Biiblã goma yĩngã gʋlb yell vugr bala. Yaa Maan-kʋʋr 19:28 pʋgẽ. B yeelame: “Bɩ y . . . ra gʋl y yĩnsã me ye.” Wẽnnaam kõo Israyɛll nebã no-kãngã sẽn na yɩl n welg-b ne tẽn-yagsã nebã sẽn da gʋnd b wẽnnaam-dãmbã yʋy wall b bãnã b yĩnsẽ wã. (Tõodo 14:2) Baa sẽn pa tɩlɛ tɩ kiris-nebã tũ Tõogã Wẽnnaam sẽn da kõ Israyɛll nebã, d segd n tagsa saglg ning sẽn be no-kãngã pʋgẽ wã zug neere.

Kiris-ned tõe n sakame tɩ b gʋl a yĩng bɩ?

 Ad Biiblã vɛrse-rãmb a wãn sẽn tõe n sõng-y tɩ y bãng sok-kãngã leoore:

•   “Pagbã segd n manegda b mens ne sik-m-menga.” (1 Tɩmote 2:9, Traduction du monde nouveau) Pagbã ne rapã fãa segd n tũu no-kãngã. D segd n gũusame tɩ d sẽn manegd d mens to-to wã ra wa sãam neb a taabã sũyã, la d ra manegd d mens nebã gesg yĩng bal ye.

•   Neb kẽer kɩtdame tɩ b gʋl b yĩngã b sẽn dat n wilg tɩ b pa wõnd b taabã wall tɩ b so b mens yĩnga, tɩ sãnda yaa sẽn na n wilg tɩ b maanda b sẽn dat ne b yĩngã. La Biiblã yeta kiris-nebã yaa: “Kõ-y y yĩnsã tɩ yɩ maoong sẽn vɩ, sẽn yaa sõma, sẽn noom Wẽnnaam, rat n yeel tɩ y tʋm Wẽnnaam tʋʋmdã ne y yamã.” (Rom-dãmbã 12:1, Traduction du monde nouveau) Tags-y “ne y yamã” n bao n bãng y sẽn dat tɩ b gʋl y yĩngã võore. Sã n yaa neb wʋsg sẽn kɩtd tɩ b gʋnd b yĩnsã wall y sẽn dat n wilg tɩ y naaga sull ning yĩnga, yɩta sõma tɩ y tẽeg tɩ y yamã tõe n wa toeemame, la tɩ b sã n gʋl y yĩngã, yaa bũmb sẽn pa yit ye. Y sã n bʋgs bũmb ning sẽn kɩt tɩ y rat rẽ wã zug neere, tõe n sõng-y lame tɩ y bãng n yãk yam.—Yel-bũnã 4:7.

•   “Ned sã n mag n yaool n tʋme, a paamda yõodo, la ned sã n tʋmd ne yãgbo, naong n na n yõk-a.” (Yel-bũnã 21:5) Naoor wʋsgo, ninã yɩta tao-tao n kɩt tɩ b gʋl a yĩngã, la a yĩngã sẽn gʋlã tõe n waa ne zu-loees sẽn kaoosde. Tõe n kɩtame tɩ lebg toog ne-a t’a paam zo-sõma la tʋʋm-sõngo. Sẽn paase, yĩngã gʋlb ligd tõe n yɩɩ toogo, t’a yẽesg me zabdẽ. Bãngdbã sẽn vaees n yã bũmb ninsã, n paas sẽn yẽesd-b yĩngã gʋlbã sẽn paamd ligd wʋsgã wilgdame tɩ neb nins sẽn kɩtd tɩ b gʋnd b yĩnsã wʋsg wat n maanda b bãngẽ.