Bibliya anawooniha wihina apaddusile Saddana kahiyo Mulugu. Oliye ampadduse mungero afiyeendhe okala Saddana. Bibliya anowoga wodhela Mulugu egihina: ‘Dhatedhene aneriyena soologomanave, mwaha dila dhaye dhatedhene sowogowa. Mulugu oororomeleya, ahinerana obure; owogowa ni apama duliye.’ (Deuteronómio 32:3-5) Ni madhu ala nihikanna ebaribari wihina Saddana ari ologomana ni ari mwana a Mulugu.

 Va João 8:44, Yesu wera Ddiyabo “ahihiya weddela ebaribari,” eyo enoniha wihina omabajhowene ari mwibaribarini ni ari apama.

 Yehova apaddusaga angero vamodha ni athu ohavaha ofuru wosakula werana ethu yapama obe yabure, ni Saddanaya apaddusiwe ni ofuru wimodhave. Vano mwaha wa omurugunuwela Mulugu ni wathukulela anamatelana obajha werana emodhave mungero oyo wisaddula mwinnya vano withaniwaga Saddana enatapulela “Mwiddani.” — Génesis 3:1-5; Apocalipse 12:9.