A Zeezi ra yaa wãn-wãna?
Biiblã sẽn yete
Ned baa a ye pa mi a Zeezi sẽn da yaa to-to wã takɩ ye. Bala Biiblã pa bilgd a yalẽ wã ye. Woto wilgdame tɩ pa tar yõod tɩ d bãng a Zeezi yalẽ wã sẽn da yaa to-to ye. La Biiblã sõngda tõnd tɩ d bãng bũmb kẽer a Zeezi yalẽ wã wɛɛngẽ.
A nengã sẽn da yaa to-to: A Zeezi ra yaa Zʋɩfe. Tõe t’a ra wõnda a ma wã bilfu. (Ebre-rãmbã 7:14) A ra pa toor fasɩ ne neb a taabã ye. Vugri, a soosame n yi Galile n kẽng Zerizalɛm tɩ ned pa bãng-a ye. (Zã 7:10, 11) Wõnda a sã n da be a karen-biisã sʋk me, a ra pa tolg n yaa toor ye. Tẽeg-y tɩ neb kʋʋngã sẽn wa n na n yõk a Zeezi wã, yɩɩ tɩlɛ t’a Zida Iskariot wilg-b a Zeezi.—Matiye 26:47-49.
A zoobdã woglem: Yaa vẽeneg t’a Zeezi ra pa tar zoob-wogd ye. Bala Biiblã yetame tɩ “zoob-wogd yaa paoogr ne raoa.”—1 Korẽnt rãmbã 11:14.
Toɛɛnga: A Zeezi ra tara toɛɛnga. A tũu Zʋɩf-rãmbã tõogã sẽn da wilg tɩ rap nins sẽn yaa kãsembã pa segd n ‘põng b toeemsã kɩremsã.’ (Maan-kʋʋre 19:27; Galat-rãmbã 4:4) Sẽn paase, Biiblã bãngr-gomd a ye sẽn bilgd a Zeezi namsgã pʋgẽ, b goma a Zeezi toɛɛngã yelle.—Ezayi 50:6.
A yĩngã: Kaset buud toor-toor n wilgd t’a Zeezi ra tara keelem sõma. A koɛɛgã mooneg sasa, a kẽna kilo-rãmb wʋsgo. (Matiye 9:35) A yɩlga Zʋɩf-rãmbã wẽnd-doogã naoor a yiibu. A leeba ligd-tekdbã taabl-dãmbã n lubi, la a rig rũmsã ne kalwaas n yiisi. (Luk 19:45, 46; Zã 2:14, 15) Sebr a yembr (McClintock and Strong’s Cyclopedia) pʋgẽ, b yeelame yaa: Evãnzill-dãmbã fãa pʋgẽ, b wilgdame t’a [Zeezi] ra tara keelem sõma.”—Volume IV, seb-neng 884.
A nen-wamdã sẽn da wilgd bũmb ningã: A Zeezi ra nonga nebã la a zoet b nimbãanega. Sãmbg kae t’a nen-wamdã ra wilgda rẽ. (Matiye 11:28, 29) Neb buud toor-toor n da wat a nengẽ, sẽn na yɩl n paam belsg la sõngre. (Luk 5:12, 13; 7:37, 38) Baa kambã meng sã n da be ne a Zeezi, b yam ra gãee bãane.—Matiye 19:13-15; Mark 9:35-37.
Tags-kɛg neb kẽer sẽn tar a Zeezi yalẽ wã sẽn da yaa to-to wã zugu
Tags-kɛgre: Neb kẽer yetame t’a Zeezi yaab-rãmbã tog n da yita Afirik soolmẽ wã, bala Vẽnegr sebrã pʋgẽ, b maka a zoobdã ne pe-kõbdo, la a nao wã ne zũud b sẽn zug “boaag pʋgẽ t’a pɩnda.”—Vẽnegre 1:14, 15, Wẽnnaam Sebre, 1983.
