yowonihiwa goyi ninga adhari owijipitu. (Êxo. 1:13, 14; 3:6-9) Naari dhigarive ndo, aliwa odduwala makathamiho amatene, mbwenye okanna munukwela wubuwelaga malabo a mundduli. Amwaana Ezarayeli yasakunle wubuwela “dhego dhapama dha mudhidhi wakale,” ohiya wubuwela dhego dhapama Yehova aavahiye. Mohanganyedha Yehova ahukuuwa vanlubale ni ekalelo yeyo. — Núm. 11:10.

7. Yamukavihere murogola ohimorela mmurakoni wothabwa wubuwela dhego dha mundduli ddi?

⁷ Enaanikavihere ddi ohimorela mmurakoni  wowubuwela mudhidhi wakale? Woone yopadduwa ya murogola ambele okavihera Beteli yo Brooklyn yaka ya 1945. Nuuvira mudhidhi, oteliwa ni betelita mmodha, aabilene okaviheraga wengo muwari mwa yaka dhowinjhiva. Mbwenye muwari mwa yaka ya 1976, mamune okala muredda. Murogola ola onawoga wihina mamune ahinakwe ahinvaha dholaga dhapama wihina eddelege ahala. Oliye awogile egi: “Iyo nahikanna matelo ohagalasa. Athu owinjhiva kinna matelo ohagalasa.” Mbwenye oliye ahigikongomedha egi: “Kuwubuwelege dhego dha mundduli — naarive dhithu ndho dhikalaga mmuruni. Mudhidhi murombwe wapama. Kukale muthu abure newene kuwiweddelege thagaraga. Otamalele mwaha wakela ohagalala, mareeliho . . . Wubuwela, ndha nvaho wa Mulugu.” Mwebaribarene ela yolaga yapama, kunoonelamo?

8. Mwahaya bwaddi edhe ekalege yapama murogola ola ohara yolaga yohisugwa mundduli?

⁸ Murogolihu ole ahilabihedha pama madhu a mamune. Oliye ohumulabela Yehova nuroromeleya ofiyedha okwa, aganna yaka 92. Ahalaga nenaa wihina akwe oliye wera: “Ginowubuwela pamadhene yaka 63 gimulabelaga Yehova mudhidhi wamutene, miyo podi owoga ni murima wamutene gegi egumaga mwebaribarene ehigihagalasa.” Mwahaya bwaddi? Oliye anowoga egi: “Enathabwa ohagalasa egumi, si emudhi eri wapela elabo yatene ni ejhehero yokala ni addibilihu ni arogolihu mwilaboni yavati, nimulabelaga Namapaddusa Munlubale eebaribari Yehova, ni mukalakala.” * Mwebaribarene murogola ola yotajhiha yapama yosugwa pamadhene osogolo!

9. Ninga munawogela Levítico 19:18 mudhidhi baani onathabwa orusa ohikoya ntxiga?

⁹ Omwileri Levítico 19:18. Kinakweya ohikoya  ntxiga akala ddibilihu, mukwihu obe mmudhihu ohunthegela. Motajhiha, murogola mmodha ahiinkedhiwa ni murogola mmodhaya wihina ohumwiyela korowa. Nuuvira mudhidhi murogola ole odhowa omuloba nikurumuwelo, mbwenye murogola ole inkedhiwe kandile odduwala vano okoya ntxiga. Ethu ninga yela enowupadduwelaga? Akala onihina naari, podi wera nihikala labo ononiwe wihina kuwande ohikoya ntxiga.

10. Enaanikavihere ddi nakoya ntxiga?

¹⁰ Nakoya ntxiga enaanikavihere ddi? Wubuwele wihina Yehova onowoona dhatedhene. Oliye ohunona dhatedhene dhinanipadduwela ni ohogowawa onanoniha goyi. (Heb. 4:13) Oliye anowukuwa noonaga goyi. (Isa. 63:9) Teto oliye anopaganya wihina anere omariha goyi yatene enadha mwaha ohogowa. — Apo. 21:3, 4.

11. Mwahaya bwaddi ohikoya ntxiga ekala ethu yapama?

¹¹ Wubuwele wihina olevelela ononikavihera vanlubale. Siyeyo murogola ole akoyile ntxiga ooniliye. Nuuvira mudhidhi oliye ohiya ntxiga nne anniyena. Wonelamo wihina nalevelelaga amodha, Yehova anonilevelela. (Mat. 6:14) Oliye ahinona wihina murogola ole ahiviriganiha, mbwenye ahisakula ohikoya ntxiga. Nuwindo murogolihu okala ohagalalene ni wilibihera wihina amparele Yehova mabasa.

12. Va 1 João 3:19, 20, nnahudheravo ddi?

¹² Omwileri 1 João 3:19, 20. Malabo mamodha atenihu nnowubuwela dhoviriganiha dhehu. Motajhiha, amodha enowubuwela dhoviriganiha yeriliwana ehinahudhere ebaribari. Amodha nuumala obaddiziwa ehiviriganiha, wubuwela ndho dhinowawukula. (Rom. 3:23) Ebaribari wihina nnafuna nerena ele eli yapama, mbwenye ‘malabo owinjhiva nnokwakwathuwesa.’ (Tia. 3:2; Rom. 7:21-23) Naarive wubuwela dhoviriganiha dhehu ehili ethu yapama, yubuwelo ela podi onikavihera. Mwaha wa ddi? Yubuwelo ela podi onthukulela osaddula yeddelo yehu nindo nitwaruwe werana yothega. — Heb. 12:12, 13.

