Ayo. Tẽngã kõn tol n sãam ye. A pa na n kok bugum, b pa na n tek-a me ye. Biiblã wilgdame tɩ Wẽnnaam naanã tẽngã n dat tɩ ninsaalbã zĩnd be wakat sẽn kõn sa.

• “Nin-tɩrsã na n sooga tẽngã, la b na n paa beenẽ wakat sẽn kõn sa.”​—Yɩɩn-sõamyã 37:29.

• “[Wẽnnaam] vigla tẽngã t’a yas kãenkãe, tẽngã yasame n ka tol n miimdẽ ye.”​—Yɩɩn-sõamyã 104:5.

• “Dũniyã paada woto wakat fãa.”​—Koɛɛg soaba 1:4.

• “Bãmb n yaa dũniyã naanda, bãmb n naan-a n kɩt t’a yasẽ, la b ka naan-a t’a yaa zaalem ye. B naan-a lame tɩ neb tõe n zĩnd a pʋgẽ.”​—Ezayi 45:18.

Ninsaalbã rẽgemda pemsmã, n maand zab-teed sẽn tar pãnga, la b maand bũmb a taab sẽn sãamd tẽngã. La Wẽnnaam pa na n bas tɩ b sãam tẽngã fasɩ ye. A na n “sãama neb nins sẽn sãamd tẽngã.” (Vẽnegre 11:18) Wãn to la Wẽnnaam na n maan dẽ?

Wẽnnaam na n kɩtame tɩ goosneem bɩ Rĩung sẽn be saasẽ wa reeg ninsaalbã goosneema zĩiga, bala b pa tõog n kogl tẽngã ye. (Dãniyɛll 2:44; Matiye 6:9, 10) Yaa Wẽnnaam biig a Zeezi Kirist n na n yɩ Rĩun-kãng Rĩma. (Ezayi 9:6, 7) A Zeezi sẽn wa n be tẽngã zugã, a maana yel-soalem sẽn wilgd t’a tara tõog koomã, sobgã la tẽngã bũmb a taab zugu. (Mark 4:35-41) A sẽn yaa Wẽnnaam Rĩungã Rĩmã yĩnga, a na n kɩtame tɩ bõn-kãens fãa ra le nams ãdem-biisã ye. A na n manesa bũmb fãa, tɩ le yɩ wa sẽn da yaa to-to Edɛn zẽedã zĩigẽ wã. (Matiye 19:28; Luk 23:43)

Ayo. Biiblã pa yet rẽ ye. Neb kẽer tagsda woto, bala b pa wʋmd 2 Pɩyɛɛr 3:7 goamã võor ye. Be b yetame: “Saasã ne tẽng ning sẽn be masã wã bĩnga bugum yĩnga.” Bũmb a yiib n sõngd tɩ d wʋm wɛrse wã goam võore:

1. Biiblã pʋgẽ, “saasã” “tẽngã” la “bugmã” pa makd bõn-yend ye. Wala makre, Sɩngr 11:1 yetame: “Dũniyã gill fãa rag n gomda gom-bu-yende.” Ka wã, “dũniyã” makda ninsaalbã fãa.

2. Goam nins a Pɩyɛɛr sẽn deng n togsã sõngdame tɩ d bãng saasã ne tẽngã la bugmã sẽn makd bũmb ninga. Vɛrse a 5 ne a 6 lebg n tẽega tõnd a Nowe wakatẽ sã-kãsengã. Wẽnnaam sãama wakat kãng dũniyã bɩ “tẽngã,” la tẽn-gãongã meng ra keta a zĩigẽ. Dẽnd yaa nin-wẽnsã la koomã sãam-yã. (Sɩngre 6:11) Wakat kãng “saasã” me sãamame, bala neb nins sẽn da rɩt naam tẽngã zugã me sãamame. Dẽnd yaa nin-wẽnsã la Wẽnnaam sãam-yã, pa tẽn-gãongã ye. A Nowe ne a zakã rãmb põsa sãoongã. Sa-kãsengã loogr poore, b le tõog n vɩɩmda tẽngã zugu.​—Sɩngre 8:15-18.

Dẽnd wa sẽn yɩ to-to ne sa-kãsengã, 2 Pɩyɛɛr 3:7 sẽn gomd sãoong bɩ bugum yellã yaa sẽn na n wilg tɩ Wẽnnaam na n sãama dũni-kãngã nin-wẽnsã, pa tẽn-gãongã la a na n sãam ye. Wẽnnaam pʋlmame tɩ “sa-paals la tẽn-paalg” n wate, la tɩ ‘tɩrlem na n zĩnda b pʋsẽ.’ (2 Pɩyɛɛr 3:13) “Tẽn-paalgã” yaa wẽn-sakdb sẽn na n zĩnd tẽngã zugu, tɩ Wẽnnaam Rĩungã sẽn yaa ‘sa-paalsã’ rɩ naam b zutu. Wẽnnaam Rĩungã sã n wa rɩt naam, tẽngã gill na n lebga arzãna, tɩ nebã vɩɩmd ne laafɩ.​—Vẽnegre 21:1-4.