Sɩdã: Vẽnegr sebrã gomda “bãn” yelle. (Vẽnegre 1:1) B sẽn bilg a Zeezi zoobdã la a nao wã woto wã, yaa sẽn na n wilg zʋg-sõma nins a sẽn tar a vʋʋgrã poorã, pa sẽn na n bilg a yalẽ wã sẽn da yaa to-to a sẽn wa n be tẽngã zugã ye. B sẽn yeel Vẽnegr 1:14 pʋgẽ t’a Zeezi “zugã ne a zoobdã ra yaa peels wa pe-kõbd sẽn yaa peelse, la wa sa-lamdã,” yaa kulɛɛrã zug la makrã tik-yã, pa zoobd ning buud a sẽn da tarã zug ye. Rẽ makda yam ning a sẽn tare, a sẽn vɩɩmd n kaoos wʋsgã yĩnga. (Vẽnegre 3:14) Vɛrse-kãngã pʋgẽ, b pa mak a zoobdã yalẽ wã ne pe-kõbdo, wa b sẽn pa mak-b ne sa-lamdã.
A Zeezi naoã ra yaa wa “zũud halaal sẽn moog wʋng pʋgẽ.” (Vẽnegre 1:15) Sẽn paase, a nengã ra “yaa wa wĩntoogã, a sẽn wat n yãgd ne a pãng fãa wã.” (Vẽnegre 1:16) Sẽn mik tɩ buud kae t’a nebã yĩngã kõbg zems ne bũmb nins b sẽn bilg ka wã, dẽnd b sẽn bilg yɛlã to-to wã yaa makr sẽn wilgd t’a Zeezi sẽn vʋʋgã “bee vẽenem ned sẽn pa tõe n kolg pʋgẽ.”—1 Tɩmote 6:16.
Tags-kɛgre: A Zeezi ra yaa ned sẽn ka pãnga.
Sɩdã: A Zeezi manesmã wilgdame t’a ra yaa rao tɛkẽ. Wala makre, neb kʋʋngã sẽn wa n na n yõk-a wã, a talla raoodo, n wilg tɩ yaa yẽ la b sẽn baoodã. (Zã 18:4-8) A Zeezi tog n da yaa ned sẽn tar pãng me, bala a ra yaa ra-wãada.—Mark 6:3.
La bõe yĩng tɩ yɩ tɩlɛ tɩ b sõng a Zeezi n tʋk a namsg ra-lukã? Bõe yĩng t’a reng neb a taabã b sẽn da ka ra-lugs zut n yɛgl-a wã n ki? (Luk 23:26; Zã 19:31-33) Bilf nand tɩ b kʋ a Zeezi, bũmb toor-toor n maan t’a pãngã boog wʋsgo. A maana yʋng tõr n pa gũs ye. Sẽn yɩɩd fãa, yaa a sẽn da be sũ-sãan-kãseng pʋgẽ wã yĩnga. (Luk 22:42-44) Yʋn-kãnga, Zʋɩf-rãmbã nams-a lame, tɩ Rom nebã me nams-a nams-toaag vẽkembeoogã yibeoogo. (Matiye 26:67, 68; Zã 19:1-3) Sãmbg sẽn kãe, yaa woto fãa n kɩt t’a ki tao-tao wã.
Tags-kɛgre: A Zeezi ra yaa ned sẽn pa mi sũ-noog ye.
Sɩdã: A Zeezi rɩka a Ba a Zeova sẽn be saasẽ wã togs-n-taar kɛpɩ. Biiblã yaool n yetame t’a Zeova yaa “Wẽnnaam sẽn yaa sũ-noog soaba.” (1 Tɩmote 1:11; Zã 14:9) Sɩd me, a Zeezi wilga nebã b sẽn tõe n paam sũ-noog to-to. (Matiye 5:3-9; Luk 11:28) Bõn-kãensã wilgdame tɩ naoor wʋsgo, a Zeezi nen-wamdã ra wilgdame t’a tara sũ-noogo.
Découvrez aussi…
BIIBLÃ ZÃMSG SẼN TAR YÕOD WƲSGO
Bõe n wilgd tɩ Biiblã yaa Wẽnnaam sebre?
Biiblã sã n yaa Wẽnnaam sebre, dẽnd a pa wa sɛb a taabã ye.
KIBAY TÕND ZUGU
Kos-y t’a Zeova Kaset soab wa kaag-yã
Bao-y n bãng-y bũmb Biiblã zug wall a Zeova Kaset rãmbã zug n paase.