Zak 4:1-17
4 Bõe n wat ne zabã la mo-yõsã yãmb sʋka? Pa yãmb yĩngã tʋlsem toɛy-toɛyã sẽn zabd taab yãmb pʋsẽ* wã n wat ne rẽ sɩda?
2 Yãmb datame, la y pa paamd ye. Yãmb kʋʋdame la y tʋlgd to bũmb n pa basdẽ, la y pa tõe n paam ye. Yãmb zabda taab la y tar mo-yõs wakat fãa. Yãmb pa tare, y sẽn pa kotã yĩnga.
3 Yãmb sã n kos me, y pa paamd ye. Bala yãmb kota ne raab sẽn yaa wẽnga, sẽn na yɩl n tall bũmb ning y sẽn kotã n pids y yĩngã tʋlsem.
4 Yoaadba,* yãmb pa mi tɩ zood ne dũniyã yaa beem ne Wẽnnaam la? Woto wã, ned ning fãa sẽn dat n lebg dũniyã zoa lebgda Wẽnnaam bɛya.
5 Bɩ yãmb tagsdame tɩ yaa zaalem la Gʋls-sõamyã sẽn yeele: “Wakat fãa, yam ning sẽn yãmb tõnd sũyã tʋlgda bũmb wʋsgã” la?
6 La Wẽnnaam barkã* b sẽn kõtã yaa kãseng n yɩɩda. Rẽ n so tɩ Gʋls-sõamyã yeele: “Wẽnnaam kisa waoog-m-menga, la b kõta sik-m-mens rãmbã b barkã.”*
7 Woto yĩnga, sulg-y y mens n sak Wẽnnaam, la y kɩɩs Sʋɩtãanã,* t’a na n zoe n basa yãmba.
8 Bɩ y kolg Wẽnnaam, la bãmb me na kolg yãmba. Yãmb a yel-wẽn-maandba, nudg-y y nusi. La yãmb a neb nins yam sẽn yuusdã, yɩlg-y y sũyã.
9 Yãmb segd n sãama y sũy wʋsgo, la y yãbe. Bɩ y laadã lebg yãbre, tɩ y sũ-noogã lebg sũ-sãanga.
10 Sik-y y mens a Zeova* nifẽ, la b na zẽk yãmba.
11 M saam-biisi, bɩ y ra le gom taab wẽng ye. Ned ning fãa sẽn gomd a saam-biig wẽnga, wall sẽn kaood a saam-biig bʋʋd gomda tõogã wẽng la a kaood tõogã bʋʋdo. La fo sã n kaood tõogã bʋʋdo, fo pa ned sẽn sakd tõogã ye. Fo yaa bʋ-kaooda.
12 Tõod-lugundã la Bʋ-kaoodã yaa b yembr tãa. Yaa soab ning sẽn tõe n fãag la sẽn tõe n sãamã. La foo la ãnda n kaood f to bʋʋdo?
13 Kelg-y-yã, yãmb a neb nins sẽn yete: “Rũndã wall beoogo, tõnd na n toga sor n kẽng galʋ-tẽn-kãngã pʋgẽ, la d na n zĩnda be yʋʋmde, n leeb n paam yõodo.”
14 Yãmb yaool n pa mi y vɩɩmã sẽn na n yɩ a soab beoog ye. Yãmb yaa wulug sẽn pukd wakat bilf yĩnga, la a wẽneg n meneme.
15 La yãmb segd n yeelame yaa: “Sã n taa a Zeova* raabo, d na n vɩɩmdame, n maan woto wall woto.”
16 Yãmb maanda sũ-noog la y wukd y mens wʋsgo. Wuk-m-meng a woto yaa wẽnga.
17 Woto wã, ned sã n mi a sẽn tõe n maan sẽn yaa tɩrg to-to la a yaool n pa maand rẽ, yaa yel-wẽnde.
Vẽnegr toor-toore
^ Gɛrk, “yãmb yĩngã wil pʋsẽ.”
^ Bɩ, “Yãmb a neb nins sẽn pa maand sɩda.”
^ Bɩ, “sõmblem d sẽn pa segd ne.”
^ Bɩ, “sõmblem d sẽn pa segd ne.”
^ Gɛrk, “diabolos” sẽn dat n togs tɩ “munaafɩɩka.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
