Biiblã pʋgẽ b wae n boonda a Zeezi tɩ “Wẽnnaam Biigã.” (Zã 1:49) B sẽn yeel tɩ “Wẽnnaam Biigã” wilgdame tɩ b sak n deegame tɩ yaa Wẽnnaam n naan bõn-vɩɩsã fãa, baa a Zeezi. (Yɩɩn-sõamyã 36:9; Vẽnegre 4:11) La Biiblã pa yet tɩ Wẽnnaam doga biig wa ninsaallbã sẽn dogd kamb to-to wã ye.

 Biiblã boonda malɛgsã me tɩ “Wẽnnaam kom-dibli.” (Zoob 1:6) Sẽn paase, Biiblã yetame tɩ d yaab a Ãdem ra yaa “Wẽnnaam biiga.” (Luk 3:38) La sẽn mik t’a Zeezi yaa Wẽnnaam pipi bõn-naandga, tɩ le yaa yẽ a ye la Wẽnnaam naan a toorã yĩnga, Biiblã yetame t’a yaa Wẽnnaam Biig sẽn ka to.

•  A Zeezi reng n zĩnda saasẽ n yaool n na n dog tẽngã zug bɩ?

•  Bõe la a Zeezi ra maand nand t’a wa tẽngã zugu?

 N-ye. Nand t’a Zeezi rog tẽngã zug n yɩ ninsaala, a ra yaa malɛk n be saasẽ. A Zeezi meng yeelame tɩ yẽ ‘yii saasẽ n sigi.’—Zã 6:38; 8:23.

 Wẽnnaam reng n naana a Zeezi n yaool n na n naan bũmb a taabã. Biiblã goma a Zeezi yelle, n yeel yaa:

•   “Biigã yaa . . . b sẽn deng n naan a soab bõn-naandsã fãa sʋkã.”—Kolos rãmbã 1:15.

•   A yaa “Wẽnnaam pipi bõn-naandga.”—Vẽnegre 3:14.

 Bãngr-gomd ning sẽn da yeel tɩ ned n na n wa t’a “sɩngrã yaa hal pĩnd wẽndẽ, hal daar zãrã” pidsa a Zeezi zugu.—Mise 5:2; Matiye 2:4-6.

 A ra tara naam sẽn yaa kãseng saasẽ. A Zeezi goma naam-kãng yelle, a sẽn wa n pʋʋs Wẽnnaam n yeel yaa: “M Ba, bɩ f waoog maam . . . ne ziir ning mam sẽn da tar fo nengẽ, dũniyã sẽn wa n nan pa beẽ wã.”—Zã 17:5.

 A sõnga a Ba wã n naan bũmb a taabã fãa. A Zeezi ra “yaa tʋʋm-mita,” n naag Wẽnnaam n tʋme. (Yel-bũnã 8:30) Biiblã goma a Zeezi yelle, n yeele: “Tũu ne yẽ maasem tɩ b naan bũmb a taabã fãa sẽn be saasẽ la sẽn be tẽngã zugu.”—Kolos rãmbã 1:16.

 Wẽnnaam tũnuga ne a Zeezi n naan bũmb a taabã fãa. Malɛgs a taabã, tẽngã, wĩntoogã, kiuugã la ãdsã naaga bũmb a taabã b sẽn naanã sʋka. (Vẽnegre 5:11) D tõe n dɩka Wẽnnaam ne a Zeezi sẽn naag taab n tʋm to-to wã n mak ne ned sẽn maand rot pãlã-rãmb ne masõ sẽn tʋmd ne taab to-to wã. Sẽn maand-a palã-rãmbã maanda roogã pãlã, tɩ masõ wã ges n me roogã.

 A ra yaa Gomdã. Biiblã sẽn wa n gomd a Zeezi vɩɩmã sẽn da yaa to-to nand t’a lebg ninsaalã, b bool-a lame tɩ “Gomdã.” (Zã 1:1) Yaa vẽeneg tɩ woto rat n yeelame tɩ Wẽnnaam ra tũnugda ne a Biigã n taasd malɛgs a taabã koees la noya.

 Wõnda a Zeezi ra taasda ninsaalbã sẽn be tẽngã zugã me Wẽnnaam koeese. Wẽnnaam sẽn wa n kõt a Ãdem ne a Awa noy Edɛn zẽedã zĩigẽ wã, tõe tɩ ra yaa a Zeezi sẽn yaa Gomdã la a ra tũnugd ne n gomd ne-ba. (Sɩngre 2:16, 17) Tõe me tɩ yaa a Zeezi la malɛk ning sẽn wilg pĩnd wẽndẽ Israyɛll nebã sor we-raoogẽ wã, soab ning koɛɛg Israyɛll nebã sẽn da segd n sak neerã.—Yikri 23:20-23. a