Ebre-rãmbã 1:1-14
1 Hal daar zãra, Wẽnnaam tũnuga ne no-rɛɛsdbã n gom ne tõnd yaab-rãmbã naoor wʋsgo, la ne manesem wʋsgo.
2 La tõnd wakatã,* b tũnuga ne b Bi-riblã n gom ne tõndo. Yaa soab ning b sẽn yãk tɩ b na n wa soog bũmb fãa, la b sẽn tũnug ne a soab n maan zãmaan toɛy-toɛyã.*
3 Bãmb yaa Wẽnnaam ziirã wõnego, la b wõnda Wẽnnaam kɛpɩ. Bãmb zãada bũmb fãa ne b goamã sẽn tar pãng wʋsgã maasem. Bãmb sẽn yɩlg tõnd n yiis d yel-wẽnã poore, b tɩ zĩnda Wẽnnaam sẽn yaa kãsengã nug-rɩtg saasẽ.
4 Woto, bãmb yɩɩda malɛgsã, bala b paama yʋʋr sẽn yɩɩd malɛgsã yʋyã hal zĩig sẽn zãre.
5 Wala makre, malɛg-bʋg la Wẽnnaam zoe n yeele: “Fo yaa mam bi-ribla. Rũndã, mam lebga fo ba”? La b le yeele: “Mam na n lebga a ba, la yẽ na n lebga mam bi-ribla”?
6 La Wẽnnaam sẽn wa n kɩt tɩ b Bi-kãsengã le wa tẽngã zugã, b yeelame: “La bɩ Wẽnnaam malɛgsã fãa wõgemd a taoore.”
7 Sẽn paase, b goma malɛgsã yell n yeele: “Bãmb maana b malɛgsã tɩ b yaa sɩɩs sẽn tar pãng wʋsgo, la b maan b tʋm-tʋmdbã tɩ b yaa wa bug-witim.”
8 La b goma Bi-riblã yell n yeele: “Wẽnnaam yaa fo geer wakat fãa, la fo Rĩungã rasaarã yaa tɩrlem dasaare.
9 Fo nonga tɩrlem, la f kisga tʋʋm-wẽnse. Yaa rẽ yĩng la Wẽnnaam sẽn yaa fo Wẽnnaamã sẽn zae foo ne sũ-noog kaam n yɩɩd f tũud-n-taasã.”
10 Wẽnnaam gomdã le yeelame: “M Zu-soaba, hal sɩngrẽ wã yãmb yẽbga tẽngã, la saasã yaa yãmb nus tʋʋma.
11 Bãmb na n sãamame, la yãmb na n kell n paame. Bãmb fãa na n kʋdga wa fuugu.
12 Yãmb na n põda bãmb wa kobre, la b na n toeem-b-la wa fuugu. La yãmb pa na n tol n toeem ye. Yãmb yʋʋmã pa na n tall tɛk a bada.”
13 La malɛg-bʋg la Wẽnnaam zoe n yeele: “Zĩnd mam nug-rɩtgo, n tãag m sẽn na n dɩgl f bɛɛbã wa nao-roagendg fo naoã yĩnga”?
14 Malɛgsã fãa pa sɩɩs sẽn tʋmd Wẽnnaam tʋʋm la? Pa bãmb la Wẽnnaam yeel tɩ b sõng sẽn na n wa paam-b fãagrã la?
Vẽnegr toor-toore
^ Gɛrk, “ra-kãensã saabẽ wã.”
^ Bɩ, “dũni toor-toore.” Ges-y gom-biis võor bilgrã zĩigẽ.
