Zak 5:1-20
5 Yãmb a arzɛk rãmbã, kelg-y-yã. Bɩ y yãb la y wiis sũ-sãams nins sẽn na n wa yãmb zutã yĩnga.
2 Yãmb arzɛgsã põogame, la mogd rɩɩ yãmb futã.
3 Yãmb sãnemã ne y wanzuri wã kẽe tẽngempiisim, la b tẽngempiismã na n yɩɩ kaset sẽn wilgd yãmb kongrã. B na n dɩɩ yãmb yĩn-nemsã. Bũmb nins yãmb sẽn bao n bĩngã na n yɩɩ wa bugum yaoolem wakatã sasa.
4 Ade! Tʋm-tʋmdb nins sẽn tigs yãmb pʋtã kelemdame, bala yãmb pa yao bãmb b yaoodã ye. La tigsdbã sẽn kelemd n dat sõngrã kelems lʋɩɩ a Zeova* sẽn yaa tãb-biis naabã tʋbrẽ.
5 Yãmb vɩɩmda naar pʋgẽ, la yõ-noogr vɩɩm tẽngã zugu. Yãmb dɩɩme n nob koodgã daar yĩnga.
6 Yãmb ninga nin-tɩrg taale. Yãmb kʋ-a lame. Yaa rẽ yĩng la a* sẽn kɩɩsd yãmbã.
7 Woto wã, m saam-biisi, bɩ y maan sũ-mar n tãag Zu-soabã waoongã. Ka-koaad gũuda tẽngã bõn-koaadlã bi-sõma wã, n maand sũ-mar rẽ yĩng hal n tãag pipi saagã la yaoolem saagã waoongo.
8 Bɩ yãmb me maan sũ-mare. Keng-y y sũyã, bala Zu-soabã waoongã kolgame.
9 M saam-biisi, bɩ y ra yẽgemd* ne taaba, sẽn na yɩl tɩ b ra wa kao y bʋʋd ye. Ade! Bʋ-kaoodã yasa rignoyẽ wã.
10 M saam-biisi, bɩ y rɩk no-rɛɛsdb nins sẽn gom a Zeova* yʋʋr yĩngã togs-n-taare, namsgã sakr la sũ-marã maaneg wɛɛngẽ.
11 Tõnd yetame tɩ neb nins sẽn tõog toogã yaa sũ-noog rãmba.* Yãmb wʋma a Zoob tõog-toogã kibare, la y yãa a Zeova* sẽn kɩt tɩ yɛlã baas to-to wã. Rẽ kɩtame tɩ y bãng t’a Zeova* tara nonglem wʋsgo,* la tɩ b yaa nimbãan-zoɛta.
12 Sẽn yɩɩd fãa, m saam-biisi, ra le wẽen-y ne saasã, wall ne tẽngã, pa rẽ bɩ ne bũmb a to ye. La bɩ yãmb “N-yẽe” yɩ n-yẽe, tɩ y “Ayo” yɩ ayo, sẽn na yɩl tɩ Wẽnnaam ra kao y bʋʋd ye.
13 Ned bee yãmb sʋkã n tar zu-loees tɩ namsd-a bɩ? Bɩ a wɩng ne pʋʋsgo. Ned bee yãmb sʋkã t’a sũur noomẽ bɩ? Bɩ a yɩɩl yɩɩn-sõamyã.
14 Ned bee yãmb sʋkã n ka laafɩ bɩ? Bɩ a bool tigingã kãsem-dãmbã, la bɩ b pʋʋs a yĩnga, la b sõog-a kaam a Zeova* yʋʋr yĩnga.
15 Pʋʋsgã b sẽn pʋʋs ne tẽebã na n kɩtame tɩ bãadã* paam laafɩ, la a Zeova* na n kɩtame t’a yiki. Sẽn paase, a sã n da maana yel-wẽna, a na n paama sugri.
16 Woto yĩnga, bɩ y vẽnegd y yel-wẽnã n togsd taaba, la y pʋʋsd taab yĩnga, sẽn na yɩl n paam laafɩ. Nin-tɩrg se-yõkr tara pãng wʋsgo, n sɩd tõe n sõng neda.
17 A Eli ra yaa ninsaal wa tõndo, la a sẽn pʋʋs ne a sũur fãa n kos tɩ saag ra ni wã, saagã maana yʋʋm a tãab la kiis a yoob n pa tol n ni tẽngã pʋgẽ ye.
18 Rẽ poore, a le pʋʋsame, la saagã yii yĩngr n ni tɩ tẽngã bõn-koaadlã wom biisi.
19 M saam-biisi, b sã n belg yãmb sʋkã ned t’a lak n bas sɩdã, tɩ ned a to sõng-a t’a lebg n wa,
20 bɩ y bãng tɩ ned ning sẽn kɩt tɩ yel-wẽn-maand bas sor ning a sẽn da tudg n dɩkã na n fãag-a-la* ne kũum, la a na n luda yel-wẽn wʋsgo.
Vẽnegr toor-toore
^ Ges-y gom-biis võor bilgrã zĩigẽ.
^ Pa rẽ bɩ, “Wẽnnaam.”
^ Gɛrk, “wẽed siri.”
^ Ges-y gom-biis võor bilgrã zĩigẽ.
^ Bɩ, “bark bee b zutu.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Bɩ, “wʋmd wʋsgo.”
^ Ges-y gom-biis võor bilgrã zĩigẽ.
^ Pa rẽ bɩ, “ned ning sẽn ya wã.”
^ Ges-y gom-biis võor bilgrã zĩigẽ.
^ Bɩ, “fãag a sɩɩgã.”
