N-ye. Biiblã yaa seb-kʋdr sẽn kõt yam. A leokda sogsg nins nebã sẽn wae n sokd b mens vɩɩmã wɛɛngẽ wã. A leb n tõe n sõng-d lame tɩ d paam vɩɩm sẽn tar bark la sũ-noogo. Ad sogsg kẽer a sẽn leokde:

1.   Naand n be bɩ? Biiblã yetame tɩ Wẽnnaam “n naan bũmb fãa.” (Vẽnegre 4:11) Wẽnnaam sẽn yaa tõnd Naandã, a mii sẽn yaa tɩlɛ ne-d sẽn na yɩl tɩ d paam sũ-noogo, la vɩɩm sẽn tar barka.

2.   Mam yell paka Wẽnnaam bɩ? Biiblã pa yet tɩ Wẽnnaam zãra ne ninsaalbã ye. A pʋd n yeelame: “Wẽnnaam ka zãr ne tõnd ned ba a yembr ye.” (Tʋʋma 17:27) Bũmb nins sẽn paamd yãmbã pak-a lame. A ratame me n sõng yãmb tɩ y vɩɩmã yɩ sõma.—Ezayi 48:17, 18; 1 Pɩyɛɛr 5:7.

3.   Wãn to la Wẽnnaam bãngr tõe n sõng tɩ m vɩɩmã yɩ noogo? Wẽnnaam naana tõnd tɩ d ‘miẽ tɩ d segd n baoa Wẽnnaam,’ rat n yeel tɩ d rogdame n dat n bãng vɩɩmã võore. (Matye 5:3, Traduction du monde nouveau) Woto leb n kɩtame tɩ d rat n bãng d Naandã la d paam a zoodo. Y sã n modgd sẽn na yɩl n bãng Wẽnnaam, a sũur noomame. Bala Biiblã yeelame: “Kolg-y Wẽnnaam, la bãmb na pẽneg yãmba.”—Zak 4:8.

 Neb milyõ-rãmb yãame tɩ b sẽn bao Wẽnnaam zoodã kɩtame tɩ b vɩɩmã tar barka. Leb n sõng-b lame tɩ b bãng b sẽn tõe n paam sũ-noog to-to. Yaa sɩd tɩ y sã n bãng Wẽnnaam, pa na n kɩt tɩ y pa le tar zu-loɛɛg baa a yembr ye. La yam ning a sẽn kõ tɩ be Biiblã pʋgẽ wã tõe n sõng-y lame tɩ . . .

•   y paam sũ-noog y zakã pʋgẽ.

•   zems-n-taar zĩnd yãmb ne y taabã sʋka.

•   y tõog n mao ne zu-loees wala yam-ka-meng bãaga, ligd zu-loeese, la bãag sẽn tõt saabo.

 Tũudum wʋsg neb karemda Biiblã, la sɩd-sɩda b pa tũud a sẽn yetã ye. La tũudum hakɩɩkã neb sẽn tũud Biiblã sẽn yetã na n sõnga yãmb tɩ y bãng Wẽnnaam.