Bũmb sẽn tõe n kɩt tɩ f yãk yam-kãnga: Tõe tɩ f rat n zẽka f meng f zo-rãmbã taoore, n wilg-b tɩ f maanda f sẽn date. Fo tagsdame tɩ f mii sẽn yaa sõma n yɩɩd f roagdbã. Sẽn paase, f toog kae ne b sẽn yet bũmb ningã ye.—Yel-bũnã 14:18.

 Sẽn na n baas to-to: F zo-rãmbã yẽ na n bãngame tɩ f maanda f sẽn date. La ad bũmb a to me b sẽn na n bãnge: Sẽn mik tɩ f toogkae ne f roagdbã, dẽnd f toog kae ne f zo-rãmbã me ye. Sẽn paase, f roagdbã sã n wa bãng f sẽn maanã, b sũurã na n sãama ne-fo. B pa na n le kõ-f sor tɩ f kẽng f sẽn datẽ ye.—Yel-bũnã 12:15.

 Bũmb sẽn tõe n kɩt tɩ f yãk yam-kãnga: Tõe tɩ f na n tagsa soaare wã yelle, n yeel tɩ b sẽn na n maan be wã pa na n yɩ-f noogo, la tɩ fo pa nong neb nins sẽn na n wa wã tũud-n-taar ye. (1 Korẽnt-rãmbã 15:33; Filip-rãmbã 4:8) Tõe me tɩ f rat n kẽngame, la f pa mi f sẽn na n maan to-to n kos f roagdbã sor ye.

 Sẽn na n baas to-to: F sã n mi tɩ f sã n kẽng soaare wã pa yam sõngo, f zo-rãmbã sã n wa sok-fo, f na n bãng n leok-b lame. La sã n yaa f sẽn pa mi f sẽn na n maan to-to n kos f roagdbã sor yĩng la f pa kẽnge, f sũurã na n sãamame, bala f na n zĩi zakẽ n tagsd f sẽn pa na n paam n deemã.

 Bũmb sẽn tõe n kɩt tɩ f yãk yam-kãnga: Fo sak n deegame tɩ f roagdbã n so foo, la tɩ f tog n waoog-b lame. (Koloos-rãmbã 3:20) Fo nonga f roagdbã, n pa rat n soos n yi, tɩ wa sãam b sũur ye. (Yel-bũnã 10:1) Sẽn paase, f sã n kose, f paamd n wilg-b-la bũmb ning sẽn kɩt tɩ f rat n kẽngã.

 Sẽn na n baas to-to: F roagdbã na n bãngame tɩ f sɩd nong-b lame, la tɩ f waoogd-b lame. Tõe meng tɩ b sak n kõ-f sore, sã n mikame tɩ f sẽn kot bũmb ningã na n nafa foo.

 D rɩk makre: F sã n kẽng n na n tɩ rug koom, f nongẽ lame tɩ neb be be n tõe n sõng-fo. Bõe yĩnga? Bala ned sã n be koomẽ n deemdẽ, yell sã n watẽ, a tõeeme n pa bãng ye. La neb sẽn yas koomã noor n getẽ tõe n yãa yellã. Woto me, f roagdbã tara yam, b leb n mii yɛlã n yɩɩd foo. B tõe n yãa soaare wã kẽngr sẽn tõe n wa ne yell ningã. B pa rat n gɩdg-f tɩ f noog f yõor ye. La b pa rat me tɩ yell paam-fo, n sãam f vɩɩmã ye.

 Bʋʋm a to. F roagdbã rata ne b sũur fãa n kogl foo. B sẽn nong foo wã yĩnga, b mi n sak n kõ-f-la sor tɩ f maan f sẽn date. La daar ninga, b zãgsdame. Bãng tɩ f sã n kos-b bũmbu, bãmb me sokda b meng yaa: “D sã n sake, d pa na n wa maan d bãngẽ sɩda?” Dẽnd b sã n wa sak bũmb f sẽn kose, yaa b sẽn mi tɩ pa na n wã-fã yĩnga.

F sẽn tõe n maane

 Tall pʋ-peelem. Sok f menga: ‘Bõe yĩng tɩ m dat n kẽnge? Yaa sẽn noom maamã yĩng bɩ, bɩ yaa m sẽn dat n maan wa m taabã? M yamã kẽe ned tɩ m dat n paam yã-a bɩ? Rẽ poore, togs f roagdbã sɩda. Ad bãmb me yɩɩ kom-bɩɩse. Sẽn paase, b mii foo sõma. B mii bũmb ning sẽn kɩt tɩ f rat n kẽngã. F sã n pelg f pʋg ne-ba, b sũur na n yɩɩ noog tɩ b kõ-f sagls sẽn na n naf-fo. (Yel-bũnã 7:1, 2) La f sã n pa pelg f pʋg ne-ba, b pa na n kɩs-f sɩd ye. Dẽnd b pa na n sak f sẽn kot bũmb ningã ye.

 Wakatã: Da pẽdg f roagdbã ye. Sẽn yɩɩd fãa b sã n nan sig tʋʋma, bɩ b sã n maand bũmb a to sẽn tar yõodo. Bas tɩ b sã n wa tar sẽka. Kos sor me tɩ ket n zãra. Ra bas tɩ daarã ta tɩ f pẽdgd-b n dat tɩ sak ye. F sã n kos tɩ ket n zãra, b paamd n tagsame n bãng b sã n na n sak n kõ-f-la sore.

 F sẽn na n gom to-to wã: Togs bũmb ning f sẽn datã vẽenega. B sã n sok-f sokr tɩ f yeel tɩ f pa mi, na n yɩɩ toog tɩ b sake. Wala makre b sã n dat n bãng ãnd-dãmb n na n wa soaare wã, kãsem sã n na n zĩnda be, wall f sẽn na n wa zakẽ lɛɛr ningã, leok vẽenega.

 Fo sẽn tagsd to-to wã: F roagdbã pa fo bɛɛb ye. Yaa neb sẽn be fo sõngr yĩnga. Rẽ na n kɩtame tɩ f ra yik f sũur ne-ba, bãmb me na n maaga b yĩng n kelg foo.

 Baa f roagdbã sã n zãgs n pa kõ-f sore, wilg tɩ f nand-b lame, la tɩ f saka yam ning b sẽn yãkã. Rẽ, bãmb me na n nanda foo. Sẽn paase, f sã n le wa kos-b sor n na n maan bũmbu, tõe tɩ b sake.