Yan wa mak a kimen tiʼitech a yaj a wuyiji? Ti kimi, uchak a tuklaj: ‹Kʼuʼ a walak u uchul toʼon ti walak ti kimili? Jedʼeʼek wa in kaʼilik jumpʼeel kʼini?› Tzʼaj ti kuentaj ichil a kambʼal adʼaaʼ y ichil a kambʼal 30 u nuukbʼeebʼ a kʼaatchiʼooʼ adʼaaʼ ich Bʼibʼle. Bʼel u kaʼa u jetzʼkunte a wool u nuukbʼeebʼ.

1. Kʼuʼ a walak ti kʼämik ti walak ti kimili?

A Jesusu u ketaj a kimil etel wäyälä. Leʼek ti kimen ti wäyäl a maka maʼax kʼuʼ a kʼäjaʼan tiʼi y maʼ u yeel kʼuʼ a tan tuxoyo. Bʼiki ti ket a kimil etel a wäyälä? Tukimil a maka, maʼ u yeel kʼuʼ a tan u yuchul tuxoyo, maʼax kʼuʼ ti yajil a tan u yubʼik y maʼ tan u penaar. A Bʼibʼle u yadʼaj ti «Leʼek a kimenooʼo maʼax kʼuʼ a käjaʼanooʼ tiʼi.»​—Xoko Eclesiastes 9:5.

2. Kʼuʼ u kiʼil tiʼitoʼon ti tan ti weeltik u jajil u pektzil a kimili?

Yaabʼ a mak saakooʼ ti kimil y saakooʼ tiʼi a kimene! Pero jedʼeʼek u jetzʼkuntik a wool kʼuʼ u yadʼaj a Bʼibʼle tupektzil a kimili. «Leʼec a jajil tʼana, bel u cu tzʼaʼ teʼex caʼ chaʼbüqueʼex,» ku tʼan a Jesusu. (Juan 8:32) Ulaakʼooʼ a religiono walakooʼ u kaʼansik ti yan u pixan a kimene, a Bʼibʼle maʼ walak u kaʼansik abʼeeʼ. Ti bʼoobʼeʼe, a kimenooʼo maʼ tanooʼ u kʼämik a yaja. Maʼ jedʼeʼekooʼ u yajkuntikoʼon umen maʼax kʼuʼ a kaʼ kʼäjaʼanooʼ tiʼi. Mentäktunu maʼ kʼabʼeet kaʼ ti tzʼaaʼ u yanil a kimene waxan kaʼ uchukoʼon ti payajchiʼ tiʼijooʼ.

Yanooʼ a maka, walakooʼ u yadʼik ti jedʼeʼekooʼ u tzikbʼal etel kimen. Pero jumpul maʼ jedʼeʼek abʼeeʼ. Jabʼix ti kambʼaltaja, a kimenooʼo «jumpul maʼax kʼuʼ kʼäjaʼanooʼ tiʼi.» Leʼek mak tan u tuklik ti tanooʼ u chiitik a mak a kimen tiʼijooʼo, jedʼeʼek ti a kʼakʼas ʼaangel a tanooʼ u chiitiki, maʼ leʼek a kimene. Leʼek ti walak ti känik u jajil bʼiki ti yan ich Bʼibʼle, walak u yaantikoʼon ti känänte ti bʼajil tuwichooʼ a kʼakʼas ʼaangel. A Jehovah ak walak u yadʼiktoʼon ti maʼ kiʼ kaʼ uchukoʼon ti tzikbʼal etel a kimene, umen u yeel ti jedʼeʼek u yajkuntikoʼonooʼ a kʼakʼas ʼaangele.​—Xoko a Deuteronomio 18:10-12.

3. Kambʼalte u jajil u pektzil kʼuʼ a walak u kʼämik a mak ti walak u kimili

Tupeteebʼal a yokʼolkabʼa, jujunpaay kʼuʼ a walakooʼ u tzʼokʼsik a kristiyaano tupektzil kʼuʼ a walak u yuchul ti walak u kimil a maka. U jajili, maʼ laj jaj kʼuʼ a walakooʼ u tzʼokʼsik.

• Kʼuʼ a walakooʼ u tzʼokʼsik a mak tubʼaj kumaʼaneche?

 4. Yan u kiʼil tiʼitoʼon ti tan ti weeltik u jajil u pektzil a kimili

Tanil ti weeltik u jajil u pektzil a kimene, maʼ kaʼ saakakoʼon tiʼijooʼ. Xokeʼex a Eclesiastes 9:10, kaʼtun tzikbʼalteʼex a kʼaatchiʼ adʼaʼa:

• Jedʼeʼek wa u yajkuntikoʼon a kimene?

Tanil ti weeltik u jajil kʼuʼ a walak u yadʼik a Bʼibʼle tupektzil a kimen, walak u känäntikoʼon tuwich a kaʼansaj ti tzʼaj ti tzeentik waxan ti tzʼeek u yanil a kimene. Xokeʼex a Isaias 8:19 etel a Revelacion 4:11, kaʼtun a tzikbʼalteʼex a kʼaatchiʼ adʼaʼa:

• Bʼiki u yool a Jehovah yokʼlal a mak a walak u tzʼeek u yanil waxan u kʼaat antaj tiʼijooʼ a kimene?

5. Tan u kiʼkuntik ti wool ti tan ti känik u jajil u pektzil a kimili

Yaabʼ a mak kaʼansajaʼanooʼ tiʼi ti leʼek ti kimikooʼo, bʼelooʼ u kaʼa u kʼämäʼ a yaj umen a kʼas a manaʼanooʼ u bʼeteʼ. Mil u kiʼil ti wool ti kaʼ ti weeltaj ti maʼ walak u kʼämik a yaj a mak ti walak u kimili, maʼax leʼek a mak a manaʼan u bʼeteʼ a top kʼas ichilooʼ u kuxtala. Xokeʼex a Romanos 6:7–​NWT, kaʼtun tzikbʼalteʼex a kʼaatchiʼ adʼaʼa:

• A Bʼibʼle u yadʼaj leʼek ti kimik juntuulak a maka, saʼtesabʼi u sipʼil, ti bʼoobʼeʼe, leʼek mak a kimene tan wa u kʼämik a yaj umen u sipʼili?

Tanil ti mas eeltik a Jehovah mas ti naʼtik ti jumpul maʼ jedʼeʼek u bʼetik a yaj tiʼijooʼ a kimene. Xokeʼex a Deuteronomio 32:4 etel a 1 Juan 4:8, kaʼtun tzikbʼalteʼex a kʼaatchiʼoo adʼaʼa:

• Leʼek a Dʼios ti känaj u pektzil ichilooʼ a versicolo adʼaaʼ, jedʼeʼek wa u chuwikooʼ a mak ti bʼebʼeele?

• Bʼiki a wool ti tan a naʼtik u jajil u pektzil a kimili? Kʼuʼkaʼa?

 KʼUʼ A KÄNAJA

Leʼek ti walak u kimil a maka, teʼ jobʼi u kuxtal. Maʼ walak u kʼämikooʼ a yaj a kimene y maʼilik jedʼeʼekooʼ u yajkuntik a kuxaʼanooʼi.

Tzikbʼalbʼäl kʼuʼ ti känaja

• Kʼuʼ a walak u yuchul toʼon ti walak ti kimili?

• Kʼuʼ u kiʼil tiʼitoʼon ti walak ti weeltik u jajil u pektzil a kimili?

• Leʼek ti walak ti känik u jajil u pektzil a kimili, bʼiki ti walak u jetzʼkuntik ti wool?