A Jehovah u kʼati kaʼ ti weelte u pektzil u famiilia a keʼenooʼ ti kaʼan. ʼAanjelooʼ abʼeeʼ. «U mejenooʼ Dʼios» ti walak u adʼabʼälooʼ. (Job 38:7) Kʼuʼ a walak u yadʼik a Bʼibʼle tupektzilooʼ a ʼaanjele? Kʼuʼ a walak u bʼetik tiʼijooʼ a kristiyaano? Laj u famiiliajooʼ wa Dʼios tulakal a ʼaanjele?

1. Makooʼ a ʼaanjele?

ʼAantes u betik a yokʼolkabʼa, a Jehovah u bʼetajooʼ a ʼaanjele. Esperito a Jehovah y bʼoobʼeʼooʼilik a ʼaanjele, ti kaʼan kumaʼanooʼ. (Hebreos 1:14) Ti millones a ʼaanjel yanooʼo y maʼ laj ketooʼ u modʼoj. (Revelacion 5:11) Walakooʼ «u mansik u mensaaje a [Jehovah] y u tzʼokʼsikooʼ u tʼan.» (Salmo 103:20) Ichil a kʼin a mani, a Jehovah walak u usaartik u ʼaanjel tiʼi kaʼ u mansej u tʼan tiʼijooʼ u jente y tiʼi kaʼ u yaantooʼ. Aleebʼe walakooʼ u yaantik aj tzʼokʼsaj tiʼi kaʼ u käxtooʼ a mak u kʼati u kambʼalte u pektzil a Dʼioso.

2. Makooʼ a kʼakʼas ʼaanjel etel a Kisini?

Yanooʼ a ʼaanjel maʼ u kulesajooʼ u tzʼokʼsaj tiʼi a Jehovah. Leʼek a ʼaanjel a primero uchi u chich polili «Quisin y Satanas, cu tʼanooʼ tiʼi. Leʼek alaʼaji, walac u choʼic tulacal a cristiano yocʼolcaba.» (Revelacion 12:9) A Kisini u kʼati u kontrolaartooʼ a maka. U choʼaj a primero kristiyaano leʼek aj Adan etel ix Eva y u choʼajilik ulaakʼooʼ a ʼaanjel tiʼi kaʼ uchukooʼ u chich polil. Kʼakʼas ʼaanjel ti walak u adʼabʼälooʼ adʼaaʼ a uchooʼ u chich polili. Jokʼsabʼooʼ ti kaʼan pulbʼooʼ tuwich yokʼolkabʼ umen Jehovah y bʼelooʼ u kaʼa jobʼsabʼäl.​—Xoko a Revelacion 12:9, 12.

3. Bʼiki ti walak u yaaltik u choʼon Kisin etelooʼ a kʼakʼas ʼaanjel?

Leʼek a Kisin etel u yaj kʼakʼas ʼaanjel walakooʼ u usaartik a kʼakʼas esperito kaʼ u choʼooʼ a maka. Walakooʼ u tzʼeek u tukle ti jedʼeʼekooʼ u chiitik a kʼakʼas esperito y ti jedʼeʼekooʼ u meyaj etel. Por ejemploj yanooʼ a mak walakooʼ u bʼel etelooʼ aj naʼat, aj pulyaʼaj y etel aj ilma. Walaklik u choʼbʼolooʼ a kristiyaano umen Kisin tiʼi kaʼ u tzʼokʼsooʼ ti jedʼeʼek u chiitikooʼ a kimene. Pero a Jehovah tan u yadʼiktoʼon: «Maʼ a bʼeleʼex etel a mak a walak u chiitikooʼ a kʼakʼas esperito y maʼ a bʼeleʼex etelooʼ aj naʼat.» (Levitico 19:31) Tan u yadʼik Jehovah adʼaaʼ tiʼi kaʼ u känäntoʼon tuwich Kisin y tuwichooʼ a kʼakʼas ʼaanjel. U elemiingojooʼ Dʼios y u kʼatooʼ u yajkuntoʼon.

 MAS KAMBʼALTETO

6. Maʼ a chaʼik u choʼikech Kisin etel u yaj kʼakʼas ʼaanjel

Kisin tan u chʼaʼikooʼ u bʼenil a kʼakʼas ʼaanjel. A Miguel ulaakʼ u kʼabʼaʼ a Jesusu, leʼek tan u chʼaʼik u bʼenil a ʼaanjel a tanooʼ u tzʼokʼsaja. Bʼoon u yaabʼil u mukʼ a Miguele? Xokeʼex a Revelacion 12:7-9, kaʼtun tzikbʼalteʼex a kʼaatchiʼooʼ adʼaʼa:

• Mak a mas yaabʼ u mukʼu? A Miguel wa etelooʼ u ʼaanjel waxan Kisin etelooʼ u yaj kʼakʼas ʼaanjel?

• Kʼabʼeet wa kaʼ u saaktooʼ a Kisin etel u yaj kʼakʼas ʼaanjel u yaj täkʼään a Jesus tatukliki?

Jedʼeʼek a paatal a pʼisbʼatej a Kisin etel u yaj kʼakʼas ʼaanjelooʼ. Xokeʼex a Santiago 4:7, kaʼtun tzikbʼalteʼex a kʼaatchiʼ adʼaʼa:

• Bʼiki ti jedʼeʼek a känäntik a bʼajil tuwich a Kisini y tuwichooʼ a kʼakʼas ʼaanjel?

 KʼUʼ A KÄNAJA

Leʼekooʼ a ʼaanjel a tanooʼ u tzʼokʼsaja walakooʼ u ʼaantikoʼon. Leʼek a Kisin etelooʼ u yaj kʼakʼas ʼaanjele u elemiingojooʼ Jehovah y walak u choʼikooʼ a mak tiʼi kaʼ u bʼetooʼ a meyaj etel a kʼasaj.

Tzikbʼalbʼäl kʼuʼ ti känaja

• Leʼekooʼ u ʼaanjel a Jehovah bʼiki ti tan u aantikooʼ a kristiyaano kaʼ talakooʼ u naʼtej u pektzil a Dʼioso?

• Maki a Kisin etelooʼ a kʼakʼas ʼaanjel?

• Kʼuʼkaʼa maʼ a kʼati a kʼämoolte u bʼetabʼäl a bʼaʼal etelooʼ a kʼakʼas esperito?