Kibayã pipi sebre 10:1-14
-
A Sayull ne a kom-dibli wã kũum (1-14)
10 Filisti nebã ra zabda ne Israyɛll nebã, la bãmb da zoeta Filisti nebã taoore. Filisti nebã kʋʋ Israyɛll neb wʋsg Gilbowa tãngã+ zugu.
2 Filisti nebã ra rɩdgda a Sayull ne a kom-dibli wã. Bãmb paam n kʋʋ a Zonatã, a Abinadaab ne a Malkisuwa+ sẽn yaa a Sayull kom-dibli wã.
3 Zabrã ra lebga toog ne a Sayulli, tɩ tãb-tãoodbã paam-a n tão n pogle.+
4 Woto, a Sayull yeela ned ning sẽn da zãad a zab-teedã yaa: “Wõog f sʋʋgã n kõs maam n kʋ tɩ nin-kãensã sẽn pa kẽ bãongã ra wa paam maam n nams wʋsg+ ye.” La sẽn zãad-a a zab-teedã zãgsame, bala rabeem n da tar-a wʋsgo. Dẽ, a Sayull wõoga a sʋʋgã n tilg n bas a meng n lʋɩ a zugu.+
5 Ned ning sẽn da zãad a Sayull zab-teedã sẽn yã t’a Sayull kiime wã, yẽ me wõoga a sʋʋgã n kõs a meng n ki.
6 Yɩɩ woto la a Sayull ne a kom-dibli a tãabã, la a zakã neb nins fãa sẽn da be ne-a wã naag taab n ki.+
7 Israyɛll neb nins fãa sẽn da be tẽn-nabrẽ wã sẽn bãng tɩ Israyɛll tãb-biisã zoeeme, la t’a Sayull ne a kom-dibli wã kiime wã, bãmb me zoeeme n bas b tẽnsã. Filisti nebã wa n kẽe tẽn-kãens n soog-ba.
8 Vẽkembeoogã, Filisti nebã sẽn kẽng n na n tɩ zɛ sẽn ki-bã teedã, b yãa a Sayull ne a kom-dibli wã sẽn ki n dɩg Gilbowa tãngã+ zugu.
9 Bãmb zɛɛ a Sayull teedã, n fiuug a zugã la b wʋk a zab-teedã. Rẽ poore, b tʋma neb tɩ b saag Filisti soolmã n taas koɛɛgã b bõn-naandsã+ rotẽ la nin-buiidã.
10 Bãmb dɩka a zab-teedã n bĩng b wẽnnaamã roogẽ, la b yagl a zu-wangã a Dagõ roogẽ wã.+
11 Zabɛs+ sẽn be galaad soolmẽ wã nebã fãa sẽn wʋm Filisti nebã sẽn maan a Sayull bũmb nins fãa wã,+
12 b gãndaadã fãa yikame n tɩ rɩk a Sayull ne a kom-dibli wã kũumã. Bãmb tall-b lame n kẽng Zabɛs n tɩ mum b kõabã Zabɛs tɩ-bedrã tẽngre,+ la b loe noor dasem a yopoe.
13 Woto, a Sayull kii a sẽn pa maan sɩd ne a Zeova wã yĩnga, yẽ sẽn pa sak a Zeova goamã,+ la a sẽn kẽng ned sẽn gomd ne kɩɩms nengẽ n tɩ soke,+
14 n pa sok a Zeova wã yĩnga. Wẽnnaam kɩtame tɩ yẽ ki t’a reeg naamã n kõ a Zese* bi-ribl a Davɩɩde.+
Vẽnegr toor-toore
^ Ezayi.