Kibayã pipi sebre 14:1-17
14 Tɩɩr dĩm a Hiram+ tʋma neb a Davɩɩd nengẽ. Sẽn paase, a tool-a-la sɛɛdr tɩɩs raado, la a tʋm kug-pɛɛsdb* ne ra-wãadba, tɩ b na n me roog* n kõ a Davɩɩde.+
2 A Davɩɩd bãngame t’a Zeova kɩtame t’a naamã vigl sõma Israyɛlle,+ bala a zẽka a rĩungã sõma Israyɛll sẽn yaa Wẽnnaam nin-buiidã yĩnga.+
3 A Davɩɩd paama pagb+ a taab Zerizalɛm, la a rog kom-dibli la kom-pugli a taaba.+
4 Ad kamb nins a Davɩɩd sẽn dog Zerizalɛmmã:+ Yaa a Samuwa, a Sobaabe, a Natã,+ a Salomo,+
5 a Yibaare, a Elisuwa, a Ɛlpelɛte,
6 a Noga, a Nefɛɛge, a Zafiya,
7 a Elisama, a Beeliyada la a Elifelɛte.
8 Filisti nebã sẽn wʋm tɩ b yãka* a Davɩɩd t’a lebg Israyɛll rĩmã,+ b fãa yiime n baood a Davɩɩde.+ A Davɩɩd sẽn wʋm dẽ wã, a yiime n na n zab ne-ba.
9 Filisti nebã waame, n da zabd ne neb nins sẽn da be Refayim longã+ pʋgẽ wã.
10 A Davɩɩd soka Wẽnnaam yaa: “Mam segd n tɩ zaba ne Filisti nebã bɩ? Yãmb na n ninga bãmb mam nugẽ bɩ?” T’a Zeova leok-a yaa: “Yik n tɩ zab ne-b tɩ mam na n ning-b-la fo nugẽ.”+
11 Woto, a Davɩɩd kẽnga Baal-perazim,+ la yẽ kʋʋ Filisti nebã beenẽ. Dẽ, yẽ yeelame yaa: “Wẽnnaam sɩd-sɩdã tuka sor mam bɛɛbã sʋk wa koom sẽn lub lalga.” Rẽ n so t’a pʋd zĩigã yʋʋr tɩ Baal-perazim.*
12 Filisti nebã zoeeme n bas b wẽnnaam-dãmbã be, la a Davɩɩd kõo noor tɩ b yõog-b bugum.+
13 Rẽ zugẽ, Filisti nebã le waa Refayim longã pʋgẽ, n zab ne neb nins sẽn da be be wã.+
14 A Davɩɩd le soka Wẽnnaam a sẽn segd n maanega, la Wẽnnaam leok-a lame yaa: “Ra kẽng tɩrg n seg-b ye. Gilg b poorẽ wã n tɩ zab ne-b baka tuudã taoore.+
15 La fo sã n wa wʋm bʋrg sẽn wõnd tãb-biis nao rãamd baka tuudã zugẽ, bɩ f yik tao-tao n zab ne-ba. Bala Wẽnnaam na n lʋɩɩ fo taoor n kʋ Filisti tãb-biisã.”+
16 A Davɩɩd maana wa Wẽnnaam sẽn yeel-a wã.+ Yẽ ne a nebã kʋʋ Filisti tãb-biisã, sẽn sɩng ne Geba n tãag Gezɛɛre.+
17 A Davɩɩd yʋʋrã yiime n saag soolmã fãa pʋgẽ, la a Zeova kɩtame t’a Davɩɩd rabeem yõk buud toɛy-toɛyã neb fãa.+
Vẽnegr toor-toore
^ Bɩ, “lal-metb.”
^ Bɩ, “na-yir.”
^ Ebre, “zaee.” Ges-y gom-biis võor bilgrã zĩigẽ.
^ Rat n yeel tɩ “Naab ning sẽn tukd sorã.”
