Hee. Mulugu anothuwa-thuwa mudharaaye aabulelaga. Bibliya anopaganya: ‘Yehova anere wukavihera wakala muredda.’ (Salmos 41:3) Akala ohukanna oredda ohunamala, thalo dhinaharela podi wukavihera:

1.   Olobelege olobaga kopolo wi wande ovilela. We podi wakela ‘murenddele wa Mulugu onakwaranya dhithu dhatedhene.’ Murenddele oyo podi ovugula othuwa-thuwa wawo ni wukavihera odhowagave ovilelaga. — Filipenses 4:6, 7.

2.   Okalena moonelo wapama. Bibliya anowoga egi: ‘Murima wohagalala murombwe wapama, mbwenye murima wokubanya winokukumula.’ (Provérbios 17:22) Osayelege okala ohagalala, mwaha ohagalala winere wukavihera okanna egumi yapama.

3.   Olibiheve ejhehedhelo onniwena yosogolo. Naarive oganna oredda ohunamala, okanna ejhehedhelo yoliba podi wukavihera okanna ohagalala. (Romanos 12:12) Bibliya anopaganya wi onere ofiya mudhidhi ‘ahinakalewo muthu anaadhe eere: “Miyo gili muredda.”’ (Isaías 33:24) Mulugu anere omariha dhiredda dhihinna murombwe, athu peeno ehinandiwa omariha. Motajhiha, Bibliya anowoga makalelo athu enaahogoloweliwa okala azombwe egi: ‘Mwiili waye okale mukiteene okwaranya wa muzombwe; oliye ahogolowele kopolo anniyena agaali muzombwe.’ — Jó 33:25.

 Osugwe: Naarive Anamona a Yehova enonaga wi Mulugu anookavihera, yakala aredda enodhowa ospitale esayelaga murombwe. (Marcos 2:17) Mbwenye kannamuwaddihedha muthu ojha murombwe bu murombwe, mwaha nihinona wihina kadda muthu ohukanna ofuru wothoma murombwe anafuniye ojha.