13. Mwahaya sapama ohuthabwa wubuwela dhothega dhehu dha kale?

¹³ Malabo mamodha iyo podi othabwa wukuuwa. Obe podi odidela wubuwela dhoviriganiha dhehu naari nigasinyuwe obe Yehova aganilevele. Makalelo ala owubuwela podi ohunikavihera. (Sal. 31:10; 38:3, 4) Ni makalelo baani? Wubuwele yopadduwa ya murogola dhaala anna ekalelo yothabwa wubuwela dhothega dhaye eriliyena kale. Oliye anowoga egi: “Gubuwela wihina kinahoweleya wilibihera wi gimparele Yehova mabasa. Goona wihina vihithabwa osa.” Owinjhiva wa iyo malabo mamodha nnowubuwela ndala. Mbwenye pole-pole, iyo podi omorela mmurakoni wothabwa wubuwela dhothega dhehu dha kale. Kabiha wubuwela makalelo Saddana anahagalaliye anonaga nihiyaga omulabela Yehova wula Yehova ahininyanyanle. — Omusugwe 2 Coríntios 2:5-7, 11.

14. Enanivaha ebaribari wihina Yehova kannyanyanle ddi?

¹⁴ Naari dhigari ndo we podi wikoha wege: “Ginakalena addi ebaribari wihina Yehova kaginyanyale?” Nikoha ndala ninna wiwakula. Yaka dha mundduli A Sentinela ohuwoga egi: “[Malabo owinjhiva] mmubuweloni mwehu nnona wi ninna okakathuwa nimoraga mwaha wa elemelelo nannihuna kale. Mbwenye kuselele. Kuddiwale wihina kuwerilena yothega ehinaleveleliwa. Saddana anafuna wihina nubuwelege yeyo. Woonaga wihina weriliwena enowutakalelo obe onowuukula enatapulela wihina kuthambwe odhowa woolapa. Kugome omusayela Yehova omulobaga  wihina ulevelele, uweelihe ni ukavihere. Omwaddamele ninga anerana mwaha anamususela baabe akanna makathamiho. Naari niviriganihaga dila dhowinjhivadhene, Yehova anere onikavihera vanlubale mwaha wa mahala aye ehinafwanelela.” *

15-16. Athu amodha enona avi yonaga wihina Yehova kasukumme?

¹⁵ Addibila owinjhiva yahihagalala yoniliwa wihina Yehova kasukumme. Motajhiha, yaka mundduli ddibila dhaala ahileri yopadduwa ekumile mu seriye “A Bíblia Muda a Vida das Pessoas.” Nvo vinomusoriha murogola anarumedha wihina mwaha wa mweddelo anniyena oona okala ethu yorusa wubuwela wi Yehova anomudhivela. Naari agabaddiziwe ahididela owanana yubuwelo ndha. Mbwenye wubuwela mukutho wa Yesu ohumuthukulela murogola ola orumedha wihina Yehova anomudhivela. *

¹⁶ Yopadduwa ela emukavihere addi ddibila ole? Oliye ohuleba egi: “Ngali mwana gihiwana vanlubale wihina gihiye omoona pornografiya. Ovaneneve gimorela murako mmodhave, vano miyo osayela nikavihero nanamaholela mulogo. Teto ginna wilibihera wi gihiye ekalelo ela. Aliwa ogoniha wihina Yehova anogidhivela ni da thagaraga. Malabo mamodha ginona wihina kaginafwanelela goonaga wihina kinandeya wi Yehova agidhivelege. Mbwenye wileri yopadduwa ya murogola ola ehigikavihera vanlubale. Vano ginowoona wihina wubuwela wi Mulugu kadha agilevelela emodhave wubuwela wi mukutho wa mwanaye Yesu kunafiyedha wihina okunele dhothega dhaaga. Miyo othukula revista nna okoya wilerigi mudhidhi watene goonimi wihina kaginafwanelela.”

17. Murumiwi Pawulo andile addi ohimorela murako wothabwa wubuwela dhothega dhaye dha kale?

¹⁷ Dhopadduwa ninga ndha dhinonubusedha murumiwi Pawulo. Ahinakale mukiristawu oherana dhothega dhinlubale. Pawulo owubuwela dhego eriliyena, mbwenye kahi wihina mudhidhi watene ubuwela dhendha. (1 Tim. 1:12-15) Oliye oona wihina mukutho  nvaho munlubale onvahile Mulugu. (Gál. 2:20) Ndala oliye kathabwa wubuwela dhothega dhaye, bumwahaya adhe amulabelege Yehova nuuviheya.

18. Dhithu baani nihudherihu peeno?

¹⁸ Dhithu baani nihudherihu ofiyedha ovanene? (1) Wubuwela dhego dhapama nvaho wa Yehova. Mbwenye naarive akala kale egumi yehu yahiwomela, egumi nnafunihu okanna osogolo enere othabwa owomela. (2) Amodha podi onitheegela, mbwenye nasakula olevelela nnere wanda odhowagave osogolo. (3) Othabwa wubuwelaga dhothega dhehu dha kale, podi onihiha omulabela Yehova nuuhagalala. Bumwahaya, ninga murumiwi Pawulo nnofwanelela orumedha wi Yehova ohunilevelela.

19. Nnonne addi wi mwilaboni exa kannathabwege wubuwela dhego dha mundduli?

¹⁹ Iyo nihikanna ejhehedhelo yokalawo ni mukalakala. Mwilaboni exa ya Mulugu, kannathabwege wubuwela dhithu dhivinre. Wodhela mudhidhi yoyo Bibliya anihina: ‘Dhego dha mundduli kadhinubuweliwege.’ (Isa. 65:17) Wubuwele, amodha enamulabela Yehova enna wuluvala, mbwenye mwilaboni exa atene enakale azombwe. (Jó 33:25) Bumwahaya kuthabwege osugwa mundduli. Wubuwelege osogolo ni osugwege pamadhene winayiwe!