Biiblã sagenda tõnd tɩ d kõt d taabã ne yamleoogo, la ne yam-sõngo. Biiblã wilgdame tɩ kũun a woto buud nafda ned ning sẽn deegdã. La pa rẽ bal ye. Nafda sẽn kõt-a wã me. (Yel-bũnã 11:25; Luk 6:38) A Zeezi yeelame yaa: “Kũun wata ne sũ-noog n yɩɩd reegre.”—Tʋʋma 20:35.

•  Kũun ning buud sẽn tat Wẽnnaam yamã

•  Kũun ning buud sẽn pa tat Wẽnnaam yamã

•  Biiblã vɛrse-rãmb sẽn gomd kũunã yelle

 D sã n kõt d taabã ne yamleoogo, tata Wẽnnaam yam. Biiblã yetame yaa: “Bɩ ned kam fãa maan wa a sẽn tags a sũurẽ, la pa ne nen-gãneng wall ne modgr ye. Bala Wẽnnaam nonga ned ning sẽn kõt ne sũ-noogo.”—2 Korẽnt rãmbã 9:7.

 Kõ ne d sũur fãa wã naaga bũmb nins “tũudum” ning sẽn tat Wẽnnaam yamã sẽn dat tɩ d maanã. (Zak 1:27, notã) Ned sã n sakd n sõngd neb sẽn be sõngr daab pʋgẽ, a maanda bũmb sẽn tat Wẽnnaam yam. Wẽnnaam geta kũun a woto buudã wa yaa yẽ la b pengda. (Yel-bũnã 19:17) Biiblã wilgdame tɩ Wẽnnaam mengã n na n keo kõata.—Luk 14:12-14.

 Yaa kũun ned sẽn kõt tɩ pa ne yam-sõngo. Wala makre:

•   Sẽn na yɩl tɩ nebã pẽg-a.—Matiye 6:2.

•   Sẽn na yɩl tɩ neb a taabã me kõ-a bũmb n lebse.—Luk 14:12-14.

•   A sẽn tagsd tɩ rẽ n na n kɩt t’a paam fãagr yĩnga.—Yɩɩn-sõamyã 49:6, 7.

 Kũun b sẽn kõt n teend tʋʋm wall bũmb a taab Wẽnnaam sẽn kisi. Wala makre, y sã n kõ ned ligd t’a na n par n bao ligdi, bɩ n da dorg n yũ, wall a ra rãam n yũ tɩ looge, yaa wẽnga. (1 Korẽnt rãmbã 6:9, 10; 2 Korẽnt rãmbã 7:1) Ned sã n tõe n tʋmame n ges a meng yelle, la a zãgs t’a kõn tʋme, pa zems me tɩ d kõ-a ligd ye.—2 Tesalonik rãmbã 3:10.

 Ned sẽn na n kõt neb a taabã kũuni, n yaool n pa get a zakã rãmb yell sõma. Biiblã yetame tɩ yaa zakã soab n segd n ges t’a zakã rãmb paam sẽn yaa tɩlɛ wã. (1 Tɩmote 5:8) Zak soab sã n kõt neb a taab kũun t’a zakã rãmb yaool n namsdẽ, pa zems ye. A Zeezi me yeela neb nins sẽn zãgs tɩ b kõn ges b roagdb nins sẽn kʋʋlã yell n yetẽ tɩ b paoongã fãa yaa ‘kũun b sẽn kõ Wẽnnaamã,’ tɩ b tara taale.—Mark 7:9-13.