Ong’wa mwa makalelo opimelela kahi yothega Bibliya anihina vinyu nvaho wa Mulugu teto enohagalasa murima wa muthu. (Salmos 104:14, 15; Eclesiastes 3: 13; 9:7) Bibliya anowoga wihina vinyu enokavihera egumi.—1 Timóteo 5:23.

 Yesu agaali mwilaboni yavati ong’wa vinyu. (Mateus 26:29; Lucas 7:34) Teto agaari va mathangani va matelo ahasaddula manjhe wihina ekale vinyu. Matikiniho ala ehithabwa ononiwa.—João 2:1-10.

Pole-pole olezela ofiyedha okala tapata

 Ebaribari wihina Bibliya kanakooddiha ong’wa mopimelela. Mbwenye, anowoga wihina yothega ong’wa ofiyedha okala tapata. Mukiristawu athomile ong’wa anohowela okala pasope. (1 Timóteo 3:8; Tito 2:2, 3) Bibliya anovaha dholagihedha dhinoniha wi kanithabwihege ong’wa ofiyedha olezela. Kabeni none.

•   Othabwiha ong’wa winoviriganiha ogogo vamodha ni ekalelo yapama. (Provérbios 23:29-​35) Muthu oolezela kananda wiwelela nlamulo nna nni: ‘Mpeleke mwiili weenyu ninga mukutho wegumi, wotxena, onarumedhiwa ni Mulugu, mulabaga mabasa ootaleleya nimakalelo enyu oopendda.’—Romanos 12:1.

•   Muthu alezela kanubuwela pama teto anohiya ‘werana ele eri yapama’ — Oseias 4:11; Efésios 5:18.

•   Ong’wa bura winotota ohawa ni winodhiha makathamiho mwigumini.—Provérbios 23:21, 31, 32.

•   Olezela ethu enamutakalela vanlubale Mulugu.—Provérbios 23:20; Gálatas 5:19-21.

Okwaranyiha muddidda enatapulela ddi?

 Muthu anakwaranyiha muddidda aathabwaga ong’wa ofiyedha witotela makathamiho ni watotela makathamiho athu amodha. Olezela kinatapulela baahi ong’wa ofiyedha okala tapata. Bibliya anowoga dhinoniha wi muthu ohulezela. Motajhiha, muthu ahiwedhaga opwaaseya, okangana naathu amodha ahandaga owoga pama teto eeddaga oberimene. (Jó 12:25; Salmos 107:27; Provérbios 23:29, 30, 33) Naarive muthu ani alezela okalaga ninga kalezenle, podi okanna elemelelo . . . yofunagave ong’wa mudhidhi watene. Ekalelo eyo podi wadhana makathamiho manlubale mwigumini.— Lucas 21:34, 35.

Malabo mamodha sapama ohiyawene ong’wa

 Bibliya anowoga wihina muthu ahandaga opimelela yapama wakale ohiyawene ong’wa. Motajhiha:

•   Akala nang’wa onnowakwakwathusa athu amodha.—Romanos 14:21.

•   Akala nang’wa nnowalupa malamulo anamathonga.—Romanos 13:1.

•   Ong’wa wathabwa wuvolowela mmwiilini. Muthu ahinamwalana ni dhong’wa obe anang’wa malabo amatene anohowela werana ethu sithu mowaguva.—Mateus 5:29, 30.