Vẽnegre 22:1-21
22 A wilga maam vɩɩm koom kʋɩlg sẽn yaa yɩɩlll wa vɛɛre, n yit Wẽnnaam ne Pe-bilã geerẽ wã
2 n zoet n sigd galʋ-tẽngã so-kãsengã tẽn-sʋka. La vɩɩm tɩɩs n be kʋɩlgã kɩrems a yiibã fãa n womd b biisã naoor piig la a yiibu, rat n yeel tɩ b womda b biisã kiuug fãa. La tɩɩsã vãadã ra yaa buud fãa neb bãas tɩɩm.
3 Kãab-wẽng baa a ye pa na n le zĩnd ye. La Wẽnnaam ne Pe-bilã geerã na n zĩnda galʋ-tẽngã pʋgẽ. Wẽnnaam yembsã na n tʋma bãmb tʋʋmã ne b sũy fãa.
4 B na n yãa Wẽnnaam nengã, la b yʋʋrã na n gʋlsa b rĩyẽ wã.
5 Yʋng me pa na n le zĩnd ye. B pa na n dat fɩtl vẽenem wall wĩntoogã vẽenem, bala Wẽnnaam a Zeova* na n kɩtame tɩ vẽenem bui-ba. B na n yɩɩ rĩm-dãmb n dɩ naam wakat fãa.
6 Malɛkã yeela maam yaa: “Gom-kãensã yaa sɩda, n yaa goam b sẽn tõe n tẽ. A Zeova* sẽn yaa Wẽnnaam ning sẽn vẽneg no-rɛɛsdbã tɩ b gomã tʋma b malɛkã t’a wilg b yembsã bũmb nins sẽn segd n zĩnd ka la bilfã.
7 Gese! Mam wata tao-tao. Sũ-noog soab la ned ning sẽn sakd seb-pindem-kãngã bãngr-gomdã sẽn yetã.”
8 Be neere. Maam a Zã n yaa ned ning sẽn da wʋmd la a yãt bõn-kãensa wã. Mam sẽn wʋm la m yã bãmbã poore, mam wõgemda malɛk ning sẽn da wilgd maam bõn-kãensa wã taoor n na n waoog-a.
9 La a yeela maam yaa: “Gũusi! Ra maan woto ye! Mam yaa fo yem-taag bala, la fo saam-biisã sẽn yaa no-rɛɛsdbã ne neb nins sẽn sakd seb-pindem-kãngã goamã yem-taaga. Waoog Wẽnnaam.”
10 A le yeela maam yaa: “Ra sog seb-pindem-kãngã bãngr-gomdã sẽn yetã ye. Bala wakat ning b sẽn yãkã kolgame.
11 Bɩ tʋʋm-wẽns-maand kell n tʋm tʋʋm-wẽnse, la bɩ tʋʋm-dẽgd soab kell n pa a rẽgdẽ wã. Bɩ nin-tɩrg kell n pa tɩrlmã pʋgẽ, la bɩ ned sẽn yaa sõng kell n pa sõmblmã pʋgẽ.
12 “ ‘Gese! Mam wata tao-tao, la keoor ning mam sẽn kõtã bee ne maam, tɩ m na n keo ned kam fãa wa sẽn zems a tʋʋma.
13 Mam yaa Alfa la Omega,* rat n yeel tɩ pipi soabã la yaoolem soabã, sɩngrã la baasgã.
14 Sũ-noog rãmb la neb nins sẽn pegsd b kasaabs sẽn na yɩl tɩ b kõ-b sor tɩ b rɩ vɩɩm tɩɩsã biisi, la b paam n tũ galʋ-tẽngã rignoyẽ wã n kẽ wã.
15 Baasã* ne neb nins sẽn maand zĩn-dãmb yɛlã, yoaadbã,* nin-kʋʋdbã, bõn-naands pʋʋsdbã, n paas ned ning fãa sẽn nong ziri la sẽn yagd ziri wã bee yɩnga.’
16 “ ‘Maam a Zeezi tʋma m malɛkã t’a wa kõ yãmb bõn-kãensã kaset tigimsã yĩnga. Maam n yaa a Davɩɩd yẽgrã la a yagengã, n paas yibeoog ãdg ning sẽn pɩndã.’ ”
17 La vʋʋsem sõngã ne pʋg-paalã yeta wakat fãa yaa: “Wa!” Bɩ ned ning fãa sẽn wʋmd yeele: “Wa!” Bɩ ko-yũud sẽn tar a soab fãa wa. Bɩ ned ning fãa sẽn dat reeg vɩɩm koom zaalem.
18 “Mam yeta ned ning fãa sẽn wʋmd seb-pindem-kãngã bãngr-gomdã sẽn yetã yaa: Ned sã n paas bũmb bõn-kãens pʋsẽ, Wẽnnaam na n kɩtame tɩ tood nins b sẽn bilg seb-pindem-kãngã pʋgẽ wã paam-a.
19 La ned sã n yãk bũmb seb-pindmã bãngr-gomdã sẽn yetã pʋgẽ, Wẽnnaam na n yãka a pʋɩɩrã vɩɩm tɩɩsã la galʋ-tẽn-sõngã pʋsẽ, sẽn yaa bũmb nins b sẽn bilg seb-pindem-kãngã pʋgẽ wã.
20 “Soab ning sẽn kõt bõn-kãensã kasetã yetame: ‘Sɩd-sɩda, mam wata tao-tao.’ ”
“Ãmiina! Zu-soab a Zeezi, wa-y-yã.”
21 Bɩ Zu-soab a Zeezi barkã* zĩnd ne nin-sõamyã wã.
Vẽnegr toor-toore
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Alfa wã yaa Gɛrkã gʋls-biisã pipi soabã, tɩ Omega wã yaa yaoolem soabã.
^ Rat n yeel tɩ neb nins tʋʋm sẽn yaa wẽns Wẽnnaam nifẽ wã.
^ Ges-y gom-biis võor bilgrã zĩigẽ: “Yoobo.”
^ Bɩ, “sõmblem d sẽn pa segd ne.”
