Makalelo nnonihu ni nnerihuna mutugumano dha vamakwelo dhinadhela mBibliyani. Motajhiha, Bibliya anihina:

•   Kahi yabure okala owukuwene muthu nnamudhivelihu akwa. Motajhiha, anamahara a Yesu yowunla ni yowukuuwa vanlubale okwa muthu yamudhiveliwa. (João 11:33-35, 38; Atos 8:2; 9:39) Bumwahaya, vamakwelo kahiyo mburo vinagumanihu wihina naredhegevo. (Eclesiastes 3:1, 4; 7:1-4) Mbwenye nadhowaga omakwelo nnafuna noonihe wi nnowaweddela thagaraga ni nnowadhivela athu amodha.—Romanos 12:15.

•   Anookwa kinonne ethu newene kinona dhithu dhinapadduwa mmambalo. Naarive nigaari a dhilabo ni mweddelo dhohiyana, kannerana ethu enathukulela anookwa wubuwelaga wi anookwa ehikalawo. (Eclesiastes 9:5, 6, 10) Podi okala ninga wavaha mukutho anookwa, waloba wi enerele ethu-sithu newene owara dhowara dhemamukwele. Iyo kannerana dhilemelelo ndha mwaha nniwelela ndhe dhinawoga Bibliya egi: ‘muhiye werana dhithu dhonyakavala.’—2 Coríntios 6:17.

•   Ale ekwile enere ovenyihiwa mukwani. Bibliya anoohudhiha wi winere okala a ovenyihiwa teto okwa onere omala. (Atos 24:15; Apocalipse 21:4) Ninga yakaviheriiwa makiristawu obajha, ejhehedhelo yovenyihiwa mukwani enonikavihera ohuthabwa okala owukuwene ni oherana dhithu dhonyakavala vamentoni va Mulugu.— 1 Tessalonicenses 4:13.

•   Bibliya anonikongomedha ohukala athu owithukula. (Provérbios 11:2) Kannadhowa omakwelo wi nawonihe athu amodha wi nihikanna korowa. (1 João 2:16) Bumwahaya mutugumano dhehu dha vamakwelo kannegeredha dhithu dhokwima wi nathukulena athu murima.

•   Kannawaddihedha athu amodha wegeredha mutugumano dhewa dhomakwelo ninga nnafunelihu. Iyo nnahara nlagano na mBibliyani nnihina: ‘Kadda muthu anakulelege yothega yaye’ (Romanos 14:12) Mbwenye wakala mudhidhi wofwanelela nnowawaddela athu amodha ndhe nnarumedhihu ni ‘nuupama vamodha ni nriho.’—1 Pedro 3:15.

 Mburo: Anaamudhi yafuna okalawo mutugumano wa omakwelo podi weriwana mburo enathomiwa ninga mu Nyumbani Yomwene, mburo onapwehiwa wanookwa, vade vamwanokwaya, va amudhaaye obe omahame.

 Mwaha: Vinowogiwa mwaha wa mBibliyani wihina elibihiwena ni etodoliwena anamudhiya vamodha nakwaye ni onawoga wodhela ejhehedhelo yovenyihiwa muukwani. (João 11:25; Romanos 5:12; 2 Pedro 3:13) Mwaha oyo wawogiwa dhinowogiwa dhikalelo dhapama anna muthu ole akwile teto podi owogiwa ethu nnahudherihu ni nroromelo anniyena.—2 Samuel 1:17-27.

 Podi wibavo jhibo enakumela mBibliyani. (Colossenses 3:16) Omagomihedho nnoweriwana nlobelo nnalibiha aatene erivo.—Filipenses 4:6, 7.

 Korowa: Kannakukusa korowa mwaha wa mabasa nnaparihu, na mabasa a vamwakwelova. Newene natugumanaga kanneddana togwa.— Mateus 10:8.

 Athu: Naaleya ehiri anamoona a Yehova podi odhowa omakwelo naarive ogaali onyumbani Yomwene. Ni makalelo mamodhave dhineddiwa mutugumano dhehu athu aatene podi omakwelo wa Anamoona a Yehova a.

 Kadda Namona a Yehova anathoma yeka olabihera mubuwelwaye oxagihiwe ni Bibliya. (1 Timóteo 1:19) Mbwenye, kannadhowa omutugumanoni wula mutugumanoya ohiwananaga niile anahudhiha Bibliya.—2 Coríntios 6:14-17.